Long magasin ya, yumi lanem plante samting finis we oli givhan long yumi blong faenem ansa blong kwestin ya, ?God hem i hu? Fastaem, yumi lanem nem blong God we Baebol i talem, hemia Jehova, mo bigfala fasin blong hem, hemia lav. Yumi tokbaot tu, ol samting we hem i mekem finis mo we bambae hem i mekem yet long fiuja, blong givhan long ol man. I gat plante moa samting blong lanem long saed blong God, be maet yu wantem save olsem wanem samting ya bambae i givhan long yu.

Jehova i promes se, “sipos yu girap, yu lukaot hem, bambae hem i glad blong tekem yu.” (1 Kronikel 28:9) !Tingbaot nambawan presen we bambae yu kasem taem yu lukaot God mo yu save hem moa, hemia se bambae hem i kam ‘fren blong yu’! (Ol Sam 25:14) ?Samting ya bambae i givhan long yu olsem wanem?

Bambae yu glad tumas. Baebol i talem se Jehova hem i “God ya we i hapi.” (1 Timoti 1:11) Sipos yu kam klosap long hem mo folem ol fasin blong hem, bambae yu rili glad, mo hemia bambae i mekem i gud long filing, tingting, mo bodi blong yu. (Ol Sam 33:12) Mo tu, taem yu blokem ol fasin we oli save spolem yu, wokem ol gudfala fasin, mo gat pis wetem ol narafala man, hemia i save givhan long yu blong yu gat wan hapi laef. Bambae yu agri wetem ol tok ya blong Deved se: “Taem we mi mi kam stap klosap long yu, mi harem se i gud tumas long mi.”—Ol Sam 73:28.

Jehova i lukaot gud long yumi wanwan. Jehova i promes long ol man blong hem se: “Bambae mi stap givim gudfala tingting long yu, mo mi stap lukaot gud long yu.” (Ol Sam 32:8) Hemia i min se Jehova i tingbaot nid blong yumi wanwan, mo i kea long yumi olsem yumi nidim. (Ol Sam 139:1, 2) Taem yu fren gud wetem Jehova, yu luksave se hem i stap rere oltaem blong givhan long yu.

Wan nambawan fiuja. Jehova i save givhan long yu blong yu gat wan hapi laef naoia, mo hem i givim janis long yu tu blong yu save gat wan nambawan fiuja. (Aesea 48:17, 18) Baebol i talem se: “Laef ya we i no save finis, hemia se man i gohed blong save yu we yu nomo yu tru God, mo i save Jisas Kraes we yu yu sanem hem i kam.” (Jon 17:3) Long taem ya we laef i had, hop ya we God i givim i save kam olsem wan angka we i “fas strong mo yumi save trastem.”—Hibrus 6:19.

Hemia sam long ol impoten risen blong save God mo blong fren gud wetem hem. Blong kasem moa save, yu save toktok wetem wan Witnes blong Jehova o go long Websaet ya jw.org.