!Fasin Ya Bambae i Lus Blong Olwe!
Nating se yumi lego fasin blong no laekem narafala, be yumi no save kontrolem ol aksen mo fasin blong ol man. Bambae i stil gat ol viktim blong fasin ya. So, ?hu nao bambae i finis fasin ya blong no laekem narafala?
Jehova God i naf blong stopem fulwan fasin ya. Hemia nao samting we Baebol i promes se God bambae i mekem.—Ol Proveb 20:22.
GOD BAMBAE I FINISIM STAMBA BLONG FASIN YA
-
1. DEVEL SETAN. Setan nao i stamba blong fasin ya blong no laekem ol narafala. God bambae i distroem Setan mo olgeta we oli gat ol fasin olsem hem.—Ol Sam 37:38; Rom 16:20.
-
2. RABIS WOL BLONG SETAN. God bambae i finisim olgeta samting we oli promotem fasin blong no laekem narafala, hemia i minim tu ol rabis man blong politik mo ol lida blong skul we oli stap pulum ol man blong no laekem ol narafala. Mo tu, God bambae i finisim ol griri bisnes we oli stap mekem korapsen mo profite long ol man.—2 Pita 3:13.
-
3. SIN WE I STAP LONG MAN. Baebol i eksplenem se olgeta man oli gat sin, taswe i isi blong gat ol nogud tingting, filing, mo mekem samting we i rong. (Rom 5:12) Wan long ol filing ya, hemia blong no laekem ol narafala. God bambae i halpem yumi blong winim olgeta nogud filing olsem, nao fasin ya bambae i finis blong olwe.—Aesea 54:13.
BAEBOL I PROMES SE BAMBAE I NO MOA GAT FASIN BLONG NO LAEKEM NARAFALA
-
1. BAMBAE I GAT JASTIS. Kingdom blong God we i stap long heven bambae i rulum wol mo i mekem se i gat jastis long fulwol. (Daniel 2:44) Fasin blong jajem man mo fasin blong no laekem man we i defren bambae i finis. God bambae i mekem ol man we oli stap harem nogud naoia, oli kasem jastis.—Luk 18:7.
-
2. BAMBAE EVRIWAN I GAT PIS. I nogat wan man bambae i safa from vaelens o wo. (Ol Sam 46:9) Wol ya bambae i fulap long ol man we oli laekem pis, nao ol man bambae oli harem se oli sef.—Ol Sam 72:7.
-
3. BAMBAE EVRIWAN I GAT GUDFALA LAEF. Olgeta man long wol bambae oli rili lavlavem olgeta. (Matiu 22:39) Bambae oli no moa safa, mo tingbaot ol nogud memori blong bifo. (Aesea 65:17) Long taem ya, olgeta man “bambae oli glad tumas from oli gat pis we i bigwan tumas.”—Ol Sam 37:11.
?Yu yu wantem stap long wan wol we i olsem? Tede, plante man oli stap lanem blong sakemaot fasin blong no laekem narafala, taem oli folem ol tijing blong Baebol. (Ol Sam 37:8) Hemia nao samting we ol Witnes blong Jehova raon long wol oli stap mekem. Nating se oli blong ol defdefren kalja mo bakgraon, be oli joen tugeta mo lavlavem olgeta.—Aesea 2:2-4.
Ol Witnes blong Jehova bambae oli glad blong soem olsem wanem blong dil wetem fasin ya blong no laekem narafala. Samting we yu lanem i save halpem yu, blong sloslo yu lego filing blong no laekem narafala mo stat blong lavem olgeta. Mo tu, yu save lanem blong kaen long narafala, nating se oli no laekem yu. From samting ya, bambae yu haremgud mo yu frengud moa wetem ol narafala. Samting we i impoten moa se bambae yu lanem blong laef aninit long Kingdom blong God, taem Hem i finisim fulwan fasin blong no laekem narafala.—Ol Sam 37:29.
Maet Yu Laekem Hemia Tu
WAJTAOA
?Kingdom Blong God Bambae i Mekem Wanem?
Jisas i save se i gat wan gavman nomo we i save stretem ol trabol long wol, hemia Kingdom blong God. ?Kingdom i mekem wanem finis?
ANSA WE BAEBOL I GIVIM
?Weples Mi Save Faenem Hop?
Advaes we yumi save trastem i mekem laef blong yumi i gud moa naoia, mo i givim wan gudfala hop blong fiuja.
SAM MOA TOPIK
?Yu Ting Se i Save Gat Jastis Long Wol?
Baebol i soemaot se trufala jastis i kam long God ya we i stap mekem i sem long olgeta man.
WEKAP!
Meresin Blong Aotem Vaeras Ya
?Wanem fo samting we Kingdom blong God bae i mekem blong aotem fasin blong no laekem narafala?
