Nating se Baebol i no wan buk blong meresin, be hem i givim ol gudfala advaes we i save givhan long man we tingting blong hem i trabol. Hemia sam eksampol.

“Ol man we oli no sik, oli no nidim dokta, be olgeta we oli sik, yes, oli nidim.”—MATIU 9:12.

Baebol i talem se samtaem yumi nidim blong go luk wan dokta. Plante man oli haremgud moa, afta we oli kasem ol infomesen long dokta long saed blong sik blong olgeta.

“Eksasaes i gud long bodi.”—1 TIMOTI 4:8, Contemporary English Version.

Taem yu mekem ol samting we i save givhan long helt blong yu, hemia i givhan tu long tingting blong yu. Hemia ol samting olsem, eksasaes oltaem, kakae ol helti kakae, mo spelgud.

“Hat we i glad, i wan gudfala meresin, be tingting we i foldaon, i mekem se man i no moa gat paoa.”—OL PROVEB 17:22.

Taem yu ridim ol vas blong Baebol we oli leftemap tingting, mo yu putum ol mak we yu naf blong kasem, hemia i save mekem yu glad. Sipos yu fokas long ol positif samting long laef mo yu bilif se ol  samting bambae oli kamgud long fiuja, hemia tu bambae i givhan long yu blong dil wetem ol samting we i mekem tingting blong yu i trabol.

“Waes i stap wetem man we i gat tingting daon.”—OL PROVEB 11:2.

Maet yu luksave se yu no naf blong mekem evri samting yu wan. Long taem olsem, i gud yu akseptem help blong ol narafala. Ol fren mo famle oli wantem givhan long yu, be maet oli no save wanem blong mekem. Taswe i gud yu letem olgeta oli save wanem we yu nidim. Be yu no ekspektem tumas samting long olgeta, mo yu mas glad long help we oli givim.

“Mi mi harem se wan samting i rong long mi, so mi go luk wan dokta mo hem i faenemaot wanem i rong long mi. Hemia i givhan long mi blong kasemsave problem blong mi, mo ol tritmen we mi save tekem blong givhan long mi.”—Nicole, a we i gat sik ya bipolar disoder.

“Mi makem se taem mi mo waef blong mi i ridim Baebol oltaem, hemia i givhan long mitufala blong gat positif tingting. Mo samtaem, taem tingting blong mi i foldaon, bambae i gat wan vas we i tajem hat blong mi.”—Pita, we i gat sik ya dipresen.

“I had blong mi tokbaot sik blong mi long ol narafala from mi sem tumas. Be wan fren i lesingud long mi mo i traehad blong kasemsave filing blong mi. Hem i givhan long mi blong haremgud bakegen mo harem se mi no stap mi wan.”—Ji-yoo, we i gat problem long saed blong kakae.

“Baebol i givhan long mi blong gat stret tingting oltaem, blong mi no wok bitim mak mo blong mi spelgud. Ol waes blong hem i givhan long mi blong dil wetem ol negatif filing we mi gat.”—Timoti, we i gat sik ya obsessive-compulsive disorder.