Sipos yu wantem go long wan ples we yu neva go long hem bifo, ?bambae yu mekem wanem?

1. 1. ?Bambae yu folem rod we yu ting se i stret?

2. 2. ?Bambae yu folem tingting blong ol narafala we yu no sua sipos oli save rod ya?

3. 3. ?Bambae yu folem wan map o advaes blong wan man we i save gud rod ya?

Sipos yu jusum namba wan o namba tu, maet bambae yu no kasem ples we yu wantem go long hem. Be sipos yu jusum namba tri, i sua se bambae yu kasem ples ya.

Yumi evriwan i stap wokbaot long wan rod, mo ples we yumi wantem kasem, hemia wan gudfala laef. Be blong gat wan gudfala laef, yumi mas save weples blong faenem ol gudfala advaes blong lidim yumi.

Sam long ol desisen we yumi mekem oli no impoten tumas. Be sam narafala desisen oli save gat bigfala paoa long laef blong yumi. Ol desisen ya oli soemaot wanem samting we yumi ting se i stret mo wanem samting we yumi ting se i no stret, mo oli save mekem i gud o i nogud long yumi mo ol famle blong yumi. Hemia ol desisen we yumi mekem long ol samting olsem:

• Seks mo mared

• Fasin blong tok tru, wok, mo mane

• Fasin blong tijim ol pikinini

• Fasin we yumi mekem long ol narafala

?Wanem i save givhan long yu blong mekem ol gudfala desisen we bambae i mekem yu mo famle blong yu i glad?

Kwestin we yumi evriwan i mas tingbaot se: ?Weples mi save faenem gudfala advaes blong mekem ol waes desisen?

Magasin ya bambae i eksplenem from wanem yu save trastem ol advaes blong Baebol, mo olsem wanem ol advaes ya oli save givhan long yu.