“Yufala i mas gohed blong lukaot gud, from we yufala i no save dei mo aoa blong hem.”—MATIU 25:13.

“Yufala i mas lukaot, yufala i mas stap wekap, from we yufala i no save wetaem stret ol samting ya bambae oli kamtru.”—MAK 13:33.

Taswe i no gat wan man long wol ya we i save stret taem we en blong sistem blong wol ya bambae i kam. Be God i makemaot finis stret taem mo stret “dei mo aoa” blong en i kam. (Matiu 24:36) ?Hemia i min se i no gat rod nating blong save se en i klosap? Si. Jisas i talem sam saen long ol disaepol blong soem se en i klosap.

Ol samting ya bambae oli ol saen blong “lashaf blong sistem blong wol ya.” Jisas i talem se: “Ol nesen oli faet agensem ol narafala nesen, mo ol kingdom oli faet agensem ol narafala kingdom. Mo olbaot long wol bambae kakae i sot mo graon i seksek.” (Matiu 24:3, 7) Hem i talem tu se bambae i gat “ol strong sik,” we i save kasem plante man kwiktaem. (Luk 21:11) ?Yu luk se ol samting ya we Jisas i talem oli kamtru?

Tede ol man oli safa from ol faet, hanggri, etkwek, mo ol defdefren kaen sik. Eksampol long 2004, i gat wan bigfala etkwek long Indian Osen we i mekem se i gat wan tsunami i kamaot nao i kilim i ded 225,000 man. Long tri yia nomo, COVID-19 pandemik i kilim i ded samwe 6.9 milian man long fulwol. Jisas i talem se ol samting olsem bambae oli soemaot se en blong sistem blong wol ya i klosap.

Baebol i tokbaot taem ya we i klosap long en se, “ol las dei.” (2 Pita 3:3, 4) Seken Timoti 3:1-5 i talem se long las dei ol man bambae oli no laekem ol gudfala fasin. (Luk bokis ya “ Jes Bifo En Blong Wol.”) ?Yu yu luk se ol man tede oli tingbaot olgeta nomo, oli griri, oli wael olgeta, mo oli no lavem narafala? Ol fasin ya tu oli soemaot se en blong wol i klosap.

?Ol las dei ya bambae oli stap longtaem? Folem Baebol, bambae oli stap “smol taem nomo.” Biaen, God bambae i “spolem ol man ya we oli stap spolem wol.”—Revelesen 11:15-18, 12:12.

God i makemaot wan stret dei mo aoa finis blong i finisim rabis sistem blong wol ya. (Matiu 24:36) Nating se i olsem, i gat sam gud nius. God “i no wantem se wan man i ded.” (2 Pita 3:9) Hem i givim janis long yumi blong save wil blong hem mo obei long hem. ?From wanem? From we hem i wantem se yumi laef tru long en blong wol ya, mo yumi go insaed long niufala wol we bambae hem i mekem i kam paradaes.

God i oganaesem wan program blong tijim ol man long olgeta ples long wol, blong oli save samting we oli mas mekem blong oli save stap long niufala wol, aninit long Kingdom blong hem. Jisas i talem se gud nius ya blong Kingdom, ol man bambae oli talemaot “long olgeta ples long wol.” (Matiu 24:14) Ol Witnes blong Jehova raon long wol, oli spenem plante bilian aoa blong prij mo tijim ol man long tok blong Baebol we i givim hop. Jisas i talem se wok blong prij i mas kasem olgeta ples long wol bifo en i kam.

Klosap nao rul blong ol man bambae i finis. Be gud nius se, yu save stap sef tru long en blong wol mo laef long wol ya we God i promes blong mekem i kam paradaes. Nekis atikol bambae i tokbaot samting we yu save mekem blong laef long niufala wol.