Atikol bifo i soemaot se i no longtaem God bambae i finisim ol man nogud mo olgeta problem blong yumi. Yumi sua se samting ya bambae i hapen. ?From wanem? From we promes ya i kamaot long Tok blong God se:

‘Wol ya i stap lus.’​—1 JON 2:17.

Yumi save se bambae i gat sam man oli laef tru long taem ya from we vas ya i talem tu se:

“Man we i mekem wil blong God, hem i no save lus samtaem.”

Taswe, blong yumi stap laef, yumi mas mekem wil blong God. Be blong save wil blong God, fastaem yumi mas save gud hem.

Jisas i talem se: “Mo laef ya we i no save finis, hemia se man i save yu we yu nomo yu tru God.” (Jon 17:3) Blong stap sef tru long en mo laef olwe, yumi nidim blong save God. Be i no naf nomo blong save se God i stap o save sam samting long saed blong hem, yumi mas mekem sam moa samting. Yumi mas frengud wetem hem. Blong frengud wetem wan man, yumi nidim blong spenem taem wetem hem. Mo hemia i sem mak wetem God. Traem luk sam impoten trutok long Baebol we i save halpem yumi blong wokem mo holemtaet wan gudfala frensip wetem God.

Yumi nidim blong kakae evridei blong yumi save stap laef. Be Jisas i talem se: “Man i mas laef, i no long bred nomo, be long evri tok we i kamaot long maot blong Jehova.”—Matiu 4:4.

Tede yumi faenem ol tok blong Jehova long Baebol. Sipos yu stadi long tabu buk ya, bambae yu lanem ol samting we God i mekem bifo, tede, mo we bambae i mekem long fiuja.

?Yu save mekem wanem sipos yu wantem obei long God, be i had blong lego ol nogud samting we yu stap mekem? Samting we i save givhan hemia se yu mas savegud God.

Traem tingbaot wan woman we bambae yumi singaot hem se Sakura, we hem i gat fasin ya blong slip olbaot. Taem hem i stat blong stadi Baebol, hem i lanem komanmen ya blong God se yumi “mas ronwe long enikaen doti fasin blong seks.” (1 Korin 6:18) Sakura i prea blong God i givim paoa long hem, mo hem i naf blong lego nogud fasin ya. Be hem i mas gohed blong faet agensem fasin ya. Hem i talem se: “Taem ol nogud tingting ya oli kambak long mi, mi talemaot evri samting long Jehova tru long prea, from mi save se mi no naf blong faet agensem ol nogud fasin ya mi wan. Prea i mekem mi kam klosap moa long Jehova.” Olsem Sakura, plante milian man oli stat blong save God. Hem i givim paoa we oli nidim blong oli save mekem sam jenis long laef blong olgeta, mo blong oli mekem ol fasin we hem i laekem.—Filipae 4:13.

Moa we yu savegud God, moa we “God i save” yu olsem wan gudfala fren blong hem. (Galesia 4:9; Ol Sam 25:14) Nao bambae yu naf blong stap sef mo go insaed long niufala wol. ?Be niufala wol i olsem wanem? Nekis atikol bambae i eksplenem moa.