God i talem long Adam se: “Sipos yu kakae frut blong hem, be long sem dei nomo, bambae yu ded.” (Jenesis 2:17) Sipos God i wokem Adam blong i kam olfala mo i ded, ol tok ya i blong nating nomo. Adam i kasem save se sipos hem i no kakae frut blong tri ya, bambae hem i laef olwe.

I no nid blong Adam mo Iv i kakae frut blong tri ya, i gat plante narafala tri long garen. (Jenesis 2:9) Sipos tufala i no kakae frut ya, bambae tufala i soemaot se tufala i glad blong obei long God we i givim laef long tufala, mo tufala i luksave se God i gat raet blong talem samting we tufala i mas mekem.

Blong faenem ansa blong kwestin ya, yumi mas tingbaot wan storian we i jenisim laef blong yumi evriwan. Setan i yusum wan snek blong giaman long Adam mo Iv. Baebol i talem se: ‘Snek i waes tumas long fasin blong wokem trik. Wan dei, snek i askem long woman ya se, “?I tru we God i blokem ol tri long ples ya se i tabu, yutufala i no save kakae?”’—Jenesis 3:1.

Iv i ansa se: ‘Mitufala i save kakae frut blong olgeta tri, wan nomo we God i blokem se i tabu, mitufala i no save kakae. Sipos mitufala i brekem tabu ya, bambae mitufala i ded.’ Nao snek i talem long hem se: ‘Yutufala i no save ded. Hem i save se sipos yutufala i kakae frut ya, bambae ae blong yutufala i open, nao bambae yutufala i kam olsem hem, we i save ol fasin we i nogud mo ol fasin we i gud.’ Setan i stap talem se Jehova i giaman, mo i stap blokem tufala blong tufala i no kasem wan gudfala samting.—Jenesis 3:2-5.

Iv i bilivim tok blong Setan. !Hem i luk se tri ya i naes tumas, mo i wantem kakae frut blong hem! Ale, hem i pusum han, i tekem frut ya, mo i kakae. Afta, hem “i givim long man blong hem, mo man blong hem tu i kakae.”—Jenesis 3:6.

!Ating Jehova God i harem nogud tumas taem hem i luk se tufala pikinini blong hem i no obei! ?Hem i mekem wanem? Hem i talem long Adam se: ‘Bodi blong yu bambae i gobak bakegen long graon ya. Mi mi wokem yu long graon fastaem, mo bambae yu yu kam graon bakegen.’ (Jenesis 3:17-19) Taswe, Adam i ded taem “hem i gat naen handred toti yia.” (Jenesis 5:5) Hem i no go long heven o long wan narafala ples olsem. Bifo we Jehova i wokem hem long graon, hem i no laef samples. Taswe taem hem i ded, hem i no stap laef samples, be hem i gobak long graon nomo. !Sore tumas!

Taem Adam mo Iv i no obei long God, tufala i no moa stret gud, mo tufala i no moa gat janis blong laef olwe. Tufala i kam sinman, mo bodi blong tufala i no moa naes. Be sin blong tufala i no spolem tufala nomo. Tufala i pasem sin i go tu long ol pikinini blong tufala. Rom 5:12 i talem se: “Wan man [Adam] nomo i mekem se sin i kam long wol, mo ded i kamaot from sin. Mo ded i kasem olgeta man from we olgeta evriwan oli mekem sin.”

Baebol i talem se sin mo ded i mekem ‘yumi evriwan i harem nogud, yumi stap krae.’ (Aesea 25:7) Sin mo ded i kasem olgeta man olsem wan posen smok we i kavremap olgeta, mo oli no save ronwe long hem. Tru ya, “olgeta man we oli joen long Adam oli ded.” (1 Korin 15:22) Be yumi wantem save ansa blong kwestin we aposol Pol i stanemap se: ‘?Hu bambae i sevem mi long bodi ya we bambae i ded?’ ?I gat wan man we i naf blong mekem olsem?—Rom 7:24.