Taem yumi ridim stori blong ol samting we God i wokem, yumi luk se God i talem long Adam se: “Olgeta tri long ples ya, yu yu save kakae frut blong olgeta. Wan tri nomo i stap we i tabu blong yu kakae frut blong hem. Hemia tri ya we frut blong hem i save mekem yu yu save ol fasin we i gud, mo ol fasin we i nogud. Tri ya, sipos yu kakae frut blong hem, be long sem dei nomo, bambae yu ded.” (Jenesis 2:16, 17) Tok ya i soemaot klia se sipos Adam i obei long God, hem i no save ded, be bambae i laef olwe long garen blong Iden.

Sore tumas, Adam i no jusum blong obei mo laef olwe. Hem i kakae frut blong tri ya we God i putum tabu long hem, we Iv i givim long hem. (Jenesis 3:1-6) Trabol we i kamaot from samting we hem i mekem, i stap kasem yumi yet. Aposol Pol i tokbaot samting ya se: “Wan man nomo i mekem se sin i kam long wol, mo ded i kamaot from sin. Mo ded i kasem olgeta man from we olgeta evriwan oli mekem sin.” (Rom 5:12) “Wan man” ya, hemia Adam. ?Be wanem ya sin, mo from wanem hem i mekem man i ded?

Taem Adam i brekem loa blong God, hem i mekem sin. (1 Jon 3:4) Mo panis blong sin, hemia ded, olsem we God i talem long Adam. Sipos Adam mo ol pikinini blong hem, oli gohed blong obei long God, bambae oli no gat sin mo oli no save ded. God i wokem man blong i laef olwe, be i no blong ded.

 I tru nomo se ded “i kasem olgeta man,” olsem we Baebol i talem. ?Be i tru se sol, no wan samting long bodi blong yumi, i gohed blong laef afta we yumi ded? Plante bambae oli ansa se yes. Sipos i olsem, yumi stap talem se God i giaman long Adam. ?From wanem? From we sipos wan samting long bodi blong yumi i gohed blong laef afta long ded, mo i go long ples blong ol spirit, hemia i min se ded i no panis blong sin olsem we God i talem. Be Baebol i talem se: “God i neva save giaman.” (Hibrus 6:18) Blong talem stret, Setan nao i giaman taem hem i talem long Iv se: “Yutufala i no save ded.”—Jenesis 3:4.

Hemia i mekem wan narafala kwestin i kamaot se, sipos tijing ya se sol i no save ded, i stanap long wan giaman tok, ?ale, wanem samting i rili hapen taem man i ded?

Jenesis i tokbaot taem ya we God i wokem man, i se: “Jehova God i tekem sam graon, i wokem man long hem, mo hem i blu long nus blong man ya, i putum win blong laef long hem. Nao long fasin ya, man ya i kam wan man we i laef.” Tok ya “man we i laef” i kamaot long Hibru wod ya ne’phesh, we i min se “wan laef samting we i pulum win.”—Jenesis 2:7, NW.

Taswe Baebol i soemaot klia se God i no wokem man wetem wan sol we i no save ded. Be man nao i “wan laef samting we i pulum win.” Taswe, sipos yu lukaotem long Baebol, bambae yu neva faenem wan vas we i yusum tok ya “sol we i no save ded.”

Baebol i no talem se ol man oli gat wan sol we i no save ded. ?Be from wanem plante jos oli stap tijim se sol i no save ded? Ansa blong kwestin ya bambae i pulum yumi i gobak long Ijip bifo.

Herodotus, wan man Gris we i stap raetem ol stori mo i laef long ol yia 400 bifo Kraes, i talem se ol man Ijip nao oli “faswan blong talem se sol i no save ded.” Ol man Babilon tu oli stap tijim se sol i no save ded. Bifo we Bigfala Aleksanda i winim ol kantri long Medel Is long yia 332 bifo Kraes, ol man we oli stadi long waes blong ol man Gris oli tijim ol man long tijing ya, mo i no longtaem afta, tijing ya i kavremap olgeta ples we Gris i rul long hem.

Long taem blong ol fas Kristin, tu bigfala grup blong ol man Jiu, hemia ol Esin mo ol Farisi, oli stap tijim se taem man i ded, sol blong hem i gohed blong laef. Wan buk (The Jewish Encyclopedia) i se: “Ol man Jiu oli bilif se sol i no save ded, from we oli folem tingting blong ol man Gris, antap moa tijing blong Plato.” Long sem fasin, Josephus, wan man Jiu long taem blong ol fas Kristin, i talem se tijing ya i no kamaot long Baebol, be i kamaot long “bilif blong ol man Gris,” we i stanap long ol kastom stori blong olgeta.

Taem tijing blong ol man Gris i stap go long plante moa kantri, ol skul we oli talem se oli Kristin, oli folem tijing ya tu. Wan man blong raetem histri, Jona Lendering, i talem se: “Plato i tijim se fastaem sol blong yumi i stap long wan gudfala ples, be naoia i stap long wan wol we i nogud. Samting ya i mekem se i isi blong joenem tijing blong Plato wetem tijing blong Kristin skul.” Long rod ya, tijing ya blong ol hiten man we i talem se sol i no save ded, i kam wan stamba tijing blong ol jos we oli talem se oli Kristin.

Long taem blong ol fas Kristin, aposol Pol i givim woning ya se: “Tok ya we i kamaot long spirit blong God i talemaot klia se long fiuja bambae samfala oli lego bilif, from we oli lesin long sam giaman tok we i kamaot long ol spirit, mo long ol tijing blong ol rabis spirit.” (1 Timoti 4:1) !Ol tok ya oli tru tumas! I gat plante “tijing blong ol  rabis spirit,” mo sol we i no save ded i wan long olgeta. Baebol i no sapotem tijing ya, mo stamba blong tijing ya i kamaot long skul mo kastom blong ol hiten man bifo.

Yumi glad tumas from we Jisas i talem se: “Bambae yufala i save trutok, mo trutok bambae i mekem yufala i kam fri.” (Jon 8:32) Taem yumi kasem stret save long trutok blong Baebol, yumi fri long ol giaman tijing we oli daonem God, mo long ol kastom blong ol giaman skul. Mo tu, trutok blong Baebol i mekem yumi fri long ol kastom blong dedman, mo yumi no moa fraet long ol dedman.—Yu luk bokis ya “ ?Ol Dedman Oli Stap Wea?”

God we i wokem yumi i no wantem se yumi laef blong 70 o 80 yia nomo long wol, nao biaen yumi go laef olwe long wan narafala ples. Stamba tingting blong hem se ol man bambae oli kam ol pikinini blong hem we oli obei long hem, mo oli laef olwe long wol ya. Tingting blong hem i soemaot se hem i lavem tumas ol man, mo i no gat wan samting bambae i blokem hem. (Malakae 3:6) Man blong raetem Sam, i talem se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”—Ol Sam 37:29.