Yu traem tingbaot taem ya we yu yu pikinini. Maet i gat wan taem we yu foldaon mo yu katem han blong yu, no yu skrasem ni blong yu. ?Yu yu tingbaot olsem wanem mama blong yu i mekem yu yu harem gud bakegen? Maet hem i klinim soa ya, mo i putum plasta long hem. Yu krae, be hem i toktok gud long yu mo i putum han blong hem i goraon long yu, nao yu harem gud. Taem yu yu smol, oltaem i gat man blong mekem yu yu harem gud bakegen.

Be taem yu gruap, laef i fasfas. Ol problem oli kam bigwan moa, mo i had blong faenem rod blong harem gud. Sore tumas, ol samting we mama i mekem long yu taem yu smol, i no moa save winim ol problem. Traem tingbaot sam eksampol.

• ?Yu yu harem nogud from we yu lusum wok blong yu? Julian i talem se taem hem i lusum wok blong hem, hem i sek nogud mo tingting blong hem i fasfas. Hem i stap tingting se: ‘?Bambae mi lukaot long famle blong mi olsem wanem? Mi wok had blong kampani ya blong plante yia, be ?from wanem oli no moa wantem mi?’

• Maet yu harem nogud from we mared blong yu i brok. Raquel i talem se: “I mekem 18 manis nao we man blong mi i lego mi. Long taem ya, mi sek mo mi harem nogud tumas. I olsem se hat blong mi i brok long tu haf. Mi no harem nogud long filing blong mi nomo, be long bodi blong mi tu. Samting ya i mekem mi mi fraet.”

• Maet yu gat wan bigfala sik we i no save kam gud. Ating samtaem yu harem olsem Job, we i krae long Jehova se: “Naoia mi taed finis long laef ya, mi rere blong lego rop.” (Job 7:16) Maet yu gat sem filing olsem Luis we i gat 80 yia, we i se: “Samtaem mi harem se mi stap wet blong ded nomo.”

• Maet yu harem nogud from wan famle we i ded. Robert i talem se: “Taem boe blong mi i ded long wan aksiden long plen, mi no save bilivim. Mi harem nogud tumas. Soa we mi filim i sem mak long filing we Baebol i tokbaot, taem naef blong faet i stikim yu.”​—Luk 2:35.

Robert, Luis, Raquel, mo Julian oli harem gud bakegen, nating se oli kasem ol bigfala trabol ya. Oli faenem stret Man we i save givhan long olgeta blong oli harem gud bakegen, hemia God ya we i gat Olgeta paoa. ?Hem i givhan long ol man olsem wanem? ?Bambae hem i givhan long yu tu?