STADI 49
‘I Gat Taem’ Blong Wok Mo Spel
“Yufala i kam, yumi go long wan ples we i no gat man long hem, blong yufala i save spel smol.”—MAK 6:31.
SINGSING 143 Yumi Mas Wet, Wekap Gud, Mo Wok Strong
BIGFALA TINGTING *
1. ?Wanem tingting blong ol man long saed blong wok?
?WANEM tingting blong ol man long ples blong yu long saed blong wok? Long plante kantri, ol man oli stap wok had moa i bitim bifo. Ol man we oli bisi tumas, oli no moa gat taem blong spel, stap wetem ol famle, o blong ridim mo stadi Baebol. (Pri. 2:23) Wan narafala problem se, sam man oli no laekem nating blong wok mo oli mekem plante eskius blong no wok.—Prov. 26:13, 14.
2-3. ?Wanem eksampol we Jehova mo Jisas i soemaot long saed blong wok?
2 Plante man long wol oli nogat stret tingting long saed blong wok. Taswe i gud blong save tingting we Jehova mo Jisas i gat. Yumi save se Jehova i laekem blong wok. Jisas i talem klia se: “Papa blong mi i stap wok yet kam kasem naoia, mo mi tu mi stap wok.” (Jon 5:17) Traem tingbaot ol samting we God i wokem olsem ol enjel, ol samting long skae, mo ol naesfala samting long wol ya. Man blong raetem Sam i se: “Hae God. Yu yu mekem plante naranarafala samting, mo olgeta evriwan oli stap soemaot we fasin blong yu blong wokem olgeta i waes we i waes. Wol ya i fulap long olgeta samting we yu yu mekem.”—Sam. 104:24.
3 Jisas i folem fasin blong Papa blong hem. Hem i givhan long God blong “putum skae i stap long ples blong hem.” Hem i stap wetem Jehova “olsem nambawan man blong wok blong hem.” (Prov. 8:27-31, NW) Mo biaen, taem Jisas i stap long wol, hem i mekem ol nambawan wok. Hem i talem se ol wok ya oli olsem kakae blong hem, mo ol wok we hem i mekem long wol ya ol pruvum se God nao i sanem hem i kam.—Jon 4:34; 5:36; 14:10.
4. ?Yumi lanem wanem long eksampol blong Jehova mo Jisas long saed blong spel?
4 From we Jehova mo Jisas i wok had, ?hemia i minim se yumi no save spel? Nogat. Jehova i no save taed, taswe hem i no nidim blong spel. Be Baebol i talem se afta we Jehova i wokem heven mo wol, ‘hem i no moa wok, hem i spel.’ (Eks. 31:17) Hemia i min se Jehova i spel long wok blong hem mo i tekem taem blong harem gud long ol samting we hem i wokem. Mo nating se Jisas i wok strong taem hem i stap long wol, hem tu i tekem taem blong spel mo harem gud blong kakae wetem ol fren blong hem.—Mat. 14:13; Luk 7:34.
5. ?Sam man blong God oli faenem i had long wanem samting?
5 Baebol i leftemap tingting blong ol man blong God blong oli harem gud blong wok. Ol man blong hem oli mas wok had, oli no mas les. (Prov. 15:19) Maet yu mas wok blong lukaot long ol nid blong famle blong yu. Be olsem wan disaepol blong Kraes, yu gat wok tu blong talemaot gud nius. Nating se i olsem, yu nidim blong spel smol. ?Samtaem yu faenem i had blong skelem taem blong wok, prij, mo spel? ?Olsem wanem blong save hamas taem we yumi nidim blong wok mo spel?
STRET TINGTING LONG WOK MO SPEL
6. ?Olsem wanem Mak 6:30-34 i soemaot se Jisas i gat stret tingting long wok mo spel?
6 I impoten blong gat stret tingting long saed blong wok. King Solomon i raetem se: “I gat wan taem blong evri samting.” Hem i tokbaot taem blong planem kakae, bildim samting, krae, laf, danis, mo ol narafala samting. (Pri. 3:1-8, NW) I gat tu impoten samting long laef, hemia wok mo spel. Jisas i skelemgud taem we hem i gat blong wok mo spel. Wan dei, ol aposol oli bisi long wok blong prij mo “oli no gat taem nating blong spel mo blong kakae.” Nao Jisas i talem long olgeta se: “Yufala i kam, yumi go long wan ples we i no gat man long hem, blong yufala i save spel smol.” (Ridim Mak 6:30-34.) Jisas i save se ol disaepol blong hem oli nidim blong spel, nating se plante taem oli no spelgud.
7. ?Loa blong Sabat i save givhan long yumi olsem wanem?
7 Samtaem yumi nidim blong spel o jenisim program blong yumi. Yumi save tingbaot samting we God i mekem long ol man blong hem bifo, hemia long saed blong Sabat dei. Nating se yumi no moa stap aninit long Loa blong Moses, be ol samting we loa i talem long saed blong Sabat, i save givhan long yumi blong gat stret tingting long saed blong wok mo spel.
SABAT I WAN TAEM BLONG SPEL MO WOSIP
8. Folem Eksodas 31:12-15, ?Sabat i dei blong wanem?
8 Baebol i talem se afta we God i wokem olgeta samting long wol, hem i spel long namba “sikis dei.” (Jen. 2:2) Be nating se i olsem, Jehova i laekem blong wok mo i “stap wok yet.” (Jon 5:17) Loa ya blong Sabat dei i folem dei blong spel blong Jehova we Jenesis i tokbaot. God i talem se Sabat dei i wan saen bitwin hem mo ol man Isrel. Hem i wan “dei blong spel, we i tabu, i blong [Jehova].” (Ridim Eksodas 31:12-15.) Loa ya i talem se i tabu blong ol pikinini, ol slef, mo ol animol oli wok long dei ya. (Eks. 20:10) Hemia i givhan long ol man blong oli tingbaot moa blong wosipim Jehova.
9. ?Wanem rong tingting blong Sabat dei we ol man oli gat long taem blong Jisas?
9 Sabat dei i givhan long ol man blong God. Be long taem blong Jisas, plante lida blong skul oli ademap sam moa rul long saed blong Sabat. Oli talem se long Sabat dei, i no stret blong pulumaot sam sid blong wit, o blong mekem sikman i kamgud bakegen. (Mak 2:23-27; 3:2-5) Be hemia i no samting we God i wantem, mo Jisas i eksplenem gud samting ya long ol man we oli stap lesin long hem.
Famle blong Jisas i yusum Sabat dei blong mekem ol samting long saed blong spirit (Haf 10) *
10. Folem Matiu 12:9-12, ?yumi lanem wanem long tingting blong Jisas long saed blong Sabat dei?
10 Jisas mo ol man ples blong hem oli stap folem Sabat dei from we oli stap aninit long Loa blong Moses. * Be ol samting we Jisas i talem mo i mekem, oli soemaot se i no rong blong mekem i gud long ol man long Sabat dei. Hem i talem klia se: “I stret nomo long Loa, blong yumi mekem wan gudfala samting long Sabat dei.” (Ridim Matiu 12:9-12.) Hem i no luk se fasin ya blong mekem i gud long ol man, i brekem loa blong Sabat. Ol samting we Jisas i mekem, oli soemaot se hem i kasem save impoten risen from wanem God i talem long ol man blong hem blong spel long Sabat dei. Taem ol man blong God oli spel long wok blong olgeta, hemia i mekem se oli save wosipim God. Jisas i gruap long wan famle we i sua se long Sabat dei oli stap wosipim God. Yumi save samting ya folem stori blong Jisas taem hem i stap long ples blong hem long Nasaret. Baebol i talem se: “Oltaem long Sabat dei, [Jisas] i go insaed long sinagog, mo i stanap blong i rid.”—Luk 4:15-19.
?WANEM TINGTING BLONG YU LONG SAED BLONG WOK?
11. ?Hu i soem gudfala eksampol long Jisas long saed blong wok?
11 Josef i tijim Jisas olsem wanem blong mekem wok blong kapenta, mo gat tingting blong God long saed blong wok. (Mat. 13:55, 56) Jisas i luksave olsem wanem Josef i wok had evridei blong lukaot long olgeta. From samting ya, Jisas i talem long ol disaepol blong hem se: “I stret nomo we wan wokman i kasem pei blong hem.” (Luk 10:7) Yes, Jisas i save se i minim wanem blong wok had.
12. ?Wanem sam vas blong Baebol we oli tokbaot fasin ya blong wok had?
12 Aposol Pol tu i kasemsave se i minim wanem blong wok had. Be wok we i moa impoten long hem, hemia blong talemaot mesej mo nem blong Jisas long ol narafala. Nating se i olsem, hem i wok had tu blong kasem mane blong sapotem hem wan. Ol Kristin long Tesalonaeka oli luksave we hem i stap “wok had long dei mo long naet,” blong i no kam “wan baden” long olgeta. (2 Tes. 3:8; Ol Wok 20:34, 35) Maet Pol i stap tokbaot wok ya blong somap haos tapolen. Taem hem i stap long Korin wetem Akwila mo Prisila, “hem i mekem wok olsem tufala, oli stap somap haos tapolen.” Mo taem Pol i talem se hem i wok had “long dei mo long naet,” hem i no stap minim se hem i wok we i no spel. Defren olgeta, hem i no mekem wok blong somap haos tapolen long Sabat dei. Hem i yusum taem ya blong prij long ol man Jiu, we olgeta tu oli no wok long Sabat dei.—Ol Wok 13:14-16, 42-44; 16:13; 18:1-4.
13. ?Yumi lanem wanem long eksampol blong Pol?
13 Aposol Pol i soem wan gudfala eksampol long yumi. Hem i wok had blong kasem mane, be hem i meksua tu se oltaem hem i “mekem tabu wok ya blong talemaot gud nius blong God.” (Rom 15:16; 2 Kor. 11:23) Mo tu, hem i leftemap tingting blong ol narafala blong oli mas prij oltaem. Taswe Akwila mo Prisila tu i “joen wetem [Pol] long wok blong Kraes Jisas.” (Rom 12:11; 16:3) Pol i talem long ol Kristin long Korin se oli mas “gat plante wok blong mekem long wok blong Masta.” (1 Kor. 15:58; 2 Kor. 9:8) Mo Jehova i pulum aposol Pol blong raetem se: “Sipos wan man i no wantem wok, hem i no mas kakae.”—2 Tes. 3:10.
14. ?Jisas i stap minim wanem taem hem i talem ol tok ya long Jon 14:12?
14 Tede wok we i moa impoten, hemia blong prij mo pulum ol man oli kam disaepol. !Mo Jisas i talem se ol disaepol blong hem bambae oli mekem moa wok i bitim hem! (Ridim Jon 14:12.) Hemia i no min se bambae yumi mekem ol merikel olsem we hem i mekem. Defren olgeta, ol man blong hem bambae oli prij mo oli tij long plante moa ples, mo blong plante moa yia i bitim hem.
15. ?Wanem ol kwestin we yumi mas askem yumi wan, mo from wanem?
15 Sipos yu stap mekem wan wok blong kasem mane, i gud yu askem yu wan se: ‘?Ol fren long wok oli luk mi olsem wan man blong wok had? ?Mi mi stap finisim wok blong mi long stret taem mo mi mekem bes blong mi?’ Sipos yu ansa yes long ol kwestin ya, bambae bos blong yu i trastem yu. Mo tu, hemia bambae i mekem se ol man long ples blong wok blong yu, oli glad blong lesin long gud nius. Long saed blong wok blong prij mo tij, i gud yu askem yu wan se: ‘?Ol brata sista oli luk mi olsem wan man we i wok had long wok blong prij? ?Mi mi rere gud from wok blong prij? ?Mi mi kwik blong visitim ol man we oli intres? ?Mi mi joen oltaem long ol defdefren haf blong wok blong prij?’ Sipos yu ansa yes long ol kwestin ya, yu save kasem glad long wok ya we yu stap mekem.
?WANEM TINGTING BLONG YU LONG SAED BLONG SPEL?
16. ?Olsem wanem tingting blong Jisas mo ol disaepol long saed blong spel, i defren long tingting blong plante man tede?
16 Jisas i kasemsave se hem mo ol disaepol blong hem oli nidim blong spel smol. Nating se i olsem, plante man long taem bifo mo tede oli gat sem tingting olsem rij man long pijatok blong Jisas. Man ya i stap talem long hem wan se: “Naoia yu save spel, yu kakae, yu dring, mo yu gat hapi taem.” (Luk 12:19; 2 Tim. 3:4) Hem i ting se ol samting we oli moa impoten long laef, hemia blong spel mo haremgud. Be hemia i defren olgeta long tingting we Jisas mo ol disaepol blong hem oli gat. Olgeta oli no luk ol samting blong haremgud long laef se oli moa impoten.
Taem yumi gat stret tingting long wok mo spel, hemia bambae i givhan long yumi blong mekem ol gudfala wok we oli mekem yumi glad (Haf 17) *
17. ?Yumi save mekem wanem taem yumi spel?
17 Tede, yumi traehad blong folem eksampol blong Jisas. Taem yumi spel long wok blong kasem mane, yumi no jes haremgud blong spel, be yumi go prij mo go long ol Kristin miting. From we yumi tinghevi long wok blong prij mo blong go long ol Kristin miting. (Hib. 10:24, 25) Nating se yumi travel i go long wan nara ples blong spel, be yumi gohed blong go long ol miting mo tekem janis blong prij long eni man we yumi mitim.—2 Tim. 4:2.
18. ?King blong yumi, Kraes Jisas, i wantem se yumi mekem wanem?
18 !Yumi glad tumas we King blong yumi, Kraes Jisas, i no fosem yumi blong mekem samting we yumi no naf blong mekem, mo i halpem yumi blong gat stret tingting long saed blong wok mo spel! (Hib. 4:15) Hem i wantem se yumi spel, taem yumi nidim. Mo tu, hem i wantem se yumi wok had blong kasem ol samting we yumi nidim long saed blong bodi, mo blong joen long gudfala wok ya blong pulum ol man oli kam disaepol. Long nekis stadi, bambae yumi tokbaot samting we Jisas i mekem blong sevem yumi long sin.
SINGSING 38 Hem Bambae i Mekem Yu Yu Strong
^ par. 5 Baebol i givhan long yumi blong gat stret tingting long saed blong wok mo spel. Long stadi ya bambae yumi tokbaot olsem wanem Sabat dei we ol man Isrel oli stap folem evri wik, i givhan long yumi blong gat stret tingting long saed blong wok mo spel.
^ par. 10 Ol disaepol blong Jisas oli gat bigfala respek long loa blong Sabat, taswe oli wet kasem we Sabat dei i finis, blong oli save rerem mo putum senta long bodi blong Jisas.—Luk 23:55, 56.
