Ol tok blong Dutronome 22:25-27 oli no blong pruvum se man ya i rong, from we long ol vas ya, man ya i mekem i no stret finis. Loa ya i blong soemaot se woman ya i no mekem wan nogud samting. Makem ol vas bifo long Dutronome 22:25-27.

Dutronome 22:23, 24 (NW) i tokbaot wan man we i mekem seks wetem wan gel “long wan taon.” Man we i mekem fasin ya, hem i mekem adaltri, from we oli blokem gel ya finis se i blong narafala man, mo oli luk hem olsem se i mared finis. ?Be olsem wanem long gel ya? “Hem i no singaot.” Sipos hem i bin singaot, bambae ol narafala man oli harem hem nao oli givhan long hem. Be hem i no singaot. Taswe, hem tu i mekem adaltri, mo tufala tugeta i mekem samting we i no stret.

Biaen, Loa i tokbaot wan narafala situesen, i se: “Be sipos wan man i holem wan gel olsem, mo i fosem hem blong i slip wetem hem long wan ples we i no gat man klosap, nao yufala i faenemaot, bambae yufala i mas kilim man nomo i ded, yufala i mas livim gel i stap. Bambae yufala i no mas mekem wan samting long gel ya, from we hem i no mekem wan samting nogud we i stret blong hem i ded from. Bisnes ya i fol blong man nomo, i olsem bisnes ya we man i girap hem wan, i go kilim narafala man i ded. Man ya i holem gel ya long ples we i no gat man klosap, mo sipos gel ya i singaot, be bambae i no gat man i save harem hem, blong givhan long hem.”—Dut. 22:25-27.

Long taem olsem, ol jaj bambae oli bilivim gel ya. ?From wanem? From we gel ya i “singaot, be . . . i no gat man i save harem hem, blong givhan long hem.” Taswe, hem i no mekem adaltri. Be man we i repem hem, hem nao i mekem adaltri from we i “fosem hem blong i slip wetem hem,” we gel ya oli blokem hem finis se i blong narafala man.

Nating se loa ya i blong soemaot se gel ya i no mekem wan nogud samting, vas ya i tokbaot klia se man ya i rep mo hem i mekem adaltri. Yumi sua se ol jaj bambae oli “faenemaot fastaem se i tru no nogat,” mo oli mekem desisen folem Loa we God i putumap mo i stap talemaot plante taem.—Dut. 13:14; 17:4; Eks. 20:14.