?Yu yu save ansa blong ol kwestin ya we oli kamaot long Wajtaoa blong 2019?

?Wanem mining blong promes ya blong God se: “Eni tul blong faet we bambae ol man oli stanemap agensem yu bambae oli no save win”? (Aes. 54:17, NW)

Yumi trastem se God bambae i protektem yumi long ‘ol enemi we oli no gat sore.’ (Aes. 25:4, 5) Bambae oli no save mekem wan samting blong spolem yumi blong olwe.—w19.01, pej 5-6.

?Olsem wanem fasin blong God blong dil wetem ol man Kenan mo ol stronghed man Isrel, i soemaot stret fasin blong hem?

God i jajem olgeta we oli mekem enikaen doti fasin blong seks o olgeta we oli stap spolem ol woman mo ol pikinini. Hem i blesem ol man we oli obei long hem mo oli mekem i stret long ol narafala.—w19.02, pej 22-23.

?Bambae yumi mekem wanem sipos wan man we i no gat bilif i prea?

Yumi stap kwaet mo yumi soem respek, be yumi no save talem “amen” o holem han blong ol narafala. Yumi save mekem prea blong yumi wan.—w19.03, pej 31.

?Olsem wanem rabis fasin wetem pikinini i nogud tumas?

Rabis fasin wetem pikinini i wan sin agensem pikinini, kongregesen, gavman, mo God. Long kantri we i gat loa blong ripotem man we i mekem nogud long pikinini, ol elda oli mas folem.—w19.05, pej 9-10.

?Olsem wanem blong jenisim paoa we i pusum tingting blong yu?

Hemia sam samting we i save givhan: Prea. Tingting dip wetem mak ya blong jekem yu wan. Jusum ol gudfala fren.—w19.06, pej 11.

?Yumi save mekem wanem naoia blong rere from fasin agens?

Yumi mas frengud moa wetem Jehova. Trastem se hem i lavem yumi mo bambae i neva lego yumi. Ridim Baebol evridei, mo prea oltaem. Trastem se ol blesing blong Kingdom bambae oli kamtru. Lanem baehat ol vas we yu laekem mo ol singsing blong presem Jehova.—w19.07, pej 2-4.

?Yumi save mekem wanem blong halpem ol famle blong yumi blong oli sef?

I impoten blong kasem save filing blong olgeta, letem fasin blong yu i pulum olgeta, soemaot longfala tingting mo yu kaen be yu stanap strong tu.—w19.08, pej 15-17.

?Olsem wanem yumi save kasembak paoa olsem we Jisas i promes long Matiu 11:28?

Yumi gat ol Kristin elda we oli lukaot long yumi, ol gudfala fren, mo wan gudfala wok.—w19.09, pej 23.

?Olsem wanem God i save givim paoa mo i mekem yumi wantem wok? (Fil. 2:13)

Taem yumi ridim Baebol mo tingting dip long hem, God i save givim paoa mo i mekem yumi wantem mekem wil blong hem. Tabu spirit blong hem i save mekem wok blong yumi i kam gud moa.—w19.10, pej 21.

?Yumi mas mekem wanem bifo we yumi mekem wan bigfala desisen?

Hemia faef samting: Mekem risej. Prea blong askem waes fasin. Tingbaot risen from wanem yu mekem desisen ya. Makemaot klia samting we yu wantem mekem. Save samting we yu naf blong mekem.—w19.11, pej 27-29.

?Tijing ya se sol i no save ded, i kamaot long tok we Setan i talem long Iv?

Nogat. Setan i talem se Iv bambae i no save ded, be i no se bambae spirit blong hem i gohed blong laef samples. Olgeta giaman tijing blong ol skul oli lus taem bigfala wota i ron long taem blong Noa. Taswe bilif ya se sol i no save ded i kam antap bifo we God i mekem ol man we oli bildim taoa blong Babel oli go wanwan olbaot long wol.—w19.12, pej 15.