Kwestin
?Olsem wanem atikol ya “Plis Yu Mekem We Nem Blong Yu i Tabu” long Wajtaoa blong Jun 2020, i mekem bilif blong yumi i kam klia long saed blong nem blong Jehova mo hae rul blong hem?
Long atikol ya, yumi bin lanem se i gat wan samting we i impoten long ol man mo ol enjel, hemia blong mekem nem blong Jehova i tabu. Fasin blong Jehova blong rul i joen wetem fasin ya blong mekem nem blong Hem i tabu. Mo taem man i holemstrong long Jehova, hemia tu i joen blong mekem nem blong hem i Tabu.
?From wanem yumi talem se samting we i impoten moa hemia blong save nem blong Jehova mo mekem i tabu? Bambae yumi tokbaot tri risen.
Stat long taem we Setan i agensem God long garen blong Iden, hem i giaman blong spolem nem blong God
Faswan, Setan i agensem nem blong Jehova, o gudnem blong Hem long garen blong Iden. Kwestin we Setan i askem long Iv i givim tingting ya se, Jehova i stap holembak sam gudfala samting long tufala mo putum ol rul we oli strong tumas. Taem Setan i agensem ol tok blong Jehova, i olsem we hem i talem se God i wan man blong giaman. Taswe, from we hem i spolem gudnem blong Jehova, hem i kam “Devel,” we i minim “man blong spolem nem blong narafala.” (Jon 8:44) Taem Iv i bilivim ol giaman tok ya mo i no obei, hem i soemaot se i no wantem stap aninit long rul blong Jehova. (Jen. 3:1-6) Kam kasem tede, Setan i gohed blong spolem nem blong God, mo talem ol giaman toktok long saed blong Hem. Olgeta we oli bilivim ol tok ya, sloslo oli no moa obei long Jehova. Be long tingting blong ol man blong God, fasin ya blong spolem tabu nem blong Jehova, i wan samting we i moa nogud. Hemia nao risen from wanem ol man oli stap safa.
Seken risen, hemia blong mekem i gud long olgeta kriesen. Jehova bambae i leftemap nem blong hem, mo i tekemaot doti we ol man oli sakem long nem ya. Hemia i impoten tumas long Jehova, taswe Hem i talem se: “Bambae mi mi mas mekem hae nem blong mi i kam tabu.” (Esik. 36:23) Jisas i talemaot samting we i moa impoten blong ol man blong Jehova oli prea from, taem hem i se: “Plis yu mekem we nem blong yu i tabu.” (Mat. 6:9) Baebol i talem bakegen mo bakegen se i impoten tumas blong ona long nem blong Jehova. Tingbaot ol vas ya: “Yufala i givim glori long Jehova from nem blong hem.” (1 Kron. 16:29; Sam 96:8) “Yufala i singim ol sing blong presem gudfala nem blong hem.” (Sam 66:2) “Bambae mi leftemap nem blong yu olwe.” (Sam 86:12) Wan long ol taem ya we voes blong Jehova i kamaot long heven, hemia long tempol long Jerusalem, taem Jisas i talem se: “Papa, yu leftemap nem blong yu.” Jehova i ansa se: “Mi mi leftemap finis, mo bambae mi leftemap bakegen.”—Jon 12:28. a
Namba tri risen, stamba tingting blong Jehova i joen wetem nem blong hem o gudnem blong hem. Traem tingbaot: ?Olsem wanem nem blong Jehova bambae i impoten moa afta long laswan traem long en blong Wan Taosen Yia Rul Blong Kraes? ?Ol enjel mo ol man bambae oli gat wanem tingting long nem blong Jehova long taem ya? Blong ansarem kwestin ya, tingbaot tufala samting we i joen wetem nem ya, hemia fasin blong man blong holemstrong long Jehova mo hae rul blong Hem. ?Olsem wanem? ?Ol man long taem ya bambae oli faenem i had blong gohed blong holemstrong long God? Nogat. Hemia from we oli stretgud olgeta mo oli bin stanap strong long ol traem we oli fesem. Mo bambae oli kasem laef we i no save finis. Long taem ya, bambae i no nid blong pruvum se rul blong Jehova i beswan, from we olgeta long heven mo long wol bambae oli joengud mo oli glad blong stap aninit long rul blong Jehova. Be, ?olsem wanem long nem blong Jehova?
Long taem ya, nem blong Jehova bambae i kam tabu bakegen, mo bambae i no gat wan samting i mekem i kam doti. Mo olgeta laef samting long heven mo long wol, bambae oli gohed blong tinghae long nem ya. Hemia from we bambae oli luk ol samting blong sapraes we Jehova i mekem. Traem tingbaot, from we Jisas i gat tingting daon mo i givimbak paoa ya blong rul long Jehova, Jehova “bambae i hed long olgeta samting.” (1 Kor. 15:28) Afta long hemia, olgeta man long wol bambae oli haremgud long “nambawan laef ya we oli fri olsem ol pikinini blong God.” (Rom 8:21) Mo Jehova bambae i mekem stamba tingting blong hem i kamtru fulwan, hemia blong mekem ol pikinini blong hem long heven mo long wol oli joengud olsem wan famle.—Efes. 1:10.
Afta long ol samting ya, ?wanem filing blong ol famle blong Jehova long heven mo long wol? I klia se bambae oli wantem tumas blong presem nambawan nem blong Jehova. Tabu spirit i pulum Deved blong raetem Sam ya we i se: “I gud ol man oli presem Jehova God . . . I gud ol man oli presem haenem blong hem olwe.” (Sam 72:18, 19) Bambae yumi gohed blong faenem ol gudfala risen blong wantem mekem olsem blong olwe.
Nem blong Jehova i soemaot evri samting long saed blong hem, olsem lav blong Hem. (1 Jon 4:8) I gud yumi tingbaot oltaem se Jehova i lavem yumi taswe hem i krietem yumi, i givim ransom sakrefaes, mo i soemaot lav tru long rul blong hem. Mo bambae yumi gohed blong luk olsem wanem Jehova i soemaot lav long olgeta kriesen. Blong olwe, bambae yumi wantem kam klosap moa long Papa blong yumi mo singsing blong presem nambawan nem blong hem.—Sam 73:28.
