1, 2. (1) ?Olsem wanem rabis wol ya i olsem wan rabis man we kot i jajem? (Yu luk pija long stat blong stadi.) (2) Taem rabis wol ya i lus, ?olgeta man long heven mo long wol bambae oli luksave wanem?

TRAEM tingbaot: Ol gad blong kalabus oli lidim wan rabis man i go afsaed, mo oli stap singaot se: “!Dedman i stap wokbaot!” ?From wanem oli talem olsem? From we, nating se man ya i laef, mo i luk olsem se hem i helti gud, be kot i jajem hem finis se hem i mas ded, ale hem i stap go blong oli kilim hem i ded. Taswe, i olsem we hem i ded finis. *

² Rabis wol we yumi stap long hem i sem mak long rabis man ya we i stap go blong oli kilim hem i ded. Baebol i talem se: ‘Wol ya i stap lus.’ (1 Jon 2:17) Yumi save se samting ya bambae i hapen, from we Jehova i jajem wol ya finis. Be i gat wan samting we i no sem mak long saed blong rabis man ya, mo en blong wol ya. Maet sam man oli ting se kot i rong taem i jajem rabis man ya, ale oli toktok plante blong traem jenisim panis blong hem. Be taem Jehova i jajem ol man, hem i no save rong. Desisen blong hem blong spolem rabis wol ya i stret gud olgeta.  (Dutronome 32:4) Bambae hem i no jenisim desisen ya. Taem hem i spolem rabis wol ya, olgeta man long heven mo long wol bambae oli luksave se jajmen blong hem i stret nomo. !Evriwan bambae oli harem gud!

3. ?Wanem fo samting we bambae oli lus taem Kingdom blong God i kam?

³ ?‘Wol ya we i stap lus,’ i minim wanem? Hem i minim ol nogud samting we oli joen wetem laef blong yumi tede. I no longtaem, olgeta samting ya bambae oli lus. Hemia wan haf blong “gud nius ya blong Kingdom.” (Matiu 24:14, NW) Long stadi ya, bambae yumi tokbaot fo samting we bambae oli lus taem Kingdom blong God i kam, hemia: ol rabis man, ol ogenaesesen we oli gat kruked fasin, ol nogud fasin, mo ol trabol blong laef. Bambae yumi tokbaot trifala kwestin ya: (1) ?Ol fo samting ya oli mekem wanem long yumi? (2) ?Jehova bambae i mekem wanem? (3) ?Wanem bambae i tekem ples blong olgeta?

4. ?Olsem wanem ol rabis man oli spolem yumi?

⁴ ?Ol rabis man oli mekem wanem long yumi? Aposol Pol i talem se long ol las dei, “laef long wol ya bambae i kam strong tumas.” Hem i gohed se: “Ol man nogud wetem ol man blong giaman, bambae oli save gohed blong mekem i mowas olgeta.” (2 Timoti 3:1-5, 13) ?Yu yu luksave samting ya? Plante long yumi oli bin kasem trabol from ol rabis man. I gat ol stronghed we oli mekem man i fraet, mo ol man we oli agensem narafala from kala blong skin, mo ol man blong stil mo blong kilim man. Sam long olgeta oli mekem ol rabis wok ya long klia ples nomo. Sam narafala oli giaman se oli wantem givhan long yumi, be oli gat rabis tingting. Nating se ol rabis man ya oli no mekem wan samting long yumi stret, be oli spolem yumi yet. Yumi harem nogud tumas taem yumi kasem nius blong ol rabis samting we ol man ya oli mekem long ol pikinini, ol olfala, mo olgeta we oli no naf blong stanap strong agens long olgeta. Ol rabis man ya oli gat fasin olsem ol wael anamol mo ol rabis enjel. (Jemes 3:15) Be i gud tumas we i gat ol gudfala promes long Tok blong Jehova.

5. (1) ?Ol rabis man oli gat janis yet blong mekem wanem? (2) ?Olsem wanem long olgeta we oli no wantem jenisim fasin blong olgeta?

⁵ ?Jehova bambae i mekem wanem? Jehova i stap givim janis yet long ol rabis man, blong oli jenisim fasin blong olgeta. (Aesea 55:7) I no longtaem rabis wol ya bambae i lus, be Jehova i no jajem ol man yet. ?Olsem wanem long ol rabis man we oli no wantem jenisim fasin blong olgeta, be oli gohed blong sapotem rabis wol ya gogo kasem taem blong bigfala trabol? Jehova i promes se hem bambae i spolem olgeta. (Ridim Ol Sam 37:10.) Tede, plante man oli haedem ol rabis fasin blong olgeta, mo oli no kasem panis from. (Job 21:7, 9) Be Baebol i talem se: “[God] i stap wajem ol man long evri ples we oli pas long hem. I no gat tudak we i tudak olgeta, we man nogud i save go haed long hem blong God i no luk hem.” (Job 34:21, 22) Taswe, ol rabis man oli no save haed long Jehova. Hem i luk evri samting we oli stap mekem. Afta long faet blong Amagedon, bambae yumi luk ples we oli bin stap long hem, be yumi no moa luk olgeta. !Oli lus blong olwe!—Ol Sam 37:12-15.

6. ?Hu bambae i stap taem ol rabis man oli lus, mo from wanem hemia wan gud nius?

⁶ ?Hu bambae i stap, taem ol rabis man oli lus? Jehova i promes se: “Ol man we tingting blong olgeta i stap daon, bambae oli tekem graon ya i blong olgeta. Nao  bambae oli harem gud, from we oli stap gud, mo oli gat plante samting.” Sam ya i gohed se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” (Ol Sam 37:11, 29) ?Hu “ol man we tingting blong olgeta i stap daon” mo “ol stret man”? Ol man we tingting blong olgeta i stap daon, hemia olgeta we oli letem Jehova i tijim olgeta, mo oli obei long hem. Ol stret man, hemia olgeta we oli glad blong mekem ol samting we i stret long tingting blong Jehova. Long wol ya, i gat plante moa rabis man i bitim ol stret man. Be long niufala wol, bambae i gat ol man ya nomo we tingting blong olgeta i stap daon mo oli mekem stret fasin. !Olgeta ya nao bambae oli mekem wol i kam paradaes!

7. ?Olsem wanem ol ogenaesesen we oli gat kruked fasin oli spolem yumi?

⁷ ?Ol ogenaesesen we oli gat kruked fasin oli mekem wanem long yumi? I no ol man wanwan nomo we oli mekem ol nogud fasin, be ol ogenaesesen nao oli mekem bighaf blong ol trabol. Yu traem tingbaot olsem wanem ol jos oli giaman long plante milian man. Oli no talem trutok long saed blong God, oli talem se yumi no save trastem Baebol, mo oli giaman long saed blong fiuja blong wol mo ol man. Mo tu, ol gavman we oli gat kruked fasin, oli statem ol bigfala faet long wol, mo oli agensem plante man from laen blong olgeta. Oli mekem i strong tumas long ol puaman, mo long ol man we oli no gat paoa. Blong kasem mane mo paoa, ol gavman ya oli mekem i gud moa long sam man i bitim ol narafala man, mo oli letem man i pem olgeta, blong hem i save mekem samting we i agensem loa. Mo tu, ol bigfala kampani we oli wantem mane tumas, oli spolem win, graon, wota, mo ol gudfala samting we God i mekem raonabaot long yumi, mo oli ravem ol man blong oli save kam rij moa. I klia se ol ogenaesesen we oli gat kruked fasin, oli stamba blong plante trabol we i mekem ol man oli harem nogud.

8. Folem Baebol, ?wanem bambae i hapen long ol ogenaesesen we i luk olsem se oli stanap strong?

⁸ ?Jehova bambae i mekem wanem? Baebol i talem se ol giaman skul oli olsem woman blong rod, mo i kolem olgeta se Bigfala Babilon. Ol giaman skul ya bambae oli lus long stat blong bigfala trabol taem ol politik paoa oli agensem ol giaman skul. (Revelesen 17:1, 2, 16; 18:1-4) Ol narafala ogenaesesen we oli gat kruked fasin, Baebol i talem se oli olsem ol bigfala hil mo aelan, from we i luk olsem se oli stanap strong, oli no save muv. (Ridim Revelesen 6:14.) ?Wanem bambae i hapen long olgeta? Long lashaf blong bigfala trabol, ol gavman mo ol ogenaesesen we oli no wantem Kingdom blong God, bambae oli lus. (Jeremaea 25:31-33) !Afta long hemia, bambae i no moa gat wan ogenaesesen long wol we i mekem kruked fasin!

9. ?From wanem yumi save se, long niufala wol bambae yumi wok folem plan?

⁹ ?Wanem bambae i tekem ples blong ol ogenaesesen we oli gat kruked fasin? ?Afta Amagedon, bambae i gat wan ogenaesesen long wol? Baebol i talem se: “God i promes finis blong putum niufala skae mo niufala wol, we stret fasin nomo bambae i stap long hem.” (2 Pita 3:13) Olfala heven mo wol, hemia ol gavman we oli gat kruked fasin mo ol man we oli sapotem olgeta. Afta we oli lus, ?wanem bambae i tekem ples blong olgeta? “Niufala skae mo niufala wol.” Niufala skae i minim wan niufala gavman, hemia Kingdom we Jisas Kraes mo ol  144,000 man oli joen long hem. Niufala wol i minim ol man we Kingdom ya i rul long olgeta. Jisas mo olgeta we oli rul wetem hem, bambae oli folemgud fasin blong Jehova God, we i no olbaot, be i wok folem plan. (1 Korin 14:33) Taswe long “niufala wol,” ol man bambae oli wok folem plan. Bambae i gat ol gudfala man blong lukaot long wok ya. (Ol Sam 45:16) Jisas Kraes mo ol 144,000 bambae oli lidim ol man ya. !Yu traem tingbaot taem ya we ol ogenaesesen we oli gat kruked fasin oli lus finis! !Long ples blong olgeta, bambae i gat wan ogenaesesen nomo we ol man blong hem oli joen gud, mo neva bambae oli mekem kruked fasin!

10. ?Wanem nogud fasin i stap long ples blong yu? ?Yu mo famle blong yu i mas mekem wanem?

¹⁰ ?Ol nogud fasin oli mekem wanem long yumi? Long wol ya, i gat fulap nogud fasin, olsem slip olbaot, stil, giaman, faet, mo kilim man. Mo ol muvi we oli daonem ol stret fasin blong Jehova, oli pulum ol man blong oli ting se ol rabis fasin oli oraet nomo. (Aesea 5:20) Ol papa mo mama oli mas wok had blong blokem ol nogud fasin, blong oli no kasem ol pikinini blong olgeta. Blong talem stret, evri Kristin i mas wok had blong gohed blong fren gud wetem Jehova, from we ol man blong wol ya oli no gat respek long ol loa blong hem.

11. ?Samting we Jehova i mekem long Sodom mo Gomora, i soemaot wanem?

¹¹ ?Jehova bambae i mekem wanem? Yu traem tingbaot samting we Jehova i mekem long tufala taon ya Sodom mo Gomora. (Ridim 2 Pita 2:6-8.) Lot i wan gudfala man, be hem mo famle blong hem oli harem nogud long ol nogud fasin blong ol man raonabaot long olgeta. Jehova i spolem ol ples ya blong finisim ol nogud fasin. Samting ya i “soemaot fasin we hem i save mekem” long ol man nogud tede. Hem i finisim ol rabis fasin long taem bifo, mo bambae hem i finisim bakegen, taem hem i spolem rabis wol ya.

12. Taem ol nogud fasin oli lus, ?wanem gudfala wok we yu wantem mekem?

¹² ?Wanem bambae i tekem ples blong ol nogud fasin? Long niufala wol, bambae yumi bisi long ol gudfala wok. Traem tingbaot: Bambae yumi mekem wol i kam paradaes mo wokem ol niufala haos blong yumi mo famle blong yumi. Bambae yumi welkamem plante milian man we oli laef bakegen, mo bambae yumi tijim olgeta blong oli save Jehova mo ol gudfala samting we hem i mekem finis long ol man. (Aesea 65:21, 22; Ol Wok 24:15) !Long taem ya, bambae yumi bisi long ol wok we oli mekem yumi glad mo oli presem Jehova!

13. From we trifala i agensem Jehova long garen blong Iden, ?yumi kasem wanem trabol?

¹³ ?Ol trabol blong laef oli mekem wanem long yumi? Yumi kasem plante trabol long laef blong yumi, from we wol ya i fulap long ol rabis man, ol ogenaesesen we oli gat kruked fasin, mo ol nogud fasin. Yumi kasem trabol from ol bigfala faet long wol, yumi sot long plante samting, ol man oli no laekem yumi from kala no laen blong yumi, yumi kasem sik, mo yumi stap ded. Ol trabol ya oli stat taem Setan, Adam, mo Iv, trifala i agensem Jehova. Nao yumi evriwan i kasem nogud frut from.

14. ?Jehova bambae i mekem wanem?

¹⁴ ?Jehova bambae i mekem wanem? Hemia sam samting we Jehova i promes blong mekem: Bambae hem i finisim ol  faet. (Ridim Ol Sam 46:8, 9.) Bambae hem i tekemaot ol sik. (Aesea 33:24) Bambae hem i finisim ded. (Aesea 25:8) Bambae hem i mekem ol puaman oli kasem ol samting we oli nidim. (Ol Sam 72:12-16) Mo bambae hem i finisim ol narafala rabis fasin we oli mekem yumi harem nogud. !Mo tu, bambae Jehova i mekem se Setan mo ol rabis enjel oli no moa gat paoa long wol ya!—Efesas 2:2.

15. Long Amagedon, ?wanem sam samting we bambae oli lus blong olwe?

¹⁵ !Yu traem tingbaot wol ya taem i no moa gat faet, sik, mo ded! Bambae i no moa gat ol ami, ol tul blong faet, mo ol ston we ol man oli stanemap blong ona long ol man we oli ded long faet. Bambae i no moa nidim hospital, ol dokta, ol nes, ol aesbokis blong putum bodi blong dedman long hem, mo ol beregraon. Bambae i no moa gat fasin blong stil mo kilim man, taswe bambae yumi no moa nidim ol polis, ol alam blong givim woning from ol stilman, mo maet bambae yumi no moa nidim ol lok mo ki tu. Ol nogud fasin ya we oli mekem trabol long yumi, bambae oli lus blong olwe.

16, 17. (1) ?Olgeta we oli pastru long Amagedon bambae oli harem olsem wanem? Talem wan pijatok. (2) ?Yu mas mekem wanem blong meksua se bambae yu yu stap laef taem rabis wol ya i lus?

¹⁶ ?Bambae i olsem wanem, taem i no moa gat ol trabol blong laef? I no isi blong tingbaot wan wol we i no moa gat trabol long hem. Blong yusum wan pijatok, yu traem tingbaot ol man we oli stap laef klosap long epot. Oli lan long noes blong ol plen, gogo oli no moa tingbaot. Mo tu, ol man we oli stap laef klosap long ples blong doti, oli no moa harem smel blong ol doti ya. Yumi tu, yumi laef plante yia finis wetem ol nogud fasin raonabaot long yumi, mo yumi lan long olgeta. Taswe maet yumi no ting se yumi stap harem nogud. !Be taem Jehova i tekemaot ol trabol ya, bambae yumi harem i defren olgeta!

¹⁷ ?Bambae yumi harem olsem wanem? Ol Sam 37:11 i talem se: “Bambae [ol man] oli harem gud, from we oli stap gud, mo oli gat plante samting.” !Yumi glad tumas blong save se Jehova i wantem mekem samting ya blong yumi! Long taem ya we i gat plante trabol, yu mas mekem evri samting we yu naf blong mekem, blong stap klosap long Jehova mo ogenaesesen blong hem. Ol promes blong fiuja we hem i mekem, oli gud bitim mak. Taswe yu mas tingting dip long olgeta, meksua se bilif blong yu i strong, mo tokbaot bilif ya long ol narafala. (1 Timoti 4:15, 16; 1 Pita 3:15) !Sipos yu mekem olsem, yu save sua se taem God i finisim rabis wol ya, bambae yu stap laef mo yu glad blong olwe!