1. ?Brata Russell mo ol fren blong hem oli yusum wanem rod blong stadi Baebol, mo from wanem oli kasem save gud?

BITIM wan handred yia bifo, Brata C. T. Russell mo sam man we oli stadi long Tok blong God, oli joen olsem wan grup. Oli wantem faenemaot samting we Baebol i tijim long saed blong Jehova, Jisas Kraes, ol dedman, mo ransom. Oli yusum wan isi rod blong stadi. Wan long grup i askem kwestin, nao evriwan oli lukaot ol vas we oli ansarem kwestin ya. Oli raetemdaon ol save we oli faenemaot. From we Jehova i blesem ol Kristin ya we oli wantem tumas blong save Baebol, oli kasem save plante stamba trutok we oli impoten yet.

2. ?Wanem i save mekem se yumi kasem rong mining blong wan profet tok?

² Be i no longtaem, ol Baebol studen ya oli luksave se i had moa blong kasem save long wan profet tok i bitim wan stamba tijing blong Baebol. ?From wanem? Wan risen se, i moa isi blong kasem save long wan profet tok taem hem i stap kamtru o afta we i kamtru. Be i gat wan narafala risen tu. Blong kasem save gud long wan profet tok, yumi mas stadi long ful profet tok ya. Sipos yumi lukluk wan haf nomo, maet yumi kasem rong mining. I luk olsem se samting ya i hapen long profet tok long buk blong Joel. Bambae yumi tokbaot profet tok ya bakegen, mo luk from wanem yumi mas jenisim tingting blong yumi long mining blong hem.

3-4. Plante yia finis, ?yumi ting se profet tok blong Joel 2:7-9 i minim wanem?

 ³ Ridim Joel 2:7-9. Joel i talem se bambae i gat wan bigfala hip blong ol lokis we oli kam spolem graon blong ol man Isrel. !Ol tut blong olgeta oli olsem tut blong laeon, taswe ol lokis ya oli kakae evri samting long Isrel! (Joel 1:4, 6) Plante yia finis, yumi talem se profet tok ya i olsem pijatok blong ol man blong Jehova we oli gohed nomo blong prij, olsem ol lokis we i no gat samting i save stopem olgeta. Yumi ting se wok ya i spolem “graon,” i min se ol man we oli stap aninit long paoa blong ol lida blong skul. *

⁴ Sipos yumi ridim Joel 2:7-9 nomo, yumi save ting se mining ya i stret. Be taem yumi stadi long ful profet tok ya, yumi kasem save se mining i defren. Bambae yumi tokbaot fo risen from wanem yumi talem olsem.

5-6. ?Yumi mas tingbaot wanem, taem yumi ridim (1) Joel 2:20? (2) Joel 2:25?

⁵ Fastaem, makem promes blong Jehova long saed blong ol lokis, se: “Mi bambae mi tekemaot olgeta lokis ya we oli aot long not oli kam, mi ronemaot olgeta.” (Joel 2:20) Sipos ol lokis oli pija blong ol Witnes blong Jehova we oli obei long tok blong Jisas blong prij mo mekem disaepol, ?from wanem Jehova bambae i ronemaot olgeta? (Esik. 33:7-9; Mat. 28:19, 20) I klia se Jehova i no save ronemaot ol gudfala man blong hem. Taswe profet tok ya i stap tokbaot sam man o sam samting we oli agensem ol man blong Jehova.

⁶ Namba tu risen: Traem tingbaot samting we Jehova i talem long Joel 2:25, se: ‘Olgeta samting we i lus, mi bambae mi givimbak long yufala bakegen. Ol lokis ya, oli olsem ol soldia we mi nomo, mi sanem olgeta i kam long yufala.’ Long vas ya, Jehova i promes blong “givimbak” ol samting we ol lokis oli spolem. Sipos ol lokis oli pija blong ol man blong talemaot Kingdom, hemia i min se ol tok we oli talemaot i spolem ol man. Be hemia i no tru. Samting we oli talemaot i pulum plante man nogud blong oli tanem tingting blong olgeta. (Esik. 33:8, 19) !Hemia i karem bigfala blesing long olgeta!

7. Long Joel 2:28, 29, ?tok ya “biaen” i givhan long yumi blong kasem save wanem?

⁷ Ridim Joel 2:28, 29. Namba tri risen, hemia nekis samting we Jehova i talem, i se: “Nao biaen, mi bambae mi givim Spirit blong mi.” Hem i stap tokbaot afta we ol lokis oli finisim wok blong olgeta. Sipos ol lokis oli pija blong ol man blong talemaot Kingdom, ?from wanem Jehova bambae i givim spirit blong hem afta we oli finisim wok blong prij? Blong talem stret, sipos oli no gat tabu spirit, bambae oli no save gohed blong prij blong plante yia, antap moa, taem ol man oli agensem olgeta, mo plante gavman oli putum tabu long wok blong olgeta.

8. ?Ol lokis long Revelesen 9:1-11 oli minim hu? (Yu luk pija long fran pej.)

⁸ Ridim Revelesen 9:1-11. Naoia bambae yumi tokbaot namba fo risen. Bifo, yumi talem se ol lokis long buk blong Joel oli joen wetem wok blong prij we yumi mekem, from we i gat wan profet tok long Revelesen we i klosap sem mak. Profet tok ya i tokbaot ol lokis we oli gat fes olsem man, mo oli werem “samting olsem hat blong king we oli wokem long gol.” (Rev. 9:7) Oli mekem “ol man ya we mak blong God i no stap long fored blong olgeta,” oli harem nogud blong faef manis,  hemia ful laef blong wan lokis. (Rev. 9:4, 5) Hemia i eksplenem gud wok we ol tabu Kristin oli mekem. Oli no fraet blong talemaot jajmen blong Jehova agensem rabis wol ya. Hemia i mekem se ol man we oli trastem wol ya, oli harem nogud tumas.

9. ?Wanem sam impoten samting we oli defdefren long profet tok blong Joel mo Jon?

⁹ I tru, i gat sam samting we oli sem mak long profet tok blong Revelesen mo Joel. Be i gat sam impoten samting we oli defdefren tu. Traem tingbaot: Long profet tok blong Joel, ol lokis oli kakae ol gras mo tri. (Joel 1:4, 6, 7) Be long vison blong Jon, ol lokis “oli kasem oda se oli no mas mekem trabol long ol gras mo tri.” (Rev. 9:4) Mo tu, Joel i luk se ol lokis oli kamaot long not. (Joel 2:20) Be Jon i luk se ol lokis oli kamaot long wan bigfala hol. (Rev. 9:2, 3) Mo tu, ol lokis we Joel i tokbaot, Jehova i ronemaot olgeta. Long Revelesen, hem i no ronemaot ol lokis, be hem i letem olgeta oli finisim wok blong olgeta. I no gat wan tok long Baebol we i soemaot se Jehova i no glad long olgeta.—Yu luk bokis ya, “ Tufala Profet Tok Long Ol Lokis Oli No Sem Mak Stret.”

10. Talem wan eksampol we i soemaot se ol lokis long Joel oli save gat defren mining long ol lokis long Revelesen.

¹⁰ Ol impoten samting ya oli soemaot se mining blong tufala profet tok ya i no sem mak. ?Olsem wanem? ?I min se ol lokis we Joel  i tokbaot oli defren long ol lokis long buk blong Revelesen? Yes. Samtaem long Baebol, wan pijatok i save minim defdefren samting. Wan eksampol: Revelesen 5:5 i talem se Jisas i olsem “Laeon we i kamaot long laen blong Juda,” be 1 Pita 5:8 i talem se Setan i olsem “laeon we i stap singaot bigwan.” From fofala risen we yumi tokbaot, yumi mas lukaot stret mining blong profet tok blong Joel. ?Wanem mining blong hem?

11. ?Olsem wanem Joel 1:6 mo Joel 2:1, 8, 11 i givhan long yumi blong yumi save mining blong ol lokis?

¹¹ Taem yumi ridim gud ful profet tok blong Joel, yumi kasem save se hem i stap talemaot wan faet. (Joel 1:6; 2:1, 8, 11) Jehova i talem se bambae hem i yusum ‘ol soldia we oli plante we plante, mo oli gat paoa’ (ol soldia blong Babilon), blong panisim ol man Isrel we oli no obei long hem. (Joel 2:25) Ol ami ya bambae “oli aot long not oli kam,” hemia ol ami blong Babilon we oli aot long not oli kam faet agensem ol man Isrel. (Joel 2:20) Ol ami ya oli folem gud plan blong olgeta, olsem wan bigfala hip blong ol lokis. Joel i tokbaot olgeta se: “Oli muv i kam stret olsem ol soldia . . . Oli resis i kam, oli klaem long stonwol blong taon, oli kam insaed blong spolem ples ya. Mo oli klaem long ol haos, oli gotru long ol windo olsem man blong stil.” (Joel 2:8, 9) Traem tingbaot samting ya. Ol soldia oli stap olbaot long evri ples. I no gat ples blong haed. !Ol man oli no save ronwe long naef blong faet blong ol man Babilon!

12. ?Olsem wanem profet tok blong Joel long saed blong ol lokis i kamtru?

¹² Long yia 607 bifo Kraes, ol ami blong Babilon oli kam insaed long Jerusalem, olsem ol lokis. Baebol i talem se: ‘King blong Babilonia i no gat sore nating, hem i kilim ol yang man, yang gel, medel man, mo olfala. God i letem we olgeta evriwan i go long han blong hem. Mo hem i bonem haos blong God, wetem ol narafala haos long taon ya, mo ol gudgudfala samting we i stap long olgeta, mo i brebrekemdaon bigfala stonwol blong taon ya.’ (2 Kron. 36:17, 19) Ol ami blong Babilon oli spolem gud ples ya, taswe ol man oli talem se: ‘Ol man mo ol animol oli no moa save stap long hem, ol man Babilonia oli kam holem i blong olgeta.’—Jer. 32:43.

13. Eksplenem mining blong Jeremaea 16:16, 18.

¹³ Samwe long 200 yia afta we Joel i talemaot profet tok blong hem, Jehova i yusum Jeremaea blong talemaot wan narafala samting long saed blong faet ya. Hem i talem se ol ami ya bambae oli lukaotem ol man Isrel we oli stap mekem ol nogud fasin, mo holemtaet olgeta. Jehova i talem se: “Mi bambae mi sanem tok i go long ol man, blong oli kam pulum yufala, olsem we man i pulum fis. Mo bambae mi sanem ol man blong lukaot mit long bus, blong oli go lukaot yufala olbaot long ol hil, mo long ol hol long ston. Bambae mi dabolem panis blong yufala from ol sin blong yufala.” Ol ami blong Babilon bambae oli faenem ol man Isrel we oli no tanem tingting blong olgeta, nating se oli traem haed long dip solwota o long dakbus.—Jer. 16:16, 18.

14. ?Wetaem ol tok long Joel 2:28, 29 i kamtru?

¹⁴ Naoia Joel i talemaot wan gud nius. Ples bambae i kam gud bakegen mo graon bambae i givim kakae. (Joel 2:23-26) Mo samtaem biaen, bambae Jehova i givim plante save long olgeta. Hem i talem se: ‘Bambae mi givim spirit blong mi long olgeta man.  Ol pikinini blong yufala, ol boe mo ol gel, bambae oli save talemaot ol tok we mi bambae mi givim long olgeta. Nating we ol boe blong wok mo ol gel blong wok nomo, be mi bambae mi givim spirit blong mi long olgeta.’ (Joel 2:28, 29) Jehova i givim tabu spirit long Pentekos long yia 33, plante handred yia afta we ol man Isrel oli aot long Babilon mo oli kambak long ples blong olgeta. ?Yumi save samting ya olsem wanem?

15. Long Ol Wok 2:16, 17, ?Pita i talem wanem tok we i defren long Joel 2:28, mo samting ya i soemaot wanem?

¹⁵ God i pulum aposol Pita blong talem se samting we ol man oli sek long hem long dei blong Pentekos, i mekem profet tok blong Joel 2:28, 29, i kamtru. Samwe long naen klok long moning, ol man we God i givim tabu spirit long olgeta, oli stat blong tokbaot “ol bigbigfala wok blong God.” (Wok 2:11) God i pulum Pita blong yusum sam tok we i defren long hemia we Joel i yusum. ?Wanem tok i defren? (Ridim Ol Wok 2:16, 17.) Pita i no stat wetem tok ya “biaen,” be hem i talem se “long ol las dei,” we i min se, jes bifo we ol ami oli spolem Jerusalem long yia 70. Long taem ya, God bambae i givim tabu spirit “long enikaen man.” Hemia i soemaot se taem i mas pas, bifo we profet tok blong Joel i kamtru fulwan.

16. Long taem blong ol fas Kristin, ?tabu spirit i mekem wanem long wok blong prij, mo olsem wanem tede?

¹⁶ Afta we God i givim tabu spirit long ol fas Kristin ya, oli statem wan wok blong prij we biaen i kavremap fulwol. Long yia 61, taem aposol Pol i raetem leta blong Kolosi, hem i talem se gud nius i stap goaot ‘long olgeta man long wol.’ (Kol. 1:23) Long taem blong Pol, “wol” i minim ol ples we Pol mo ol narafala oli save kasem. !Tede, tabu spirit i mekem se wok blong prij i finisim “olgeta ples  long wol”!—Wok 13:47; yu luk bokis ya “ Bambae Mi Givim Spirit Blong Mi.”

17. ?Olsem wanem save blong yumi i jenis long profet tok blong Joel long saed blong ol lokis?

¹⁷ Naoia yumi kasem save moa long profet tok blong Joel 2:7-9. I klia se ol vas ya oli no stap tokbaot wok blong prij blong yumi, be oli tokbaot samting we ol ami blong Babilon oli mekem, taem oli agensem Jerusalem long yia 607 bifo Kraes.

18. ?Wanem i no jenis long saed blong ol man blong Jehova?

¹⁸ ?Wanem i no jenis? Ol man blong Jehova oli yusum enikaen rod, blong gohed blong talemaot gud nius long evri ples we oli stap long hem. (Mat. 24:14) Nating se sam gavman oli putum tabu long wok blong prij we yumi mekem, be oli no save stopem. !Blesing blong Jehova i mekem se yumi gat strong tingting blong wok had i bitim olgeta taem bifo, blong talemaot gud nius blong Kingdom! Yumi gat tingting daon, taswe yumi lukluk i go long Jehova blong i lidim yumi blong kasem save long ol profet tok. !Yumi gat strong tingting se long stret taem, bambae hem i givhan long yumi, blong yumi “kasem save gud trutok”!—Jon 16:13.