Bifo yumi ting se i olsem, from ol tok blong Hibrus 12:16, we i talem se Esao “i ting nating long ol samting we oli tabu” mo i givim “raet blong hem olsem fasbon” long Jekob “blong kasem wan kakae nomo.” Taswe, yumi ting se taem Jekob i kasem ‘raet blong fasbon,’ hemia i minim tu blesing ya se Mesaea bambae i kamaot long hem.—Matiu 1:2, 16; Luk 3:23, 34.

Be taem yumi stadi gud long sam narafala stori blong Baebol, yumi luksave se i no nid blong man i fasbon, blong Mesaea i kamaot long hem. Bambae yumi tokbaot sam stori:

Fasbon boe blong Jekob mo Lea, hemia Ruben. Mo fasbon boe blong Jekob mo Rejel, hemia Josef. Taem Ruben i mekem rabis fasin long saed blong seks, hem i lusum raet blong fasbon, mo raet ya i go long Josef. (Jenesis 29:31-35; 30:22-25; 35:22-26; 49:22-26; 1 Kronikel 5:1, 2) Be Mesaea i no kamaot long Ruben mo i no kamaot long Josef tu. Hem i kamaot long Juda, we i namba fo boe blong Jekob mo Lea.—Jenesis 49:10.

Luk 3:32 i tokbaot faef bubu blong Mesaea, we olgeta evriwan oli fasbon. Boas i papa blong Obed, mo Obed i papa blong Jese.—Rut 4:17, 20-22; 1 Kronikel 2:10-12.

Jese i papa blong Deved we Mesaea i kamaot long hem. Be Deved i no fasbon, hem i laswan blong eit pikinini boe blong Jese. (1 Samuel 16:10, 11; 17:12; Matiu 1:5, 6) Sem mak long Solomon, we i no fasbon blong Deved, be Mesaea i kamaot long hem.—2 Samuel 3:2-5.

Nating se i olsem, fasbon boe i impoten. Hem i kasem plante blesing we ol narafala  boe oli no kasem. Plante taem, hem nao i kam hed blong famle taem papa blong hem i ded. Mo taem papa i seraotem ol samting long ol pikinini blong hem, samting we fasbon i kasem i tu taem antap long ol narafala pikinini.—Jenesis 43:33; Dutronome 21:17; Josua 17:1.

Be raet blong fasbon i save go long narafala boe long famle. Taem Ebraham i sanemaot Ismael, raet blong hem olsem fasbon i go long Aesak. (Jenesis 21:14-21; 22:2) Mo raet blong Ruben olsem fasbon i go long Josef, olsem yumi tokbaot finis.

?Aposol Pol i wantem makem wanem long Hibrus 12:16? Vas ya i talem se: “Yufala i mas lukaotgud se i no gat wan long yufala i stap mekem enikaen doti fasin blong seks, no i ting nating long ol samting we oli tabu, olsem Esao i mekem, taem hem i salem raet blong hem olsem fasbon blong kasem wan kakae nomo.”

Long vas ya, Pol i no stap tokbaot laen blong Mesaea, be hem i stap givim wan woning long ol Kristin. Hem i talem se: “Yufala i mas gohed blong wokbaot long stret rod” blong “bambae i no gat wan long yufala i mestem, nao God i no soemaot [kaen] fasin ya long hem.” Sore tumas, samting ya i save hapen sipos oli mekem doti fasin blong seks. (Hibrus 12:12-16) Long taem olsem, bambae oli olsem Esao, we i “ting nating long ol samting we oli tabu” mo i wantem nomo blong harem gud.

Folem kastom blong bifo, maet sam samtaem Esao i gat janis blong bonem sakrefaes long olta blong mekem wosip long Jehova. (Jenesis 8:20, 21; 12:7, 8; Job 1:4, 5) Be hem i tingting tumas long samting we hem nomo i wantem mo i lego ol blesing blong fasbon blong kasem wan plet supsup. Maet hem i wantem ronwe long hadtaem we Jehova i talem se laen blong Ebraham bambae i kasem. (Jenesis 15:13) Esao i soemaot bakegen se hem i ting nating long ol samting we oli tabu, taem hem i mared long tu hiten woman, nao i mekem mama mo papa blong hem i harem nogud. (Jenesis 26:34, 35) !Hem i defren olgeta long Jekob, we i wantem mared nomo long wan woman we i wosipim trufala God!—Jenesis 28:6, 7; 29:10-12, 18.

?Ol stori ya blong Baebol oli tijim wanem samting long yumi, long saed blong ol bubu blong Mesaea? Sam long olgeta oli fasbon boe, be sam nogat. Ol man Isrel oli kasem save long samting ya mo oli folem. ?Olsem wanem yumi save? From we oli talem se Kraes bambae i kamaot long laen blong Deved, we i lasbon boe blong Jese.—Matiu 22:42.