Baebol i talem klia se Jehova i naf blong talemaot fiuja. (Aes. 45:21) Be hem i no eksplenem olsem wanem o wetaem hem i talemaot fiuja, o hamas samting hem i jusum blong save. Taswe, yumi no save evri samting long saed ya. Nating se i olsem, i gat sam samting we yumi save.

Jehova i save mekem eni samting we hem i wantem, be samtaem hem i jusum blong no mekem. Hem i save yusum bigfala waes blong hem blong talemaot eni samting we hem i wantem. (Rom 11:33) Be from we hem i beswan eksampol long fasin blong bos long tingting, hem i jusum blong i no save sam samting we bambae i hapen.—Skelem wetem Aesea 42:14.

Jehova i mekem samting we hem i wantem i kamtru. ?Olsem wanem hemia i joen wetem fasin blong hem blong talemaot fiuja? Aesea 46:10 i talem se: “Long stat, mi mi talemaot samting we bambae i kamtru, mo longtaem finis, mi talemaot ol samting we oli no kamtru yet. Mo mi talem se: ‘Ol desisen blong mi bambae oli stanap, oli no save foldaon, mo bambae mi mekem eni samting we mi wantem.’”

Jehova i naf blong talemaot fiuja, from hem i gat paoa blong mekem eni samting i hapen. Jehova i no olsem yumi we taem yumi wajem wan muvi o ridim wan buk, yumi jam i go long en blong luk se wanem bambae i hapen. Be Jehova i save mekem desisen se wan samting bambae i hapen long wan stret taem. Mo taem stret taem ya i kamtru, hem i mekem samting ya i hapen.—Eks. 9:​5, 6; Mat. 24:36; Wok 17:31.

From samting ya, Baebol i yusum ol tok olsem, “rerem,” “mekem finis,” mo “mekem plan finis,” blong eksplenem samting we Jehova i mekem long saed blong fiuja. (2 King 19:25; fut.; Aes. 46:11) Ol tok ya i kamaot long wan olfala hanraet we i klosap sem mak long tok ya “man blong wokem graonpot.” (Jer. 18:4) Wan man blong wokem graonpot we i gat gudhan, i save wokem graon i kam wan naesfala pot blong flaoa. Long sem fasin, Jehova tu i save wokem o jenisim ol samting blong mekem wil blong hem i kamtru.—Efes. 1:11.

Jehova i letem man i jusum prapa rod blong hem. Hem i no makemaot ol samting we bambae i hapen long laef blong wanwan man. Mo hem i no fosem wan gudfala man blong mekem wan samting we hem i save kasem trabol from. Hem i letem ol man oli jusum prapa rod blong olgeta, mo i tijim olgeta blong jusum rod we i stret.

Tingbaot tufala eksampol ya. Faswan hemia ol man Nineve. Jehova i bin talemaot se ol enemi bambae oli spolem taon ya from i fulap long ol rabis fasin. Be taem ol man blong taon ya oli tanem tingting blong olgeta, Jehova “i luklukgud bakegen long trabol we hem i talem se bambae i tekem i kam long olgeta, nao i no moa tekem trabol ya i kam.” (Jona 3:​1-10) Jehova i jenisim tingting blong hem, from we ol man Nineve oli jusum blong tanem tingting blong olgeta afta we oli harem woning blong Jehova.

Seken eksampol, hemia profet tok we i talem se Saeras bambae i win long faet, mo i letem ol man Jiu we oli stap kalabus oli go fri, mo i givim oda blong oli bildim bak tempol blong Jehova. (Aes. 44:26–45:4) Nating se King Saeras blong Pesia i no wosipim Jehova, be hem i mekem profet tok ya i kamtru. (Esra 1:​1-4) Jehova nao i yusum Saeras blong mekem samting ya, be hem i no fosem hem blong wosipim Hem.—Prov. 21:1.

I tru, i gat plante moa samting blong tingbaot long fasin blong Jehova blong talemaot fiuja. Be i no gat wan man we i naf blong kasemsave fulwan long ol tingting mo fasin blong Jehova. (Aes. 55:​8, 9) Be samting we Jehova i talem long saed ya, i mekem yumi bilif strong se oltaem samting we hem i mekem i stret, mo hemia i minim tu taem hem i talemaot fiuja.