?YU YU makem se plante man tede oli wantem se ol man oli tritim olgeta olsem we oli spesel? Nating se ol man oli tritim olgeta olsem, be oli wantem yet se ol man oli tinghae moa long olgeta. Kaen tingting olsem i kamaot from we man i tingbaot hem wan nomo, mo i no gat tangkiu from samting we hem i gat. Mo ol fasin ya oli soemaot se yumi stap laef long ol las dei.—2 Tim. 3:2.

I tru, longtaem finis i kam ol man oli tingbaot olgeta wan nomo. Eksampol, Adam mo Iv i mekem prapa desisen blong tufala long samting we i gud mo samting we i no stret, nao yumi evriwan i kasem trabol from. Sam yia biaen, King Usia blong Juda i ting se hem i gat raet blong bonem insens long tempol, be tingting blong hem i rong. (2 Kron. 26:​18, 19) Long sem fasin, ol Farisi mo ol Sadusi oli ting se from we oli kamaot biaen long Ebraham, God bambae i mekem i gud long olgeta i bitim ol narafala man.—Mat. 3:9.

Yumi laef long medel blong ol man we oli tingbaot olgeta nomo, mo fasin blong olgeta i save gat paoa long yumi. (Gal. 5:26) Maet yumi save stat blong gat tingting ya se yumi gat raet blong kasem wan spesel wok, o se ol man oli mas tritim yumi long wan spesel fasin. ?Olsem wanem blong blokem tingting ya? Fastaem, yumi mas kasemsave tingting blong Jehova long ol samting we yumi wantem kasem. I gat tu stamba trutok blong Baebol we bambae i halpem yumi.

Jehova nao bambae i jusum ol samting we yumi sud kasem. Tingbaot sam eksampol.

•   Insaed long famle, Jehova i mekem plan se ol waef oli mas respektem ol hasban blong olgeta, mo ol hasban oli mas lavem ol waef blong olgeta. (Efes. 5:33) Mo tu, hem i talem se wan kapol i mas soem lav long tufala nomo, be i no long wan narafala man o woman. (1 Kor. 7:3) Mo i stret nomo we ol perens oli wantem se ol pikinini oli obei long olgeta, mo tu i stret nomo we ol pikinini oli wantem se perens i lavem olgeta mo sapotem olgeta.—2 Kor. 12:14; Efes. 6:2.

• Long kongregesen, Jehova i wantem se yumi respektem ol elda from we oli wok had. (1 Tes. 5:12) Be olgeta oli no gat raet blong bos long ol brata mo sista.—1 Pita 5:​2, 3.

• God i givim raet long ol gavman blong oli askem yumi blong pem ol takis mo ona long olgeta.—Rom 13:​1, 6, 7.

Jehova i givim moa samting long yumi i bitim wanem we yumi gat raet blong kasem. From we yumi sinman, yumi sud ded nomo. (Rom 6:23) Be from we Jehova i gat fasin ya blong lavem man oltaem, hem i givim plante blesing long yumi. (Sam 103:​10, 11) Jehova i givim evri blesing o ol spesel wok ya long yumi from we hem i kaen tumas.—Rom 12:​6-8; Efes. 2:8.

Blokem tingting we ol man blong wol oli gat. Sipos yumi no lukaot gud, maet yumi save stat blong gat tingting ya se yumi gat raet blong kasem plante moa samting i bitim ol narafala. Jisas i soemaot se i isi blong gat tingting olsem, taem hem i tokbaot stori blong ol man blong wok we oli kasem wan denarias. Samfala oli stat wok long eli moning, mo oli wok fuldei long hot san. Sam narafala oli wok blong wan aoa nomo. Taswe, faswan grup ya oli ting se bambae pei blong olgeta i bigwan moa. (Mat. 20:​1-16) Folem stori ya, Jisas i tijim ol man blong hem se oli mas glad long samting we God i givim long olgeta.

Talem tangkiu, mo no askem tumas samting. (1 Tes. 5:18) I gud yu folem eksampol blong aposol Pol, we hem i no askem ol brata long Korin blong givim samting we hem i nidim long bodi, nating se hem i gat raet blong mekem olsem. (1 Kor. 9:​11-14) Yumi mas glad long evri blesing we yumi kasem, mo blokem fasin ya blong askem tumas samting.

Wokem fasin ya blong gat tingting daon. Taem wan man i tingbaot hem wan tumas, plante  taem bambae hem i stat blong ting se hem i sud kasem plante moa samting. Be tingting daon bambae i halpem yumi blong blokem rabis tingting olsem.

Profet Daniel i soemaot wan gudfala eksampol long fasin ya blong gat tingting daon. Hem i kamaot long wan famle we oli luk naes, oli gat save mo gudhan blong mekem plante samting, taswe hem i save gat tingting ya se ol man oli sud tritim hem long wan spesel fasin mo se hem i gat raet blong kasem ol spesel wok ya we oli givim long hem. (Dan. 1:​3, 4, 19, 20) Be Daniel i gohed blong gat tingting daon, mo hemia nao i mekem se hem i sas long ae blong Jehova.—Dan. 2:30; 10:​11, 12.

I gud yumi sakemaot fasin ya blong tingbaot yumi wan, mo fasin ya we yumi ting se yumi impoten moa, from we hemia ol fasin we plante man long wol tede oli gat. Mo from we Jehova i kaen tumas long yumi, i gud yumi gohed blong glad long evri blesing we hem i givim long yumi.