1, 2. (1) ?Presen ya we i “gud tumas, i bitim mak,” i minim wanem? (2) ?Wanem ol kwestin we bambae yumi tokbaot?

JEHOVA i givim wan nambawan presen long yumi, hemia pikinini blong hem Jisas, we hem i sanem i kam long wol. (Jon 3:16; 1 Jon 4:9, 10) Aposol Pol i talem se presen ya i “gud tumas, i bitim mak.” (2 Korin 9:15) ?From wanem Pol i talem olsem?

² Pol i save se sakrefaes blong Jisas nao bambae i mekem ol nambawan promes blong Jehova oli kamtru. (Ridim 2 Korin 1:20.) Taswe, presen ya we i “gud tumas, i bitim mak,” i minim sakrefaes blong Jisas, kaen fasin blong Jehova mo lav we hem i soemaot long yumi. I had blong eksplenem spesel presen ya long wan fasin we yumi kasemsave gud long hem. ?Presen ya i mekem yumi harem olsem wanem? Mo ?olsem wanem presen ya i pulum yumi blong rere from Memoriol blong ded blong Jisas long Wenesde 23 Maj 2016?

3, 4. (1) ?Yu yu harem olsem wanem taem wan man i givim wan presen long yu? (2) ?Wan spesel presen i save jenisim fasin blong yu olsem wanem?

³ Yumi glad taem narafala i givim wan presen long yumi. Be i gat sam presen we i spesel, mo i save jenisim laef blong yumi. Yu traem tingbaot, sipos yu yu mekem wan bigfala trabol, mo panis we oli givim long yu hemia se yu mas ded. Be yu sek se wan man we yu no save hem i talem se, hem i rere blong ded long ples blong yu. ?Bambae yu harem olsem wanem long wan spesel presen olsem?

⁴ Wan spesel presen olsem i save mekem se yu jenisim fasin blong yu. Maet presen ya i mekem se yu kaen, yu lavem ol narafala, mo yu glad blong fogivim eni man we i mekem nogud long yu. Long ful laef blong yu, bambae yu wantem soemaot se yu glad long sakrefaes we man ya i mekem.

5. ?Olsem wanem sakrefaes blong Jisas i gud moa i bitim ol narafala presen?

⁵ Presen ya sakrefaes blong Jisas we God i givim long yumi i gud moa i bitim presen long stori we yumi jes tokbaot. (1 Pita 3:18) Yu traem tingbaot: Yumi evriwan i kasem sin long Adam, mo panis blong sin hemia ded. (Rom 5:12) From we Jehova i lavem yumi, hem i sanem Jisas i kam long wol blong i ded from yumi evriwan, mo hem i ded blong “tekem ples blong olgeta man.” (Hibrus 2:9) Be sakrefaes blong Jisas bambae i mekem sam moa samting. Bambae hem i finisim ded blong olwe. (Aesea 25:7, 8; 1 Korin 15:22, 26) Olgeta we oli bilif long Jisas bambae oli laef long pis mo oli harem gud blong olwe, nating se oli king long heven no oli stap aninit long Kingdom blong God long wol ya. (Rom 6:23; Revelesen 5:9, 10) ?Wanem sam narafala blesing we yumi save kasem from presen we Jehova i givim?

6. (1) ?Wanem ol blesing we yu yu wantem luk? (2) Yu tokbaot 3 samting we presen blong God bambae i pulum yumi blong mekem.

⁶ From presen we Jehova i givim, wol bambae i kam wan paradaes, i no moa gat sik, mo ol ded man bambae oli laef bakegen. (Aesea 33:24; 35:5, 6; Jon 5:28, 29) Yumi lavem Jehova mo pikinini blong hem from presen ya we i “gud tumas, i bitim mak.” ?Presen ya i pulum yumi blong mekem wanem? Bambae i pulum yumi blong (1) folem Jisas klosap, (2) lavem ol brata mo sista blong yumi, mo (3) fogivim narafala long fulhat blong yumi.

7, 8. ?From we Jisas i lavem yumi, samting ya i pulum yumi blong mekem wanem?

⁷ Faswan samting we presen ya i pulum yumi blong mekem, hemia se, yumi wantem yusum laef blong yumi blong ona long Jisas. Aposol Pol i talem se: “Kraes i lavem mifala tumas, nao fasin ya blong hem i stap holemtaet mifala” (Ridim 2 Korin 5:14, 15.) Pol i save se sipos yumi kasemsave se Jisas i lavem yumi, hemia bambae i holemtaet yumi, no i pulum yumi blong lavem hem mo ona long hem. Yes, taem yumi luksave ol samting we Jehova i mekem from we Hem i lavem yumi, samting ya bambae i mekem se yumi wantem gat wan laef we i soemaot se yumi ona long Jisas. ?Olsem wanem yumi save mekem olsem?

⁸ Mo tu, sipos yumi lavem Jehova, samting ya bambae i pulum yumi blong biaen long eksampol blong Jisas, mo folem hem klosap. (1 Pita 2:21; 1 Jon 2:6) Taem yumi obei long Jehova mo Jisas, yumi soemaot se yumi lavem tufala. Jisas i talem se: “Man we i kasemgud ol tok blong mi, mo i stap obei long olgeta, man ya nao i lavem mi. Mo man we i lavem mi, Papa blong mi bambae i lavem hem. Mo mi bambae mi lavem hem, nao bambae mi  save soemaot mi long hem, blong hem i savegud mi.”—Jon 14:21; 1 Jon 5:3.

9. ?Sipos yumi no lukaot gud wanem i save hapen?

⁹ Long taem blong Memoriol, i gud yumi tingting dip long ol samting long laef blong yumi. Taswe, yu save askem long yu wan se: ?Wanem i soemaot se mi stap folem Jisas finis? ?Mi mi save mekem wanem blong kam gud moa? I impoten blong yumi askem ol kwestin ya, from we ol man blong wol ya oli wantem se yumi mekem olsem olgeta. (Rom 12:2) Sipos yumi no lukaot gud, yumi save stat blong folem ol tija blong wol, ol man blong aktem muvi, mo ol man blong plei spot. (Kolosi 2:8; 1 Jon 2:15-17) ?Olsem wanem blong lukaot gud?

10. (1) ?Wanem ol kwestin we yumi save askem long taem blong Memoriol? (2) ?Ansa blong ol kwestin ya bambae i pulum yumi blong mekem wanem? (Yu luk pija long stat blong stadi.)

¹⁰ Long taem blong Memoriol, i gud yumi tekem smol taem blong jekem ol klos, ol muvi, ol miusik, mo ol samting we oli stap long kompiuta, mobaelfon, no tablet blong yumi. I gud yu askem long yu wan se: ?Sipos Jisas i stap long ples ya, mo i luk klos we mi stap werem, bambae mi mi sem? (Ridim 1 Timoti 2:9, 10.) ?Ol klos blong mi oli soemaot se mi mi man blong Kraes? ?Jisas bambae i glad blong wajem ol muvi blong mi? ?Bambae hem i lesin long ol miusik blong mi? Sipos hem i yusum mobaelfon no tablet blong mi, ?bambae mi sem long samting we hem i luk? ?I had blong mi eksplenem long hem from wanem mi laekem plei sam video gem? Sipos yumi lavem Jehova, samting ya bambae i pulum yumi blong sakemaot ol samting we i no stret blong wan Kristin i gat, nating se samting ya i sas. (Ol wok 19:19, 20) Taem yumi givim laef blong yumi long Jehova, yumi promes blong yusum laef blong yumi blong ona long Jisas. Taswe, yumi mas sakemaot ol samting we oli save mekem se i had blong yumi folem Jisas klosap.—Matiu 5:29, 30; Filipae 4:8.

11. (1) ?From we yumi lavem Jehova mo Jisas, hemia pulum yumi blong mekem wanem? (2) ?Olsem wanem lav ya i pulum yumi blong givhan ol narafala long kongregesen?

¹¹ From we yumi lavem Jisas, hemia i pulum yumi blong prij mo tij wetem strong tingting. (Matiu 28:19, 20; Luk 4:43) ?Olsem wanem? ?Long taem blong Memoriol, yu save jenisim sam samting long laef blong yu, blong spenem 30 no 50 aoa blong mekem wok blong paenia? Wan olfala brata we woman blong hem i ded finis, mo hem i gat 84 yia, i ting se bambae hem i no save mekem wok blong paenia, from we hem i olfala, mo helt blong hem i nogud. Be ol paenia long eria blong hem oli wantem givhan long hem. Oli tekem hem long trak blong olgeta, mo oli jusum wan stret teritori we hem i save prij long hem. Long en blong manis, brata ya i kasem 30 aoa. ?Olsem wanem? ?Yu save givhan long wan narafala long kongregesen blong yu, blong i paenia long manis Maj no Eprel? I tru se i no evriwan we oli save mekem wok blong paenia, be yumi save yusum taem mo paoa blong yumi blong mekem moa long wok blong Jehova. Olsem Pol, sipos yumi mekem olsem, yumi soemaot se Jisas i lavem yumi, nao lav ya i pulum yumi blong mekem moa long wok blong prij. Be, from God i lavem yumi, ?samting ya i pulum yumi blong mekem wanem narafala samting tu?

12. ?From God i lavem yumi, samting ya i pulum yumi blong mekem wanem?

¹² Seken samting hemia se, from God i lavem yumi, samting ya bambae i pulum yumi blong lavem ol brata mo sista blong yumi.  Aposol Jon i raetem se: “Ol fren. From God i lavem yumi olsem, yumi tu i mas lavlavem yumi.” (1 Jon 4:7-11) Taswe, sipos yumi agri se God i lavem yumi, yumi mas lavem ol brata mo sista blong yumi. (1 Jon 3:16) ?Olsem wanem yumi save soemaot se yumi lavem olgeta?

13. ?Jisas i soemaot wanem eksampol long yumi?

¹³ Eksampol blong Jisas i soemaot olsem wanem yumi save lavem ol narafala. Taem hem i stap long wol, hem i givhan long ol man we tingting blong olgeta i stap daon. Hem i hilim ol sik man, olgeta we leg blong olgeta i nogud, ol blaenman, olgeta we sora blong olgeta i fas, mo olgeta we oli no save toktok. (Matiu 11:4, 5) Jisas i no olsem ol lida blong skul, hem i glad nomo blong tijim ol man we oli wantem save God. (Jon 7:49) Hem i lavem ol man ya we oli gat tingting daon, mo i wok had blong givhan long olgeta.—Matiu 20:28.

14. ?Yumi save mekem wanem blong soem lav long ol brata mo sista?

¹⁴ Taem blong Memoriol i wan nambawan taem we yumi save tingbaot blong givhan long ol brata mo sista long kongregesen, antap moa ol olfala. ?Olsem wanem? ?Yu yu save visitim olgeta? ?Yu save karem sam kakae blong olgeta, mo mekem sam wok long haos blong olgeta? ?Yu save tekem olgeta i go long miting long trak blong yu, no maet yu save askem olgeta blong prij wetem yu? (Ridim Luk 14:12-14.) From God i lavem yumi, yumi mas letem samting ya i pulum yumi blong lavem ol brata mo sista blong yumi.

15. ?Yumi mas luksave wanem?

¹⁵ Namba tri samting hemia se, from Jehova i lavem yumi, samting ya i pulum yumi blong fogivim ol brata mo sista blong yumi. Yumi evriwan i kasem sin long Adam mo yumi stap ded from, taswe i nogat man i save talem se, “mi mi no nidim sakrefaes blong Jisas.” Olgeta tu we oli mekem wok blong Jehova longtaem finis, oli nidim presen ya. Jehova i fogivim yumi evriwan from bigfala kaon we yumi gat. Taswe, ?from wanem i impoten blong luksave samting ya? Bambae yumi faenem ansa long wan pijatok blong Jisas.

16, 17. (1) ?Yumi lanem wanem long pijatok blong Jisas? (2) Afta we yu tingting dip long pijatok ya, ?yu gat strong tingting blong mekem wanem?

¹⁶ Jisas i tokbaot pijatok blong wan masta we i fogivim slef blong hem. Slef ya i gat bigfala kaon long hem blong plante milian vatu. Be biaen slef ya i no fogivim narafala man blong wok, we i kaon long hem blong wan handred taosen vatu nomo. Fasin sore blong masta ya i sud pulum slef ya blong i fogivim narafala man ya. Be taem masta ya i harem se hem i no fogivim man ya from smol kaon we hem i gat, hem i kros tumas. Hem i talem se: “!Yu yu wan rabis man! Mi mi fogivim yu long bigfala kaon ya blong yu, from we yu krae long mi. ?From wanem yu no sore long man ya, stret  olsem we mi mi sore long yu?” (Matiu 18:23-35) Olsem masta ya, Jehova i stap fogivim yumi from bigfala kaon we yumi gat. ?Lav mo sore we Jehova i gat i pulum yumi blong mekem wanem?

¹⁷ Taem yumi stap rere from Memoriol, i gud yumi askem se: ?Wan brata no sista i mekem mi mi harem nogud? ?Mi harem se i had blong fogivim hem? Sipos yes, taem blong Memoriol i wan gud taem blong yu folem fasin blong Jehova we i rere oltaem blong “fogivim” ol man. (Nehemaea 9:17; Ol sam 86:5) Sipos yumi glad long fasin sore we Jehova i gat, bambae yumi soemaot sore long ol narafala mo fogivim olgeta long fulhat blong yumi. Sipos yumi no lavem mo fogivim ol brata mo sista blong yumi, bambae Jehova i no save fogivim yumi. (Matiu 6:14, 15) Taem yumi fogivim narafala, hemia i no jenisim samting we hem i mekem long yumi, be i givhan long yumi blong yumi harem gud long fiuja.

18. ?From God i lavem yumi, samting ya i givhan olsem wanem long Lili blong i fogivim Carol?

¹⁸ Samtaem i had blong fogivim ol brata mo sista blong yumi, from we yumi sin man. (Ridim Efesas 4:32; Kolosi 3:13, 14.) Wan sista, nem blong hem Lili, [1] (Yu luk ol not, pej 13.) i stap givhan long wan wido sista we nem blong hem Carol. Lili i tekem hem long trak long eni ples we hem i wantem go long hem. Mo i givhan long hem blong go pem ol samting long stoa. Hem i mekem plante narafala samting tu. Nating se i olsem, oltaem Carol i stap agensem Lili from ol samting we hem i mekem, taswe, i no isi blong givhan long hem. Be Lili i lukluk ol gudfala fasin blong Carol, nao i givhan long hem blong sam yia, kasem taem we hem i sik bigwan mo i ded. Lili i talem se: “Mi mi stap tingbaot taem ya we bambae Carol i laef bakegen. Mi wantem save hem taem hem i stret gud olgeta.” I klia nomo se, from God i lavem yumi, samting ya i save pulum yumi blong fogivim ol brata mo sista blong yumi, mo yumi putum tingting blong yumi long taem ya we bambae yumi stret gud olgeta.

19. ?Presen ya we i “gud tumas, i bitim mak” i pulum yu blong mekem wanem?

¹⁹ I tru nomo se Jehova i givim wan presen long yumi we i “gud tumas, i bitim mak.” I gud we yumi glad oltaem long presen ya. Taem blong Memoriol, i wan gudfala taem blong tingting dip long ol gudfala samting we Jehova mo Jisas i mekem long yumi. From we tufala i lavem yumi, i gud we samting ya i pulum yumi blong folem Jisas klosap, yumi lavem ol brata mo sista blong yumi, mo yumi fogivim ol narafala long fulhat blong yumi.