1. ?Wanem filing we Deved i gat long Jehova, mo hemia i pulum Deved blong mekem wanem?

KING DEVED i raetem se: “Hae God [Jehova], hem i hae we i hae, mo i stret blong ol man oli stap leftemap nem blong hem.” (Sam 145:3) Deved i lavem Jehova, mo lav ya i pulum hem blong presem God “long medel blong kongregesen.” (Sam 22:22, 40:5) I sua se yu tu yu lavem Jehova mo yu agri wetem tok ya blong Deved se: “Hae God. Yu yu God blong Isrel, we i olfala bubu ya blong mifala bifo. Bambae mifala i stap presem yu oltaem, gogo i no save finis.”—1 Kron. 29:10-13.

2. (1) ?Yumi save mekem wanem blong presem Jehova? (2) ?From wanem samfala oli harem se i had, mo bambae yumi tokbaot wanem?

² Wan rod blong presem Jehova tede, i blong ansa long ol miting. Be sam brata mo sista oli harem se i had. Oli wantem ansa be oli fraet. ?Oli save mekem wanem? ?Wanem advaes we i save givhan long yumi evriwan blong yumi givim ol ansa we oli leftemap tingting? Bifo we yumi ansarem tufala kwestin ya, i gud yumi tokbaot fo stamba risen blong ansa long ol miting.

3-5. (1) Folem Hibrus 13:15, ?from wanem yumi givim ansa long miting? (2) ?Yumi evriwan i mas givim semkaen ansa? Eksplenem.

³ Jehova i givim blesing long yumi evriwan blong presem hem. (Sam 119:108) Ansa we yumi givim long miting i olsem “wan sakrefaes we yumi givim i go long [God] blong presem hem.” I no gat wan narafala man we i save mekem sakrefaes  ya blong yumi. (Ridim Hibrus 13:15.) ?Olsem wanem? ?Jehova i wantem se yumi evriwan i givim semkaen sakrefaes? !Nogat!

⁴ Jehova i save se laef blong yumi wanwan i defdefren mo samfala oli gat moa save i bitim ol narafala. Be hem i glad long eni sakrefaes we yumi naf blong givim. Traem tingbaot ol man Isrel. Sam long olgeta oli naf blong givim wan smol sipsip o nani olsem sakrefaes. Be olgeta we oli pua, maet oli givim “tu sotleg no tu nawimba.” Sipos oli no naf blong givim tufala pijin ya, Jehova i glad long “wan kilo flaoa we i beswan.” (Lev. 5:7, 11) Flaoa i no sas, be Jehova i glad long sakrefaes ya sipos flaoa “i beswan.”

⁵ God blong yumi we i kaen, i gat sem filing tede. Taem yumi givim ansa, hem i no gat tingting se yumi evriwan i mas gudfala man blong toktok olsem Apolos, o yumi mas pulum tingting blong ol man, olsem Pol i mekem. (Wok 18:24; 26:28) Jehova i wantem nomo se yumi mekem bes blong yumi, olsem we yumi naf blong mekem. Tingbaot wido we i givim tu smol mane nomo. Jehova i glad long hem from we hem i givim olgeta samting we hem i gat.—Luk 21:1-4.

6. (1) Folem Hibrus 10:24, 25, ? ol ansa we yumi harem oli save mekem wanem long yumi? (2) ?Olsem wanem yu save soemaot se yu glad long ol ansa we oli leftemap tingting blong yu?

⁶ Ol ansa blong yu oli leftemap tingting blong evriwan. (Ridim Hibrus 10:24, 25.) Yumi evriwan i glad blong harem ol defdefren ansa long miting. Yumi laekem tumas ol smosmol ansa we ol pikinini oli givim wetem fulhat blong olgeta. Taem wan brata o sista i ansa wetem bigfala glad long voes blong hem from wan niufala trutok we hem i jes lanem, hemia i tajem hat blong yumi. Mo yumi glad tu long olgeta we oli ‘mekem tingting blong olgeta i strong’ blong givim ansa, nating se oli man blong sem o oli jes stat blong lanem lanwis blong yumi. (1 Tes. 2:2) ?Olsem wanem yu save soemaot se yu glad long olgeta? Yu save talem tangkiu from gudfala ansa we oli givim. Wan narafala rod blong soemaot se yu glad, hemia se yu tu yu givim ansa. Olsem nao, ansa blong olgeta i leftemap tingting blong yu mo ansa blong yu i leftemap tingting blong olgeta.—Rom 1:11, 12.

7. Taem yu givim ansa, ?olsem wanem yu givhan long yu wan bakegen?

⁷ Taem yu ansa, yu givhan long yu wan  bakegen. (Aes. 48:17) ?From wanem yumi talem olsem? Fas samting se, taem yu plan blong givim wan ansa, yu gat strong tingting blong rere gud. Taem yu rere gud, yu kasem save moa long Tok blong God. Mo taem yu kasem save moa, yu kam gud moa blong mekem samting we yu lanem i wok long laef blong yu. Seken samting se, taem yu givim ansa, yu laekem moa ol miting. Namba tri samting se, plante taem yu neva fogetem poen we yu talem long ansa blong yu.

8-9. (1) Olsem Malakae 3:16 i talem, ?Jehova i harem olsem wanem taem yumi givim ansa? (2) ?Be samfala oli fesem wanem yet?

⁸ Yu mekem Jehova i glad taem yu talemaot bilif blong yu. Yumi sua se Jehova i stap lesin long ol ansa we yumi givim long miting, mo hem i glad tumas from. (Ridim Malakae 3:16.) Hem i soemaot se hem i glad, taem hem i blesem yumi from we yumi traehad blong mekem hem i glad.—Mal. 3:10.

⁹ I klia nomo se, i gat plante gudfala risen blong ansa long ol miting. Be maet samfala oli fraet yet blong leftemap han blong olgeta. Sipos yu yu olsem, yu no mas harem nogud. I gud yumi luk sam vas blong Baebol, sam stori blong ol man blong God bifo, mo sam advaes we i save givhan long yumi blong traem ansa moa long ol miting.

10. (1) ?From wanem plante long yumi oli fraet blong ansa? (2) ?From wanem i gud blong fraet?

¹⁰ ?Yu yu harem se hat blong yu i pam taem yu wantem leftemap han blong yu? Sipos yes, i no yu wan nomo. Blong talem stret, bighaf blong yumi i fraet taem yumi givim ansa. Blong winim fraet ya, yu mas save fastaem samting we i mekem yu yu fraet. ?Yu yu fraet se bambae yu fogetem samting we yu wantem talem, o bambae yu talem wan rong ansa? ?Yu yu wari se bambae yu no givim wan gudfala ansa olsem ol narafala? Blong talem stret, i gud blong fraet olsem. Hemia i soemaot se yu gat tingting daon mo yu luk ol narafala se oli gud moa long yu. Jehova i laekem fasin ya.  (Sam 138:6; Fil. 2:3) Be Jehova i wantem tu se yu presem hem, mo yu leftemap tingting blong ol brata mo sista long miting. (1 Tes. 5:11) Hem i lavem yu mo bambae i mekem tingting blong yu i strong.

11. ?Wanem ol tok blong Baebol we i save givhan long yumi?

¹¹ Traem tingbaot sam vas blong Baebol. Baebol i talem se yumi evriwan i save mestem long ol toktok blong yumi. (Jem. 3:2) Jehova i save se yumi no stret olgeta, mo ol brata mo sista tu oli save samting ya. (Sam 103:12-14) Oli olsem ol famle blong yumi, mo oli lavem yumi. (Mak 10:29, 30; Jon 13:35) Oli kasem save se samtaem ol tok we yumi talem long ol ansa, i no kamaot stret olsem yumi wantem.

12-13. ?Stori blong Nehemaea mo Jona i tijim yumi long wanem?

¹² Tingbaot stori blong sam man blong God bifo, we oli save givhan long yu blong winim fraet. I gat Nehemaea we i wok long haos blong king. Nehemaea i harem nogud taem hem i kasem nius se stonwol mo ol get blong Jerusalem oli brobrok. (Neh. 1:1-4) !Traem tingbaot olsem wanem hat blong hem i pam taem king i askem long hem from wanem hem i harem nogud! Kwiktaem nomo Nehemaea i prea, mo i ansa long king. Nao king i glad blong mekem plante samting blong givhan long ol man blong God. (Neh. 2:1-8) Tingbaot Jona tu. Taem Jehova i askem long Jona blong i go prij long ol man Nineve, Jona i fraet mo i ronwe. (Jona 1:1-3) Be Jehova i givhan long Jona blong i winim fraet, nao hem i go prij long ol man Nineve. Mo ol tok blong hem i givhan gud long ol man ya. (Jona 3:5-10) Stori blong Nehemaea i tijim yumi se i impoten blong prea bifo we yumi givim ansa. Stori blong Jona i tijim yumi se Jehova i save givhan long yumi blong mekem wok blong hem, nating se yumi fraet bigwan. !Ating i no gat wan kongregesen tede we ol man blong hem oli save mekem yumi fraet, olsem ol man Nineve oli mekem Jona i fraet!

¹³ ?Wanem sam advaes we i save givhan long yu, blong yu givim ol ansa we oli leftemap tingting? Bambae yumi tokbaot.

14. ?From wanem yumi mas rere gud long ol miting, mo wetaem yumi save rere?

¹⁴ Rere gud. Sipos yu mekem plan mo yu rere gud, bambae yu no fraet tumas blong ansa. (Prov. 21:5) I tru, program blong yumi wanwan i no sem mak. Elois we i gat 80 yia mo i wan wido, i stat blong rerem Wajtaoa long ol fas dei blong wik. Hem i talem se: “Mi mi laekem moa ol miting taem mi stat eli blong rerem olgeta.” Joy we i wok fultaem, i stap makemaot taem long dei bifo long miting blong rerem Wajtaoa blong hem. Hem i se: “Mi wantem se ol save i stap klia long tingting blong mi.” Aek we i wan bisi elda mo paenia, i talem se: “Mi mi laekem blong stadi smoltaem evri dei, i bitim we mi stadi longtaem long wan dei nomo.”

15. ?Olsem wanem blong rerem miting?

 ¹⁵ ?Olsem wanem blong rerem miting? Bifo we yu stat blong stadi, yu prea long Jehova blong askem tabu spirit. (Luk 11:13; 1 Jon 5:14) Afta, yu tekem smoltaem blong lukluk long stadi, mo tingbaot taetel, ol smol stamba tok, ol pija, mo bokis blong tingting bak. Nao taem yu stadi long ol haf wanwan, ridim ol vas tu. Tingting dip long ol save ya, speseli long ol poen we yu wantem tokbaot long ol ansa blong yu. Sipos yu rere gud, bambae yu kasem plante gudfala samting long stadi, nao i isi moa blong yu givim ansa.—2 Kor. 9:6.

16. ?Wanem ol tul we oli save givhan, mo olsem wanem blong yusum olgeta?

¹⁶ Sipos yu yu naf, i gud yu yusum tablet o mobaelfon. Jehova i yusum ogenaesesen blong hem blong givim plante tul, blong halpem yumi blong rerem ol miting. Long mobaelfon o tablet, yu save daonlodem ol buk blong stadi long JW Laebri^®. Nao yu save stadi enitaem mo long eniples, o maet yu wantem ridim o lesin nomo long olgeta. Samfala oli yusum JW Laebri blong stadi long taem blong kakae long wok o skul, o taem oli stap long bas, sip, o plen. Mo tu, i gat Watchtower Library (long Inglis mo Franis) mo Wajtaoa LAEBRI LONG INTENET^™ we oli givhan blong mekem risej long ol poen long stadi we yu wantem save moa long olgeta.

17. (1) ?From wanem i gud blong rerem plante ansa? (2) ?Yu lanem wanem long video ya Kam Fren Blong Jehova—Rerem Ansa Blong Yu?

¹⁷ I gud yu traem rerem plante ansa. ?From wanem? From we i no evri taem yu leftemap han we brata bambae i jusum yu blong ansa. Bambae i gat plante narafala we oli leftemap han tu, mo maet hem i jusum wan long olgeta. Blong mekem se miting i finis long stret taem, brata bambae i no askem tumas man blong ansa long wan kwestin. Taswe yu no mas kros o harem nogud sipos hem i no singaot yu blong ansa long ol fas haf blong stadi. I gud yu rerem plante ansa, nao bambae yu gat moa janis blong givim ansa long miting. Yu save joenem wan vas tu long ansa blong yu. Mo i gud sipos yu rerem ansa long prapa toktok blong yu. *

18. ?From wanem i gud blong givim ansa we i sot?

¹⁸ Givim ansa we i sot. Plante taem, ol ansa we oli isi mo sot, oli leftemap tingting moa. Taswe i gud blong givim ol sot ansa nomo. Traem mekem se oli no bitim 30 seken. (Prov. 10:19; 15:23) Sipos yu stap givim ol ansa plante yia finis, yu gat wan impoten wok blong mekem, hemia blong soemaot gudfala eksampol blong givim ol ansa we oli sot. Sipos yu givim ol longlongfala ansa we oli fasfas, maet plante brata mo sista oli fraet blong  ansa, from we oli no save givim wan longfala ansa olsem. Mo tu, taem ol ansa oli sot, plante moa man oli save givim ansa. Sipos yu yu faswan blong ansa long wan kwestin, i impoten blong givim ansa we i isi mo i go stret long poen. Yu no mas traem blong tokbaot evri poen we i stap long haf ya. Afta we bigfala poen i kamaot klia, yu save givim ansa long sam narafala poen.—Luk bokis ya “?Mi Save Givim Wanem Ansa?”

19. ?Olsem wanem brata we i lidim miting i save givhan long yu, be yu mas mekem wanem?

¹⁹ Talem long brata we i lidim miting wanem ansa we yu wantem givim. Sipos yu wantem mekem olsem, i gud yu talem long brata we i lidim Wajtaoa Stadi bifo we miting i stat. Taem yufala i kasem stret haf we yu wantem ansa long hem, yu leftemap han i go antap kwiktaem, blong brata we i lidim miting i save luk klia.

20. ?Olsem wanem miting i olsem kakae we yumi serem wetem ol fren?

²⁰ Traem tingbaot miting olsem wan kakae we yu serem wetem ol gudfala fren. Sipos sam fren long kongregesen oli singaot yu blong go kakae wetem olgeta, mo oli askem long yu blong karem wan smol kakae i kam, ?bambae yu mekem wanem? Maet yu wari smol, be ating bambae yu mekem bes blong yu blong tekem wan samting we evriwan oli harem gud long hem. Jehova i singaot yumi blong kam kakae long ol miting, mo hem i rerem finis plante gudfala samting. (Sam 23:5; Mat. 24:45) Hem i glad taem yumi karem wan smol presen i kam, we i beswan blong yumi. Taswe yu mas rere gud mo no fraet blong givim ansa. Sipos yu mekem olsem, bambae yu yu kakae long tebel blong Jehova, mo tu, bambae yu karem wan smol presen i kam blong serem wetem kongregesen.