1-2. ?Enjel i talem wanem long ol woman long beregraon blong Jisas? ?Mo Jisas i talem wanem long olgeta?

LONG namba 16 Nisan long yia 33, long eli moning, sam woman we oli ona gud long God oli harem nogud tumas, taem oli stap wokbaot i go long hol blong ston we ol man oli putum bodi blong Jisas long hem tri dei bifo. Oli go blong putum oel mo lif we i smel gud long bodi blong Jisas. !Be oli sek se beregraon i emti! Wan enjel i talem long olgeta se Jisas i laef bakegen finis, mo i se: “Hem i stap go fastaem long Galili. Bambae yufala i luk hem longwe.”—Mat. 28:1-7; Luk 23:56; 24:10.

² Taem oli aot long beregraon, Jisas i kamtru long olgeta mo i talem se: ‘Yufala i go talem long ol brata blong mi se oli save go long Galili, mo long ples ya, bambae oli luk mi.’ (Mat. 28:10) !Fas samting we Jisas i mekem afta we hem i laef bakegen, hem i go mitim ol disaepol blong hem! !Hem i mas gat sam impoten samting blong talem long olgeta!

3-4. ?Olsem wanem yumi save se tok blong Jisas long Matiu 28:19, 20 i no go long ol aposol nomo? (Yu luk pija long fran pej.)

³ Ridim Matiu 28:16-20. Taem Jisas i mitim ol disaepol blong hem, hem i tokbaot impoten wok we oli mas mekem, mo  we yumi tu yumi mas mekem tede, i se: “Yufala i mas go long ol man blong olgeta neson, yufala i pulum olgeta oli kam disaepol blong mi, . . . mo yufala i tijim olgeta blong oli folem olgeta tok ya we mi mi talem finis long yufala.”

⁴ Jisas i no talem tok ya long ol 11 gudfala aposol blong hem nomo. Hem i wantem se olgeta man blong hem oli prij. ?Olsem wanem yumi save samting ya? Taem Jisas i talem tok ya antap long wan hil long Galili, i no ol aposol nomo we oli stap. Enjel i talem long ol woman ya se: “Bambae yufala i luk hem [long Galili].” Taswe i mas gat ol woman tu oli stap. Mo tu, aposol Pol i talem se Jisas i “kamtru long bitim faef handred brata long semtaem nomo.” (1 Kor. 15:6) ?Jisas i kamtru wetaem long olgeta ya?

5. ?Olsem wanem yumi save se 1 Korin 15:6 i tokbaot taem ya we Jisas i mitim olgeta antap long hil long Galili?

⁵ I luk olsem se, long 1 Korin 15:6, Pol i stap tokbaot taem ya we Jisas i mitim olgeta antap long hil ya long Galili, olsem Matiu 28 i tokbaot. ?Olsem wanem yumi save? Fas samting se: Plante long ol disaepol blong Jisas oli man Galili. Taswe i stret blong ting se Jisas bambae i mekem wan bigfala miting olsem antap long wan hil long Galili. Namba tu samting: Jisas i mekem miting finis wetem ol 11 aposol blong hem long Jerusalem. Sipos hem i wantem se ol aposol ya nomo oli pulum ol man oli kam disaepol, hem i save talem long olgeta long Jerusalem. I no nid blong hem i talem se oli mas go mitim hem long Galili, wetem ol woman mo sam narafala.—Luk 24:33, 36.

6. ?Olsem wanem Matiu 28:20 i soemaot se tok blong Jisas i go long yumi tede? ?Olsem wanem yumi obei long tok ya?

⁶ Namba tri samting: Jisas i no givim wok ya long ol fas Kristin nomo. ?Olsem wanem yumi save? Las samting we Jisas i talem long ol man blong hem se: “Mi bambae mi stap wetem yufala oltaem, gogo kasem en blong wol.” (Mat. 28:20) !Tok ya blong Jisas i tru tumas! !Tede ol man blong hem oli ful swing long wok blong mekem disaepol! !Evri yia, klosap 300,000 man oli kam disaepol blong Jisas, mo oli baptaes!

7. ?Bambae yumi tokbaot wanem, mo from wanem?

⁷ Plante man we oli stadi Baebol, oli gohed gud mo oli baptaes. Be samfala oli fraet blong kam disaepol blong Jisas. Oli laekem blong stadi, be oli no gohed go kasem we oli baptaes. Sipos yu stadi wetem wan man, i sua se yu wantem givhan long hem blong i folem ol samting we hem i lanem, mo i kam wan disaepol. Wajtaoa ya bambae i tokbaot olsem wanem blong halpem ol man we oli stadi, blong oli lavem Jehova mo oli gohed gud. ?From wanem i gud yumi tokbaot samting ya? From we maet yu mas mekem desisen blong stopem stadi blong wan man.

8. ?From wanem i had blong givhan long sam man blong oli lavem Jehova?

⁸ Jehova i wantem se man i wosipim hem from we i lavem hem. Taswe yumi mas halpem man we i stadi blong i kasem save se Jehova i tingbaot yumi wanwan mo i lavem yumi. Yumi wantem se hem i tingbaot Jehova olsem Papa blong ol pikinini we oli no gat man blong lukaot long olgeta, mo hem i mekem i gud tu long ol wido. (Sam 68:5) Taem hem i kasem save se Jehova i lavem hem tumas, samting ya bambae i tajem hat blong hem, nao sloslo bambae hem i lavem Jehova. I had blong samfala oli tingbaot Jehova olsem wan Papa we i lavem olgeta, from we maet stret papa blong olgeta i no  soemaot lav. (2 Tim. 3:1, 3) Sipos i olsem, taem yu mekem stadi, yu mas makem gud ol nambawan fasin blong Jehova. Givhan long hem blong i kasem save se God i wantem we hem i kasem laef olwe, mo bambae i givhan long hem blong mekem olsem. ?I gat sam narafala samting tu we yumi save mekem?

9-10. ?Wanem tufala buk we yumi mas yusum blong mekem ol Baebol stadi, mo from wanem?

⁹ Yusum tufala buk ya “?Baebol i Tijim Wanem?” mo ‘Stap Long Laef Ya We God i Lavem Yu.’ Tufala buk ya i blong halpem ol man we yumi stadi wetem olgeta, blong oli lavem Jehova. Long Japta 1 blong buk ya Tijim Wanem, oli save faenem ansa blong ol kwestin ya: ?Ol trabol oli olsem panis we God i givim? ?God i harem nogud taem man i safa? ?Yu save kam fren blong Jehova? Buk ya ‘God i Lavem Yu’ i givhan long ol man blong oli save olsem wanem blong folem ol tok blong Baebol long laef blong olgeta, mo kam klosap long Jehova. Nating se yu stadi finis wetem samfala long tufala buk ya, be taem  yu gat wan niufala stadi, yu mas rerem buk bakegen, mo tingbaot olsem wanem blong yusum save ya blong givhan long hem.

¹⁰ ?Be olsem wanem sipos man we yu stadi wetem hem i askem wan kwestin we i no stap long tufala buk ya? Maet yu save pulum hem blong i ridim narafala buk we ansa i stap long hem. Olsem nao, yu save gohed blong mekem stadi wetem hem long wan long tufala buk ya.

11. ?I gud yumi stat wetaem blong openem mo klosem stadi wetem prea? ?Olsem wanem blong eksplenem se prea i impoten?

¹¹ Openem stadi wetem prea. I gud yumi no tektaem tumas blong openem mo klosem stadi wetem prea, maet sam wik nomo afta we yu statem stadi. Oli mas luksave se yumi dipen long tabu spirit blong kasem save long Tok blong God. Samfala oli ridim Jemes 1:5 blong eksplenem from wanem yumi prea. Vas ya i talem se: “Sipos wan long yufala i sot long waes, i gud hem i gohed blong askem long God.” Nao oli askem long man we i stadi se: “?Olsem wanem yumi askem long God blong i givim waes?” Bambae hem i ansa se yumi mas prea long God.

12. ?Olsem wanem yu save yusum Ol Sam 139:2-4 blong halpem wan man blong kam gud moa long ol prea blong hem?

¹² Tijim hem blong i prea. Talem long hem se Jehova i wantem we hem i prea wetem fulhat blong hem. Eksplenem se long ol prea blong hem, hem i save talemaot evri samting long Jehova, hemia ol samting we maet i had blong talem long wan narafala man. Blong talem stret, Jehova i save finis evri samting we i stap long hat blong hem. (Ridim Ol Sam 139:2-4.) Mo tu, yumi save pulum hem blong i askem help blong God blong sakemaot ol nogud tingting mo fasin. Wan eksampol: Nating se hem i stadi longtaem lelebet, be hem i gohed blong mekem lafet blong Krismas. Hem i save se i rong from we i kamaot long giaman wosip, be hem i laekem yet. Yu save pulum hem blong i talemaot klia ol tingting blong hem long Jehova, mo i plis long hem blong i halpem hem blong laekem nomo ol samting we Jehova i laekem.—Sam 97:10.

13. (1) ?From wanem yu no mas tektaem tumas blong singaot hem i kam long miting? (2) ?Olsem wanem blong mekem se hem i no fraet blong kam long miting?

¹³ Yu no tektaem tumas blong singaot hem i kam long miting. Ol tok we hem i harem long ol miting i save pulum hem blong i wantem mekem wok blong Jehova, mo gohed gud long trutok. I gud hem i luk video ya ?Wanem i Stap Hapen Insaed Long Haos Kingdom? mo yu singaot hem i kam wetem yu long miting. Sipos yu gat wan trak, yu save tekem hem i go. I gud tu blong tekem ol narafala pablisa oli go wetem yu long stadi blong hem. Olsem nao bambae hem i save plante long kongregesen, nao bambae hem i no fraet blong kam long miting.

14. ?Wanem i save givhan long Baebol stadi blong i gohed gud?

¹⁴ Yumi wantem se Baebol stadi blong yumi i gohed gud. (Efes. 4:13) Taem wan man i stat blong stadi Baebol, maet hem i stap tingbaot nomo olsem wanem stadi ya bambae i givhan long laef blong hem. Be taem hem i lavem Jehova moa, bambae hem i tingbaot olsem wanem hem i save givhan long ol narafala, wetem olgeta insaed long kongregesen tu. (Mat. 22:37-39) Long taem we yu luk se i stret, yu no mas fraet blong tokbaot janis we yumi evriwan i gat, blong givim presen mane blong sapotem wok blong Kingdom.

15. ?Olsem wanem blong tijim Baebol stadi blong i stretem ol problem?

 ¹⁵ Tijim hem blong i stretem ol problem. Traem tingbaot sipos stadi blong yu i wan pablisa we i no baptaes yet, nao i talem se hem i harem nogud long samting we narafala long kongregesen i mekem long hem. Long taem olsem, i moa gud yu eksplenem samting we Baebol i talem se hem i save mekem, i bitim we yu agri wetem hem mo yu agensem narafala brata. I gat tu rod: Hem i save fogivim brata ya mo fogetem trabol ya, sipos no, hem i save go luk hem blong storian long kaen fasin, wetem tingting blong ‘givhan long hem.’ (Skelem wetem Matiu 18:15.) I gud yu givhan long hem blong i rerem ol tok we bambae hem i talem. Soemaot long hem olsem wanem blong yusum JW Library,^® Buk Blong Mekem Risej, mo jw.org,^® blong i save rod blong stretem trabol ya. Sipos hem i lanem blong stretem ol problem bifo we hem i baptaes, bambae hem i fren gud wetem ol narafala long kongregesen afta long baptaes.

16. ?From wanem i gud blong singaot sam narafala pablisa blong oli joen long stadi?

¹⁶ Singaot samfala long kongregesen mo eria elda tu, blong oli joen long stadi. ?From wanem i gud blong mekem olsem? Antap long ol risen we yumi tokbaot finis, maet oli save givhan long Baebol stadi ya long sam rod we yumi no naf blong givhan long hem. Traem tingbaot sipos hem i stap traehad blong lego sigaret, be hem i no save winim. Yu save askem long wan Witnes we hem tu i gat sem problem bifo, blong i joen long stadi. Maet hem i save givim sam gudfala advaes. Sipos yu fraet blong lidim stadi long fored blong brata ya, yu save askem long hem blong i lidim. Man we i stadi i save lanem plante samting long ol narafala we oli winim trabol long laef blong olgeta. Yu no mas fogetem se yu wantem givhan long Baebol stadi blong i gohed gud.

17-18. ?Blong mekem desisen blong stopem wan stadi, yu mas tingbaot wanem?

¹⁷ Sipos yu luk se man we i stadi i no mekem sam jenis long laef blong hem, maet i moagud we yu stopem stadi. Blong mekem desisen ya, yu mas tingbaot sipos hem i kwik blong lanem samting o i slo. Yu save askem se: ‘?Nating se man ya i slo bitim ol narafala, be hem i stap mekem sam jenis?’ ‘?Hem i stap traehad blong “folem” samting we hem i lanem?’ (Mat. 28:20) Nating se hem i slo, be hem i mas mekem sam jenis long laef blong hem.

¹⁸ ?Be olsem wanem sipos man i stadi longtaem lelebet be i no gohed gud? !Maet hem i finisim buk ya Tijim Wanem mo i statem ‘God i Lavem Yu,’ be hem i no kam long miting, mo i no kam long Memoriol tu! Mo plante taem hem i mestem stadi from ol smosmol samting nomo. Sipos i olsem, i gud yu toktok stret long hem, mo talem se bambae yutufala i stop fastaem. *

19. ?Maet yu askem wanem long Baebol stadi we i no gohed gud, mo yu mas tingbaot wanem?

 ¹⁹ Fastaem yu save askem long hem se: ‘?Wanem samting we yu luk se i had blong jenisim, blong kam wan Witnes blong Jehova?’ Maet hem i ansa se: ‘!Mi laekem stadi Baebol, be bae mi neva kam wan Witnes blong Jehova!’ Sipos hem i gat tingting olsem afta we hem i stadi longtaem lelebet, ating i gud yu stopem stadi. Be sipos hem i talemaot samting we i stap blokem hem, maet i defren. Ating hem i harem se neva bambae hem i naf blong prij long ol haos wanwan. Naoia yu save samting we i stap blokem hem, mo yu save givhan long hem.

20. ?Olsem wanem Ol Wok 13:48 i save halpem yu blong mekem desisen blong stopem wan stadi?

²⁰ Sore tumas, be sam man we oli stadi oli olsem ol man Isrel long taem blong Esikel. Long saed blong olgeta, Jehova i talem long Esikel se: “Oli stap luk yu olsem we yu wan man we i stap plei long gita, i stap singsing long ol sing blong switat, mo voes blong hem i naes we i naes. Oli stap lesin long ol tok blong yu, be oli no obei long hem nating.” (Esik. 33:32) Maet i had blong talem long wan man se bambae yu stopem stadi. Be yu mas tingbaot se, “taem we i stap yet i sot tumas.” (1 Kor. 7:29) Taswe yu no save westem taem blong stadi wetem man we i no gohed gud. Be yu mas go lukaot olgeta we oli “stret blong kasem laef we i no save finis.”—Ridim Ol Wok 13:48.

21. ?Wanem stamba vas blong yia 2020? ?Olsem wanem vas ya bambae i givhan long yumi?

²¹ Stamba vas blong yia 2020 bambae i givhan long yumi blong kam gud moa long wok blong pulum ol man oli kam disaepol. Jisas i talem ol tok long vas ya long ol disaepol blong hem antap long wan hil long Galili, i se: ‘Yufala i mas go long ol man, pulum olgeta oli kam disaepol, mo baptaesem olgeta.’—Mat. 28:19.