1, 2. ?From wanem yumi tokbaot samting we i save givhan long man we i stap krae? (Yu luk pija long stat blong stadi.)

SUSI i talem se: “Taem boe blong mitufala i ded, mitufala i harem nogud bitim mak blong klosap wan yia, mo hat blong mitufala i soa.” Wan brata we i sek se woman blong hem i ded, i talem se bodi blong hem “i soa bitim mak” we hem i no save eksplenem. Sore tumas, plante man oli harem nogud olsem, taem wan we oli lavem hem i ded. Plante brata mo sista tede oli neva ting se wan famle blong olgeta bambae i ded bifo we Amagedon i kam. Yu tu, maet yu stap harem nogud tumas from wan we yu lavem hem i ded, no maet yu save wan narafala we i harem nogud olsem. Maet yu stap tingbaot se: ‘?Olsem wanem mi save harem gud bakegen?’

² Samfala oli talem se, afta we sam taem i pas, bambae yu harem gud bakegen. ?Be tok ya i tru? Wan woman we man blong hem i ded, i talem se: “Ating i moa stret blong talem se, samting we yu mekem wetem taem blong yu, hemia nao samting we i save mekem yu yu harem gud bakegen.” Taem yu  kasem wan kil, yu letem taem i pas mo yu kea gud long kil ya. Long sem fasin, taem yu harem nogud tumas, yu letem taem i pas, mo tu, yu nidim ol narafala we oli kea gud long yu, blong mekem filing blong yu i kam gud. ?Wanem sam samting we oli save givhan long yu?

3, 4. ?Olsem wanem yumi save se Jehova i kasem save long filing blong yumi?

³ Papa blong yumi Jehova, i gat sore, mo hem nao i faswan blong givhan long yumi taem yumi nidim. (Ridim 2 Korin 1:3, 4.) I no gat wan narafala man we i kasem save long filing blong yumi, olsem Jehova. Hem i promes long ol man blong hem se: “!Mi nao mi stap mekem yufala i strong!”—Aesea 51:12; Ol Sam 119:50, 52, 76.

⁴ Sam gudfala fren blong Jehova tu oli ded, olsem Ebraham, Aesak, Jekob, Moses, mo King Deved. (Namba 12:6-8; Matiu 22:31, 32; Ol Wok 13:22) Baebol i soemaot se Jehova i wantem tumas we taem ya i kam kwik, blong mekem ol gudfala man ya we hem i lavem olgeta, oli laef bakegen. (Job 14:14, 15) Bambae oli glad mo bodi blong olgeta bambae i stret gud. Fasbon pikinini blong Jehova tu i ded. Baebol i talem se Pikinini ya Jisas, i ‘stap mekem Papa blong hem i glad’ oltaem. (Ol Proveb 8:22, 30) Yu traem tingbaot olsem wanem Jehova i mas harem nogud bitim mak, blong luk pikinini blong hem i safa gogo hem i ded.—Jon 5:20; 10:17.

5, 6. ?Jehova i save yusum wanem blong mekem yumi harem gud?

⁵ Yumi save bilif strong se Jehova bambae i givhan long yumi. Taswe yumi no mas fraet blong prea long hem blong talemaot ol filing blong yumi, taem yumi harem nogud tumas. !I gud tumas blong save se Jehova i kasem save long filing blong yumi, mo bambae i givhan long yumi olsem yumi nidim! ?Hem i givhan long yumi olsem wanem?

⁶ Wan rod we Jehova i yusum, hemia tabu spirit. (Ol Wok 9:31) Jisas i promes se Papa blong hem bambae i givim bigfala paoa ya long olgeta we oli askem. (Luk 11:13) Susi, we yumi tokbaot hem finis, i talem se: “Plante taem, mitufala i nildaon mo krae long Jehova blong i mekem mitufala i harem gud. Evri taem, pis we hem i givim, i lukaot gud long hat mo tingting blong mitufala.”—Ridim Filipae 4:6, 7.

7, 8. ?From wanem yumi save se Jisas bambae i leftemap tingting blong yumi?

⁷ Taem Jisas i stap long wol, ol toktok mo fasin blong hem oli sem mak long ol nambawan toktok mo fasin blong Papa blong hem. (Jon 5:19) Jehova i sanem Jisas i kamdaon long wol, blong i leftemap tingting blong “ol man we tingting blong olgeta i foldaon,” mo “olgeta we oli harem nogud, oli stap krae.” (Aesea 61:1, 2; Luk 4:17-21) Taem ol man oli kasem trabol, oli haremsave se Jisas i kea long olgeta, mo i wantem tumas blong givhan long olgeta.—Hibrus 2:17.

 ⁸ Ating sam famle mo fren blong Jisas oli ded taem hem i yangfala nomo. I luk olsem se wan long olgeta, hemia Josef we i adoptem hem. * Traem tingbaot olsem wanem Jisas i harem nogud long taem ya. Mo tu, ating i had blong hem i luk mama blong hem, mo ol brata mo sista blong hem, oli harem nogud.

9. Taem Lasaros i ded, ?olsem wanem Jisas i soemaot se hem i kasem save filing blong Meri mo Mata?

⁹ Taem Jisas i stap prij, hem i soemaot se hem i kasem save filing blong ol man, mo i sore long olgeta. Traem tingbaot taem ya we gudfala fren blong hem Lasaros i ded. Jisas i kasem save filing blong Meri mo Mata, taem tufala i harem nogud tumas. Nating we hem i save se bambae i mekem Lasaros i laef bakegen, be hem tu i krae.—Jon 11:33-36.

10. ?Olsem wanem yumi save se Jisas i kasem save filing blong yumi tede?

¹⁰ ?Olsem wanem ol gudfala toktok we Jisas i talem long taem bifo, oli save givhan long yumi tede? Baebol i talem se: “Jisas Kraes i no jenis, hem i sem mak yestede, tede, mo bambae hem i stap sem mak olsem blong olwe.” (Hibrus 13:8) Baebol i talem se hem i “Nambawan Man blong givim laef,” from we hem i mekem rod blong yumi save kasem laef blong olwe. Mo tu, Jisas i harem nogud taem ol famle mo fren blong hem oli ded, taswe hem i kasem save filing blong ol narafala, mo “hem i naf blong givhan long olgeta we ol samting oli stap traem olgeta.” (Ol Wok 3:15; Hibrus 2:10, 18) From samting ya, yumi save se Jisas i harem nogud taem hem i luk wan narafala i krae. Hem i kasem save filing blong hem, mo i save leftemap tingting blong hem “long stret taem” we hem i nidim.—Ridim Hibrus 4:15, 16.

11. ?Wanem ol vas we oli save leftemap tingting blong yu?

¹¹ Stori blong Lasaros i wan nomo long ol stori long Baebol we oli mekem yumi harem gud. Yumi no sapraes long samting ya, from we “olgeta tok we oli raetem bifo, oli blong tijim yumi. Nao yumi save gat hop from we ol tok blong Baebol oli mekem yumi harem gud mo oli mekem se yumi save stanap strong longtaem.” (Rom 15:4) Sipos yu tu yu stap krae from wan man we i ded, ol vas blong Baebol oli save mekem yu yu harem gud bakegen. Tingbaot sam long ol vas ya:

• “[Jehova] i stap klosap long ol man we tingting blong olgeta i kam nogud, i stap sevem ol man we tingting blong olgeta i foldaon.”—Ol Sam 34:18, 19.

• “[Jehova], taem we mi mi wari, mo mi stap tingting tumas, oltaem yu mekem tingting blong mi i kam gud bakegen, yu stap mekem mi mi glad.”—Ol Sam 94:19.

• “God ya we i Papa blong yumi, hem i lavem yumi, mo from we hem i kaen tumas, hem i save mekem yumi harem gud blong olwe, mo hem i givim gudfala hop long yumi. Mifala i prea se hem mo  Masta blong yumi Jisas Kraes, tufala i mekem yufala i harem gud mo tufala i mekem yufala i strong.”—2 Tesalonaeka 2:16, 17. *

12. ?Olsem wanem yu save leftemap tingting blong narafala?

¹² Kristin kongregesen tu i save leftemap tingting blong olgeta we oli stap krae. (Ridim 1 Tesalonaeka 5:11.) ?Yu yu save mekem wanem blong givhan long olgeta we ‘tingting blong olgeta i kam nogud’? (Ol Proveb 17:22) Yu mas tingbaot se i gat wan stret taem blong “stap kwaet” mo wan stret taem blong “tok.” (Prija 3:7) Dalin, we man blong hem i ded finis, i talem se olgeta we oli stap krae oli mas talemaot tingting mo filing blong olgeta. Taswe, i impoten blong lesin gud long olgeta, mo yu no katem toktok blong olgeta. Junia, we brata blong hem i kilim hem wan i ded, i talem se: “Maet yu no kasem save fulwan long filing blong olgeta, be samting we i impoten se, yu traehad blong kasem save.”

13. ?Yumi mas tingbaot wanem?

¹³ Yumi mas tingbaot tu se yumi evriwan i gat defdefren fasin blong soemaot se yumi harem nogud. Baebol i talem se: “Sipos samting i spolem tingting blong wan man, man ya nomo i save harem nogud from samting ya, narafala man i no save harem nogud olsem. Mo long sem fasin, sipos samting i mekem man i harem gud, hem nomo i save harem gud.” (Ol Proveb 14:10) Taem wan man i talemaot filing blong hem, i no isi blong ol narafala oli kasem save.

14. ?Yumi save talem wanem blong leftemap tingting blong olgeta we oli stap krae?

¹⁴ Plante taem, i had blong faenem ol stret tok blong talem long man we i stap krae. Be Baebol i talem se: “Tok we i waes i save mekem man i harem gud.” (Ol Proveb 12:18) Buklet ya, Taem Wan We Yu Laekem Hem Tumas i Ded, i givhan long plante man blong oli faenem ol stret tok. * Plante taem, i moa gud yu krae nomo wetem man we i stap krae. (Rom 12:15) Gabi, we man blong hem i ded, i talem se samtaem hem i krae from we i harem se i no gat narafala rod blong soemaot ol filing blong hem. Hem i talem tu se: “Mi harem gud moa taem ol fren oli krae wetem mi. I moa gud i bitim we mi stap krae mi wan nomo.”

15. Sipos i had blong yu talem wan samting, ?yu save mekem wanem? (Yu luk bokis ya “ Ol Gudfala Tok Blong Leftemap Tingting.”)

¹⁵ Sipos i had blong yu talem wan samting long man we i stap krae, maet yu sanem wan kad, wan imel, wan teks mesej, o wan leta. Yu save raetem wan gudfala vas we i leftemap tingting, talem wan gudfala fasin blong man we i ded, o tokbaot wan hapi taem we yu bin serem wetem hem. Junia i talem se: “Mi laekem tumas taem mi kasem wan sot mesej we i  leftemap tingting blong mi, no wan narafala Kristin i askem long mi blong mi spenem taem wetem hem. Hemia i givhan moa long mi, i bitim ol narafala samting. Mi harem se narafala i lavem mi mo i tingbaot mi.”

16. ?Wanem wan gudfala rod blong leftemap tingting blong man we i krae?

¹⁶ Ol prea blong yumi oli save givhan long ol brata mo sista we oli stap krae. Yumi save prea from olgeta, no yumi prea wetem olgeta. Maet yu harem se bambae yu krae taem yu prea. Be i oraet nomo. Prea we i kamaot long hat i gat bigfala paoa blong mekem narafala i harem gud. Dalin i talem se: “Taem sam sista oli kam blong leftemap tingting blong mi, plante taem mi askem long olgeta sipos oli save mekem wan prea. Long stat blong prea oli wantem krae, be taem oli gohed, voes blong olgeta i kam strong, nao oli talem wan nambawan prea we i kamaot long hat blong olgeta. Bilif blong mi i kam strong taem mi haremsave se oli lavem mi, oli wari long mi, mo oli soemaot strong bilif.”

17-19. ?From wanem yumi mas gohed nomo blong leftemap tingting?

¹⁷ Yumi no save se wan man we i stap krae bambae i harem nogud kasem wetaem, from we yumi evriwan i defdefren. Taem wan man i ded, ol fren mo famle oli stap blong leftemap tingting. Be taem oli gobak, man we i stap krae i nidim yet we narafala i leftemap tingting blong hem. Taswe i gud yu gohed blong givhan long hem. Baebol i talem se: “Wan tru fren i lavem yu oltaem nomo, mo hem i olsem wan brata we i rere blong givhan long taem blong trabol.” (Ol Proveb 17:17,  NW) Yumi mas gohed blong leftemap tingting blong olgeta, gogo oli harem gud bakegen.—Ridim 1 Tesalonaeka 3:7.

¹⁸ Samtaem yu sek se man we i harem nogud, i stat blong krae. Maet samting ya i hapen long wan spesel dei, olsem dei we i makem mared blong hem, no taem hem i harem wan miusik, no i lukluk sam foto, no i mekem wan wok we i bin mekem wetem hemia we i ded. Sam smel mo noes tu oli save mekem hem i krae, mo ol defdefren taem blong yia we tufala i bin mekem wan samting tugeta. Taem man i ded, maet woman blong hem i harem nogud tumas blong mekem samting hem wan, olsem go long wan asembli no long Memoriol. Wan brata i talem se: “Mi save se bambae i no isi nating long dei we i makem mared blong mitufala. Be sam brata mo sista oli singaot ol gudfala fren blong mi, mo mifala i joen wanples, nao mi no stap mi wan.”

¹⁹ Olgeta we oli stap krae, oli nidim man blong leftemap tingting oltaem, i no long ol spesel dei nomo. Junia i talem se: “I gud tumas blong joen wetem ol narafala enitaem, i no long taem we i gat wan lafet nomo. Ol taem olsem, we mi no plan from, oli leftemap tingting blong mi bigwan.” I tru se yumi no save tekemaot ol filing blong harem nogud we narafala i gat, mo filing blong stap hem wan, be yumi save mekem sam samting blong givhan long hem. (1 Jon 3:18) Gabi i talem se: “Mi talem tangkiu tumas long Jehova from ol gudfala elda we oli stap wetem mi evritaem we mi harem nogud tumas. Oli mekem mi mi harem olsem se Jehova i putum han blong hem i goraon long mi, mo i holemtaet mi.”

20. ?From wanem yumi harem gud long ol promes blong Jehova?

²⁰ Yumi harem gud blong save se God ya we i stap leftemap tingting blong man, Jehova, bambae i finisim krae fulwan, taem i mekem ol dedman oli laef bakegen. (Jon 5:28, 29) Hem i promes se “ded bambae i go lus olgeta. Bambae hem i ravemaot wota blong ae” blong olgeta man. (Aesea 25:8) Afta, bambae yumi no moa “krae wetem olgeta” we oli stap krae, be evriwan long wol bambae oli “glad wetem olgeta” we oli stap glad.—Rom 12:15.