Aposol Pol i save se ol giaman toktok blong Setan oli save spolem yumi. Be sam Kristin oli no luksave samting ya. I luk olsem se long Korin bifo, samfala we oli strong long trutok oli ting se Setan i no save winim olgeta. (1 Korin 10:12) Taswe, Pol i givim woning long olgeta se: “Mi mi fraet se tingting blong yufala bambae i kam nogud olsem Iv we snek i trikim hem nao i pulum hem. Ale bambae yufala i lego gudfala fasin ya we yufala i stap lavem Kraes mo we yufala i stap klin from hem.”—2 Korin 11:3.

Ol tok blong Pol oli soemaot se yumi no mas trastem yumi tumas. Blong winim faet ya agensem Setan, yumi mas luksave se ol giaman toktok blong hem oli save spolem yumi, mo yumi mas lukaot gud.

Ol giaman toktok ya, hemia ol save we oli no stret, we narafala i save yusum blong trikim man, no blong givim rong tingting long hem, no blong pulum hem i go krangke. Wan buk (Propaganda and Persuasion) i talem se ol giaman toktok olsem oli “no sapotem ol rul we oli stret, oli spolem man, mo oli no stanap long stret fasin.” Plante man oli talem se ol tok ya i “twistim trutok, i trikim man, i pulum hem i go krangke, mo i kontrolem tingting blong hem.”

Ol giaman toktok ya oli nogud tumas, from we oli save pulum tingting blong yumi sloslo, we yumi no luksave nating. Hem i olsem wan posen gas we yumi no save luk mo smelem. Vans Pakad, we i stadi long fasin blong man, i talem se ol giaman toktok oli gat paoa long ol  samting we yumi mekem, “i bitim wanem we yumi tingbaot.” Wan narafala man we i gat save, i talem se ol giaman toktok i save pulum ol man, blong oli mekem samting we i krangke mo i denja tumas. Hem i stamba blong plante faet we oli kilimaot wan ful laen blong man, mo ol bigfala wo, mo ol trabol we samfala oli mekem long narafala from kala blong skin i defren no i blong wan defren skul.—Easily Led—A History of Propaganda.

Sipos ol man oli save yusum ol giaman toktok blong trikim yumi, be Setan i save mekem samting ya moa. Stat long taem we God i wokem man, Setan i wajem gud fasin blong man. Naoia, hem i kontrolem “fulwol,” taswe hem i save yusum eni samting blong mekem ol giaman toktok blong hem i kasem ol man. (1 Jon 5:19; Jon 8:44) Hem i yusum giaman toktok blong “blaenem tingting” blong plante man, mo blong “lidim olgeta man long wol oli go krangke.” (2 Korin 4:4; Revelesen 12:9) ?Olsem wanem yu save agensem ol giaman toktok blong hem?

Jisas i talem wan isi rod blong agensem ol giaman toktok, i se: “Bambae yufala i save trutok, mo trutok bambae i mekem yufala i kam fri.” (Jon 8:31, 32) Long taem blong faet, wan soldia i mas save weples blong kasem ol save we i tru, from we enemi bambae i talemaot ol giaman toktok blong trikim hem. Taswe, ?yumi save faenem trutok wea? Jehova i givim Baebol long yumi. Long Baebol, i gat evri save we yumi nidim blong faet agensem ol giaman toktok blong Setan.—2 Timoti 3:16, 17.

Setan i save samting ya. Taswe, hem i yusum wol blong pulum tingting blong yumi, mo blong blokem yumi, blong yumi no moa ridim Baebol mo stadi long hem. !Yu no mas foldaon long “ol giaman trik blong Setan”! (Efesas 6:11) I no naf blong save ol stamba trutok nomo. Yumi mas traehad blong kasem save moa long trutok. (Efesas 3:18) Wan man blong raetem buk, Nom Jomski, i talem se: “I no wan narafala man we bambae i putum trutok long tingting blong yu. Yu nomo yu mas faenemaot.” Taswe, i gud yu “stadigud long ol tok blong Baebol” blong “faenemaot” trutok.—Ol Wok 17:11.

Setan i no wantem se yu gat klia tingting mo yu kasem save long trutok we yu harem. ?From wanem? From we, sipos man i “no traehad blong faenemaot se wan samting i tru no i giaman,” ol giaman toktok oli save “trikim hem moa.” (Media and Society in the Twentieth Century) Taswe, yu no mas bilivim evri samting we yu harem. Yu mas tingting gud  fastaem. (Ol Proveb 14:15) God i wantem se yu “yusum gud tingting” blong yu blong “savegud mining” blong ol tok we yu harem.—Ol Proveb 2:10-15; Rom 12:1, 2.

Ol soldia we oli lesin long ol giaman toktok, oli fraet nao oli no moa wantem faet. Maet oli stat blong rao wetem ol narafala soldia, no oli no moa wantem joen wetem olgeta. Wan jenerol long ami blong Jemani, i talem se hemia nao wan risen from wanem Jemani i lusum faet long Wol Wo Wan. Ol man oli lesin tumas long ol giaman toktok gogo oli no moa save yusum tingting blong olgeta. Setan i yusum trik ya tede blong mekem se ol Kristin oli no moa joen gud. Hem i traem blong mekem ol brata mo sista oli raorao, no oli ting se ogenaesesen blong Jehova i mekem i no stret, ale oli lego trutok.

!Yu no go krangke! Yu mas folem advaes blong Baebol, mo gohed blong joen gud wetem ol brata mo sista. Baebol i talem se yumi mas “glad blong fofogivim” yumi, mo yumi mas kwik blong stretem ol rao. (Kolosi 3:13, 14; Matiu 5:23, 24) Mo tu, Baebol i givim woning, se yumi no mas gowe long kongregesen mo stap yumi nomo. (Ol Proveb 18:1) Yu meksua se yu rere blong agensem ol giaman toktok blong Setan. Traem askem se: ‘Lastaem we wan brata i mekem mi mi harem nogud, ?mi mekem wanem? ?Mi mekem samting we God i glad long hem, no mi mekem Setan i glad?’—Galesia 5:16-26; Efesas 2:2, 3.

Wan soldia we i no trastem lida blong hem, i no save faet gud. Taswe ol enemi oli talem ol giaman toktok, blong mekem ol soldia oli no moa trastem ol lida blong olgeta. Sipos wan lida i mekem wan mastik, ol enemi bambae oli talem se: “!Yu luk! !Yu no save trastem hem!” no “!Bae yu ded sipos yu folem tingting blong hem!” Sem mak long Setan. Hem i wantem se yu no moa trastem olgeta we Jehova i yusum, blong lidim ol man blong hem.

?Yu save mekem wanem blong Setan i no winim yu? Yu mas gat strong tingting blong joen oltaem wetem ogenaesesen blong Jehova. Yu gohed blong sapotem olgeta we oli lidim ol man blong God mo obei long olgeta, nating se oli save mestem samtaem. (1 Tesalonaeka 5:12, 13) Ol man blong apostasi mo sam narafala man, oli save talem plante giaman toktok agensem ogenaesesen blong Jehova. (Taetas 1:10) Maet i luk olsem se tok blong olgeta i tru, be yu no mas letem tingting blong yu i kam  slak, mo yu no mas ‘hareap blong harem nogud.’ (2 Tesalonaeka 2:2) Be yu “gohed blong folem ol samting we yu lanem finis,” olsem Pol i talem long Timoti, from we “yu savegud ol man we oli tijim yu long hem.” (2 Timoti 3:14, 15) Traem tingbaot ol samting we i soemaot se, yu save trastem gudfala slef ya we Jehova i yusum klosap 100 yia finis, blong tijim yumi long trutok.—Matiu 24:45-47; Hibrus 13:7, 17.

Setan i save yusum wan narafala trik tu, hemia fraet. Wan buk (Easily Led—A History of Propaganda) i talem se, fraet i wan “rod we oli yusum longtaem finis i kam blong trikim man.” Filip Teila, wan profesa long Inglan, i talem se ol ami blong Asiria oli mekem ol enemi blong olgeta oli fraet tumas, nao i isi blong oli winim olgeta. Setan tu i yusum fraet blong traem winim yumi, olsem fraet long man, fraet se man bambae i kilim yumi, mo fraet blong ded.—Aesea 8:12; Jeremaea 42:11; Hibrus 2:15.

!Yu no mas letem Setan i mekem yu yu fraet! Jisas i talem se: “Yufala i no mas fraet long olgeta we oli save kilim bodi i ded, be biaen oli no moa save mekem wan samting long yufala.” (Luk 12:4) Yu mas trastem Jehova nomo, se bambae hem i holem promes blong hem blong lukaot gud long yu, mo blong givim “paoa ya we i bigwan bitim mak,” blong yu yu naf blong agensem Setan.—2 Korin 4:7-9; 1 Pita 3:14.

Samtaem, maet yu harem se yu fraet mo yu no moa gat paoa. I gud yu tingbaot ol tok ya we Jehova i talem blong leftemap tingting blong Josua, i se: “Tingting blong yu i mas strong, mo yu mas stanap strong oltaem. Yu yu no mas fraet, mo tingting blong yu i no mas foldaon, from we mi bambae mi stap wetem yu long weples bambae yu yu go long hem.” (Josua 1:9) Sipos yu fraet mo yu wari, yu mas prea kwiktaem long Jehova mo talemaot ol trabol blong yu long hem. Nao “pis ya blong God we i bigwan tumas i bitim olgeta save blong yumi, bambae i lukaot gud long hat mo tingting” blong yu. Nao bambae yu gat paoa blong agensem ol giaman toktok blong Setan.—Filipae 4:6, 7, 13.

?Yu yu tingbaot ol giaman toktok we man blong karem mesej blong ol ami blong Asiria i talem, blong mekem ol man blong God oli fraet? Hem i wantem mekem olgeta oli bilif se, i no gat wan man i save blokem Asiria, mo Jehova tu i no save blokem. Mo hem i gohed i se, Jehova nao i talem long olgeta blong oli spolem Jerusalem. Nao Jehova i toktok long ol man blong hem, i se: “Yu no fraet long ol man Asiria ya we oli stap tok nogud long mi, oli stap talem se mi mi no save sevem yufala.” (2 King 18:22-25; 19:6) !Nao Jehova i sanem wan enjel we i kilim i ded 185,000 soldia blong Asiria, long wan naet nomo!—2 King 19:35.

?Samtaem yu luk wan muvi we man i no kasem save se narafala i stap trikim hem? Ating yu wantem singaot long man ya se: ‘!Yu no bilivim hem! !Hem i stap giaman!’ Tingbaot: Ol enjel oli stap talem sem samting long yu, se: “!Yu no bilivim ol giaman toktok blong Setan! !Hem i stap trikim yu!”

Taswe, yu no mas lesin long ol giaman toktok blong Setan. (Ol Proveb 26:24, 25) Yu mas lesin long Jehova mo trastem hem oltaem. (Ol Proveb 3:5-7) Hem i lavem yu, mo hem i stap talem long yu se: “Pikinini blong mi . . . sipos yu kam waes, bambae mi glad we mi glad.” (Ol Proveb 27:11) !Olsem nao, bambae yu naf blong agensem ol giaman toktok we oli save spolem tingting blong yu!