1. ?Wanem wil blong Jehova tede?

 TEDE, wil blong God hemia se gud nius blong Kingdom i mas goaot long olgeta ples long wol. (Mak 13:10; 1 Tim. 2:3, 4) Hemia i wok blong Jehova, so i stret nomo we hem i jusum Boe blong hem we i lavem tumas, blong i lidim wok ya. Jisas i wan gudfala ovasia, taswe yumi save sua se wok blong prij bambae i finis gud olsem we Jehova i wantem, bifo we en i kam.—Mat. 24:14.

2. ?Bambae yumi tokbaot wanem long stadi ya?

² Long stadi ya, bambae yumi luk olsem wanem Jisas i yusum “gudfala slef we i waes” blong givim kakae long saed blong spirit mo oganaesem ol man blong hem blong oli mekem wok blong prij we i stap kam bigwan moa tede i bitim olgeta taem bifo. (Mat. 24:45) Mo tu, bambae yumi luk samting we yumi wanwan i save mekem blong sapotem Jisas mo gudfala slef ya.

3. ?Jisas i kasem wanem otoriti?

³ Jisas i stap lidim wok blong prij. ?Olsem wanem yumi save samting ya? Smoltaem bifo we hem i gobak long heven, Jisas i mit wetem sam man blong hem long wan hil long Galili. Hem i talem long olgeta se: “God i givim paoa long mi long olgeta samting long heven mo long wol.” Makem nekiswan samting we hem i talem: “Nao from samting ya, yufala i mas go long ol man long olgeta nesen, yufala i pulum olgeta oli kam disaepol blong mi.” (Mat. 28:18, 19) So antap long ol narafala samting ya, Jisas i bin kasem otoriti ya tu blong lidim wok blong prij.

4. ?From wanem yumi sua se Jisas i gohed yet blong lidim wok blong prij?

 ⁴ Jisas i talem se wok blong prij mo wok blong mekem disaepol bambae i gohed kasem “olgeta nesen” mo bambae hem i stap wetem ol man blong hem “oltaem, gogo kasem lashaf blong sistem blong wol.” (Mat. 28:20) Ol tok ya oli soemaot klia se Jisas bambae i gohed blong lidim wok blong prij kam kasem tede.

5. ?Olsem wanem yumi stap givhan blong mekem ol tok blong Ol Sam 110:3 i kamtru?

⁵ Jisas i no wari se long las haf blong sistem blong wol, bambae i no gat naf man blong wok. Hem i save gud se ol tok ya we man blong raetem sam i talem, bambae oli kamtru: “Ol man blong yu bambae oli glad nomo blong kam joen long dei we ol ami blong yu oli go faet.” (Sam 110:3) Sipos yu yu stap joen long wok blong prij, yu stap sapotem Jisas mo gudfala slef ya, mo yu stap givhan blong mekem profet tok ya i kamtru. Wok ya i stap gohed yet tede, be i gat sam traem tu.

6. ?Wanem wan traem we ol man blong talemaot Kingdom oli stap fesem tede?

⁶ Wan traem we ol man blong talemaot Kingdom oli fesem, hemia fasin agens. Ol apostasi, ol lida blong giaman skul, mo ol man blong politik, oli talem plante giaman tok long saed blong wok blong yumi. Sipos ol famle, ol fren, mo ol man long ples blong wok blong yumi oli bilivim ol giaman tok ya, maet hemia i save pulum olgeta blong traem stopem yumi blong yumi no moa prij mo wosipim Jehova. Long sam kantri, ol enemi blong yumi oli talem ol tok blong mekem ol brata mo sista blong yumi oli fraet, oli atakem o arestem olgeta, mo samtaem oli putum olgeta long kalabus. Yumi no sapraes long ol samting ya, from we Jisas i bin talem finis se: “Ol man blong olgeta nesen bambae oli no laekem yufala nating from we yufala i holem nem blong mi.” (Mat. 24:9) Taswe, taem yumi fesem ol trabol olsem, yumi save sua se Jehova i glad long yumi. (Mat. 5:11, 12) Setan nao i pulum ol man blong agensem yumi. !Be Jisas i strong moa i winim hem! From we Jisas i stap sapotem yumi, gud nius i stap goaot long olgeta man blong olgeta nesen. Bambae yumi luk sam pruf.

7. ?Wanem ol pruf we i soemaot se ol tok blong Revelesen 14:6, 7 i stap kamtru?

⁷ Wan narafala traem we yumi fesem taem yumi prij, hemia se ol man oli toktok plante defren lanwis. Long vison we Jisas i givim long aposol Jon, hem i talemaot se long taem blong yumi gud nius bambae i goaot long olgeta lanwis. (Ridim Revelesen 14:6, 7.) ?Olsem wanem samting ya i hapen? Yumi givim janis long plante man blong oli save akseptem mesej blong Kingdom. Tede, plante man raon long wol oli save go long websaet blong yumi long jw.org, blong ridim ol buk we i stanap long Baebol, from oli stap long bitim 1,000 lanwis. Hed kampani i apruvum blong oli transletem buk ya !Enjoem Laef Olwe! long bitim 700 lanwis, blong yumi save yusum blong mekem wok ya blong disaepol. Oli wokem plante video tu we i stanap long Baebol blong givhan long ol man we sora blong olgeta i fas, mo ol buk we oli wokem long braille blong givhan long ol blaenman. Yumi luk we ol profet tok blong Baebol oli stap kamtru. Ol man “we oli kamaot long olgeta lanwis blong ol nesen,” oli stap lanem blong toktok “klin lanwis” blong trutok. (Sek. 8:23; Sef. 3:9) Olgeta samting ya oli stap kamtru from we Jisas nao i stap lidim wok ya.

8. Kam kasem naoia, ?wanem gudfala frut i kamaot from wok blong prij we yumi mekem?

⁸ Tede, i gat bitim 8,000,000 man long 240 kantri we oli stap joen wetem oganaesesen  blong Jehova, mo evri yia i gat plante taosen man oli stap tekem baptaes. Be samting we i moa impoten i bitim namba, hemia se ol niufala disaepol ya oli stap wok had blong wokem “niufala fasin.” (Kol. 3:8-10) Plante oli stop blong mekem ol rabis fasin, vaelens, mo oli no moa agensem narafala from kantri o kala blong skin blong hem. Profet tok long Aesea 2:4 i stap kamtru, ol man ya oli “no moa lanem blong faet.” Taem yumi wok had blong putum niufala fasin, yumi stap halpem ol man blong kam long oganaesesen blong God, mo yumi pruvum se yumi stap folem ovasia blong yumi, Kraes Jisas. (Jon 13:35; 1 Pita 2:12) Ol samting ya oli no hapen olsem nomo, be Jisas nao i givhan long yumi.

9. ?Matiu 24:45-47 i talemaot se wanem bambae i hapen long taem blong en?

⁹ Ridim Matiu 24:45-47. Jisas i talem se long taem blong en, bambae hem i putumap wan “gudfala slef we i waes” blong i givim kakae long saed blong spirit. Mo i tru, tede slef ya i stap wok had. Jisas i yusum wan smol grup blong ol tabu man, blong halpem ol man blong God mo ol man we oli intres, blong oli kasem kakae long saed blong spirit “long stret taem blong hem.” Ol man ya oli no gat tingting ya se oli bos long bilif blong ol narafala. (2 Kor. 1:24) Be oli luksave se Jisas Kraes nao i ‘lida mo komanda’ blong ol man blong hem.—Aes. 55:4.

10. ?Weswan buk long pija ya we i pulum yu blong stat wosipim Jehova?

¹⁰ Stat long 1919, gudfala slef i rerem plante buk blong givhan long ol man we oli intres, blong lanem trutok blong Baebol. Long 1921, slef ya i wokem buk ya The Harp of God, blong halpem ol man we oli intres blong oli lanem ol stamba tijing blong Baebol. Taem ol yia oli pas, oli wokem plante moa buk. ?Weswan  buk nao i bin halpem yu blong kasemsave mo lavem Papa blong yumi long heven? Hemia buk ya “Let God Be True,” Trutok Blong Soemaot Rod Blong Itenel Laef, Yu Save Laef Foreva Long Paradaes Long Wol, Save Blong Lidim Yu long Laef We i No Save Finis, ?Wanem Samting We Baebol i Rili Tijim?, ?Baebol i Tijim Wanem?, o niufala buk ya !Enjoem Laef Olwe! Olgeta buk ya oli wokem blong halpem yumi blong mekem disaepol, mo oli kamaot long ol stret yia, folem nid blong ol man long taem ya.

11. ?From wanem i impoten we yumi evriwan i kasem kakae long saed blong spirit?

¹¹ I no ol niufala man nomo we oli intres we oli nidim blong tekem strong kakae long saed blong spirit. Yumi evriwan i nidim. Aposol Pol i raetem se: “Strong kakae i blong olgeta we oli kam bigman finis, hemia olgeta we oli yusum tingting blong olgeta oltaem, mo taem oli mekem olsem, oli trenem tingting blong olgeta blong luksave samting we i stret mo samting we i rong.” (Hib. 5:14) Naoia we rabis fasin i kam antap, hemia i save mekem se i had blong yumi obei long ol rul blong Jehova. Be Jisas i meksua se yumi kasem ol samting we yumi nidim blong gohed blong mekem bilif blong yumi i stap strong. Mo yumi kasem samting ya tru long Tok blong God, Baebol. Jisas i yusum gudfala slef blong rerem mo givimaot kakae we yumi nidim.

12. Olsem Jisas, ?wanem tingting blong yumi long saed blong nem blong God?

¹² Olsem Jisas, i stret nomo we yumi karem nem blong God we i givim ona i go long hem. (Jon 17:6, 26) Eksampol, long 1931 yumi karem nem ya Ol Witnes Blong Jehova, mo hemia i soemaot se nem ya i impoten tumas long yumi, mo yumi wantem se ol narafala oli save nem blong Papa blong yumi long heven. (Aes. 43:10-12) Mo long semfala yia ya long manis Oktoba, nem ya i stat blong kamaot oltaem long fored blong ol Wajtaoa blong yumi.  Mo tu, long Baebol Long Niu Wol Translesen oli putumbak nem blong God i go long ol ples we i sud stap long hem. Hemia i defren olgeta long plante giaman skul we oli karemaot nem blong Jehova long plante Baebol we oli transletem.

13. ?Wanem i mekem yu sua se Jisas i stap yusum “gudfala slef we i waes” tede? (Jon 6:68)

¹³ Tru long “gudfala slef we i waes,” Jisas i stanemap wan nambawan oganaesesen long wol we i leftemap tru wosip. ?Wanem tingting blong yu long oganaesesen ya? Maet yu yu gat sem tingting olsem aposol Pita, we i talem long Jisas se: “?Bambae mifala i go long hu? Yu nomo yu gat ol tok blong laef ya we i no save finis.” (Jon 6:68) ?Laef blong yumi tede bambae i olsem wanem sipos yumi no joenem oganaesesen blong Jehova? Tru long oganaesesen ya, Kraes i meksua se yumi kakae gud long saed blong spirit. Mo tu, hem i trenem gud yumi blong yumi save mekem gud minista wok blong yumi. Antap moa, hem i halpem yumi blong wokem “niufala fasin,” nao long rod ya yumi save mekem Jehova i glad.—Efes. 4:24.

14. From we yu stap long oganaesesen blong Jehova, ?olsem wanem samting ya i mekem i gud long yu long taem blong COVID-19 pandemik?

¹⁴ Jisas i givim ol waes advaes long ol taem we i gat trabol. Eksampol, taem COVID-19 pandemik i stat, yumi luk klia se ol advaes we hem i givim oli wok gud. Nating se long taem ya ol man long wol oli no save se bambae oli mekem wanem, be Jisas i meksua se yumi kasem ol klia daereksen blong yumi stap sef. Yumi kasem advaes blong werem mask taem yumi go aot long pablik mo blong folem rul ya blong sosol distensing. Ol elda oli  kasem advaes se oltaem oli mas jekem ol brata mo sista long kongregesen, mo meksua se oli gat evri samting we oli nidim long saed blong bodi mo spirit. (Aes. 32:1, 2) Mo tu, yumi kasem sam narafala daereksen mo ol tok blong leftemap tingting tru long ol apdet blong Hed Kampani.

15. ?Yumi kasem wanem daereksen long saed blong ol miting mo wok blong prij long taem blong pandemik, mo wanem i kamaot from?

¹⁵ Long taem blong pandemik, yumi kasem tu ol klia daereksen olsem wanem blong mekem ol miting mo wok blong prij. Mo kwiktaem nomo yumi stat blong joen long ol miting mo long ol asembli tru long ol video konfrens. Mo tu yumi stat blong prij tru long leta mo telefon. Jehova i blesem ol traehad blong yumi. Plante branj ofis oli makem se namba blong ol pablisa blong olgeta i go antap bigwan. Blong talem stret, plante brata mo sista oli gat ol gudfala ekspiriens long taem blong pandemik ya.—Yu luk bokis ya “ Jehova i Blesem Wok Blong Prij We Mifala i Mekem.”

16. ?Yumi save sua long wanem samting?

¹⁶ Maet samfala oli save harem olsem se ol daereksen we oganaesesen i givim long taem blong pandemik ya i bitim mak. Nating se i olsem, plante taem yumi makem se ol daereksen we yumi kasem oli waes. (Mat. 11:19) Mo taem yumi tingting dip long nambawan fasin blong Jisas blong lidim ol man blong hem, yumi save sua se nomata wanem samting i hapen long fiuja, be Jehova mo Boe blong hem we hem i lavem tumas bambae tufala i stap wetem yumi.—Ridim Hibru 13:5, 6.

17. ?Yu yu harem olsem wanem from Jisas i ovasia blong yumi?

¹⁷ !Yumi glad tumas se Jisas i ovasia blong yumi! Yumi joen long wan oganaesesen we yumi no seseraot from kalja, kantri, mo lanwis blong yumi. Yumi kasem plante advaes we i kam long Tok blong God, mo yumi kasem ol trening we yumi nidim blong mekem wok blong prij. Yumi evriwan i lanem olsem wanem blong wokem niufala fasin mo blong lavlavem yumi. !Yumi gat plante risen blong tok flas from we Jisas i ovasia blong yumi!