1. ?Wanem gudfala nius i mekem yumi glad tumas?

!YUMI glad tumas blong harem se ol man blong Jehova oli stap letem laet blong olgeta i saenaot! Las yia oli mekem bitim 10 milian Baebol stadi. Mo plante milian niuwan oli kam long Memoriol, blong kasem save long nambawan presen we Jehova i givim from lav blong hem, hemia ransom sakrefaes.—1 Jon 4:9.

2, 3. (1) ?Wanem i no save blokem laet blong yumi? (2) ?Bambae yumi tokbaot wanem long stadi ya?

² Nating se ol Witnes blong Jehova oli toktok long plante defren lanwis, be oli presem Jehova olsem wan famle nomo long fulwol. (Revelesen 7:9) Nomata se yumi toktok wanem lanwis mo yumi stap long wanem kantri, be yumi save saenaot “olsem ol laet long wol.”—Filipae 2:15.

³ Taem yumi stap prij, joen gud, mo lukaot gud oltaem, yumi leftemap nem blong Jehova. ?Olsem wanem yumi save letem laet blong yumi i saenaot long trifala rod ya?—Ridim Matiu 5:14-16.

4, 5. (1) Antap long wok blong prij, ?wanem narafala rod blong letem laet i saenaot? (2) ?Wanem i save kamaot taem yumi kaen long ol man? (Yu luk pija long stat blong stadi.)

⁴ Wok blong prij mo mekem ol disaepol i wan impoten rod blong letem laet i saenaot. (Matiu 28:19, 20) Long 1925, Wajtaoa i tokbaot “Laet i Saenaot Long Tudak,” mo i talem se, blong holemstrong long Masta long ol las dei, yumi mas tekem “evri janis blong letem laet blong yumi i saenaot.” Mo i gohed se: “Yumi mekem olsem taem yumi talemaot gud nius long olgeta man long wol, mo yumi mekem ol fasin we oli blong delaet.” (Wajtaoa, 1 Jun 1925) Antap long wok blong prij, ol fasin blong yumi tu oli leftemap nem blong Jehova. Plante man oli luk yumi taem yumi stap prij. Sipos yumi smael mo talem halo, oli save gat gudfala tingting long yumi mo long God blong yumi.

⁵ Jisas i talem long ol disaepol se: “Taem yufala i go insaed long wan haos, yufala i talem halo long ol man long haos.” (Matiu 10:12) Kastom blong ol man long taem blong Jisas, se oli tekem ol strenja oli kam insaed long haos blong olgeta. Tede, long plante ples, ol man oli no moa folem kastom ya. Plante oli fraet mo oli kros taem oli luk wan strenja i stanap long doa. Be sipos yumi kaen mo yumi toktok gud long olgeta, maet oli no moa fraet. Taem yu stap prij wetem troli, ?yu makem finis se sipos yu smael mo talem halo long ol man, plante taem oli glad blong kam tekem wan buk? !Samfala oli wantem storian tu!

6. ?Wan olfala brata mo woman blong hem, tufala i mekem wanem?

⁶ Long Inglan, wan olfala brata mo woman blong hem we oltaem tufala i siksik, tufala i no moa save wokbaot plante blong prij. Ale tufala i putum wan tebel long fored blong haos blong tufala. I gat wan skul blong pikinini i stap klosap, taswe tufala i putum ol buk we oli save pulum tingting blong ol papa mo mama taem oli kam from pikinini blong olgeta. Samfala oli tekem ol buk olsem Ol Kwestin We Ol Yangfala Oli Askem—Ol Ansa We Oli Wok Gud, Buk 1 mo 2. Plante taem wan sista we i paenia i joen wetem tufala. Ol mama mo papa oli luk se sista ya i toktok gud mo i kaen, mo se tufala olfala i wantem tumas blong givhan long olgeta. Mo tu, i gat wan papa we i wantem stadi Baebol.

7. ?Olsem wanem yu save givhan long ol refuji we oli kam stap long ples blong yu?

⁷ Naoia, plante man oli aot long kantri blong olgeta, oli go stap long narafala kantri olsem ol refuji. ?Yu save mekem wanem blong tijim olgeta we oli kam stap long ples blong yu, blong oli save Jehova? Fas samting, yu save lanem blong talem halo long lanwis blong olgeta. Afta, yu save yusum JW Language blong lanem sam toktok we i save pulum olgeta blong storian. Long jw.org, yu  save soem sam video mo buk long lanwis blong olgeta.—Dutronome 10:19.

8, 9. (1) ?Olsem wanem miting ya Kristin Wok Mo Laef i givhan long yumi? (2) ?Ol papa mo mama oli save tijim pikinini blong i mekem wanem?

⁸ Jehova i givim stret samting we yumi nidim blong kam gud moa long wok blong prij. Traem tingbaot ol samting we yumi lanem long miting ya Kristin Wok Mo Laef. Wetem ol save ya, i isi moa blong mekem ol visit mo statem ol Baebol stadi.

⁹ Taem ol niuwan oli kam long miting, oli sapraes long ol ansa we ol pikinini oli givim. I gud yu tijim pikinini blong yu blong i ansa long prapa toktok blong hem. Sam man we oli kam long miting oli laekem trutok tumas taem oli harem ol smosmol ansa blong ol pikinini, we oli soemaot bilif mo oli kamaot long hat.—1 Korin 14:25.

10. ?Yumi save mekem wanem long famle wosip, blong evriwan oli joen gud?

¹⁰ Taem yumi traehad blong tijim famle blong i joen gud mo wok wanples long pis, yumi leftemap nem blong Jehova. Ol papa mo mama oli save makemaot wan naet evri wik blong mekem Famle Wosip. Plante famle oli wajem JW Brodkasting, mo biaen oli tokbaot olsem wanem oli save folem samting we oli lanem. Tingbaot se nid blong ol smol pikinini i defren long nid blong ol yangfala. Traehad blong givhan long evriwan long  famle, blong oli kasem gudfala samting long famle wosip.—Ol Sam 148:12, 13.

11-13. ?Olsem wanem yumi save mekem fasin joen i kam gud moa long kongregesen?

¹¹ Yangfala, yu tu yu save leftemap tingting blong ol narafala long kongregesen, blong oli gohed blong letem laet blong olgeta i saenaot. Yu save fren gud wetem ol olfala brata mo sista. Mo yu save askem long olgeta, wanem i givhan long olgeta blong oli gohed plante yia long wok blong Jehova. Oli save tijim yu long plante samting. !Hemia bambae i leftemap tingting blong olgeta mo blong yu tu! Yumi evriwan, nating se yumi yangfala no yumi olfala, yumi save welkamem olgeta we oli kam long Haos Kingdom. I gud yumi talem halo, smael gud, halpem olgeta blong oli faenem wan ples blong sidaon, mo tekem olgeta oli goraon blong mitim ol narafala long kongregesen. Yumi mas mekem se oli glad blong joen wetem yumi.

¹² Sipos yu stap lidim miting blong prij, yu save givhan long ol olfala blong oli gohed blong letem laet blong olgeta i saenaot. Yu save meksua se oli gat teritori we i stret long nid blong olgeta. Mo yu save mekem plan se yangfala i wok wetem olfala. Plante olfala brata mo sista mo olgeta we oli siksik, oli harem nogud from we oli no moa save prij plante. Be bambae oli harem gud sipos oli save se yu tingbaot olgeta mo yu kasem save long ol trabol blong olgeta. Nomata se oli olfala mo oli stap longtaem long trutok, be kaen fasin blong yu i save leftemap tingting blong olgeta blong oli traehad long wok blong prij.—Levitikas 19:32.

¹³ Ol man Isrel oli glad blong joen wanples blong wosipim Jehova. Ol Sam i talem se: “I gud tumas taem ol man blong God oli stap wanples, we oli gat wan tingting nomo. Fasin ya i gud tumas.” (Ridim Ol Sam 133:1, 2.) Sam ya i talem se fasin blong joen gud i olsem oel we i smel gud, mo i mekem man i harem gud. Long sem fasin, taem yumi kaen mo yumi fren gud wetem ol brata mo sista, yumi save mekem olgeta oli harem gud. Nao fasin joen i kam gud moa long kongregesen. ?Olsem wanem? ?Yu stap traehad blong save gud ol brata mo sista long kongregesen?—2 Korin 6:11-13.

14. ?Olsem wanem yu save letem laet i saenaot long eria blong yu?

¹⁴ Yu save letem laet blong yu i saenaot long eniples we yu stap long hem. Sipos yu yu kaen long ol neba, maet bambae oli wantem kasem save moa long Jehova. I gud yu askem se: ‘?Ol neba oli glad long mi? ?Haos blong mi i klin, mo i mekem eria blong mifala i moa naes? ?Mi stap givhan long ol neba?’ Taem yu storian wetem ol narafala Witnes, traem askem long olgeta olsem wanem kaen fasin mo gudfala eksampol blong olgeta i jenisim tingting blong ol famle, ol neba, mo ol narafala we oli wok o skul wetem olgeta.—Efesas 5:9.

15. ?From wanem yumi mas gohed blong lukaot gud?

¹⁵ Blong letem laet blong yumi i saenaot oltaem, yumi mas tingbaot impoten taem we yumi laef long hem. Plante taem Jisas i talem long ol disaepol se: “Yufala i mas gohed blong lukaot gud.” (Matiu 24:42; 25:13; 26:41) Sipos yumi ting se “bigfala trabol” bambae i longtaem yet, maet yumi no tekem evri janis blong givhan long ol narafala blong oli save Jehova. (Matiu 24:21) Laet blong yumi bambae i no saenaot gud, be sloslo i save godaon gogo i ded.

16, 17. ?Yu save mekem wanem blong no fogetem impoten taem we yumi stap long hem?

¹⁶ Yumi mas lukaot gud naoia i bitim ol taem bifo. Wol i stap kam moa nogud. Be yumi save se en bambae i kam long stret taem we Jehova i makem. (Matiu 24:42-44) Go kasem taem ya, yumi mas gat longfala tingting mo tingbaot fiuja nomo. Ridim Baebol evri dei, mo no fogetem blong prea oltaem long Jehova. (1 Pita 4:7) Traehad blong lanem samting from ol brata mo sista we oli mekem wok blong Jehova plante yia finis. Mo ridim ol laef stori long ol magasin, olsem  “Seventy Years of Holding On to the Skirt of a Jew,” we i stap long Wajtaoa (Inglis) 15 Eprel 2012, pej 18-21.

¹⁷ Stap bisi oltaem long wok blong Jehova. Mekem samting blong givhan long ol narafala, mo spenem taem wetem ol brata mo sista. Olsem nao, bambae yu glad, mo bambae yu luk se taem i pas hareap nomo. (Efesas 5:16) Ol man blong Jehova oli mekem plante bigfala wok long handred yia we i pas. Mo naoia, yumi bisi moa i bitim ol yia bifo. Yumi neva tingbaot se wok blong Jehova bambae i kam bigwan olsem tede. !Tru ya, laet blong yumi i stap saenaot bigwan!

18, 19. ?Olsem wanem ol elda oli save givhan long yumi, blong yumi gohed strong long wok blong Jehova? Tokbaot wan stori.

¹⁸ Nating se yumi mekem plante mastik, Jehova i letem yumi yet blong yumi mekem wok blong hem. Blong givhan long yumi, hem i putumap ‘ol man we oli olsem presen,’ hemia ol elda. (Ridim Efesas 4:8, 11, 12.) Taswe, taem ol elda oli kam luk yu, yu mas traem lanem moa from ol waes mo gudfala advaes blong olgeta.

¹⁹ Wan brata mo waef blong hem long Inglan i askem help blong tu elda, from we waef i ting se hasban i no stap lidim gud famle long wok blong Jehova. Hasban i talem se hem i no wan gudfala tija, mo i no stap mekem famle wosip evri wik. Tufala elda i pulum hasban blong i traem folem eksampol blong Jisas blong lukaot gud long ol disaepol. Tufala i pulum waef blong i soemaot longfala tingting long hasban. Mo tufala i givim sam tingting, olsem wanem brata mo sista ya i save mekem famle wosip wetem tufala pikinini. (Efesas 5:21-29) Afta long hemia, hasban i traehad blong kam wan gudfala hed blong famle. Tufala elda i talem se hem i mas gohed blong dipen long spirit blong Jehova, i no mas lego. !Lav mo kaen fasin blong tufala elda ya, i givhan bigwan!

20. ?Wanem i save kamaot taem yu letem laet blong yu i saenaot?

²⁰ “Ol man we oli stap ona long Hae God, mo we oli stap folem ol tok we hem i putum, bambae oli save harem gud.” (Ol Sam 128:1) Sipos yu letem laet blong yu i saenaot, bambae yu glad. Taswe, yu mas tijim ol narafala long saed blong God, mekem bes blong yu blong givhan long famle mo kongregesen blong oli joen gud, mo gohed blong lukaot gud. Samfala we oli luk gudfala eksampol blong yu, bambae oli wantem leftemap nem blong Jehova.—Matiu 5:16.