“Taem kasen brata blong mi i rao wetem mi, mi holem trot blong hem mo mi traem jokem hem. Mi wantem kilim hem i ded.”—Pol.

“Long haos, mi kam kros from evri smosmol samting we i hapen. Mi smasem ol jea, ol pleplei, o eni samting we i stap raonabaot long mi.”—Mako.

Maet yu yu no kam kros tumas olsem tufala. Be samtaem i had long yumi evriwan blong bos long tingting. Hemia from we yumi kasem sin long Adam. (Rom 5:12) Samfala oli olsem Pol mo Mako we oli kros kwik. Sam narafala oli no save kontrolem tingting blong olgeta. Oli tingbaot ol nogud samting we i mekem oli fraet o tingting i foldaon. Sam narafala bakegen oli no save blokem ol nogud fasin blong seks, dring bitim mak, mo tekem ol drag.

Ol man we oli no kontrolem tingting, filing, mo aksen blong olgeta, oli save spolem laef blong olgeta. ?Yumi mas mekem wanem blong yumi no kasem trabol olsem? Yumi mas bos long tingting blong yumi. Bambae yumi tokbaot tri kwestin: (1) ?Bos long tingting i minim wanem? (2) ?From wanem i impoten? (3) ?Olsem wanem blong gat fasin ya we i kamaot long tabu spirit? (Gal. 5:22, 23) Biaen, bambae yumi tokbaot samting we yumi save mekem sipos yumi foldaon.

Man we i bos long tingting blong hem, i no letem filing blong hem i lidim hem. Be hem i blokem ol toktok mo aksen we God i no glad long olgeta.

Jisas i soemaot olsem wanem blong bos long tingting. Baebol i talem se: “Taem ol man oli tok nogud long hem, hem i no tok nogud bakegen long olgeta. Taem oli mekem hem i safa, hem i no traem blong givimbak fasin ya long olgeta. Hem i putum hem i stap long han blong God we i stap jajem ol man long stret fasin.” (1 Pita 2:23) Jisas i bos long tingting taem hem i hang long pos nao ol man oli tok nogud long hem. (Mat. 27:39-44) Mo bifo long taem ya, hem i bos long tingting taem ol lida blong skul we oli agensem hem oli traem faenem poen long ol tok blong hem. (Mat. 22:15-22) !Mo hem i soemaot gudfala eksampol taem ol man Jiu we oli kros tumas oli pikimap ol ston blong stonem hem! Jisas i no givimbak, be hem “i haed nao i goaot long haos tempol.”—Jon 8:57-59.

?Olsem wanem? ?Yumi naf blong folem eksampol blong Jisas? Aposol Pita i talem se: “Kraes i safa from yufala. Hem i soem eksampol long yufala blong yufala i folemgud trak blong leg blong hem.” (1 Pita 2:21) Nating se yumi sinman, yumi naf blong folemgud eksampol blong hem. ?From wanem samting ya i impoten?

Yumi mas bos long tingting blong yumi sipos yumi wantem mekem Jehova i glad. Nating  se yumi mekem wok blong Jehova longtaem finis, be sipos yumi no kontrolem ol toktok mo aksen blong yumi, bambae yumi no moa fren gud wetem hem.

Traem tingbaot Moses. Long taem blong hem, “i no gat wan narafala man long wol we tingting blong hem i stap daon olsem hem.” (Nam. 12:3) Plante yia hem i bos long tingting blong hem taem ol man Isrel oli stap komplen. Nating se i olsem, biaen hem i foldaon. Taem oli komplen bakegen se i no gat wota, hem i tok kros long olgeta se: “?Olsem wanem? ?Mitufala i mas mekem wota i kamaot long ston ya blong yufala i dring?”—Nam. 20:2-11.

Long taem ya, Moses i no bos long tingting blong hem. Taem hem i mekem wota i ron, hem i no leftemap Jehova olsem Stamba blong merikel ya. (Sam 106:32, 33) From samting ya, Jehova i no letem hem i go insaed long Promes Lan. (Nam. 20:12) Ating Moses i sore go kasem we hem i ded, se hem i no bos long tingting blong hem.—Dut. 3:23-27.

?Yumi lanem wanem? Nating se yumi stap long trutok longtaem finis, yumi no mas tok kros long olgeta we oli mekem yumi harem nogud mo olgeta we yumi stretem. (Efes. 4:32; Kol. 3:12) I tru, taem yumi stap kam olfala, samtaem i had blong gat longfala tingting. Be yumi mas tingbaot Moses. Yumi no wantem spolem gudnem we yumi gat wetem Jehova. ?Yumi save mekem wanem blong bos long tingting?

Prea from tabu spirit. ?From wanem? Tabu spirit nao i mekem se man i bos long tingting blong hem, mo Jehova i givim tabu spirit long ol man we oli askem. (Luk 11:13) Jehova i yusum tabu spirit blong givim paoa we yumi nidim. (Fil. 4:13) Mo tu, hem i save givhan long yumi, blong yumi gat ol narafala fasin we tabu spirit i givim, olsem lav. Ol fasin ya oli save mekem i isi moa blong yumi bos long tingting.—1 Kor. 13:5.

Sakemaot ol samting we oli mekem i had blong bos long tingting. I gud yumi no luk ol websaet mo ol muvi we oli soemaot ol nogud fasin. (Efes. 5:3, 4) Blong talem stret, yumi mas sakemaot evri samting we i save pulum yumi blong mekem nogud fasin. (Prov. 22:3; 1 Kor. 6:12) Taswe, sipos ol nogud fasin  blong seks oli save pulum wan man, maet i moa gud we hem i no ridim nating ol stori buk blong lav mo wajem ol muvi we oli pulum filing.

Maet i no isi blong folem advaes ya. Be sipos yumi traehad, Jehova bambae i givim paoa we yumi nidim blong bos long tingting. (2 Pita 1:5-8) Bambae hem i givhan long yumi blong yumi kontrolem ol tingting, ol toktok, mo ol aksen blong yumi. Pol mo Mako we yumi tokbaot finis, tufala i lanem blong kontrolem kros. Wan narafala brata, plante taem hem i kros mo i rao long ol man taem hem i draevem trak. ?Hem i mekem wanem blong winim fasin ya? Hem i talem se: “Evri dei, mi prea wetem fulhat blong mi. Mi stadi long ol buk blong yumi we oli tokbaot bos long tingting, mo mi lanem sam gudfala vas blong Baebol. Plante yia nao mi stap traehad blong kamgud moa long fasin ya, be evri dei mi mas traehad yet blong stap kwaet. Mo tu, taem mi go samples, mi no wet kasem las minit blong aot long haos.”

Samtaem yumi evriwan i foldaon. Sipos i hapen long yu, maet yu harem se yu sem, nao yu fraet blong prea long Jehova. Be hemia nao taem we yu mas prea moa. Yu mas askem kwiktaem long Jehova blong i fogivim yu, mo i givhan long yu. Mo yu mas gat strong tingting blong no mekem sem mastik bakegen. (Sam 51:9-11) Jehova i rere blong lesin long prea we yu mekem wetem fulhat. (Sam 102:17) Aposol Jon i talem se blad blong Pikinini blong God “i stap mekem yumi klin long olgeta sin blong yumi.” (1 Jon 1:7; 2:1; Sam 86:5) I gud yu tingbaot we Jehova i talem long ol man blong hem, se oltaem oli mas fofogivim olgeta. Taswe yu save sua se bambae hem tu i mekem olsem long yu.—Mat. 18:21, 22; Kol. 3:13.

Jehova i no glad long Moses taem hem i no moa bos long tingting blong hem long draeples. Be Jehova i fogivim hem. Mo Baebol i tokbaot Moses olsem wan gudfala eksampol blong bilif. (Dut. 34:10; Hib. 11:24-28) Jehova i no letem Moses i go insaed long Promes Lan, be bambae hem i glad blong givim laef long hem long Paradaes, mo bambae hem i gat janis blong laef olwe. Yumi tu yumi gat janis blong laef olwe, sipos yumi traehad oltaem blong gat impoten fasin ya blong bos long tingting.—1 Kor. 9:25.