1. ?Baebol i talem wanem long saed blong fasin stretem?

?WANEM tingting blong yu taem yu harem tok ya “stretem”? Plante oli tingbaot panis, be tok ya stretem i save minim plante moa samting. Baebol i talem se taem narafala i stretem yumi, hem i mekem i gud long yumi. Mo tu, Baebol i joenem fasin ya wetem save, waes, lav, mo laef. (Ol Proveb 1:2-7; 4:11-13) Taswe, taem God i stretem yumi, hem i lavem yumi mo i wantem se yumi laef olwe. (Hibrus 12:6) Nating se samtaem God i panisim man blong stretem hem, be hem i no mekem i strong tumas. Impoten mining blong tok ya “stretem” hemia “tijim,” olsem wan papa mo mama we tufala i tijim pikinini from we tufala i lavem hem.

2, 3. ?Olsem wanem fasin stretem i joen wetem tijing mo panis? (Yu luk pija long stat blong stadi.)

² Tingbaot stori blong Joni, we i stap pleplei insaed long haos. Mama blong hem i talem se: “!Joni, yu save se yu no mas plei wetem balong insaed long haos! Bambae yu brekem wan samting.” Be Joni i no lesin. !Nao balong i fas long wan botel flaoa mo i brekem! ?Mama blong Joni i mekem wanem blong stretem hem? Hem i eksplenem from wanem samting  we Joni i mekem i no stret. Hem i wantem mekem Joni i luksave se i gud hem i obei, mo se, Mama mo Papa i mas putum ol rul we oli no strong tumas. Blong tijim Joni, mama blong hem i tekemaot balong blong smol taem blong panisim hem. Joni i harem nogud, be samting ya i mekem hem i tingbaot se, siposhem i no lesin long papa mo mama blong hem, bambae tufala i mas stretem hem.

³ Yumi ol Kristin, yumi famle blong God. (1 Timoti 3:15) Papa blong yumi Jehova i gat raet blong talem wanem i stret mo wanem i no stret. Taem yumi no lesin, hem i stretem yumi. Mo sipos yumi kasem nogud frut, hemia bambae i mekem yumi tingbaot se i impoten blong obei long hem. (Galesia 6:7) God i lavem yumi tumas, mo i no wantem we yumi kasem trabol.—1 Pita 5:6, 7.

4. (1) ?Jehova i wantem se yumi trenem ol narafala olsem wanem? (2) ?Bambae yumi tokbaot wanem long stadi ya?

⁴ Taem yumi yusum Baebol blong stretem pikinini o wan Baebol stadi, yumi save givhan long hem blong i folem Kraes. Yumi yusum Baebol blong tijim ol Baebol stadi long samting we i stret, mo blong givhan long olgeta blong oli kasem save mo ‘folem olgeta tok we Jisas i talem.’ (Matiu 28:19, 20; 2 Timoti 3:16) Jehova i wantem se oli kasem trening long rod ya, nao biaen, olgeta tu oli save givhan long ol narafala blong oli folem Kraes. (Ridim Taetas 2:11-14.) Naoia bambae yumi tokbaot tri impoten kwestin: (1) Taem God i stretem yumi, ?olsem wanem hem i soemaot lav? (2) ?Yumi save lanem wanem long stori blong ol man we God i stretem olgeta? (3) ?Olsem wanem yumi save folem fasin blong Jehova mo Pikinini blong hem blong stretem narafala?

5. ?Olsem wanem Jehova i soemaot se hem i lavem yumi?

⁵ Jehova i stretem, tijim, mo trenem yumi from we hem i lavem yumi. Hem i wantem se yumi stap klosap long hem mo kasem laef we i no save finis. (1 Jon 4:16) Hem i neva tok nogud long yumi mo daonem yumi. (Ol Proveb 12:18) Hem i luk ol gudfala fasin blong yumi, mo i letem yumi jusum rod we yumi wantem folem. ?Wanem tingting blong yu taem ol tok blong Baebol, ol buk blong yumi, papa mo mama, o ol elda oli stretem yu? ?Yu luksave se Jehova i lavem yu? Traem tingbaot sipos yu mekem wan mastik be yu no luksave, nao ol elda oli stretem yu long kaen fasin. Long taem olsem, oli stap soemaot lav olsem Jehova.—Galesia 6:1.

6. ?Olsem wanem fasin stretem i soemaot lav blong God, nating se man i lusum wok long kongregesen?

 ⁶ Samtaem fasin stretem i no minim advaes nomo. Sipos man i mekem wan bigfala sin, bambae hem i lusum wok long kongregesen. Nating se i olsem, hemia i soemaot we God i lavem hem. Maet samting ya i mekem hem i luksave se i mas spenem moa taem blong stadi Baebol, tingting dip, mo prea. Nao bambae hem i kam klosap moa long Jehova. (Ol Sam 19:7) Sloslo, hem i save kasembak ol wok long kongregesen. Mo tu, taem kongregesen i putumaot wan man, samting ya i soemaot se Jehova i lavem mo i protektem kongregesen blong i no kam doti. (1 Korin 5:6, 7, 11) Oltaem God i stretem man long fasin we i stret. Man we kongregesen i putumaot hem, i kasem save se bigfala sin we hem i mekem i nogud. Samting ya i save pulum hem blong i tanem tingting.—Ol Wok 3:19.

7. ?Hu ya Sebna, mo hem i gat wanem nogud fasin?

⁷ Blong kasem save olsem wanem fasin stretem i mekem i gud long yumi, bambae yumi tokbaot tu man we Jehova i stretem. Wan, hemia Sebna, man Isrel we i laef long taem blong King Hesekia, mo narawan hemia Graham, wan brata long taem blong yumi. Sebna i wan haeman. Hem i “bos blong ol man blong wok long haos blong king,” maet King Hesekia. (Aesea 22:15) Be Sebna i kam flas mo i wantem mekem ol narafala oli ting se hem i impoten tumas. Taswe hem i rerem wan beregraon we i sas we i sas, blong hem wan. Mo hem i stap ron long ol ‘kat blong faet ya, we oli flas tumas.’—Aesea 22:16-18.

8. ?Jehova i stretem Sebna olsem wanem, mo wanem i kamaot from?

⁸ Sebna i leftemap hem wan tumas, taswe God i tekemaot wok blong hem mo  i givim long Eliakim. (Aesea 22:19-21) Samting ya i hapen taem King Senakerib blong Asiria i mekem plan blong spolem Jerusalem. Biaen, Senakerib i sanem sam haeman mo wan bigfala ami blong mekem King Hesekia mo ol man Jiu oli fraet. (2 King 18:17-25) Hesekia i sanem Eliakim mo tu narafala man oli go blong toktok wetem ol haeman ya. Wan long tufala hemia Sebna, we naoia i wok olsem sekretari. Samting ya i soemaot se ating Sebna i lanem blong gat tingting daon, mo i no harem nogud mo sore long hem wan. Hem i glad blong mekem wan wok we i no impoten tumas. Yumi lanem tri lesen long stori blong Sebna.

9-11. (1) ?Wanem sam impoten lesen we yumi lanem long stori blong Sebna? (2) ?Wanem tingting blong yu long fasin we Jehova i mekem long Sebna?

⁹ Fas lesen se: “Man we i praod bambae i kasem trabol.” Taswe Sebna i lusum wok blong hem. (Ol Proveb 16:18) Maet yu gat wok long kongregesen, mo ol narafala oli ting se yu yu impoten. ?Be olsem wanem? ?Yu yu gat tingting daon? ?Yu tingbaot se gudhan we yu yu gat blong mekem ol gudfala wok ya i kamaot long Jehova nomo? (1 Korin 4:7) Aposol Pol i givim woning ya se: “Mi mi talem long yufala se i no mas gat wan long yufala we i tinghae long hem bitim mak. Yufala i mas gat stret tingting.”—Rom 12:3.

¹⁰ Namba tu lesen se: Jehova i save se strong advaes we hem i givim long Sebna i save jenisim fasin blong hem. (Ol Proveb 3:11, 12) Ogeta we oli lusum wan spesel wok oli mas tingbaot samting ya. I no stret we oli kam kros mo harem nogud, be oli mas gohed blong mekem bes blong olgeta long wok blong Jehova. Oli mas luk fasin stretem ya olsem wan samting we i soemaot lav blong Jehova. Tingbaot se Papa blong yumi bambae i givim pei long olgeta we oli gat tingting daon. (Ridim 1 Pita 5:6, 7.) Man blong wokem graonpot i save wokem graon we i sofsof i kam wan naesfala graonpot. Long sem fasin, sipos yumi gat tingting daon taem Jehova i stretem yumi, hemia i save jenisim fasin blong yumi.

¹¹ Namba tri lesen we yumi lanem long stori blong Sebna, se: Fasin blong Jehova blong stretem man we i mekem sin, i soemaot se hem i no laekem sin, be i soemaot tu se hem i laekem man ya yet. Jehova i lukaotem ol gudfala fasin blong man. Sipos yu yu wan papa, mama, o wan elda, ?bambae yu folem fasin blong Jehova blong stretem narafala?—Jud 22, 23.

12-14. (1) ?Samfala oli mekem wanem taem Jehova i stretem olgeta? (2) ?Olsem wanem Baebol i givhan long wan brata blong i jenisim tingting blong hem, mo wanem i kamaot from?

¹² Sore tumas, samfala oli harem nogud tumas taem God i stretem olgeta, nao oli gowe long hem mo long kongregesen. (Hibrus 3:12, 13) ?Hemia i min se i no gat man i save givhan long olgeta? !Si i gat! Traem tingbaot Graham, we kongregesen i putumaot hem mo biaen i kambak. Be afta, hem i no moa prij mo i no moa go long miting. Wan elda i traehad blong fren gud wetem hem, mo afta we sam taem i pas, Graham i askem blong stadi Baebol wetem hem.

¹³ Elda ya i tingtingbak, i se: “Graham i gat flas tingting. Hem i tok agens long ol elda we oli stap long kot komiti. Ale fastaem mitufala i stadi long ol vas long saed blong fasin flas mo nogud frut  blong hem. !Baebol i givhan long Graham blong i luksave fasin blong hem, mo hem i no glad long hem wan! Hem i luksave se i no ol brata we oli gat problem, be hem nomo, from we fasin flas i olsem wan ‘bigfala timba’ we i stap long ae blong hem. Kwiktaem nomo, hem i stat blong jenisim tingting blong hem, nao hem i joen bakegen long ol miting, i stadi gud long Baebol, mo i prea evri dei. Waef blong hem mo ol pikinini tu oli glad tumas we hem i lidimgud famle long saed blong wosip.”—Luk 6:41, 42; Jemes 1:23-25.

¹⁴ Elda ya i gohed se: “Wan dei, Graham i talem wan samting we i tajem hat blong mi. Hem i se: ‘Mi save trutok plante yia finis mo mi bin mekem wok blong paenia tu. Be naoia mi save talem tru se mi lavem Jehova.’” I no longtaem, oli givim wok long Graham blong pasem maekrofon long miting, mo hem i glad. Elda ya i talem se: “!Stori blong hem i tijim mi se taem wan man i mekem tingting blong hem i stap daon mo i letem God i stretem hem, hem i kasem plante blesing!”

15. Sipos yu wantem se narafala i lesin long advaes blong yu, ?yu mas gat wanem fasin?

¹⁵ Sipos yu wantem kam wan gudfala tija, fastaem yu mas wan gudfala studen. (1 Timoti 4:15, 16) Long sem fasin, sipos Jehova i stap yusum yu blong stretem ol narafala, tingting blong yu i mas stap daon, mo yu mas letem Jehova i lidim yu. Taem ol narafala oli luk se yu gat tingting daon, bambae oli respektem yu, nao i isi moa blong oli lesin long advaes we yu givim. Eksampol blong Jisas i save givhan long yu.

16. ?Jisas i stretem mo tijim narafala long wanem fasin?

¹⁶ Oltaem Jisas i obei long Papa blong hem, nating se samtaem i no isi. (Matiu 26:39) Hem i talem se ol tijing mo waes blong hem oli kamaot long Papa blong hem nomo. (Jon 5:19, 30) Jisas i gat tingting daon mo i obei, nao hemia i givhan long hem blong i kam wan tija we i gat sore. Ol man we hat blong olgeta i stret oli laekem blong joen wetem hem. (Ridim Luk 4:22.) Ol tok we Jisas i talem long kaen fasin i leftemap tingting blong olgeta we tingting i foldaon mo oli slak. (Matiu 12:20) Taem ol aposol oli raorao se hu long olgeta i hae moa, Jisas i no kam kros, be hem i stretem olgeta long fasin we i kaen mo i soemaot lav.—Mak 9:33-37; Luk 22:24-27.

17. ?Wanem ol fasin we ol elda oli nidim blong lukaot gud long kongregesen?

¹⁷ Taem ol elda oli yusum Baebol blong stretem narafala, oli mas folem fasin blong Kraes. Hemia i soemaot se oli letem God mo Pikinini blong hem i lidim olgeta. Aposol Pita i talem se: ‘Yufala i mas lukaot gud long ol man we God i putum long han blong yufala. Yufala i mas  glad nomo blong mekem wok ya we yufala i no kasem pei from. Yufala i no mas mekem olsem we yufala i bos long ol man ya blong God, be yufala i mas soemaot gudfala eksampol long olgeta.’ (1 Pita 5:2-4) Ol elda we oli glad blong letem God mo Kraes i lidim olgeta, oli harem gud, sem mak long olgeta we oli stap aninit long han blong olgeta.—Aesea 32:1, 2, 17, 18.

18. (1) ?Jehova i givim wanem wok long ol papa mo mama? (2) ?Mo hem i givhan olsem wanem long ol papa mo mama?

¹⁸ ?Olsem wanem insaed long famle? Jehova i talem long hed blong famle se: ‘Yu no mas mekem ol pikinini oli harem nogud gogo oli kam kros. Be yu mas gohed blong stretem olgeta mo givim woning long olgeta folem tingting blong mi.’ (Efesas 6:4) ?I impoten blong tijim mo stretem pikinini? Ol Proveb 19:18 i talem se: “Taem pikinini blong yu i yangfala, we i save lan yet, yu mas stretem hem. Sipos no, i olsem we yu stap givhan nomo long hem blong i kilim hem i ded.” Jehova i givim wok long ol papa mo mama blong oli stretem pikinini blong olgeta. !Sipos oli no mekem wok ya, oli mas talemaot long hem from wanem! (1 Samuel 3:12-14) Sipos ol papa mo mama oli prea long Jehova, mo oli dipen long Baebol mo tabu spirit blong lidim olgeta, bambae Jehova i givim waes mo paoa we oli nidim.—Ridim Jemes 1:5.

19, 20. (1) ?Yumi kasem wanem blesing taem yumi glad long fasin stretem? (2) ?Bambae yumi tokbaot wanem long nekis stadi?

¹⁹ !Sipos yu yu glad we God i stretem yu mo yu folem fasin blong God mo Jisas blong stretem narafala, bambae yu kasem plante blesing! Bambae i gat pis mo lav long famle mo long kongregesen, evriwan bambae oli gat gudfala fasin, mo oli harem se oli stap sef. Hemia wan smol pija nomo blong pis mo glad we bambae yumi gat long fiuja. (Ol Sam 72:7) Taem Jehova i stretem yumi, hemia i stap rerem yumi blong joen gud olwe long pis, olsem wan famle we hem nomo i Papa blong yumi. (Ridim Aesea 11:9.) Sipos yumi tingbaot samting ya, bambae yumi luksave se fasin stretem i wan nambawan rod we i soemaot se God i lavem yumi.

²⁰ Long nekis stadi, bambae yumi tokbaot moa fasin stretem long famle mo long kongregesen. Bambae yumi tokbaot olsem wanem yu save stretem yu wan. Mo tu, bambae yumi tokbaot olsem wanem blong blokem ol nogud tingting we oli save spolem yumi, nao yumi no glad taem narafala i stretem yumi.