1. ?Wanem wan fasin blong Jisas we yumi laekem tumas? Yu eksplenem.

WAN fasin blong Jisas we yumi laekem hemia se hem i naf blong kasem save long ol hadtaem we ol man oli stap fesem. Taem Jisas i stap long wol, hem i ‘glad wetem olgeta we oli glad’ mo hem i ‘krae wetem olgeta we oli krae.’ (Rom 12:15) Eksampol, taem ol 70 disaepol we Jisas i sanem olgeta blong prij oli kambak mo oli glad bigwan, “tabu spirit i mekem hem i glad bitim mak.” (Luk 10:17-21) Mo tu, taem Jisas i luk ol man oli harem nogud taem Lasaros i ded, “tingting blong hem i kam hevi tumas, i stap pulum win blong hem from.”—Jon 11:33.

2. ?Wanem i halpem Jisas blong i kasem save filing blong ol man?

² Nating se Jisas i stret gud olgeta, ?wanem i givhan long hem blong i gat sori mo i tingbaot ol man? Fas samting se hem i lavem ol man. Olsem we yumi tokbaot long las stadi, hem i “hapi tumas blong luk ol man.” (Prov. 8:31) Lav i pusum hem blong i kasem save long tingting blong ol man. Aposol Jon i eksplenem se: “Hem i save finis tingting blong ol man.” (Jon 2:25) Jisas i gat bigfala sori long ol man mo hemia i pulum ol man blong oli lesin long mesej blong Kingdom. Taswe, taem yumi traehad blong kasem save long filing blong ol man, bambae yumi givhan long plante man long wok blong prij.—2 Tim. 4:5.

3-4. (1) ?Sipos yumi kasem save long filing blong ol man, bambae yumi mekem wanem? (2) ?Bambae yumi tokbaot wanem long stadi ya?

³ Aposol Pol i save se hem i mas prij, mo yumi tu yumi gat sem tingting. (1 Kor. 9:6) Taswe, sipos yumi kasem save long  filing blong ol man, bambae yumi laekem tumas blong mekem wok ya. Bambae yumi wantem soemaot se yumi tingbaot ol man mo yumi wantem halpem olgeta. Yumi save se “man i harem gud moa taem hem i givim samting long narafala, i bitim we hem i kasem samting.” (Wok 20:35) Sipos yumi holem tingting ya taem yumi prij, bambae yumi glad long wok ya.

⁴ Long stadi ya bambae yumi tokbaot olsem wanem blong kasem save filing blong ol man taem yumi prij. Fastaem, bambae yumi tokbaot tingting we Jisas i gat long ol man. Biaen, bambae yumi tokbaot fo rod blong yumi folem eksampol blong Jisas.—1 Pita 2:21.

5-6. (1) ?Jisas i soemaot se hem i kasem save long filing blong hu? (2) Folem Aesea 61:1, ?from wanem Jisas i sori long ol man we hem i prij long olgeta?

⁵ Traem tingbaot olsem wanem Jisas i soemaot se hem i tingbaot filing blong ol man. Wan dei, Jisas mo ol disaepol blong hem oli taet tumas, from we oli prij be “oli no gat taem nating blong spel mo blong kakae.” Ale Jisas i talem long olgeta blong “oli go long wan ples we i no gat man long hem,” blong oli save “spel smol.” Be wan bigfala hip blong ol man oli resis i go fastaem long ples we Jisas mo ol disaepol bambae oli go long hem. Taem Jisas i luk ol man ya, ?hem i harem olsem wanem? “Hem i sore tumas * long olgeta, from we oli olsem ol sipsip we i no gat man blong lukaot long olgeta. Nao hem i tijim olgeta long plante samting.”—Mak 6:30-34.

⁶ ?From wanem Jisas i sore mo i tingbaot filing blong ol narafala? Hem i luk se oli “olsem ol sipsip we i nogat man blong lukaot long olgeta.” Maet Jisas i talem olsem from we hem i luk se samfala oli pua, mo oli wok had blong lukaot long famle blong olgeta. Mo samfala oli harem nogud tumas from we oli lusum wan famle long ded. Sipos i olsem, Jisas i kasem save long laef blong olgeta. Olsem we yumi  tokbaot long las stadi, Jisas tu i fesem ol trabol ya. From we Jisas i tingbaot ol narafala, hem i wantem talemaot gud nius long olgeta.—Ridim Aesea 61:1, 2.

7. ?Olsem wanem yumi save folem eksampol blong Jisas?

⁷ ?Yumi lanem wanem long eksampol blong Jisas? Olsem long taem blong Jisas, ol man we oli stap raonabaot long yumi “oli olsem ol sipsip we i no gat man blong lukaot long olgeta.” Oli kasem plante trabol, mo oli nidim mesej blong Kingdom we yumi stap talemaot. (Rev. 14:6) Taswe olsem Jisas, yumi prij from we yumi “gat sore long ol puaman, mo long olgeta we oli no strong.” (Sam. 72:13) Yumi sori long ol man, mo yumi wantem givhan long olgeta.

8. ?Wanem wan rod blong soem se yumi kasem save long filing blong ol man long wok blong prij? Talem wan eksampol.

⁸ ?Olsem wanem blong soemaot se yumi kasem save filing blong ol man we yumi prij long olgeta? Yumi mas tingbaot tingting mo filing blong ol man we yumi prij long olgeta, mo yumi givhan long olgeta olsem we yumi wantem se oli mekem long yumi. * (Mat. 7:12) Naoia, bambae yumi tokbaot fo rod blong mekem samting ya. Faswan, tingbaot nid blong wanwan man. Wok blong prij we yumi mekem, i sem mak olsem wok blong wan dokta. Wan gudfala dokta i tingbaot nid blong wanwan sikman. Hem i askem kwestin mo i lesin gud taem sikman i stap tokbaot sik blong hem. Biaen, hem i no kwik blong givim meresin, be hem i lukluk gud long sik blong man ya, nao i jes givim meresin. Long sem fasin, yumi no mas yusum semfala fastok long evri man we yumi prij long olgeta. Be, yumi traehad blong kasem save long tingting mo samting we wanwan man i stap go tru long hem.

9. ?Yumi no mas mekem wanem? Yu eksplenem.

⁹ Taem yumi prij long wan man, yumi no mas ting se yumi save finis tingting blong hem, ol trabol we hem i kasem o bilif blong hem. (Prov. 18:13) Defren olgeta, yumi mas askem ol gudfala kwestin blong savegud man mo bilif blong hem. (Prov. 20:5) Sipos i oraet, yu save askem kwestin long saed blong wok mo famle blong hem, ples we hem i kamaot long hem, mo tingting blong hem. Taem yumi askem ol kwestin olsem, yumi stap pulum olgeta blong oli talemaot from wanem oli nidim gud nius. Mo long rod ya, yumi save soemaot se yumi kasem save long filing blong olgeta, mo yumi givhan long olgeta olsem we Jisas i bin mekem.—Skelem wetem 1 Korin 9:19-23.

10-11. ?Folem 2 Korin 4:7, 8, wanem Namba tu rod blong soem se yumi kasem save long filing blong narafala? Yu talem wan stori.

¹⁰ Namba tu samting, traem tingbaot se laef blong olgeta i olsem wanem. Samtaem,  yumi naf blong kasem save samting we oli stap go tru long hem. Nating se i olsem, yumi tu yumi gat ol trabol from we yumi evriwan i sinman. (1 Kor. 10:13) Yumi save se laef long ol lasdei ya bambae i kam strong tumas. Jehova nomo i save halpem yumi blong stanap strong. (Ridim 1 Korin 4:7, 8.) Be traem tingbaot ol man we oli stap kasem trabol mo we oli no fren wetem God, ating laef blong olgeta i mas had moa. Olsem Jisas, yumi sore long olgeta, mo yumi wantem “talemaot gud nius” long olgeta.—Aes. 52:7.

¹¹ Traem tingbaot stori blong brata Sergey. Bifo hem i wan man we i stap sem bigwan, mo hem i faenem i had blong toktok long ol narafala. Biaen hem i stat blong stadi Baebol. Sergey i talem se: “Taem mi stadi Baebol, mi lanem se ol Kristin oli mas talemaot bilif blong olgeta long ol narafala. Mi ting se bambae mi neva mekem samting ya.” Be, hem i tingbaot ol man we oli no save trutok yet, mo hem i stap tingbaot se laef blong olgeta i had from we oli no save Jehova. Hem i talem se: “Ol samting ya we mi stap lanem oli givim glad mo pis long tingting blong mi. Mo mi save se ol narafala tu oli nidim blong harem ol trutok ya.” Sloslo, Sergey i gat strong tingting blong prij, mo hem i talem se: “Mi mi sapraes tumas se taem mi tokbaot ol samting we mi lanem wetem ol narafala, hemia i mekem tingting mo bilif blong mi i kam strong moa.” *

12-13. ?From wanem yumi mas gat longfala tingting long ol man we yumi tijim olgeta? Yu talem wan eksampol.

¹² Namba tri samting, gat longfala tingting long man we yu tijim. Yumi mas tingbaot se maet oli neva tingbaot sam long ol trutok blong Baebol we yumi save gud. Mo plante oli holem strong long ol giaman bilif blong olgeta. Maet oli harem se skul blong olgeta i mekem se oli joengud wetem famle mo komuniti blong olgeta. Taswe, ?olsem wanem yumi save halpem olgeta?

¹³ Yu traem tingbaot: ?Wanem bambae i hapen sipos ol man oli wantem jenisim wan olfala brij? Plante taem, bambae oli wokem wan niufala brij, be long sem taem bambae ol man  oli gohed yet blong yusum olfala brij. Taem niufala brij i finis, naoia oli save brekemdaon olfala brij. Long sem fasin, bifo we yumi talem long ol man se oli mas lego “olfala” bilif blong olgeta, fastaem yumi mas givhan long olgeta blong oli kasem save mo laekem ol “niufala” trutok blong Baebol. Nao biaen, maet bambae oli rere blong lego olfala bilif blong olgeta. Yes i tru, i tektaem blong halpem ol man blong oli mekem ol jenis ya.—Rom 12:2.

14-15. ?Olsem wanem yumi save halpem ol man blong oli kasem save long saed blong laef olwe long Paradaes long wol? Yu talem wan eksampol.

¹⁴ Sipos yumi gat longfala tingting wetem ol man long wok blong prij, bambae yumi no gat tingting ya se oli mas kasem save o akseptem trutok long faswan taem we oli harem. Taem yumi kasem save long filing blong narafala, bambae yumi gohed blong halpem olgeta mo mekem oli tingbaot samting we Baebol i talem. Eksampol, ?yumi save mekem wanem blong halpem man blong i kasem save long hop ya blong laef olwe long Paradaes long wol? Plante man oli gat smol save o maet oli no gat save nating long saed blong tijing ya. Maet oli bilif se taem man i ded, hem i no moa save laef bakegen. O maet oli ting se ol gudfala man bambae oli go long heven. ?Yu save mekem wanem blong halpem olgeta?

¹⁵ Hemia samting we wan brata i mekem blong givhan long ol man. Fastaem hem i ridim Jenesis 1:28. Biaen, hem i askem se, ?God i wantem se ol man oli laef wea mo blong oli gat wanem kaen laef? Bighaf blong ol man oli talem se: “Long wol mo hem i wantem blong oli haremgud.” Ale, brata i ridim Aesea 55:11 mo i askem sipos tingting blong God i jenis. Plante taem man blong haos i talem se, nogat. Mo brata i ridim Ol Sam 37:10, 11 mo i askem se laef blong man long fiuja bambae i olsem wanem. Fasin blong brata ya blong yusum gud Baebol, i halpem plante man blong oli kasem save se God i wantem yet blong ol gudfala man oli laef olwe long Paradaes long wol ya.

16-17. ?Wanem sam gudfala rod blong soem se yumi kasem save long filing blong narafala? Yu talem wan stori.

¹⁶ Namba fo samting, mekem sam samting blong soemaot se yu kea long narafala. Eksampol, ?yumi pas long wan taem we i no stret long man blong haos? Yumi save talem sore mo talem se bambae yumi pas bakegen long wan narafala taem we i gud moa. ?Be olsem wanem sipos man blong haos i nidim help blong mekem wan smol samting? O ?Olsem wanem sipos man blong haos i sik o i olfala mo i nidim wan man blong i go pem sam samting blong hem long stoa? Long taem olsem, maet yumi save givhan long hem.—Ridim Ol Proveb 3:27.

¹⁷ Wan sista i mekem wan samting olsem, we maet narafala bambae i luk se i no impoten. Be gudfala frut i kamaot. Hem i raetem wan leta i go long wan famle, we wan pikinini blong olgeta i ded. Long leta ya, i gat sam vas blong Baebol blong leftemap tingting blong  olgeta. ?Famle ya i harem olsem wanem taem oli ridim leta ya? Mama ya we i harem nogud i talem se: “Yestede, mi gat wan rabis dei. Be leta blong yu i rili halpem mifala. Mi no save stop blong talem tangkiu, mo mi no save eksplenem olsem wanem samting ya i givhan bigwan long mifala. Ating yestede mi bin ridim leta blong yu bitim 20 taem. Mi mi sapraes blong luk se ol toktok long leta ya oli kaen, oli mekem man i harem gud mo oli leftemap tingting. Tangkiu we tangkiu tumas.” Yes, gudfala frut i save kamaot taem yumi putum yumi long ples blong narafala we i safa, mo yumi mekem sam samting blong halpem olgeta.

18. ?Yumi mas tingbaot wanem taem yumi mekem wok blong prij, mo from wanem?

¹⁸ I tru, yumi mas gat stret tingting long wok we yumi mekem taem yumi prij. Yumi stap halpem ol narafala blong oli lanem moa long saed blong God, be bighaf blong wok ya, i no yumi we yumi stap mekem. (Ridim 1 Korin 3:6, 7.) Jehova nao i stap pulum ol man blong oli kam long hem. (Jon 6:44) Be long en, wanwan man bambae i jusum sipos hem i glad blong lesin long gud nius o nogat, hemia i dipen long samting we i stap long hat blong olgeta. (Mat. 13:4-8) !Yumi mas tingbaot se bighaf blong ol man oli no wantem lesin long Jisas, nating se hem nao i beswan tija! Taswe, tingting blong yumi i no mas foldaon taem ol man we yumi wantem halpem olgeta oli no glad blong lesin long yumi.

19. Folem 1 Korin 3: 6, 7, ?wanem gudfala frut i kamaot taem yumi soem se yumi tingbaot filing blong narafala long wok blong prij?

¹⁹ Gudfala frut bambae i kamaot taem yumi soemaot se yumi tingbaot filing blong ol narafala long wok blong prij. Bambae yumi laekem moa blong prij, mo bambae yumi kasem bigfala glad from we yumi stap givim samting long ol narafala. Mo yumi stap mekem i isi moa long olgeta we oli “stret blong kasem laef we i no save finis,” blong oli lesin long gud nius. (Wok 13:48) Taswe, “taem yumi gat janis, yumi mas mekem i gud long olgeta man.” (Gal. 6:10) Nao bambae yumi glad tumas se yumi stap leftemap nem blong Papa blong yumi long heven.—Mat. 5:16.