Sam Kristin oli yusum ol niu teknoloji blong kontaktem ol famle mo ol Witnes. I tru se Kristin we i bigman long spirit, bambae i tingbaot advaes ya: “Man we i tingting gud, i luksave we trabol i stap kam, nao i go haed, be man we i no gat ekspiriens, hem i gohed nomo, i no wantem save, mo biaen i safa from.”—Prov. 27:12.

Yumi kasemsave se Jehova i wantem protektem yumi. Taswe yumi no joen wetem olgeta we oli stap seraotem ol man, olgeta we oli disfelosip, o oli stap leftemap ol rong tijing. (Rom 16:17; 1 Kor. 5:11; 2 Jon 10, 11) Maet samfala long kongregesen oli no stap obei long ol loa blong Baebol. (2 Tim. 2:20, 21) Sipos yumi wantem fren wetem ol narafala, yumi mas tingbaot samting ya. Be maet i had blong jusum ol gudfala fren taem yumi yusum wan mesejing aplikesen.

I impoten tumas blong lukaotgud taem yumi jusum olgeta we yumi wantem joen wetem, speseli sipos ol man ya oli stap long wan bigfala grup. Sam Kristin oli joen long wan bigfala grup, be rabis frut i kamaot from. ?Olsem wanem wan brata o wan sista i save lukaotgud sipos i gat handred o taosen man long wan grup? Bambae i no posibol blong save stret aedentiti blong evri man long grup ya, mo blong save sipos oli strong long spirit. Ol Sam 26:4 i talem se: “Mi mi no stap joen wetem ol man blong giaman, mo mi stap longwe long olgeta we oli stap haedem prapa fasin blong olgeta.” !Taswe i moa waes blong jusum olgeta ya nomo we yu savegud!

Nating sipos wan Kristin i gat wan smol grup blong fren nomo, be hem i mas lukaotgud yet se hamas taem hem i spenem blong teksem olgeta, mo i lukaotgud long samting we oli stap tokbaot. Sipos ol narafala long grup ya oli stap tokbaot wan topik, o oli spenem plante taem long topik ya, yumi no mas filim se yumi tu yumi mas ansa long mesej blong olgeta. Pol i bin wonem Timoti long saed blong sam man we oli stap “tokbaot man tu, mo oli pusum nus long bisnes blong ol narafala man.” (1 Tim. 5:13) Tede man i save mekem ol samting ya tru long elektronik tu.

Wan Kristin we i bigman long spirit, bambae i no kritisaesem wan man, o lesin long wan man we i mekem fasin ya. Mo bambae hem i no talemaot sikret blong wan nara Kristin long ol narafala. (Sam 15:3; Prov. 20:19) Mo bambae hem i no ripitim o lesin long eni stori we i blong mekem man i sek, o ol ripot we i no gat pruf blong olgeta. (Efes. 4:25) Evri manis, yumi kasem plante kakae long spirit mo ol laswan nius we yumi save trastem, tru long websaet blong yumi jw.org mo long ol program blong JW Brodkasting^®.

Sam Witnes oli yusum ol mesejing aplikesen blong salem mo pem ol prodak, o blong givim wok long ol man. Ol samting ya oli blong mekem bisnes, be oli no blong mekem ol tiokratik wok. Ol Kristin we oli no wantem gat fasin ya blong “laekem mane tumas,” oli neva yusum bigfala famle blong ol brata blong winim mane long olgeta.—Hib. 13:5.

?I stret blong yusum mesejing aplikesen, blong askem mane blong givhan long olgeta we oli gat nid o oli kasem disasta? Yumi lavem ol brata sista mo yumi intres long olgeta, mo plante taem yumi soem lav ya long ol aksen blong yumi. (Jem. 2:15, 16) Be sipos yumi traem blong mekem olsem tru long wan mesejing aplikesen, hemia i save blokem wan plan we i gud moa we lokol branj ofis o kongregesen i mekem finis. (1 Tim. 5:3, 4, 9, 10, 16) Mo i sua se i no gat wan long yumi i wantem givim tingting long ol narafala, se yumi kasem spesel wok blong lukaot long ol sipsip blong God.

Yumi wantem mekem samting blong givim glori long God. (1 Kor. 10:31) Taswe sipos yu wantem yusum wan mesejing aplikesen o wan nara teknoloji, i gud yu tingbaot ol denja ya mo yu lukaotgud.