1. ?Laef blong yu i olsem wanem bifo we yu stat blong stadi Baebol?

 ?LAEF blong yu i olsem wanem bifo we yu stadi Baebol wetem ol Witnes blong Jehova? Plante long yumi oli no laekem tingtingbak long olfala laef we oli bin gat. Ol fasin blong yumi long taem ya oli folem tingting we wol i gat long saed blong samting we i stret mo samting we i no stret. Sipos i olsem, yumi ‘no gat hop long wol ya mo yumi no gat God.’ (Efes. 2:12). Be afta we yumi stat blong stadi Baebol laef blong yumi i jenis.

2. ?Yu yu faenemaot wanem taem yu stadi Baebol?

² Taem yu stap stadi Baebol, yu faenemaot se yu gat wan Papa long heven we i lavem yu tumas. Yu luksave se sipos yu wantem mekem Jehova i glad mo kam pat blong famle blong hem, yu mas mekem sam bigfala jenis long laef blong yu mo lanem blong folem ol rul blong hem.—Efes. 5:3-5.

3. Folem Kolosi 3:9, 10, ?Jehova i wantem se yumi mekem wanem? ?Mo bambae yumi tokbaot wanem long stadi ya?

³ Jehova i Krieta blong yumi mo i Papa blong yumi long heven, taswe hem i gat raet blong talem samting we ol memba blong famle blong hem oli sud folem. Mo hem i wantem se bifo we yumi baptaes, yumi mas traehad blong “tekemaot olfala fasin blong yumi wetem ol wok we oli joen wetem.” * (Ridim Kolosi 3: 9, 10.) Stadi ya bambae i halpem olgeta we oli wantem baptaes blong ansa long tri kwestin: (1) ?Wanem ya “olfala fasin”? (2) ?From wanem Jehova i wantem se yumi tekemaot? (3) ?Olsem wanem blong mekem samting ya? Long yumi we  yumi baptaes finis, stadi ya bambae i halpem yumi blong yumi no tekembak olfala fasin we yumi tekemaot finis.

4. ?Man we “olfala fasin” i gat paoa long hem, i gat wanem fasin?

⁴ Wan man we “olfala fasin” i gat paoa long hem, i tingting mo i mekem samting we i no stret. Maet hem i tingbaot hem wan nomo, i kros kwik, i no gat fasin blong talem tangkiu, mo i praod. Mo tu, maet hem i laekem blong lukluk ponografi mo wajem ol muvi blong faet. I sua se hem i gat sam gudfala fasin, mo maet hem i gilti from ol nogud samting we hem i talem o i mekem. Be maet hem i no gat strong tingting blong jenisim ol fasin mo tingting blong hem.—Gal. 5:19-21; 2 Tim. 3:2-5.

5. ?Yumi save tekemaot fulwan olfala fasin blong yumi? Eksplenem. (Ol Wok 3:19)

⁵ Yumi sinman, taswe i no gat wan long yumi we i save tekemaot fulwan ol nogud tingting mo filing we hem i gat. Samtaem, yumi save mekem o talem wan samting we biaen yumi rigret from. (Jer. 17:9; Jem. 3:2) Be taem yumi tekemaot olfala fasin, fasin mo tingting blong wol i nomo kontrolem yumi. Naoia yumi kam wan defren man.—Aes. 55:7; ridim Ol Wok 3:19.

6. ?From wanem Jehova i wantem se yumi mas tekemaot olfala fasin blong yumi?

⁶ Jehova i wantem se yumi sakemaot ol nogud fasin mo tingting from we hem i lavem yumi tumas mo i wantem se yumi harem gud long laef. (Aes. 48:17, 18) Hem i save se olgeta we oli laekem mekem ol nogud fasin, oli stap spolem olgeta wan mo ol man raonabaot long olgeta. Jehova i harem nogud taem hem i luk we yumi spolem yumi wan mo ol narafala.

7. Folem Rom 12:1, 2, ?wanem desisen we yumi mas mekem?

⁷ Maet long stat, sam fren o famle bambae oli traem daonem o jikim yumi, taem yumi wantem jenisim ol fasin blong yumi. (1 Pita 4:3, 4) Maet oli talem se yumi gat raet blong mekem eni samting we yumi wantem, mo yumi no sud letem narafala blong oli talem samting we yumi mas mekem. Be olgeta we oli no wantem folem ol rul blong Jehova oli no fri fulwan. Blong talem stret, oli stap letem wol blong Setan i kontrolem olgeta. (Ridim  Rom 12:1, 2.) Yumi evriwan i mas mekem wan desisen: Yumi kipim olfala fasin blong yumi we Setan mo sin nao i kontrolem, o yumi letem Jehova i jenisim yumi blong kam wan gudfala man.—Aes. 64:8.

8. ?Wanem i save halpem yumi blong sakemaot ol rong tingting mo fasin?

⁸ Jehova i save se bambae i tekem taem blong yumi traehad blong sakemaot ol rong tingting mo fasin blong yumi. (Sam 103:13, 14) Be wetem Tok blong hem, spirit blong hem, mo oganaesesen blong hem, hem i givim waes, paoa, mo sapot we yumi nidim blong jenisim fasin blong yumi. I sua se hem i stap halpem yu finis. Taswe naoia bambae yumi tokbaot sam rod we yu save folem blong tekemaot olfala fasin blong yu mo blong yu naf blong kasem mak blong baptaes.

9. ?Baebol i save givhan long yu blong mekem wanem?

⁹ Yusum Baebol blong jekem gud yu wan. Baebol i olsem wan mira we i save halpem yu blong jekem ol aksen, tingting, mo toktok blong yu. (Jem. 1:22-25) Baebol tija blong yu mo ol narafala Kristin we oli bigman long spirit oli save givim advaes blong givhan long yu. Eksampol, bambae oli yusum ol vas blong Baebol blong halpem yu blong luksave ol samting we yu gud long hem, mo ol samting we yu nid blong kam gud moa long hem. Mo tu, bambae oli tijim yu olsem wanem blong faenem ol advaes we i save halpem yu blong winim ol slak fasin blong yu. Mo oltaem Jehova i rere blong halpem yu. Hem nao beswan man blong halpem yu from we hem i save samting we i stap long hat blong yu. (Prov. 14:10; 15:11) So traehad blong gat fasin ya blong prea long hem mo stadi long tok blong hem evri dei.

10. ?Yu yu lanem wanem long stori blong Elie?

¹⁰ Yu mas trastem se ol rul blong Jehova oli beswan. Evri samting we Jehova i askem yumi blong mekem, oli blong givhan long yumi. Olgeta we oli laef folem ol rul blong Jehova, narafala i respektem olgeta, oli gat gudfala laef, mo oli kasem trufala glad. (Sam 19:7-11) Be olgeta we oli no wantem folem ol rul blong Jehova, oli safa long ol nogud frut we i kamaot from ol wok we i kamaot long tingting blong man. Makem samting we man ya Elie i talem long saed blong ol man we oli no wantem folem ol rul blong God. Elie i gruap long trutok. Be taem hem i yangfala hem i jusum blong joen wetem ol rabis fren. Ale hem i stat blong tekem drag, i mekem ol rabis fasin, mo i stap stil. Hem i luksave se hem i gat fasin ya blong kam kros bitim mak mo faet. Elie i talem se: “Blong talem stret, mi mekem evri nogud samting we wan Kristin i no sud mekem.” Nating se i olsem, Elie i no fogetem ol samting we hem i lanem taem hem i smol. Hem i traehad, blong sakemaot ol rabis fasin ya mo i tekem baptaes long yia 2000. Taem Elie i folem ol rul blong Jehova, ?samting ya i givhan long laef blong hem olsem wanem? Elie i talem se: “Naoia mi gat pis long tingting mo tingting blong mi i nomo stikim mi.” * Ekspiriens ya i soemaot se, olgeta we oli sakemaot ol rul blong Jehova oli stap spolem olgeta nomo. Nating se i olsem, Jehova i glad blong halpem olgeta blong oli jenisim laef blong olgeta.

11. ?Wanem ol fasin we Jehova i no laekem nating?

¹¹ Lanem blong agensem samting we Jehova i no laekem nating. (Sam 97:10) Baebol i soemaot se Jehova i no laekem nating “fasin blong flas, giaman, mo kilim man i ded.” (Prov. 6:16, 17) Mo tu, hem “i no laekem nating fasin  blong faet mo ol man blong giaman.” (Sam 5:6) Jehova i no laekem nating ol nogud fasin ya. Taswe hem i finisim ol rabis man long taem blong Noa from we oli mekem wol ya i fulap long ol raf fasin. (Jen. 6:13) Tingbaot wan narafala eksampol. Jehova i talem long profet Malakae se hem i no laekem nating olgeta we oli stap divosem patna blong olgeta we i no mekem sin. Hem i no akseptem wosip blong olgeta mo bambae hem i jajem olgeta from fasin blong olgeta.—Mal. 2:13-16; Hib. 13:4.

12. ?I minim wanem blong “agensem ol samting we oli rabis”?

¹² Jehova i wantem se yumi “mas agensem ol samting we oli rabis.” (Rom 12:9) Tok ya “agensem” i minim wan strong filing we yumi gat blong no laekem nating wan samting. Traem tingbaot filing blong yu sipos oli askem yu blong kakae ol kakae we oli sting finis. Taem yu tingbaot samting ya, maet yu harem se yu wantem traot. Hemia nao sem lukluk we yumi sud gat long ol fasin we Jehova i no laekem nating.

13. ?From wanem yumi mas lukaot gud long tingting blong yumi?

¹³ Lukaot gud long tingting blong yu. Ol tingting blong yumi oli gat paoa long ol aksen blong yumi. Hemia nao from wanem Jisas i talem se yumi mas blokem ol tingting we oli save pulum yumi blong mekem wan bigfala sin. (Mat. 5:21, 22, 28, 29) I sua se yumi wantem tumas blong mekem Papa blong yumi long heven i glad. Taswe i impoten tumas we yumi mas kwik blong blokem eni nogud tingting we i save kam long maen blong yumi.

14. ?Ol toktok blong yumi oli soemaot wanem long saed blong yumi? ?Mo wanem ol kwestin we i gud yu askem long yu wan?

¹⁴ Lukaot gud long toktok blong yu. Jisas i talem se: “Samting we i kamaot long maot blong man, hem i kamaot long hat blong hem fastaem.” (Mat. 15:18) Yes, ol toktok blong yumi oli soemaot klia samting we i stap long hat blong yumi. Taswe i gud yu askem yu wan se: ‘?Bambae mi tok tru nating sipos mi save kasem trabol from? Sipos mi mi wan mared man o woman, ?mi mi lukaot gud blong no pleplei wetem filing blong narafala? ?Mi mi lukaot gud blong no talem ol rabis tok? ?Mi mi toktok long kwaet fasin taem narafala i mekem mi mi kros?’ Ol kwestin ya oli save givhan long yu sipos yu tingting dip long olgeta. Ol rabis toktok blong yu, oli olsem ol tred long wan  klos we i holemtaet olfala fasin blong yu. Sipos yu wantem sakemaot olfala fasin blong yu, yu mas stop blong talem ol rabis tok, giaman tok, mo ol doti tok.

15. ?I minim wanem blong nilim olfala fasin blong yumi long “pos”?

¹⁵ Rere blong tekem aksen kwiktaem. Aposol Pol i yusum wan pijatok blong tokbaot from wanem i impoten blong jenisim fasin blong laef blong yumi. Hem i talem se yumi mas nilim “olfala fasin” blong yumi long “pos.” (Rom 6:6) Jisas i rere blong ded long wan pos blong mekem Jehova i glad. Long sem fasin, sipos yumi wantem mekem Jehova i glad, yumi mas rere blong lego ol rabis fasin we Jehova i no laekem nating. Sipos yumi mekem olsem, bambae yumi gat wan tingting we i klin, mo gat hop ya harem gud long laef we i no save finis. (Jon 17:3; 1 Pita 3:21) Yumi mas tingbaot se Jehova bambae i no jenisim ol rul blong hem blong mekem yumi glad. Be yumi nao yumi mas jenisim ol fasin blong yumi mo obei long ol rul blong hem.—Aes. 1:16-18; 55:9.

16. ?From wanem yu mas faet agensem ol nogud tingting we yu gat?

¹⁶ Gohed blong faet agensem ol nogud tingting we yu gat. Afta we yu baptaes,yu mas gohed blong faet agensem ol nogud tingting we yu gat. Tingbaot eksampol blong wan man nem blong hem Mauricio. Taem hem i yangfala, hem i stat blong gat fasin ya blong slip wetem man bakegen. Biaen hem i mitim ol Witnes blong Jehova mo i stat blong stadi Baebol. Hem i mekem ol jenis long laef blong hem, mo i tekem baptaes long 2002. Nating se naoia Mauricio i mekem wok blong Jehova blong plante yia, hem i talem se: “Blong talem stret samtaem mi mas faet strong agensem nogud filing ya we mi gat.” Hem i no letem samting ya i daonem tingting blong hem. Be hem i talem se: “Mi glad tumas from we mi save se taem mi jusum blong no mekem nogud samting ya, mi stap mekem Jehova i glad.” *

17. ?Stori blong Nabiha i leftemap tingting blong yu olsem wanem?

¹⁷ Prea from help blong Jehova, mo dipen long tabu spirit blong hem, i no prapa paoa blong yu. (Gal. 5:22; Fil. 4:6) Yumi mas traehad blong tekemaot fulwan olfala fasin blong yumi. Tingbaot stori blong wan woman we nem blong hem Nabiha. Papa blong hem i lego  hem taem hem i gat 6 yia nomo. Nabiha i talem se: “Long taem ya, mi mi harem nogud bigwan.” Taem Nabiha i stap gruap, hem i gat fasin ya blong kros kwik mo i save kros bitim mak. Hem i stat blong salem ol drag mo oli arestem hem, biaen hem i spenem sam yia long prisen. Ol Witnes we oli visitim kalabus long taem ya oli statem Baebol stadi wetem hem. Nabiha i stat blong mekem sam bigfala jenis long laef blong hem. Hem i talem se: “I isi blong lego sam long ol nogud fasin blong mi, be fasin blong smok i had blong lego.” Nabiha i traehad blong bitim wan yia mo biaen hem i stop blong smok. ?Olsem wanem hem i naf blong mekem samting ya? Hem i talem se: “Mi prea oltaem long Jehova mo samting ya nao i halpem mi blong stop smok.” Naoia Nabiha i talem long ol narafala se: “Mi mi sua se sipos mi naf blong mekem ol jenis blong mekem Jehova i glad, bambae ol narafala tu oli save mekem sem mak.” *

18. Folem 1 Korin 6:9-11, ?plante man blong God oli naf blong mekem wanem?

¹⁸ Long taem blong ol fas Kristin, sam long ol man mo woman we Jehova i jusumaot olgeta blong oli go rul wetem Kraes oli bin mekem sam fasin we i nogud we i nogud. Eksampol, samfala oli mekem adaltri, oli slip wetem man bakegen, mo sam oli ol stilman. Be wetem help blong tabu spirit blong God, oli naf blong mekem ol jenis long laef blong olgeta. (Ridim 1 Korin 6: 9-11.) Sem mak tede, Baebol i halpem plante milian man blong oli jenisim laef blong olgeta. * Oli lego ol rabis fasin we i had blong man i lego. Eksampol blong olgeta i soemaot se yu tu yu save mekem jenis long laef blong yu mo winim ol nogud fasin blong yu save kasem mak ya blong baptaes.

19. ?Bambae yumi tokbaot wanem long nekis stadi?

¹⁹ I tru, yumi evriwan i wok had blong tekemaot olfala fasin, be olgeta we oli wantem baptaes oli mas traehad tu blong putum niufala fasin. Nekis stadi bambae i tokbaot olsem wanem yumi save mekem samting ya, mo olsem wanem ol narafala oli save givhan long yumi.