Samfala we oli ridim vas ya kwiktaem, maet bambae oli gat kwestin olsem. Be, i gat tu defren man we nem blong tufala tugeta Mefiboset. Naoia bambae yumi luk samting we i hapen mo lesen we yumi save lanem from.

King Sol blong Isrel i gat seven boe mo tu gel. Fasbon boe blong Sol hemia Jonatan. Samtaem biaen, Rispa we i woman blong Sol i bonem wan narafala boe we nem blong hem, Mefiboset. Be samting we i intresting se Jonatan tu i gat wan boe we nem blong hem Mefiboset. Taswe, King Sol i gat wan boe mo wan smol bubu we nem blong tufala tugeta Mefiboset.

Be samtaem biaen, King Sol i stat blong agensem ol man Gibeon we oli laef long medel blong ol man Isrel, mo i wantem kilim i ded olgeta evriwan. I luk olsem se hem i kilim plante long olgeta finis i ded. Mo samting we hem i mekem i rong. ?From wanem? From we long taem blong Josua, ol jif blong Isrel oli mekem wan kontrak blong pis wetem ol man Gibeon.—Jos. 9:3-27.

Mo kontrak ya i stap yet long taem blong King Sol. Be King Sol i gat defren tingting, mo i wantem kilim i ded olgeta man Gibeon. From samting ya “blad blong ol man Gibeon i stap long han blong Sol wetem ol famle blong hem.” (2 Saml. 21:1) Biaen, Deved i kam king. Ol man Gibeon we oli laef yet oli tokbaot rong samting we King Sol i mekem. Deved i askem long olgeta se hem i mas mekem wanem atonmen blong stretem nogud samting we King Sol i mekem mo blong Jehova i save blesem ol man Isrel. Ol man Gibeon oli no askem mane, be oli askem long Deved blong i givim ol seven boe blong man we i “plan blong kilim olgeta,” blong oli save kilim ded olgeta. (Nam. 35:30, 31) Deved i mekem samting we oli askem.—2 Saml. 21: 2-6.

Long taem ya, Sol mo Jonatan i ded finis long faet, be pikinini blong Jonatan Mefiboset i laef i stap. Taem hem i pikinini hem i kasem wan aksiden we i mekem se tufala leg blong hem i nogud, taswe hem i no joen wetem bubu man blong hem blong agensem ol man Gibeon. Deved i mekem wan kontrak wetem Jonatan, blong tufala i fren gud olwe mo hemia bambae i mekem i gud long olgeta we oli kamaot biaen long hem, inkludum Mefiboset we i boe blong Jonatan. (1 Saml. 18:1; 20:42) Baebol i talem se: “King i sore long Mefiboset, we i boe blong Jonatan from strong promes we Deved mo Jonatan i mekem long fored blong Jehova.”—2 Saml. 21:7.

Deved i stil mekem samting we ol man Gibeon oli askem. Hem i givim tufala boe blong Sol long olgeta, we wan long tufala nem blong hem Mefiboset, mo faef narafala smol bubu blong hem. (2 Saml. 21:8, 9) Aksen we Deved i tekem i mekem se kantri ya i nomo gat fol from blad blong ol man Gibeon.

Samting ya we i jes hapen, i no jes wan stori. Samting we Loa blong God i talem i klia, i se: “Yu no mas kilim ol pikinini oli ded from samting we papa blong olgeta i mekem.” (Dut. 24:16) Jehova bambae i no glad long samting we oli mekem long tufala boe blong Sol, mo faef smol bubu blong hem sipos oli no bin mekem wan samting we i rong. Loa ya i gohed se: “Wan man i mas ded from prapa sin blong hem nomo.” Be i luk olsem se olgeta seven ya we oli kamaot long Sol, oli ded from we oli bin joen wetem Sol blong kilim i ded ol man Gibeon. From samting ya, olgeta oli ded from nogud samting we oli mekem.

Stori ya i soemaot se wan man i no save mekem eskius from nogud samting we hem i mekem, mo gat tingting ya o talem se hem i stap folem ol daereksen. Wan waes proveb i talem se: “Yu smutum gud rod blong leg blong yu, nao olgeta rod blong yu bambae oli go gud.”—Prov. 4:24-27; Efes. 5:15.