1, 2. (1) ?Ol man blong God oli putum tingting blong olgeta long wanem praes? (2) ?Wanem i save mekem se yumi no fogetem praes ya? (Yu luk pija long stat blong stadi.)

OL TABU Kristin oli gat nambawan hop ya blong laef long heven long fiuja. Aposol Pol i tokbaot hop ya olsem ‘praes we God i singaot hem blong i go antap.’ (Filipae 3:14) Bambae oli rul wetem Jisas Kraes long Kingdom blong hem, mo wok wetem hem blong mekem ol man oli kam stret gud. (Revelesen 20:6) !Hemia wan nambawan hop! Ol narafala sipsip oli putum tingting blong olgeta i stap long wan narafala praes. Oli gat hop ya blong laef olwe long Paradaes long wol. !Hop ya i mekem olgeta oli glad tumas!—2 Pita 3:13.

² Pol i wantem givhan long ol tabu brata blong hem, blong oli holemstrong long God mo kasem praes ya. Hem i talem long olgeta se: “Yufala i mas gohed blong putum tingting blong yufala i stap nomo long ol samting we oli stap antap.” (Kolosi 3:2) Oli mas putum tingting blong olgeta i stap fulwan long nambawan hop ya blong laef long heven. (Kolosi 1:4, 5)  Taem ol man blong God oli tingbaot ol blesing we Jehova bambae i givim, oli no fogetem praes ya, nating se hemia laef long heven o long wol.—1 Korin 9:24.

3. ?Wanem woning we Pol i givim long ol Kristin?

³ Pol i givim woning tu from ol samting we oli save tekemaot praes ya. Long leta we hem i raetem long ol Kristin long Kolosi, hem i tokbaot ol giaman Kristin we oli folem Loa blong Moses blong traem mekem God i glad, i bitim we oli bilif long Kraes. (Kolosi 2:16-18) Mo tu, Pol i tokbaot ol samting tede we oli save tekemaot praes ya. Hem i eksplenem olsem wanem blong blokem ol rabis fasin long saed blong seks, mo samting we yumi mas mekem taem yumi gat problem long famle o wetem wan brata o sista long kongregesen. Ol gudfala advaes ya blong Pol i save givhan long yumi tede. Taswe i gud yumi tingting gud long ol woning long leta blong Kolosi.

4. ?Olsem wanem ol tingting blong wantem rabis fasin oli save tekemaot praes ya?

⁴ Fastaem Pol i mekem ol brata oli tingbaot nambawan hop blong olgeta, nao biaen hem i se: ‘Yufala i mas kilimaot ol haf blong bodi blong yufala long wol ya, blong yufala i no mekem enikaen doti fasin blong seks, mo ol doti samting, yufala i no wantem ol rabis fasin blong seks, ol samting we oli nogud, mo yufala i no wantem plante samting.’ (Kolosi 3:5) Ol tingting blong wantem ol rabis fasin oli save kam strong tumas, nao yumi no moa fren gud wetem Jehova, mo yumi no moa putum tingting i stap strong long ol blesing long fiuja. Wan brata we i mekem rabis fasin long saed blong seks be biaen i kambak long kongregesen, i talem se, taem ol filing ya oli kam strong tumas, “i let finis, mi no save tanraon.”

5. ?Yu save mekem wanem taem wan samting i pulum yu blong mekem rabis fasin?

⁵ I impoten tumas blong lukaot gud, taem yumi fesem wan samting we i save pulum yumi blong mekem rabis fasin long saed blong seks. Olsem nao, taem wan boe mo gel i stat blong fren blong mared, i waes blong tufala i putum ol rul blong tufala i no bitim mak long fasin blong tajem tufala, kiskis, mo stap tufala nomo. (Ol Proveb 22:3) Mo tu, yumi mas lukaot gud taem yumi go long ol trip blong mekem bisnes, mo long ples blong wok. (Ol Proveb 2:10-12, 16) ?Yu save mekem wanem blong blokem trabol ya? Yu talemaot klia se yu wan Witnes blong Jehova. Yu mekem fasin we i stret, mo yu no pleplei wetem filing blong narafala. Hemia i save mekem se yu kasem bigfala trabol. Yumi mas lukaot gud moa, taem tingting i foldaon mo yumi harem se yumi no gat fren. Maet yumi wantem tumas we narafala i nidim mo i lavem yumi. Sipos yumi harem nogud tumas, maet yumi glad we enikaen man nomo i soemaot lav long yumi. Long taem olsem, yumi stap long bigfala denja. Sipos samtaem yu yu harem olsem, yu no mas mekem wan samting we bambae i tekemaot praes ya. Lukluk i go long Jehova mo ol brata mo sista, blong kasem help.—Ridim Ol Sam 34:18; Ol Proveb 13:20.

6. ?Yumi mas mekem wanem long saed blong samting we yumi lukluk?

⁶ Sipos yumi wantem kilimaot ol tingting blong mekem rabis fasin, yumi mas blokem ol rabis muvi mo jusum gud ol narafala samting we yumi lukluk. Plante samting olsem oli mekem yumi tingbaot ol fasin blong Sodom mo Gomora bifo.  (Jud 7) Ol muvi ya mo ol narafala samting olsem, oli givim tingting se rabis fasin long saed blong seks i oraet nomo mo i no save spolem yumi. Taswe, oltaem yumi mas lukaot gud. Yumi no save lukluk enikaen samting nomo we i kamaot long wol. Be yumi mas jusum gud ol samting we yumi lukluk, blong oli no tekemaot praes blong laef long yumi.—Ol Proveb 4:23.

7. ?Wanem problem i save kamaot long kongregesen?

⁷ Yumi glad tumas blong stap insaed long Kristin kongregesen. Yumi stadi long Tok blong God long ol miting, mo yumi givgivhan long yumi. Hemia i mekem se yumi putum tingting i stap strong long praes. Be samtaem wan brata o sista i save rao smol wetem narafala. Sipos tufala i no stretem problem ya kwiktaem, tufala i save kam kros.—Ridim 1 Pita 3:8, 9.

8, 9. (1) ?Wanem ol fasin we yumi nidim, blong yumi kasem praes? (2) Sipos wan narafala Kristin i mekem yumi harem nogud, ?yumi mas tingbaot wanem?

⁸ Yumi no mas letem kros i tekemaot praes ya. Pol i tokbaot samting we ol Kristin oli mas mekem, i se: ‘God i jusumaot yufala finis, mo i lavem yufala tumas. Taswe, yufala i mas werem ol fasin ya olsem klos blong yufala: Yufala i mas sore long ol man, kaen, tingting i mas stap daon, yufala i mas kwaet man mo gat longfala tingting. Yufala i no mas hareap blong kros, mo yufala i mas glad blong fofogivim yufala nating sipos wan i gat poen agens long narawan. Jehova i glad oltaem blong fogivim yufala, ale yufala tu i mas mekem sem mak. Mo antap long olgeta samting ya, yufala i mas werem lav olsem wan klos, from we lav i save joenem ol man oli kam wan.’—Kolosi 3:12-14.

⁹ Sipos yumi gat lav mo kaen fasin, i isi moa blong fogivim narafala. Taem yumi harem nogud long wan samting we narafala i mekem o i talem, yumi save tingbaot sam taem we yumi tu, yumi bin talem o mekem samting we i no kaen, nao narafala i fogivim yumi. !Yumi glad tumas se oli gat lav mo kaen fasin! (Ridim Prija 7:21, 22.) Yumi glad tu long kaen fasin blong Jisas, taem i pulum yumi blong yumi joen gud long trufala wosip. (Kolosi 3:15) Yumi evriwan i lavem semfala God, yumi talemaot sem toktok, mo yumi kasem ol semfala trabol. Sipos yumi kaen, yumi lavlavem yumi, mo yumi fofogivim yumi, kongregesen bambae i joen gud, mo yumi save putum tingting i go nomo long praes we bambae yumi kasem.

10, 11. (1) ?From wanem jalus i nogud tumas? (2) ?Yumi save mekem wanem blong jalus i no tekemaot praes long yumi?

¹⁰ Fasin jalus i save tekemaot praes long yumi. Stori blong sam man long Baebol i soemaot se jalus i nogud tumas. Yumi save tingbaot Ken we i jalus long Ebel nao i kilim hem i ded. Kora, Datan, mo Abiram, trifala i jalus long Moses, nao trifala i agensem hem. King Sol i jalus long Deved nao i traem blong kilim hem i ded. Tok blong Baebol i tru nomo se: “Taem ol man oli jalus mo oli wantem rao oltaem, evri samting bambae i olbaot mo olgeta nogud samting oli stap kamaot.”—Jemes 3:16.

¹¹ Sipos yumi gat tru lav mo kaen fasin, bambae yumi no save jalus. Baebol i talem se: “Man we i gat lav, hem i gat longfala tingting mo i kaen . . . hem i no jalus.” (1 Korin 13:4) Blong yumi no kam jalus, yumi mas traem blong gat tingting blong  Jehova long evri samting. Yumi mas tingbaot ol brata mo sista long kongregesen olsem ol memba blong wan bodi nomo. Baebol i talem se: “Sipos man i presem wan haf blong bodi, evri narafala haf oli glad wetem hem.” (1 Korin 12:16-18, 26) Sipos i gat wan gudfala samting i hapen long wan brata, bambae yumi no jalus be yumi glad. Traem tingbaot gudfala eksampol blong Jonatan, pikinini blong King Sol. Hem i no jalus taem hem i kasem save se i no hem we bambae i king, be Deved nomo. Hem i leftemap tingting blong Deved mo i sapotem hem. (1 Samuel 23:16-18) ?Olsem wanem? ?Yumi save gat lav mo kaen fasin olsem Jonatan?

12. ?Wanem advaes blong Baebol i save givhan long ful famle blong i kasem praes?

¹² Taem evriwan long famle oli folem ol rul blong Baebol, i gat pis mo glad, mo bambae famle i kasem praes. Pol i givim waes advaes ya se: ‘Ol waef, yufala i mas putum yufala i stap aninit long hasban blong yufala, from we fasin ya i stret long ae blong Masta. Ol hasban, yufala i mas gohed blong lavem waef blong yufala mo no stap kros long olgeta. Ol pikinini, yufala i mas obei long papa mo mama blong yufala long evri samting, from we Masta i glad long fasin ya. Ol papa, yufala i no mas pulum pikinini blong i kam kros, from we tingting blong hem bambae i foldaon.’ (Kolosi 3:18-21) ?Yu yu luksave olsem wanem advaes ya i save givhan long famle blong yu?

13. ?Olsem wanem wan sista i save pulum man blong hem blong i wantem wosipim Jehova?

¹³ Maet yu yu wan sista we man blong yu i no wosipim Jehova, mo maet hem i no mekem i gud long yu. ?Yu harem olsem wanem? Maet yu stap kam kros mo rao long hem. ?Be samting ya bambae i stretem trabol ya? Maet yu winim ol rao, ?be  hemia bambae i mekem se hem i wantem wosipim Jehova? Ating nogat. Sipos yu respektem hem olsem hed blong famle, bambae i gat pis long famle mo yu givim ona long Jehova. Maet gudfala eksampol ya blong yu i mekem se hem i wantem wosipim Jehova, nao yutufala tugeta i save kasem praes.—Ridim 1 Pita 3:1, 2.

14. ?Wan brata i save mekem wanem sipos woman blong hem i no respektem hem?

¹⁴ Maet yu yu wan brata we woman blong yu i no wosipim Jehova. Sipos yu harem se hem i no respektem yu, ?yu save mekem wanem? Maet yu ting se i gud blong singaot strong long hem blong soemaot se yu nao yu bos. ?Be samting ya bambae i pulum hem blong i respektem yu? !Nogat! God i wantem se yu lavem woman blong yu mo yu mekem olsem Jisas. (Efesas 5:23) Jisas i hed blong kongregesen, mo oltaem hem i gat longfala tingting mo i kaen. (Luk 9:46-48) Sipos yu folem fasin blong Jisas, sloslo maet woman blong yu i wantem wosipim Jehova.

15. ?Olsem wanem Kristin hasban i soemaot se i lavem waef blong hem?

¹⁵ Jehova i talem long ol hasban se: ‘Yufala i mas gohed blong lavem waef blong yufala mo yufala i no mas stap kros long olgeta.’ (Kolosi 3:19) Hasban we i lavem waef blong hem i ona long hem. ?Olsem wanem hem i ona long hem? Hem i lesin long ol samting we waef blong hem i talem, mo i soemaot se i tinghevi long ol tok blong hem. (1 Pita 3:7) Maet i no evri taem we hem i save mekem samting we waef i wantem, be sipos hem i lesin gud, hem i save mekem wan gudfala desisen. (Ol Proveb 15:22) Man olsem i no talem strong long waef blong hem se i mas respektem hem, be hem i traehad blong winim respek blong hem. Taem wan man i lavem waef blong hem mo ol pikinini blong  hem, bambae evriwan oli hapi moa long wok blong Jehova, mo bambae oli save kasem praes blong laef.

16, 17. Sipos yu wan yangfala, ?yu save mekem wanem blong yu no kam kros long papa mo mama blong yu?

¹⁶ Sipos yu wan yangfala, maet yu ting se papa mo mama blong yu i no kasem save long yu mo tufala i strong tumas. Maet yu kam kros, nao yu no moa save sipos yu wantem gohed blong wosipim Jehova. Be sipos yu lego Jehova, bambae yu luk se i no gat wan man long wol we i lavem yu olsem papa mo mama blong yu, mo ol brata mo sista long kongregesen.

¹⁷ Traem tingbaot: Sipos papa mo mama blong yu i neva stretem yu, ating bambae yu no save sipos tufala i kea long yu. (Hibrus 12:8) I tru se tufala i no stret gud, taswe maet fasin blong tufala blong stretem yu i mekem yu yu harem nogud. Be i nogud yu tingting tumas long samting ya. I moa gud yu stap kwaet, yu no kam kros, mo yu traem kasem save from wanem tufala i stretem yu. Baebol i talem se: ‘Man we i savegud ol samting we hem i stap mekem, hem i no save toktok tumas, i save stap kwaet. Man olsem i luksave mining blong ol had samting.’ (Ol Proveb 17:27) Traehad blong kam wan bigman long tingting blong yu, we yu lesin long advaes mo lanem samting, nating se man we i givim i strong lelebet. (Ol Proveb 1:8) Yu no mas fogetem se taem yu gat wan papa mo mama we i lavem Jehova, hemia i olsem wan presen we i sas we i sas. Tufala i wantem we yu kasem praes blong laef.

18. ?From wanem yu save putum tingting blong yu i stap strong long praes ya?

¹⁸ Nating se yumi gat hop blong laef olwe long heven no long paradaes long wol, be yumi evriwan i save tingbaot wan nambawan fiuja. Hop ya i tru, i stanap long promes blong God ya we i wokem heven mo wol. Hem i talem se: ‘Wol ya bambae i fulap long ol man we oli save gud Jehova.’ (Aesea 11:9) I no longtaem, Jehova bambae i tijim evriwan we oli stap long wol. Hemia wan praes we yumi glad blong wok had from. !Taswe, oltaem yu mas tingbaot ol promes blong Jehova, mo yu no mas letem wan samting i tekemaot praes ya long yu!