1. Taem yumi harem se yumi stap yumi wan nomo, ?wanem i save kamfotem yumi? (Ol Sam 118:5-7)

?SAMTAEM yu harem se yu stap yu wan nomo? ?Se i no gat wan i stap blong halpem yu blong dil wetem ol hadtaem we yu fesem? Plante man oli harem olsem, mo sam gudfala man blong Jehova tu. (1 Ki. 19:14) Sipos samting ya i hapen long yu finis, i gud yu rimemba promes ya blong Jehova: “Bambae mi mi neva lego yu, mo bambae mi neva livim yu yu stap yu wan.” Taswe, yumi save talem wetem strong tingting se: “Jehova nao i stap halpem mi. Bambae mi no fraet.” (Hib. 13:5, 6) Aposol Pol i raetem ol tok ya long ol nara Kristin long Judia, samwe long yia 61 K.T. Tok blong hem i mekem yumi tingbaot tingting we i stap long Ol Sam 118:5-7.—Ridim.

2. ?Bambae yumi tokbaot wanem long stadi ya, mo from wanem?

² Olsem man we i raetem Sam ya, Pol i luk long ekspiriens blong hem se Jehova i Helpa blong hem. Eksampol, bitim tu yia bifo we hem i raetem leta blong hem i go long ol man Hibru, hem i travel i go long nara ples, tru long solwota we i raf tumas. (Wok 27:4, 15, 20) Bifo long taem ya mo long ful taem we hem i travel, Jehova i Helpa blong hem long plante defren rod. Bambae yumi tokbaot tri long olgeta. Hem i yusum Jisas mo ol enjel, ol man blong otoriti, mo ol brata sista. Taem yumi lukluk bakegen long samting we i hapen long laef blong Pol, bambae yumi trastem moa promes blong God, se bambae hem i ansa taem yumi singaot i go long hem blong i halpem yumi.

3. ?Wanem kwestin we maet Pol i askem hem wan, mo from wanem?

³ Pol i nidim help. Samwe long 56 K.T., wan hip blong ol man long Jerusalem i pulum hem i go aotsaed long tempol, mo i traem blong kilim hem i ded. Long nekis dei, taem Pol i go long fored blong Sanhedrin, klosap ol enemi oli brebrekem bodi blong hem. (Wok 21:30-32; 22:30; 23:6-10) Maet long taem ya Pol i askem hem wan se: ‘?Bae mi naf blong fesem hadtaem ya?’

4. ?Olsem wanem Jehova i yusum Jisas blong halpem Pol?

⁴ ?Pol i kasem wanem help? Afta we oli arestem Pol, long naet blong hem, “Masta” Jisas i stanap klosap long hem, mo i talem se: “!Yu no fraet! Yu yu eksplenem gud olgeta samting long saed blong mi finis long Jerusalem, mo yu mas mekem sem samting long Rom.” (Wok 23:11) !Enkarejmen ya i kam long stret taem! Jisas i soem se i glad long gudfala witnes we Pol i givim long Jerusalem. Mo hem i promes se Pol bambae i sef go kasem Rom, mo bambae i prij long ples ya tu. I sua se afta we Pol i harem ol tok ya, hem i harem se hem i sef, olsem wan pikinini we papa blong hem i holemtaet hem.

5. ?Olsem wanem Jehova i yusum wan enjel blong halpem Pol? (Yu luk pija long fran pej.)

⁵ ?Wanem sam nara hadtaem we Pol i fesem? Samwe tu yia afta we ol samting ya oli hapen long Jerusalem, Pol i stap long wan sip we i go long Itali, nao wan bigfala win i mekem se ol boskru mo ol pasenja oli ting se bambae oli ded. Be yet, Pol i no fraet. ?From wanem? Hem i talem long olgeta long sip se: “Las naet, God blong mi we mi stap mekem wok blong hem, hem i sanem wan enjel i kam long mi, mo i talem se: ‘Pol, yu no fraet. Yu mas stanap long fes blong Sisa. !Mo luk! God i glad blong sevem laef blong ol man ya we oli stap wetem yu long sip.’” Jehova i yusum wan enjel blong i ripitim tok we hem i bin talem long Pol tru long Jisas. Mo i tru, Pol i kasem Rom.—Wok 27:20-25; 28:16.

6. ?Wanem promes blong Jisas we i save givim paoa long yumi, mo from wanem?

⁶ ?Yumi kasem wanem help? Jisas bambae i sapotem yumi, olsem we hem i mekem long Pol. Eksampol, Jisas i promes long olgeta we oli biaen long hem se: “Mi mi stap wetem yufala oltaem, gogo kasem lashaf blong sistem blong wol.” (Mat. 28:20) Ol tok ya blong Jisas oli save givim paoa long yumi. ?From wanem? From we samtaem, yumi harem se i had tumas blong stanap strong. Eksampol, taem wan fren o famle i ded, yumi harem nogud bitim mak, mo filing ya i no jes stap blong sam  dei nomo, be maet blong plante yia, mo yumi mas dil wetem. Ol narafala oli mas dil wetem ol hadtaem we i kam taem man i kam olfala. Mo sam narafala, i gat sam dei we oli harem nogud bitim mak from we oli gat sik ya dipresen. Nating se i olsem, yumi faenem paoa blong stanap strong, from we yumi save se Jisas i stap wetem yumi “oltaem,” hemia i minim long ol taem ya tu we yumi fesem hadtaem.—Mat. 11:28-30.

7. Folem Revelesen 14:6, ?olsem wanem Jehova i halpem yumi tede?

⁷ Tok blong God i mekem yumi sua se Jehova i yusum ol enjel blong hem blong halpem yumi. (Hib. 1:7, 14) Eksampol, ol enjel oli sapotem yumi mo oli lidim yumi taem yumi talemaot “gud nius ya blong Kingdom” long ol man ‘long olgeta kantri, olgeta traeb, mo olgeta lanwis.’—Mat. 24:13, 14; ridim Revelesen 14:6.

8. ?Olsem wanem Jehova i yusum wan komanda blong ami, blong halpem Pol?

⁸ ?Pol i kasem wanem help? Long yia 56 K.T., Jisas i talem stret long Pol se bambae hem i kasem Rom. Be sam man Jiu long Jerusalem oli mekem plan blong haed long rod mo kilim Pol i ded. Taem Klodias Lisias we i komanda blong ami blong Rom, i save long plan ya, hem i sevem Pol. Kwiktaem nomo, Klodias Lisias i sanem plante soldia blong oli protektem Pol mo oli tekem hem i go long Sisaria we i stap samwe 105 km longwe long Jerusalem. Long Sisaria, hed gavman ya Filiks i “givim oda blong oli putum hem long hedkwota blong hem, we King Herod i bin wokem bifo, mo oli gad gud long hem.” Ol enemi oli no moa save kasem Pol blong kilim hem i ded.—Wok 23:12-35.

9. ?Olsem wanem Hed gavman ya Festas i halpem Pol?

⁹ Tu yia biaen, Pol i stap kalabus yet long Sisaria. Mo hed gavman ya Festas, i tekem ples blong Filiks. Ol man Jiu oli askem long Festas blong i mekem Pol i kam long Jerusalem, blong i pas long kot, be Festas i no wantem. Maet hed gavman ya i save se ol man Jiu “oli mekem plan finis se bambae oli haed long rod blong kilim Pol i ded.”—Wok 24:27–25:5.

10. ?Hed gavman ya Festas i mekem wanem taem Pol i apil long Sisa?

¹⁰ Biaen, Pol i pas long kot long Sisaria. Festas “i wantem mekem ol man Jiu oli glad long hem,” taswe hem i askem long Pol se: “?Yu yu wantem go long Jerusalem blong mi jajem yu longwe?” Pol i save se maet ol man Jiu bambae oli kilim hem i ded long Jerusalem, mo tu, hem i save samting we hem i mas mekem blong sevem laef blong hem, go long Rom, mo gohed long minista wok blong hem. Hem i talem se: “!Mi apil long Sisa!” Festas i toktok wetem ol advaesa blong hem, biaen i talem long Pol se: “Bambae yu go long Sisa, from we yu apil long Sisa.” Gudfala desisen blong Festas i sevem Pol. Sam taem biaen, Pol i go long Rom, longwe long ol man Jiu we oli stap traem blong kilim hem i ded.—Wok 25:6-12.

11. ?Maet Pol i tingbaot wanem gudfala tok blong Aesea?

¹¹ Taem Pol i stap wet blong go long Itali, maet hem i tingbaot woning we tabu spirit i pulum profet Aesea blong i talemaot long ol enemi blong Jehova, we i se: “!Yufala i save mekemrere wan plan, be bambae i no save kamtru! !Yufala i save talem eni samting we yufala i wantem, be bambae i no save mekem yufala i win, from we God i stap wetem mifala!” (Aes. 8:10) Pol i save se God bambae i halpem hem, mo i sua se hemia i givim paoa long hem blong i fesem ol hadtaem we i stap long fored blong hem.

12. ?Julias i tritim Pol olsem wanem, mo from samting ya, Pol i kasemsave wanem?

 ¹² Long yia 58 K.T., Pol i statem trip blong hem blong go long Itali. From we hem i wan prisena, oli putum hem long han blong Julias we i wan ofisa blong ami. Stat long taem ya, Julias i gat paoa blong spolem hem o blong mekem i gud long hem. ?Bambae hem i yusum paoa ya olsem wanem? Long nekis dei, taem oli goso, “Julias i kaen tumas long Pol, nao i letem hem i go luk ol fren blong hem.” Sam taem biaen, Julias i sevem laef blong Pol tu. ?Hem i sevem olsem wanem? Ol soldia oli wantem kilim ded evri prisena long sip, be Julias i stopem olgeta. ?From wanem? Hem i “wantem sevem Pol.” I sua se Pol i kasemsave we Jehova i yusum ofisa ya we i gat kaen fasin, blong i protektem hem.—Wok 27:1-3, 42-44.

13. ?Jehova i save yusum ol man blong otoriti olsem wanem?

¹³ ?Yumi kasem wanem help? Taem i stret wetem stamba tingting blong Hem, Jehova i save yusum tabu spirit blong hem blong pulum ol man we oli gat otoriti, blong oli mekem samting we Hem i wantem. King Solomon i raetem se: “Hat blong king i olsem ol reva long han blong Jehova. Hem i lidim hat blong king olsem we Hem i wantem.” (Prov. 21:1) ?Proveb ya i minim wanem? Ol man oli save digim wan kanal, blong jenisim rod blong wan reva i go long ples we oli wantem. Long sem fasin, Jehova i save yusum spirit blong hem blong jenisim tingting blong ol rula, blong oli mekem samting we i laenap wetem samting we hem i wantem. Taem i olsem, ol man blong otoriti oli filim se oli mas mekem desisen we i givhan long ol man blong God.—Skelem Esra 7:21, 25, 26.

14. Folem Ol Wok 12:5, ?yumi mas prea from hu?

¹⁴ ?Yumi save mekem wanem? Yumi save prea “from ol king mo ol haeman,” taem oli mas mekem ol desisen we i save afektem miting mo wok blong prij blong yumi. (1 Tim. 2:1, 2, fut.; Neh. 1:11) Olsem ol fas Kristin, yumi tu yumi mas prea strong long God from ol brata mo sista blong yumi we oli stap long prisen. (Ridim Ol Wok 12:5; Hib. 13:3) Mo tu, yumi save prea from ol gad blong prisen, we oli stap lukaot long ol brata sista blong yumi. Yumi save askem long Jehova blong hem i gat paoa long tingting blong ol man ya, nao oli save mekem olsem Julias, oli “kaen tumas” long ol brata blong yumi.—Yu luk stadi not long Ol Wok 27:3, Inglis.

15-16. ?Olsem wanem Jehova i yusum Aristakas mo Luk blong halpem Pol?

¹⁵ ?Pol i kasem wanem help? Taem Pol i stap  go long Rom, plante taem Jehova i yusum ol brata sista blong oli halpem hem. I gud yumi luk sam eksampol.

¹⁶ Tu gudfala fren blong Pol, hemia Aristakas mo Luk, tufala i jusum blong go wetem hem long Rom. * I luk olsem se Jisas i no promes long tufala se bambae oli sef nomo taem oli kasem Rom. Taswe taem tufala i folem Pol, tufala i save lusum laef blong tufala, be tufala i glad nomo, blong givhan long Pol. Sam taem biaen nomo, taem oli stap long solwota we i raf, tufala i jes save se bambae oli no ded. Taswe, Aristakas mo Luk i klaem long sip long Sisaria, i sua se Pol i glad tumas nao i prea long Jehova long fulhat blong hem, blong talem tangkiu from help we hem i givim tru long tufala Kristin ya we oli no fraet.—Wok 27:1, 2, 20-25.

17. ?Olsem wanem Jehova i yusum ol brata blong halpem Pol?

¹⁷ Taem Pol i stap mekem trip ya, plante taem ol brata sista oli halpem hem. Eksampol, taem oli kasem wof blong Saedon, Julias i letem Pol i “go luk ol fren blong hem, mo olgeta oli lukaot gud long hem.” Mo biaen, long taon blong Puteoli, Pol mo ol fren blong hem oli ‘faenem sam brata, mo oli askem blong oli stap seven dei wetem olgeta.’ Ol Kristin long ol ples ya, oli kea long nid blong Pol mo ol fren blong hem, mo i sua se oli glad bigwan long ol gudfala ekspiriens we Pol i tokbaot blong mekem bilif blong olgeta i strong. (Skelem Wok 15:2, 3.) Afta we Pol mo ol fren blong hem oli kasembak paoa, oli gohed bakegen long trip blong olgeta.—Wok 27:3; 28:13, 14.

18. ?Wanem i pulum Pol blong talem tangkiu long God mo blong i gat strong tingting?

¹⁸ Taem Pol i stap wokbaot i go long Rom, maet hem i tingbaot ol tok we hem i bin raetem tri yia bifo, i go long kongregesen long taon ya, we i se: “Blong plante yia finis mi mi wantem tumas blong kam luk yufala.” (Rom 15:23) Be Pol i no ekspektem se bambae hem i wan prisena taem i kamtru long olgeta. !I sua se hem i harem gud tumas taem hem i luk se ol brata sista long Rom oli wet long rod, blong  talem halo long hem! “Taem Pol i luk olgeta, hem i talem tangkiu long God, mo tingting blong hem i kam strong moa.” (Wok 28:15) Makem se Pol i talem tangkiu long God from ol brata we oli stap long ples ya. ?From wanem? From we bakegen, Pol i luk se Jehova i yusum ol brata sista blong halpem hem.

19. Folem 1 Pita 4:10, ?olsem wanem Jehova i save yusum yumi blong halpem olgeta we oli gat nid?

¹⁹ ?Yumi save mekem wanem? ?Yu yu save sam brata o sista long kongregesen, we oli stap harem nogud from we oli sik o oli kasem sam trabol? Maet wan famle o fren blong olgeta i ded. Sipos yumi save long nid blong wan man, yumi save askem Jehova blong i givhan long yumi blong toktok kaen o mekem samting we i soem lav. Maet stret samting we brata o sista blong yumi i nidim blong enkarejem hem, hemia ol toktok mo aksen blong yumi. (Ridim 1 Pita 4:10.) * Ol brata sista we yumi halpem olgeta, oli save trastem bakegen se promes ya blong Jehova i stret long olgeta, we i talem se: “Bambae mi mi neva lego yu, mo bambae mi neva livim yu yu stap yu wan.” ?Yu no ting se hemia i mekem yu yu haremgud tumas?

20. ?From wanem yumi save talem wetem strong tingting se: “Jehova nao i stap halpem mi”?

²⁰ Olsem Pol mo ol fren blong hem, yumi tu yumi kasem ol hadtaem long laef. Be long semtaem, yumi save gat strong tingting from we Jehova i stap wetem yumi. Hem i yusum Jisas mo ol enjel blong halpem yumi. Mo tu, sipos i laenap wetem samting we Jehova i wantem, Hem i save yusum ol man blong otoriti blong halpem yumi. Mo olsem we i hapen finis long plante long yumi, Jehova i yusum tabu spirit blong pulum ol man blong hem blong oli halpem ol Kristin brata sista blong olgeta. Taswe, olsem Pol, yumi gat gudfala risen blong talem wetem strong tingting se: “Jehova nao i stap halpem mi. Bambae mi no fraet. ?Man i save mekem wanem long mi?”—Hib. 13:6.