1, 2. ?Plante man oli luksave wanem long saed blong ol Witnes blong Jehova?

PLANTE man oli luk se ol Witnes blong Jehova oli defren long ol narafala man. Wan man, Anton Gil, i presem ol Witnes from nambawan fasin blong olgeta, taem ol Nasi oli rul long Jemani, i se: “Ol Nasi oli no laekem nating ol Witnes blong Jehova. . . . Long 1939, i gat 6,000 Witnes oli stap [long ol rabis kalabus].” Hem i talem se, nating we ol Witnes oli stap safa bitim mak, be yu save trastem olgeta, oli gat kwaet fasin, oli holemstrong long God, mo oli joen gud.

² Sam yia i pas, ol man Saot Afrika tu oli luksave se ol Witnes blong Jehova oli defren long ol narafala. Bifo, ol Witnes we kala blong skin blong olgeta i defdefren oli no gat raet blong joen wanples. Be long Sande, 18 Disemba 2011, bitim 78,000 Witnes blong Saot Afrika mo sam narafala kantri klosap, we oli kamaot long ol defdefren laen mo kala, oli joen long wan bigfala stadium long Johannesburg,  blong mekem wan spesel miting. Maneja blong stadium ya i talem se: “Mi neva luk wan grup we oli gat gudfala fasin olsem yufala. Evriwan oli jenis gud. Mo yufala i klinim gud stadium. Be samting we i impoten moa, yufala i joen gud, nating se yufala i kamaot long ol defdefren laen mo kala.”

3. ?From wanem yumi defren long ol narafala ogenaesesen?

³ Ol man we oli no Witnes oli luksave se yumi defren, from we yumi joen olsem wan famle nomo long fulwol. (1 Pita 5:9) ?From wanem yumi defren long ol narafala ogenaesesen? From we Baebol mo tabu spirit i givhan long yumi, nao yumi wok had blong jenisim ol fasin we Jehova i no glad long olgeta. Yumi “tekemaot olfala fasin,” mo yumi “werem niufala fasin.”—Kolosi 3:9, 10.

4. ?Bambae yumi tokbaot wanem long stadi ya? ?From wanem?

⁴ Taem yumi tekemaot olfala fasin, yumi no mas putumbak bakegen. Long stadi ya, bambae yumi tokbaot fastaem, olsem wanem blong tekemaot olfala fasin mo from wanem i impoten blong mekem olsem. Bambae yumi luk se, man i save mekem ol bigfala jenis long laef blong hem, nomata se hem i bin mekem ol samting we i nogud bitim mak. Biaen, bambae yumi tokbaot olgeta we oli stap long trutok plante yia finis, mo samting we oli save mekem blong oli no gobak long olfala fasin. ?From wanem yumi tokbaot samting ya? From we, samfala we oli mekem wok blong Jehova oli no lukaot gud, nao oli gobak long ol tingting mo fasin we oli mekem bifo we oli save Jehova. Yumi no mas fogetem woning ya se: “Man we i ting se hem i stap stanap strong, hem i mas lukaot blong bambae hem i no foldaon.”—1 Korin 10:12.

5. (1) ?Wanem pijatok i soemaot se yumi mas jenisim ol nogud fasin kwiktaem? (Yu luk pija long stat blong stadi.) (2) ?Wanem ol nogud fasin we Kolosi 3:5-9 i tokbaot?

⁵ ?Bambae yu mekem wanem sipos yu luksave se klos blong yu i doti mo i smel nogud? Bambae yu tekemaot kwiktaem. Long sem fasin, sipos yumi luksave se yumi stap mekem samting we Jehova i no laekem, yumi mas jenisim kwiktaem. Pol i tokbaot ol nogud fasin ya, se: “Yufala i mas tekemaot olgeta samting ya oli gowe long yufala.” Bambae yumi tokbaot tu long ol fasin ya, hemia ol nogud fasin blong seks mo ol doti fasin.—Ridim Kolosi 3:5-9.

6, 7. (1) ?Olsem wanem Pol i soemaot se yumi mas traehad bigwan blong tekemaot olfala fasin? (2) ?Sakura i stap mekem wanem fasin? ?Wanem i givim paoa long hem blong i jenisim fasin ya?

⁶ Ol nogud fasin blong seks. Long Baebol, “enikaen doti fasin blong seks” i minim fasin blong slip wetem eni man o woman we i no hasban o waef blong yumi. Pol i talem long ol Kristin se, oli mas “kilimaot” ol rabis fasin ya long “ol  haf blong bodi” blong olgeta. Hemia i min se, yumi mas traehad bigwan blong sakemaot ol tingting blong wantem ol rabis fasin ya. !Maet i had, be yumi save win!

⁷ Traem tingbaot wan sista long Japan we nem blong hem Sakura. * Taem Sakura i yangfala, hem i harem se i no gat fren mo i no glad. Taem hem i gat 15 yia, hem i slip olbaot wetem plante defren man, blong traem harem gud, mo tri taem, hem i kilim pikinini long bel blong hem. Sakura i talem se: “Long stat, mi harem gud blong slip olbaot, from we mi harem se i gat wan man i nidim mi mo i lavem mi. Be afta we sam taem i pas, mi harem nogud.” Hem i gohed blong mekem rabis fasin ya gogo hem i gat 23 yia. Nao hem i stadi Baebol wetem ol Witnes blong Jehova, mo hem i laekem tumas ol samting we hem i lanem. Jehova i givhan long hem blong i sakemaot ol rabis fasin, nao i no moa sem mo harem nogud. Tede, Sakura i stap mekem wok blong fultaem paenia, mo hem i harem se hem i gat plante fren. Hem i talem se: “Evri dei mi mi glad, from we mi harem se Jehova i lavem mi.”

8. ?Wanem sam fasin we i save mekem yumi doti long fes blong God?

⁸ Ol doti samting. Long Baebol, “ol doti samting” i no minim nomo ol doti fasin blong seks. Hem i minim tu ol samting olsem fasin blong smok mo ol tok plei we oli doti. (2 Korin 7:1; Efesas 5:3, 4) Mo tu, i save minim ol nogud samting we ol man oli mekem taem oli stap olgeta nomo, olsem ridim ol buk we oli wekemap filing blong seks o lukluk ol rabis pija. Ol samting ya i save pulum olgeta blong oli mekem doti fasin ya blong pleplei wetem seks blong olgeta.—Kolosi 3:5. *

9. ?Wanem i save hapen sipos wan man i “wantem ol rabis fasin blong seks”?

⁹ Ol man we oli stap lukluk ol rabis pija oli “wantem ol rabis fasin blong seks,” mo maet oli kam slef long ol rabis fasin ya. Ol man we oli stadi long samting ya, oli faenemaot se man we i kam slef long ol rabis pija i sem mak long man we i kam slef long ol drag no long strong dring. Taswe, yumi no sapraes se man we i lukluk ol rabis pija oltaem, bambae i spolem hem wan. Maet hem i sem bigwan, i no save wok gud, famle i no glad, hem i divos, no maet i kilim hem wan i ded. Wan man we i sakemaot fasin ya blong lukluk ol doti pija, i talem se afta we wan yia i pas, hem i no moa sem.

10. ?Olsem wanem Ribero i sakemaot fasin ya blong lukluk ol rabis pija?

¹⁰ Plante man oli harem se i had tumas blong sakemaot fasin ya blong lukluk ol rabis pija. Be oli save win. Traem tingbaot Ribero blong Brasil. Taem hem i yangfala, hem i lego papa mo mama blong hem, mo i go wok long wan faktri blong pepa. Long ples ya, hem i luk plante buk we oli fulap long ol rabis pija. Ribero i talem se: “Sloslo, mi kam slef blong ol rabis pija ya. Evri dei, mi wantem se woman blong mi i aot long haos  kwiktaem, blong mi save wajem video blong ol rabis pija.” Wan dei long ples blong wok, Ribero i luk wan bigfala hip blong ol buk, wan long olgeta hemia Spesel Rod Blong Mekem Famle i Hapi. Hem i ridim buk ya, nao ol samting we hem i lanem i pulum hem blong i stadi Baebol wetem ol Witnes blong Jehova. Be i had blong Ribero i sakemaot fasin ya blong lukluk ol rabis pija. ?Wanem i givhan long hem? Hem i talem se: “Mi mi prea, mi stadi Baebol, mo mi tingting dip long samting we mi lanem. Sloslo, mi kasem save long ol nambawan fasin blong God, nao mi lavem hem moa i bitim ol rabis pija.” Baebol mo tabu spirit i givhan long Ribero blong i jenisim fasin blong hem. Hem i baptaes, mo naoia hem i wan elda long kongregesen.

11. ?Wanem i save givhan long yumi, blong yumi sakemaot ol rabis pija?

¹¹ Blong sakemaot fasin ya blong lukluk ol rabis pija, i no naf we Ribero i stadi Baebol nomo. Hem i mas tingting dip long ol tok blong Baebol, mo mekem i go long hat blong hem. Hem i prea blong askem strong long Jehova blong i givhan long hem. Ol samting ya i mekem se Ribero i lavem God moa i bitim ol rabis pija. Sipos yumi wantem sakemaot ol rabis pija, yumi tu yumi mas lavem Jehova mo agensem ol rabis fasin.—Ridim Ol Sam 97:10.

12. ?Wanem i givhan long Stiven blong i sakemaot fasin kros mo ol nogud tok?

¹² Samfala oli save kros kwik nao oli talem ol nogud tok we i spolem narafala. Long taem olsem, ful famle i harem nogud. Wan papa long Ostrelia, Stiven, we bifo hem i tok swea mo i kam kros from ol smosmol samting nomo, i talem se: “Mi mo woman blong mi mitufala i seraot tri taem, mo mitufala i stap mekem plan blong divos.” Long taem ya, tufala i stat blong stadi Baebol wetem ol Witnes, mo Stiven i traehad blong folem ol samting we hem i lanem. Hem i talem se bifo, taem hem i no save Jehova yet, hem i olsem wan bom we i rere blong bosta enitaem, from we taem hem i no glad long wan samting, hem i faerap long kros. Be taem hem i stat blong folem ol advaes blong Baebol, samting ya i jenis. Hem i talem se: “Ol samting insaed long famle i kam gud. Jehova i givhan long mi, mo naoia mi gat pis mo kwaet tingting.” Tede, Stiven i wan man blong givhan, mo woman blong hem i mekem wok blong fultaem paenia plante yia finis. Ol elda long kongregesen oli talem se: “Stiven i wan kwaet brata, i wok had, mo hem i gat tingting daon.” Oli talem tu se oli neva luk Stiven i kam kros. Be Stiven i save se hem i no naf hem wan blong mekem ol jenis ya. Hem i talem se: “Sipos mi no bin letem Jehova i givhan blong jenisim fasin blong mi fulwan, bambae mi no  save kasem ol nambawan blesing ya long laef blong mi.”

13. ?From wanem i nogud blong kam kros? ?Baebol i givim wanem woning?

¹³ Baebol i givim woning se yumi no mas kam kros, tok nogud long narafala, mo singaot strong. (Efesas 4:31) Ol nogud fasin ya oli save lidim man blong i kilim narafala. Tede, plante man oli ting se i oraet nomo blong kros mo kilim narafala. Be taem yumi mekem olsem, yumi no stap ona long God we i wokem yumi. Taswe, plante brata mo sista oli mas jenisim fasin blong olgeta mo putum niufala fasin.—Ridim Ol Sam 37:8-11.

14. ?Wan man blong kilim man i save kam wan kwaet man? Talem wan stori.

¹⁴ Wan brata we nem blong hem Hans, i wan elda long wan kongregesen long Ostria. Kodineta blong ol elda long kongregesen ya i talem se: “Hans i wan brata we i kwaet we i kwaet mo i gat tingting daon.” Be bifo, Hans i no wan kwaet man. Taem hem i yangfala, hem i dring bitim mak mo i kilim ol narafala. Wan taem, hem i drong, nao i kam kros tumas mo i kilim gelfren blong hem i ded. Hem i go kalabus blong 20 yia, be kalabus i no jenisim fasin blong hem. Mama blong hem i askem long wan elda sipos i save go visitim Hans, nao Hans i stat blong stadi Baebol. Hem i talem se: “I hadwok blong sakemaot olfala fasin. Tu vas long Baebol we oli leftemap tingting blong mi, hemia Aesea 55:7, we i talem se: ‘Man we i mekem ol fasin nogud, i mas lego ol fasin ya,’ mo 1 Korin 6:11, we i tokbaot ol man we oli lego ol nogud fasin se: ‘Bifo sam long yufala oli olsem  nao.’ Jehova i yusum tabu spirit blong givhan long mi blong plante yia, blong mi jenisim fasin blong mi mo wokem niufala fasin.” Hans i baptaes taem hem i stap yet long kalabus, mo hem i kamfri afta we hem i stap 17 yia haf long kalabus. Hem i talem se: “Mi mi talem tangkiu long Jehova from bigfala sore we hem i gat, mo from we hem i fogivim mi.”

15. ?Wanem narafala fasin we i joen wetem olfala fasin? ?Baebol i talem wanem long saed ya?

¹⁵ Fasin blong giaman tu i joen wetem olfala fasin. Plante man oli giaman blong mekem se oli no pem takis o blong haedem wan mastik blong olgeta. Be Jehova i “God blong trutok.” (Ol Sam 31:5, NW) Taswe hem i wantem se ol man we oli wosipim hem, oli “tok tru” mo oli ‘no giaman.’ (Efesas 4:25; Kolosi 3:9) I klia se yumi mas tok tru oltaem, nating se i had o yumi sem from.—Ol Proveb 6:16-19.

16. ?Wanem bambae i givhan long yumi blong yumi tekemaot olfala fasin?

¹⁶ Yumi no naf long prapa paoa blong yumi, blong tekemaot olfala fasin. Sakura, Ribero, Stiven, mo Hans oli wok had blong jenisim fasin blong olgeta. Baebol mo tabu spirit nao i givim paoa long olgeta. (Luk 11:13; Hibrus 4:12) Blong kasem paoa ya, yumi mas ridim Baebol evri dei, tingting dip long hem, mo prea oltaem blong askem waes mo paoa blong mekem samting we yumi lanem i wok long laef blong yumi. (Josua 1:8; Ol Sam 119:97; 1 Tesalonaeka 5:17) Mo tu, taem yumi rerem ol miting mo yumi go long miting, yumi kasem help long Tok blong God mo long tabu spirit. (Hibrus 10:24, 25) Yumi mas yusum ol narafala samting tu we ogenaesesen blong Jehova i givim, olsem ol magasin, JW Brodkasting, JW Laebri, mo jw.org.—Luk 12:42.

17. ?Long nekis stadi, bambae yumi tokbaot wanem?

¹⁷ Yumi tokbaot finis sam nogud fasin we ol Kristin oli mas sakemaot mo oli no mas putumbak, sipos oli wantem mekem Jehova i glad. Be hemia nomo i no naf. Yumi mas wokem niufala fasin blong laef tu, mo holemtaet. Long nekis stadi, bambae yumi tokbaot olsem wanem yumi save mekem olsem.