1. ?Wanem sam sakrefaes we plante oli mekem, mo from wanem oli mekem?

TEDE plante milian man blong God oli mekem sam sakrefaes. Plante brata mo sista oli jusum blong stap singel. Ol mared kapol oli no hariap blong gat pikinini. Ol famle oli jus blong gat smol samting nomo long laef. Olgeta evriwan oli mekem ol desisen ya from wan impoten risen nomo: Oli wantem joen fulwan long wok blong Jehova olsem we oli naf blong mekem. Oli haremgud mo oli trastem se Jehova bambae i givim olgeta samting we oli rili nidim. ?Bambae oli sore from desisen blong olgeta? !Nogat! ?From wanem yumi sua long samting ya? Wan risen se Jehova i blesem Ebraham we i “papa blong olgeta we oli gat bilif.”—Rom 4:11.

2. (1) Folem Hibrus 11:8-10, 16, ?from wanem Ebraham i glad nomo blong lego Uru? (2) ?Bambae yumi tokbaot wanem long stadi ya?

² Ebraham i glad nomo blong lego gudfala laef blong hem long taon ya Uru. ?From wanem? From we hem i stap wet long “wan taon we fandesen blong hem i strong.” (Ridim Hibrus 11:8-10, 16.) ?“Taon” ya hem i wanem? ?Wanem ol hadtaem we Ebraham i fesem taem hem i stap wet long taon ya? ?Olsem wanem yumi save folem eksampol blong Ebraham mo olgeta tede we oli mekem olsem hem?

3. Taon ya we Ebraham i stap wet long hem, ?hem i wanem?

³ Taon we Ebraham i stap wet long hem, hem i Kingdom blong God. Jisas Kraes mo ol 144,000 tabu Kristin nao oli mekemap Kingdom ya. Pol i tokbaot Kingdom ya se i wan “taon blong God ya we i laef, hemia Jerusalem blong heven.”  (Hib. 12:22; Rev. 5:8-10; 14:1) Jisas i tijim ol disaepol blong hem blong prea from sem Kingdom ya, blong i kam mekem wil blong God long wol, olsem long heven.—Mat. 6:10.

4. Folem Jenesis 17:1, 2, 6, ?Ebraham i save wanem long saed blong Kingdom, o taon ya?

⁴ ?Ebraham i save evri samting long saed blong Kingdom blong God? Nogat. Blong plante handred yia, ol save ya oli wan “tabu tokhaed.” (Efes. 1:8-10; Kol. 1:26, 27) Be Ebraham i save se sam long ol pikinini blong hem bambae oli kam king. Jehova i mekem promes ya long hem stret. (Ridim Jenesis 17:1, 2, 6.) Ebraham i bilif strong long ol promes blong God, nao i olsem se hem i luk Man Ya We God i Makemaot Hem, o Mesaea, we bambae i King long Kingdom blong God. From samting ya, Jisas i save talem long ol man Jiu long taem blong hem se: “Papa blong yufala Ebraham, hem i glad tumas taem hem i tingbaot se bambae hem i luk dei blong mi, mo taem hem i luk, hem i glad tumas.” (Jon 8:56) Yes, Ebraham i save se olgeta we oli kamaot biaen long hem, bambae oli pat blong wan Kingdom we Jehova i stanemap, mo hem i glad nomo blong wet blong Jehova i mekem promes ya i kamtru.

5. ?Olsem wanem yumi save se Ebraham i stap wet long taon ya we God i wokem?

⁵ ?Olsem wanem Ebraham i soem se hem i stap wet long taon ya, o Kingdom, we God i wokem? Fastaem, Ebraham i no joen long eni kingdom long wol ya. Hem i muv oltaem, i no wantem stap long wan ples nomo, from we hem i no wantem sapotem king blong ol ples ya. Mo tu, Ebraham i no traem blong stanemap prapa kingdom blong hem. Be, hem i gohed blong obei long Jehova mo i wet blong Hem i mekem promes blong Hem i kamtru. Taem Ebraham i mekem olsem, hem i soem se hem i bilif strong long Jehova. I gud yumi luk sam long ol hadtaem we hem i fesem, mo lanem lesen from eksampol blong hem.

6. ?Taon ya Uru i olsem wanem?

⁶ Taon we Ebraham i lego, hem i sef, mo ol man blong hem oli skul gud mo oli gat wan gudfala laef. Ol bigfala stonwol wetem wota we i dip we i goraon long tri saed blong  taon ya, oli protektem hem. Ol man Uru oli save raetgud mo oli gud long matematik. Mo i luk olsem se taon ya i wan stamba ples blong bisnes, from we oli faenem plante pepa blong bisnes long ples we taon ya i stap long hem bifo. Ol man oli wokem haos blong olgeta long brikis, oli plastarem mo pentem long waetwas. Sam haos oli gat 13 o 14 rum, mo yad blong olgeta i ston floa.

7. ?From wanem Ebraham i mas trastem se Jehova bambae i protektem hem mo famle blong hem?

⁷ Ebraham i mas trastem se Jehova bambae i protektem hem mo famle blong hem. ?From wanem? Tingbaot se Ebraham mo Sera i lego gudfala laef long haos blong hem we i sef long Uru, blong go stap long ol tent long ol open ples long Kenan. Ol bigfala stonwol mo ol wota we oli dip oli no moa protektem hem mo famle blong hem. Naoia ol enemi oli save atakem olgeta enitaem nomo.

8. ?Ebraham i kasem wanem hadtaem?

⁸ Ebraham i mekem wil blong God, be wan taem i no gat naf kakae blong fidim famle blong hem. Kakae i sot bigwan long kantri ya we Jehova i sanem hem i go long hem. Hadtaem ya i strong tumas nao Ebraham i jusum blong hem mo famle blong hem oli muv i go long Ijip blong smoltaem. Be taem hem i stap longwe, Fero i tekemaot waef blong hem. Ating Ebraham i mas wari tumas go kasem we Jehova i fosem Fero blong i givimbak Sera long hem.—Jen. 12:10-19.

9. ?Wanem problem we Ebraham i gat long famle blong hem?

⁹ Mo tu, i gat sam bigfala problem long famle blong Ebraham. Waef blong hem we hem i lavem tumas, Sera, i no save gat pikinini. Hemia i mekem tufala i harem nogud blong plante yia. Ale, Sera i givim slef gel blong hem, Hega, long Ebraham, blong hem i save bonem ol pikinini blong Ebraham mo Sera. Be taem Hega i gat bel long Ismael, hem i lukluk rabis long Sera. Situesen ya i kam mowas nao Sera i ronemaot Hega long haos.—Jen. 16:1-6.

10. ?Wanem i hapen we i traem fasin blong Ebraham blong trastem Jehova?

¹⁰ Biaen, Sera i gat bel mo i bonem wan boe blong Ebraham, mo Ebraham i kolem hem se Aesak. Ebraham i lavem tugeta boe blong hem, Ismael mo Aesak. Be Ismael i stap mekem i nogud long Aesak, ale Ebraham i mas sanemaot Ismael mo Hega. (Jen. 21:9-14) Sam yia biaen, Jehova i askem long Ebraham blong i kilim Aesak olsem wan sakrefaes. (Jen. 22:1, 2; Hib. 11:17-19) Long tufala taem ya, Ebraham i mas trastem se Jehova bambae i mekem evri samting long saed blong tufala boe blong hem i go gud, olsem we hem i promes.

11. ?From wanem Ebraham i gat longfala tingting blong wet long Jehova?

¹¹ Long olgeta taem ya, Ebraham i lanem blong wet long Jehova wetem longfala tingting. I luk olsem se hem i gat bitim 70 yia finis taem hem mo famle blong hem oli lego Uru. (Jen. 11:31–12:4) Mo blong 100 yia olsem, hem i laef long ol tent nomo mo i stap go olbaot long Kenan. Ebraham i ded taem hem i gat 175 yia. (Jen. 25:7) Jehova i bin promes blong givim kantri ya we Ebraham i stap wokbaot long hem, long olgeta we oli kamaot biaen long hem, be Ebraham i no luk promes ya i kamtru. Mo hem i ded we i no luk Kingdom blong God, o taon ya, i stanap. Nating se i olsem, Baebol i talem se “hem i gat gudfala laef, mo taem hem i ded, hem i olfala we i olfala.” (Jen. 25:8) Ebraham i fesem olgeta hadtaem ya, be yet, hem i gohed blong bilif strong mo i glad blong wet long Jehova. ?From wanem hem i naf blong stanap strong? From we Jehova i protektem Ebraham long ful laef blong hem mo i tritim  hem olsem wan fren.—Jen. 15:1; Aes. 41:8; Jem. 2:22, 23.

12. ?Yumi stap wet long wanem? ?Bambae yumi tokbaot wanem?

¹² Olsem Ebraham, yumi stap wet long taon ya we i gat strong fandesen. Be yumi no stap wet blong i stanap, from we Kingdom blong God i stanap finis long 1914 mo i kontrolem heven finis. (Rev. 12:7-10) Naoia yumi stap wet blong hem i kontrolem fulwol. Taem yumi stap wet blong samting ya i hapen, yumi mas fesem plante hadtaem olsem Ebraham mo Sera bifo. ?Ol man blong Jehova tede oli naf blong folem eksampol blong Ebraham? Ol laef stori we oli kamaot long Wajtaoa, oli soem se plante tede oli gat bilif mo longfala tingting olsem Ebraham mo Sera. Bambae yumi tokbaot sam long ol stori ya mo luk lesen we yumi save lanem.

13. ?Yu yu lanem wanem long stori blong Brata Walden?

¹³ Glad nomo blong mekem sakrefaes. Sipos yumi wantem putum Kingdom blong God, o taon ya, long fasples, yumi mas mekem olsem Ebraham we i glad nomo blong mekem sakrefaes, blong mekem God i glad. (Mat. 6:33; Mak 10:28-30) Tingbaot eksampol blong brata ya Bil Walden. * Long 1942, Bil i stat blong stadi wetem ol Witnes Blong Jehova. Be long taem ya, hem i rere blong graduet long wan yunivesiti blong U.S wetem wan digri blong enjinia long akitek. Tija blong Bil i mekem plan blong Bil i gat wan wok afta long graduesen blong hem, be Bil i talem no. Hem i eksplenem se hem i jusum finis blong wok blong God fultaem, bitim we hem i wok blong kasem bigfala mane. Smoltaem afta, gavman i singaot Bil blong i joenem ami. Wetem respek hem i talem no, nao oli mekem hem i faen bitim 100,000 vatu mo i mas go long kalabus blong faef yia. Be afta long tri yia oli letem hem i go fri. Biaen, oli askem hem blong i go long Gilead Skul, afta hem i go mekem misinari wok long Afrika. Biaen Bil i mared long Eva, mo tufala tugeta i wok long Afrika, wan ples we i nidim blong tufala i mekem plante sakrefaes.  Sam yia biaen, tufala i gobak long Yunaeted Stet blong lukaot long mama blong Bil. Long sot tok nomo, Bil i tokbaot laef blong hem se: “Jehova i yusum mi long wok blong hem bitim 70 yia. Taem mi tingbaot nambawan blesing ya, wota blong ae blong mi i ron. Mi mi talem tangkiu long hem plante taem, from we hem i lidim mi blong mekem wok blong hem long ful laef blong mi.” ?Yu yu naf blong mekem wok blong God fultaem?

14-15. ?Yu yu lanem wanem long stori blong Brata mo Sista Apostolidis?

¹⁴ Rere blong fesem trabol. Yumi lanem long eksampol blong Ebraham se olgeta ya tu we oli yusum ful laef blong olgeta long wok blong Jehova, oli stap fesem ol trabol. (Jem. 1:2; 1 Pita 5:9) Hemia samting we i hapen long Aristotelis Apostolidis. * Hem i baptaes long 1946 long Gris, mo long 1952 hem i promes blong mared long sista Eleni. Sista ya tu i gat sem tingting olsem hem, hemia blong wok blong Jehova fultaem. Be biaen Eleni i sik, mo oli faenemaot se wan lam i gru long bren blong hem. Oli katemaot lam ya, be sam yia afta we tufala i mared, lam ya i gru bakegen. Ol dokta oli katem hem bakegen, be wansaed bodi blong hem i ded mo hem i no moa save toktok gud. Hem i gohed blong wok strong long wok blong prij nating se hem i sik mo gavman i mekem i strong tumas long olgeta long taem ya.

¹⁵ Brata Aristotelis i lukaot long waef blong hem blong 30 yia. Long semtaem, hem i mekem wok blong elda, i wok long ol komiti blong asembli, mo i givhan blong bildim wan Haos Asembli. Nao long 1987, Eleni i kasem wan aksiden taem i stap prij. Hem i stap long koma blong tri yia mo biaen i ded. Aristotelis i tokbaot stori ya blong hem long ol sot toktok ya, se: “Long laef blong mi, mi fesem hadtaem, bigfala traem, mo plante samting we mi no save se bambae oli kamaot. Olgeta samting ya oli halpem mi blong stanap strong longtaem mo gohed oltaem. Mo oltaem, Jehova i givim paoa long mi blong winim ol problem ya.” (Sam 94:18, 19) !I tru tumas se Jehova i lavem olgeta we oli mekem  bes blong olgeta long wok blong hem, nomata se oli kasem ol trabol!

16. ?Brata Knorr i givim wanem gudfala advaes long waef blong hem?

¹⁶ Tingbaot fiuja oltaem. Ebraham i tingbaot ol blesing we Jehova bambae i givim long hem long fiuja, mo hemia i givhan long hem blong stanap strong tru long ol trabol. Sista Audrey Hyde i traem blong gat gudfala tingting ya nating se faswan hasban blong hem, Nathan H. Knorr, i ded from kansa, mo seken hasban blong hem, Glenn Hyde, i kasem sik ya blong fogetem samting (Alzheimer). * Sista ya i talem se tok we Brata Knorr i talem long hem sam wik bifo we hem i ded, i givhan long hem. Hem i se: “Nathan i talem long mi se: ‘Nating se yumi ded, be yumi gat strong bilif se bae yumi laef bakegen, mo yumi neva safa bakegen.’ Biaen hem i leftemap tingting blong mi se: ‘Yu mas lukluk i go long fiuja, from we bae yu kasem pei blong yu long fiuja.’ . . . Hem i gohed i se: ‘Stap bisi oltaem—traem yusum laef blong yu blong givhan long ol narafala. Olsemia bae yu haremgud long laef blong yu.’” !Hemia wan gudfala advaes blong stap bisi blong givhan long ol narafala mo blong ‘glad from hop’!—Rom 12:12.

17. (1) ?Wanem ol gudfala risen blong tingbaot fiuja? (2) ?Olsem wanem Maeka 7:7 i save halpem yumi blong kasem blesing long fiuja?

¹⁷ Tede yumi gat plante moa risen blong tingbaot fiuja. Ol samting we oli stap hapen long wol, oli soemaot klia se yumi stap long en blong ol las dei blong wol ya. Klosap nao taon ya we i gat strong fandesen bambae i kontrolem fulwol, mo bambae yumi no moa nid blong wet. Bambae yumi haremgud long plante blesing, mo wan long olgeta hemia blong luk ol fren mo famle blong yumi oli laef bakegen. Long taem ya, Jehova bambae i givim pei long Ebraham from bilif mo longfala tingting blong hem, taem i mekem hem mo famle blong hem oli laef bakegen long wol ya. ?Bambae yu yu stap long taem ya blong welkamem olgeta? Yu save stap sipos yu mekem olsem Ebraham. Yu glad nomo blong mekem sakrefaes from Kingdom blong God, yu gat strong bilif nomata se yu fesem ol trabol, mo yu lanem blong gat longfala tingting mo wet long Jehova.—Ridim Maeka 7:7.