Taem wok blong prij i kam antap, ol brata mo sista oli nidim moa buk blong seremaot. Ol brata long Betel long Brooklyn oli stap printim ol magasin, mo oli stap yusum ol kampani blong wol blong printim ol buk we kava blong olgeta i strong. Be blong plante manis, kampani ya i no naf blong printim ol buk we ol brata mo sista oli nidim. Ale Brata Rutherford i askem long brata we i lukaot long faktri, Robert Martin, sipos oli naf blong printim ol buk.

Brata Martin i talem se: “Kwestin ya i mekem mi mi sek, from hemia i min se bambae mifala i setemap wan ful faktri we i gat evri masin blong printim ol buk.” Ale ol brata oli rentem wan bilding long 18 Concord Street long Brooklyn mo oli pem ol masin we oli nidim.

Samfala oli no glad long niufala plan ya. Presiden blong kampani we mifala i stap yusum blong printim ol buk, i kam visitim niufala faktri mo i talem se: “Yufala i gat wan nambawan faktri wetem ol gudfala masin blong printim ol buk, be i no gat wan long yufala we i save olsem wanem blong yusum. Long sikis manis, evri samting bambae oli nogud finis.”

Brata Martin i talem se: “Samting we hem i talem, maet i tru, be hem i fogetem Masta ya we i bin givhan long mifala finis long ol yia we i pas.” Brata Martin i talem tru. I no longtaem, niufala faktri ya i stap wokem 2,000 buk evri dei.

Antap long ol buk we ol man blong Jehova oli printim, oli stat blong yusum wan narafala rod blong talemaot gud nius, hemia tru long radio. Long Sande aftenun, 26 Februari 1922, Brata Rutherford i givim faswan tok long radio stesen KOG long Los Angeles, California, Yunaeted Stet, taetel blong tok ya se: “Plante Milian Man We Oli  Stap Laef Naoia, Bambae Oli No Save Ded Samtaem.”

Samwe long 25,000 man oli harem tok ya. Samfala oli raetem leta blong talem tangkiu. Wan long olgeta hemia Willard Ashford blong Santa Ana, California. Hem i talem se, hem i “laekem tumas tok ya we i pulum tingting” blong hem. Mo i gohed olsem: “Tri long mifala i sik, taswe sipos yu no bin mekem tok ya long radio, bambae mifala i no save kamaot long haos blong lesin long yu, nating se yu bin stanap long rod klosap nomo.”

Long ol wik biaen, oli mekem plante moa tok long radio. Long en blong 1922, Wajtaoa i talem se: “I gat bitim 300,000 man we oli bin harem gud nius tru long radio.”

Ol gudfala tok we ol man oli raetem, i leftemap tingting blong ol Baebol Studen, nao oli mekem desisen blong bildim wan radio stesen long Staten Aelan, we i no longwe long Betel long Brooklyn. Blong plante yia, ol Baebol Studen oli yusum stesen ya, WBBR, blong talemaot gud nius blong Kingdom.

Wajtaoa blong 15 Jun 1922, i talemaot se bambae i gat wan asembli long Cedar Point, Ohio, long 5 kasem 13 Septemba 1922. Ol Baebol Studen oli glad we oli glad.

Long faswan tok, Brata Rutherford i talem se: “Mi mi sua se Masta bambae i . . . blesem asembli ya mo i mekem se wok blong prij bambae i kam bigwan moa i bitim olgeta taem bifo.” Olgeta tok long asembli ya, oli pulum ol brata mo sista blong oli strong long wok blong prij.

Long Fraede 8 Septemba, samwe 8,000 man oli kam blong lesin long tok we Brata Rutherford bambae i mekem. Oli hop se bambae hem i eksplenem mining blong “ADV,” we i stap long fored blong ol invetesen. Taem oli sidaon, oli luk wan bigfala rol blong kaliko i stap antap long platfom. Arthur Claus we i bin kam long Tulsa, Oklahoma, Yunaeted Stet, i sidaon long wan jea we bambae hem i save harem evri samting. I no isi blong faenem wan jea olsem, from se long taem ya i no gat ol maekrofon mo laodspika.

 Blong mekem se i no gat man i distebem asembli ya, jeaman i talemaot se eni man we i kam let bambae i no moa save kam insaed long haos miting ya, afta we Brata Rutherford i statem tok blong hem. Long stat blong tok ya long 9:30 long moning, hem i talemaot ol tok blong Jisas long Matiu 4:17: “Kingdom blong heven i stap klosap.” (King James Version) Taem hem i tokbaot olsem wanem ol man bambae oli harem gud nius blong Kingdom, hem i se: “Jisas i talem se long ol las dei taem hem i stap, bambae hem i karem ol kakae long garen, i min se bambae hem i hivimap ol man we oli stret mo oli holemstrong long hem.”

Brata Claus we i stap sidaon insaed long haos miting ya, i talem se: “Mifala i stap lesin gud long evri wod we hem i talem.” Be wantaem nomo, hem i harem se hem i sik mo i mas aot long haos miting. Hem i no wantem aot from hem i save se bambae oli no letem hem i kambak insaed.

Sam minit biaen, hem i harem gud bakegen. Taem hem i stap wokbaot i kam klosap long haos miting, hem i harem ol man oli klapem han bigwan. !Faea blong hem i laet! Hem i no wantem mestem lashaf blong nambawan tok ya, nating se hem i mas klaem i go antap long ruf blong haos ya blong harem. Ale, Arthur we i gat 23 yia nomo, i faenem wan rod blong klaem i go antap long ruf. Ol windo antap oli open mo taem hem i kam klosap long olgeta, hem “i save harem evri samting.”

Be i no Arthur nomo we i stap antap long ruf. I gat sam fren blong hem tu i stap. Wan long olgeta, Frank Johnson, i ron i kam long hem mo i askem se: “?Yu yu gat wan smol sap naef?”

Arthur i talem se: “Yes, mi gat.”

Frank i talem se: “Yu yu ansa blong prea blong mifala. ?Yu yu luk bigfala rol blong kaliko ya? Hemia wan bigfala saen we mifala i fasem long ol nil.  Yu lesin gud long Jaj, * mo taem hem i talem se, ‘Yufala i mas talemaot, talemaot (advertise, advertise),’ yu katem fofala rop ya.”

Ale Arthur i holem naef, mo i wet wetem ol narafala blong katem ol rop blong saen ya. I no longtaem, Brata Rutherford i kasem haf blong tok ya we i impoten tumas. Strong tingting mo filing i pulum hem blong singaot se: “Yufala i mas ol trufala witnes we oli holemstrong long Masta. Gohed blong faet gogo kasem evri haf blong Babilon i lus. Talemaot gud nius long evri ples. Olgeta man long wol oli mas save se Jehova i God mo Jisas Kraes i King blong ol king mo Masta blong ol masta. Hemia wan taem long histri we i impoten tumas. !Yufala i luk, King i rul finis! Yufala i mas talemaot samting ya long evri man. !Talemaot, talemaot, talemaot, King ya mo Kingdom blong hem!”

Arthur i talem se hem mo ol narafala oli katem ol rop, nao bigfala saen ya i rol i kamdaon. Saen ya i soemaot mining blong ol leta ya “ADV,” taem i talem se: “Advertise (talemaot) King mo Kingdom.” “ADV” i wan sot rod blong talem Inglis tok ya “advertise,” we i minim “prij” o “givim witnes.”

Asembli ya long Cedar Point i givhan long plante brata blong putum tingting blong olgeta i stap strong long wok ya blong talemaot Kingdom, mo oli glad tumas blong prij. Wan colporteur (tede yumi talem se paenia) blong Oklahoma, Yunaeted Stet, i raetem se: “Mifala i prij long wan ples we ol man oli wok long maen mo oli pua tumas.” Plante “oli stat blong krae” taem oli harem gud nius we i stap long Golden Age magasin. Paenia ya i talem se: “Mifala i glad tumas blong kamfotem olgeta.”

Ol Baebol Studen ya oli save se ol tok blong Jisas long Luk 10:2 i impoten tumas, i se: “I gat plante kakae blong havestem, be ol man blong wok oli no plante.” Long en blong 1922, tingting blong olgeta i strong moa blong talemaot Kingdom long olgeta ples long wol.