1. ?Wanem tingting blong Jehova long ol man we oli gat tingting daon? Eksplenem.

JEHOVA i lavem ol man we oli gat tingting daon. Olgeta ya nomo oli save stap klosap long Jehova mo fren gud wetem hem. Be “hem i stap longwe long ol man we oli praod.” (Sam 138:6, NW) Yumi evriwan i wantem tumas blong mekem Jehova i glad mo kasem lav blong hem, hemia wan gudfala risen blong gat tingting daon.

2. ?Bambae yumi tokbaot wanem long stadi ya?

² Long stadi ya, bambae yumi faenem ansa blong trifala kwestin ya: (1) ?Wanem ya tingting daon? (2) ?From wanem yumi mas gat tingting daon? (3) ?Wanem i save traem tingting daon blong yumi? Bambae yumi luk se taem yumi gat tingting daon, yumi mekem Jehova i glad mo yumi mekem i gud long yumi bakegen.—Prov. 27:11; Aes. 48:17.

3. ?Wanem ya tingting daon?

³ Man we i gat tingting daon i no praod mo i no ting se hem i moa impoten i bitim ol narafala. Baebol i soemaot se man we i gat tingting daon i kasem save se Jehova i hae we i hae moa long hem, mo i luk ol narafala tu se oli hae moa. Man ya i kasem save se evri man i gat sam fasin we oli gud moa i bitim fasin blong hem.—Fil. 2:3, 4.

4-5. ?From wanem fasin we man i soemaot i no min se hem i gat tingting daon?

⁴ Taem wan man i kwaet mo i sem, yu save ting se hem i gat  tingting daon, be maet samting ya i no tru. Maet man ya i gruap long wan ples we ol man oli kaen mo oli soemaot respek, mo hem i lanem blong mekem olsem. Be long hat blong hem, maet hem i praod. Mo i no longtaem, bambae hem i soemaot samting ya.—Luk 6:45.

⁵ Taem wan man i no fraet mo i toktok stret, yu save ting se hem i praod. Be maet samting ya tu i no tru. (Jon 1:46, 47) Nating se i olsem, man ya i mas lukaot blong no trastem hem wan tumas. Maet fasin blong yumi wanwan i defdefren, be yumi evriwan i mas wok had blong gat tingting daon.

6. Olsem 1 Korin 15:10 i soemaot, ?yumi save lanem wanem long aposol Pol?

⁶ Traem tingbaot aposol Pol. Jehova i yusum hem blong stanemap ol niufala kongregesen long plante taon. Maet hem i go prij long moa ples i bitim ol narafala aposol. Be Pol i no leftemap hem wan olsem we hem i impoten moa long ol brata mo sista. Hem i talem wetem tingting daon se: “Mi mi daon moa long ol narafala aposol mo i no stret nating blong ol man oli singaot mi se aposol, from we fastaem, mi stap spolem kongregesen blong God.” (1 Kor. 15:9) Pol i gohed blong talem se kaen fasin blong Jehova nomo i mekem se hem i fren gud wetem Jehova, be i no from we hem i spesel o i mekem plante wok. (Ridim 1 Korin 15:10.) !Long leta we Pol i raetem long ol Kristin long Korin, hem i soemaot bigfala tingting daon, hem i no leftemap hem wan, nating se sam man long kongregesen ya oli stap daonem hem mo agensem hem!—2 Kor. 10:10.

7. ?Long taem blong yumi, olsem wanem wan brata we ol man oli save hem, i soemaot se hem i gat tingting daon?

⁷ Laef stori blong Brata Karl Klein, we i wan memba blong Hed Kampani bifo, i leftemap tingting blong plante man blong Jehova. Brata Klein i talem wetem tingting daon, se i gat  sam slak fasin mo problem we oli had blong winim long laef blong hem. Long ol yia 1920, i had blong hem i go prij long ol haos wanwan, mekem se hem i prij wan taem nomo, nao i no moa prij blong tu yia. Biaen, hem i wok long Betel, be taem wan brata i stretem hem, hem i stap kros longtaem. Mo tu, hem i kasem sik ya we tingting i foldaon olgeta, be biaen hem i kamgud. Nating se i gat ol problem ya, be hem i kasem plante blesing mo i mekem ol gudfala wok. !Tingbaot olsem wanem brata ya we ol man oli save hem, i mas gat tingting daon blong talemaot ol slak fasin blong hem olsem! Plante brata mo sista oli tingbaot Brata Klein yet mo gudfala laef stori blong hem. *

8. ?Olsem wanem 1 Pita 5:6 i soemaot se Jehova i glad long man we i gat tingting daon?

⁸ Bigfala risen blong gat tingting daon, hemia from we Jehova i glad long man we i gat fasin ya. Aposol Pita i soemaot samting ya i klia nomo. (Ridim 1 Pita 5:6.) Long saed blong tok blong Pita, buk ya Come Be My Follower * i talem se: “Flas tingting i olsem wan posen. Hem i denja tumas. Nating se wan man i waes gud mo i gat gudhan blong mekem plante wok, be sipos hem i flas, God i no save yusum hem. Be man we i gat tingting daon, Jehova i save yusum hem nating se hem i no naf blong mekem plante samting. . . . [Jehova] bambae . . . i glad long yu sipos yu gat tingting daon, mo bambae i blesem yu.” !I no gat wan samting we i moagud i bitim we yumi mekem Jehova i glad!—Prov. 23:15.

9. ?From wanem tingting daon i mekem se ol narafala oli glad blong joen wetem yumi?

⁹ Taem yumi gat tingting daon, yumi mekem Jehova i glad, mo antap long hemia, yumi mekem i gud long yumi bakegen. Ol man oli glad blong joen wetem yumi sipos yumi gat tingting daon. Blong kasem save long samting ya, traem tingbaot ol man we yu yu glad blong joen wetem olgeta. (Mat. 7:12) Ating yu no glad blong joen wetem ol man we oli wantem folem prapa tingting blong olgeta oltaem, mo oli no lesin long advaes blong narafala. Be yu harem gud blong joen wetem ol brata mo sista we oli gat fasin blong ‘safa wetem olgeta we oli safa, oli laekem yu tumas olsem we yumi brata nomo, oli gat bigfala sore mo tingting blong olgeta i stap daon.’ (1 Pita 3:8) Yumi glad blong joen wetem ol man olsem, mo olgeta tu bambae oli glad blong joen wetem yumi sipos yumi gat tingting daon.

10. ?Olsem wanem tingting daon i mekem laef i isi moa?

 ¹⁰ Mo tu, tingting daon i mekem laef blong yumi i isi moa. Yumi luksave se plante samting we i hapen long laef i no stret. Waes King Solomon i luksave samting ya tu, i se: “Plante taem, mi luk we ol slef oli stap wokbaot long hos, be ol haeman oli wokbaot long leg nomo, olsem we oli slef.” (Pri. 10:7) Plante taem, olgeta we oli gat gudhan blong mekem samting oli no kasem ona. Be samfala we oli no gat gudhan oli kasem bigfala ona. Nating se i olsem, Solomon i luksave se i gud yumi glad nomo long laef blong yumi, mo yumi no tingting tumas long ol nogud samting we oli hapen. (Pri. 6:9) Sipos yumi gat tingting daon, bambae i isi moa blong glad long laef blong yumi mo no tingbaot ol jenis we yumi wantem.

11. ?Yumi mas mekem wanem taem narafala i stretem yumi?

¹¹ Evri dei yumi gat plante janis blong soemaot tingting daon. Traem tingbaot sam janis we yumi gat. Taem narafala i stretem yumi. I gud yumi tingbaot se sipos narafala i tekem taem blong stretem yumi, ating yumi mekem wan mastik we i bigwan lelebet. Long taem olsem, maet yumi no wantem lesin long advaes. Maet yumi tok agensem man we i givim, o fasin blong hem blong givim. Be sipos yumi gat tingting daon, bambae yumi lesin long advaes.

12. Folem Ol Proveb 27:5, 6, ?from wanem yumi mas glad taem narafala i stretem yumi? Talem wan pijatok.

¹² Man we i gat tingting daon i glad blong kasem advaes. Traem tingbaot pijatok ya: Afta we yu storian wetem sam brata mo sista long miting, wan long olgeta i singaot yu, nao i talem long kwaet fasin se yu gat sam kakae i stap long fes blong yu. Ating yu sem, be yu glad tu se hem i talem. !Blong talem stret, maet yu ting se i gud sipos narafala i bin talem long yu finis! Long sem fasin, yumi mas glad long wan brata we i no fraet blong stretem yumi taem yumi nidim. Yumi tingbaot brata ya olsem fren blong yumi, i no enemi blong yumi.—Ridim Ol Proveb 27:5, 6; Gal. 4:16.

13. ?Olsem wanem yumi soemaot tingting daon taem narafala i kasem wan gudfala wok?

¹³ Taem narafala i kasem wan gudfala wok. Wan elda we nem blong hem Jeson, i talem se: “Taem mi luk we ol narafala oli kasem ol gudfala wok, mi stap tingbaot from wanem oli no jusum mi.” ?Yu tu yu harem olsem? I no rong blong “wantem tumas” ol gudfala wok long oganaesesen blong Jehova. (1 Tim. 3:1) Be  yumi mas lukaot gud, sipos no, sloslo tingting blong yumi i save go antap. Olsem nao, wan brata i save ting se hem nomo i naf blong mekem wan wok long kongregesen. O wan sista i save ting se: ‘!Hasban blong mi i save mekem wok ya i moa gud i bitim brata ya!’ Sipos yumi gat tingting daon, bambae yumi no praod olsem.

14. ?Fasin we Moses i mekem taem ol narafala oli kasem gudfala wok, i tijim yumi long wanem?

¹⁴ I gud yumi tingbaot fasin blong Moses. Moses i tinghae long wok blong hem blong lidim nesen blong Isrel. Be taem Jehova i letem sam narafala oli wok wetem Moses, ?Moses i mekem wanem? Hem i no jalus. (Nam. 11:24-29) Moses i gat tingting daon, nao i letem olgeta oli givhan long hem blong mekem wok ya blong jajem ol man. (Eks. 18:13-24) Hemia i min se ol man Isrel oli no nid blong wet longtaem blong wan i jajem bisnes blong olgeta. Moses i tingbaot ol narafala fastaem, i bitim hae posisen we hem i gat. !Hem i wan gudfala eksampol long yumi! Yumi no mas fogetem se sipos yumi wantem we Jehova i yusum yumi, i moa impoten we yumi gat tingting daon i bitim we yumi gat gudhan long wan wok. ‘Nating se Jehova i hae tumas, hem i stap lukaot gud long ol man we tingting blong olgeta i stap daon.’—Sam 138:6.

15. ?Wanem jenis i kamaot long laef blong plante brata mo sista?

¹⁵ Taem i gat wan jenis long laef blong yumi. Long ol yia we oli jes pas, sam jenis i kamaot long laef blong plante brata mo sista we oli mekem wok blong Jehova longtaem finis. Long yia 2014, i no moa gat ol distrik elda, ale oli askem long ol distrik elda mo waef blong olgeta blong oli mekem wan narafala wok. Long sem yia, oganaesesen i talem se taem ol eria elda oli gat 70 yia, bambae oli no moa mekem wok ya. Mo ol brata we oli gat 80 yia oli no moa mekem wok blong kodineta blong ol elda. Mo tu, oli askem long plante we oli wok  long Betel blong oli go mekem wok blong paenia long narafala ples. Sam narafala oli mas lego spesel wok we oli mekem fultaem from we oli sik, oli mas lukaot long wan famle blong olgeta, o from wan narafala trabol we i kasem olgeta.

16. ?Olsem wanem ol brata mo sista oli soemaot tingting daon taem i gat wan jenis long laef blong olgeta?

¹⁶ I no isi blong ol brata mo sista ya oli mekem ol jenis ya. Oli laekem tumas wok we oli mekem, mo samfala oli bin mekem wok ya plante yia finis. Taswe, oli harem nogud taem oli no moa mekem. Be sloslo, oli lan long jenis ya. ?From wanem? Fas samting se oli lavem Jehova. Oli tingbaot se oli givim laef blong olgeta i go long Jehova, be i no long wan wok, posisen, o ples. (Kol. 3:23) Oli glad blong mekem enikaen wok blong Jehova long eniples. Oli ‘lego ol wari blong olgeta long hem,’ from we oli save se hem i lavem olgeta.—1 Pita 5:6, 7.

17. ?From wanem yumi glad tumas se Tok blong God i pulum yumi blong gat tingting daon?

¹⁷ Yumi glad tumas se Tok blong God i pulum yumi blong gat tingting daon. Taem yumi traehad blong gat gudfala fasin ya, yumi mekem i gud long yumi mo long ol narafala tu. Yumi naf blong stanap strong taem yumi fesem ol problem. Samting we i moa impoten, se yumi kam klosap moa long Papa blong yumi long heven. !Yumi harem gud tumas blong save se nating we Jehova i ‘hae we i hae,’ be hem i lavem ol man blong hem we oli gat tingting daon mo i tinghae long olgeta!—Aes. 57:15.