1. ?From wanem yumi mas stap aninit long Jehova?

YUMI mas stap aninit * long Jehova from we hem nao i wokem yumi, taswe hem i gat raet blong talem samting we yumi mas mekem. (Rev. 4:11) Be i gat wan narafala impoten risen blong stap aninit long hem, hemia from we rul blong hem i beswan. Longtaem finis i kam, sam man oli rul antap long ol narafala man. Taem yumi skelem rul blong olgeta wetem rul blong Jehova, yumi luk se Jehova i rul long fasin we i waes moa, i gat lav mo sore, mo i fogivim man.—Eks. 34:6; Rom 16:27; 1 Jon 4:8.

2. Folem Hibrus 12:9-11, ?from wanem yumi mas stap aninit long Jehova?

² Jehova i wantem se yumi stap aninit long hem, i no from we yumi fraet nomo blong mekem hem i harem nogud, be from we hem i Papa blong yumi mo i lavem yumi. Long leta we Pol i raetem long ol Hibru Kristin, hem i talem se yumi mas “rere moa blong stap aninit” long Papa blong yumi, from we hem i stap trenem yumi “blong mekem i gud long yumi.”—Ridim Hibrus 12:9-11.

3. (1) ?Olsem wanem yumi stap aninit long Jehova? (2) ?Wanem ol kwestin we bambae yumi ansarem?

³ Yumi stap aninit long Jehova taem yumi traehad blong obei long hem long evri samting, mo yumi no folem prapa tingting blong yumi. (Prov. 3:5) I isi moa blong obei long Jehova taem yumi save moa ol nambawan fasin blong hem. ?From wanem? From we hem i soemaot ol fasin ya long evri  samting we hem i mekem. (Sam 145:9) Taem yumi kasem save moa long Jehova, yumi lavem hem moa. Mo taem yumi lavem Jehova, yumi no nidim wan longfala lis blong ol rul blong talem samting we yumi mas mekem mo samting we yumi no mas mekem. Yumi traehad blong laekem ol gudfala fasin mo agensem ol nogud fasin, olsem Jehova. (Sam 97:10) ?Be from wanem samtaem i had blong obei long Jehova? ?Olsem wanem eksampol blong distrikejen Nehemaea i save tijim ol elda? ?Olsem wanem eksampol blong King Deved i save tijim ol papa? ?Mo olsem wanem eksampol blong Meri, mama blong Jisas, i save tijim ol mama? Stadi ya bambae i ansarem ol kwestin ya.

4-5. Folem Rom 7:21-23, ?from wanem samtaem i had blong obei long Jehova?

⁴ Samtaem i had blong obei long Jehova from we yumi sinman, taswe samtaem yumi stronghed. Taem Adam mo Iv i kakae frut we God i putum tabu long hem, tufala i mekem prapa desisen blong tufala long samting we i stret mo samting we i no stret. (Jen. 3:22) Sem mak tede, plante man oli no wantem obei long Jehova, be oli wantem mekem prapa desisen blong olgeta long samting we i stret mo samting we i no stret.

⁵ Yumi tu, we yumi save Jehova mo yumi lavem hem, samtaem i had blong yumi obei long hem long evri samting. Aposol Pol tu i luk se i had. (Ridim Rom 7:21-23.) Olsem Pol, yumi wantem mekem samting we i stret long fes blong Jehova. Be oltaem yumi mas faet agensem tingting we i pulum yumi blong mekem samting we i no stret.

6-7. ?Wanem narafala risen from wanem i had blong obei long Jehova? Talem wan stori.

⁶ Wan narafala risen from wanem i had blong obei long Jehova, hemia from kalja we yumi gruap long hem. Tingting blong plante man i agensem samting we Jehova i wantem, mo yumi mas faet agensem ol tingting ya we oli save pulum yumi. Bambae yumi tokbaot wan long olgeta.

⁷ Long sam ples, ol man oli fosem ol yangfala blong yusum laef blong olgeta blong ronem mane. Wan sista we nem blong hem Meri * i fesem samting ya. Bifo we hem i kasem save long Jehova, hem i skulgud long wan nambawan yunivesiti long kantri blong hem. Famle blong Meri i stap fosem hem blong kasem wan gudfala wok mo winim plante mane. Meri tu i wantem samting ya. Be taem hem i kasem save long Jehova mo i lavem hem, hem i no moa wantem. Nating se i olsem, hem i talem se: “Samtaem mi gat janis blong kasem wan wok we i givim plante mane, be mi save se bambae i spolem program blong mi blong wosipim Jehova. Be from kalja we mi gruap long hem, i had yet blong mi talem ‘no.’ Mi mas askem long Jehova wetem fulhat blong mi, blong i halpem mi blong talem ‘no’ long wok we i save blokem mi long wok blong hem.”—Mat. 6:24.

8. ?Bambae yumi tokbaot wanem?

⁸ Taem yumi obei long Jehova, yumi mekem i gud long yumi bakegen. Be taem ol elda, ol papa, mo ol mama oli obei long God, oli save mekem i gud tu long olgeta we oli stap aninit long olgeta. Naoia bambae yumi tokbaot samfala long Baebol, we oli save tijim yumi long fasin we yumi mas mekem long olgeta we oli stap aninit long yumi.

9. ?Wanem sam problem we Nehemaea i mas stretem?

⁹ Jehova i givim impoten wok long ol elda blong oli lukaot long ol man blong hem. (1 Pita 5:2) I gud ol elda oli lanem samting  from fasin blong Nehemaea blong lukaot long ol man blong Jehova. Nehemaea i distrikejen blong Juda, mo hem i stap lukaot long plante man. (Neh. 1:11; 2:7, 8; 5:14) Traem tingbaot sam problem we Nehemaea i fesem. Hem i faenemaot se ol man oli stap yusum tempol long fasin we i no stret, mo oli no stap sapotem ol Livaet, olsem Loa i talem. Mo tu, ol man Isrel oli no stap obei long loa blong Sabat dei, mo sam man oli maredem ol woman blong ol narafala nesen. Nehemaea i mas stretem ol trabol ya.—Neh. 13:4-30.

10. ?Nehemaea i mekem wanem fasin long ol man blong God?

¹⁰ Nehemaea i no mekem bigfala bos long ol man blong God mo fosem olgeta blong oli folem tingting blong hem. Be hem i prea wetem fulhat blong hem blong Jehova i lidim hem, mo i tijim ol man long Loa blong Jehova. (Neh. 1:4-10; 13:1-3) Mo tu, Nehemaea i gat tingting daon, i wok wetem ol brata blong hem, mo i givhan tu blong wokem bakegen stonwol blong Jerusalem.—Neh. 4:15.

11. Folem 1 Tesalonaeka 2:7, 8, ?ol elda oli mas mekem olsem wanem long ol brata mo sista?

¹¹ Maet ol elda oli no fesem sem problem olsem Nehemaea, be oli save folem fasin blong hem. Oli save wok had blong givhan long ol brata mo sista. Oli no mas kam flas from wok blong olgeta, be oli mas kaen long ol brata mo sista. (Ridim 1 Tesalonaeka 2:7, 8.) Lav mo tingting daon i mas pulum olgeta blong oli toktok kaen long ol narafala. Andru, we i wan elda plante yia finis, i talem se: “Mi mi luk se ol brata mo sista oli glad blong stap aninit long ol elda we oli kaen mo oli fren gud wetem olgeta. Ol fasin ya oli pulum ol brata mo sista blong oli wok gud wetem ol elda.” Toni, we hem tu i wan elda longtaem finis, i talem se: “Mi traem folem advaes blong Filipae 2:3 blong tingbaot ol narafala olsem we oli hae moa long mi. Hemia i givhan long mi blong mi no fosem ol narafala blong oli obei long mi.”

12. ?From wanem ol elda oli mas gat tingting daon?

¹² Ol elda oli mas gat tingting daon, olsem  Jehova. Nating se Jehova i King blong heven mo wol, be hem i “glad blong lukluk i kamdaon” blong ‘leftemap ol puaman mo tekemaot olgeta long ol trabol blong olgeta.’ (Sam 18:35; 113:6, 7) Blong talem stret, Jehova i no laekem nating ol man we oli stap flas mo oli leftemap olgeta.—Prov. 16:5.

13. ?From wanem ol elda oli mas ‘kontrolem tang blong olgeta’?

¹³ Ol elda we oli stap aninit long Jehova oli mas ‘kontrolem tang blong olgeta.’ Sipos no, oli save tok nogud long wan brata o sista we i no soemaot respek long olgeta. (Jem. 1:26; Gal. 5:14, 15) Andru we yumi tokbaot finis, i talem se: “Samtaem mi harem se mi wantem tok long wan brata o sista we mi ting se i no gat respek long mi. Be taem mi tingbaot ol gudfala man blong Jehova long Baebol, mi kasem save se i impoten blong gat tingting daon.” Ol elda oli soemaot se oli stap aninit long Jehova, taem oli toktok kaen mo soemaot lav long ol brata mo sista, mo long ol narafala elda tu.—Kol. 4:6.

14. ?Jehova i givim wanem wok long ol papa, mo hem i wantem se oli mekem wanem?

¹⁴ Jehova i givim wok long ol papa blong oli hed long famle, mo hem i wantem se oli tijim mo stretem ol pikinini blong olgeta. (1 Kor. 11:3; Efes. 6:4) Be oli mas tingbaot se oli stap aninit long Jehova, we hem i stamba blong famle. (Efes. 3:14, 15) Ol papa oli soemaot se oli stap aninit long Jehova taem oli yusum paoa blong olgeta long fasin we God i glad long hem. I gud oli stadi long laef blong King Deved mo lanem plante samting from.

15. ?Olsem wanem King Deved i soemaot wan gudfala eksampol long ol papa?

¹⁵ Jehova i putumap Deved i kam hed blong ful nesen blong Isrel, i no blong famle blong hem nomo. From we Deved i king, hem i gat bigfala paoa. Samtaem, hem i no yusum gud paoa blong hem mo i mekem sam bigfala mastik. (2 Saml. 11:14, 15) Be hem i soemaot se hem i stap aninit long Jehova taem hem i lesin long olgeta we oli stretem hem. Hem i talemaot evri samting we i stap long hat blong hem taem i prea long Jehova. (Sam 51:1-4) Mo tu, hem i lesin wetem tingting daon long ol gudfala advaes blong ol man mo ol woman tu. (1 Saml. 19:11, 12; 25:32, 33) Deved i lanem lesen from ol mastik blong hem, mo i putum wosip blong Jehova long fasples long laef blong hem.

16. ?Ol papa oli save lanem wanem samting long eksampol blong Deved?

¹⁶ Tingbaot sam samting we ol papa oli save lanem long eksampol blong King Deved. Yu we  yu papa, yu mas yusum gud paoa we Jehova i givim long yu. Yu mas luksave ol mastik blong yu, mo lesin long advaes blong Baebol we ol narafala oli givim. Sipos yu mekem olsem, famle blong yu bambae i luk se yu gat tingting daon nao bambae oli respektem yu. Taem yu prea wetem famle, yu mas talemaot evri samting long Jehova, mo letem famle i harem olsem wanem yu lukluk i go long hem. Mo tu, yu mas mekem wok blong Jehova i kam impoten moa long ol narafala samting long laef blong yu. (Dut. 6:6-9) Gudfala eksampol blong yu i olsem wan sas presen we yu save givim long famle blong yu.

17. ?Jehova i givim wanem wok long ol mama?

¹⁷ Jehova i givim wan impoten wok long ol mama, taem hem i mekem se ol pikinini oli stap aninit long olgeta. (Prov. 6:20) Taswe, samting we mama i talem mo mekem i save gat paoa long ol pikinini blong ful laef blong olgeta. (Prov. 22:6) Makem gud samting we ol mama oli save lanem long eksampol blong Meri, mama blong Jisas.

18-19. ?Ol mama oli save lanem wanem long eksampol blong Meri?

¹⁸ Meri i save gud ol tok blong Baebol. Hem i gat bigfala respek long Jehova mo i fren gud wetem hem. Hem i rere blong folem samting we Jehova i wantem, nating se i jenisim ful laef blong hem.—Luk 1:35-38, 46-55.

¹⁹ Yu we yu wan mama, ?olsem wanem yu save folem fasin blong Meri? Fas samting, yu gohed blong stadi Baebol yu wan mo prea long Jehova, blong fren gud wetem hem. Seken samting, yu rere blong mekem sam jenis long laef blong yu blong mekem Jehova i glad. Taem yu yu pikinini, maet papa mo mama blong yu i bin faerap oltaem mo tok nogud long yu. Nao taem yu kam bigwan, yu ting se i stret nomo blong mekem sem mak long ol pikinini blong yu. Nating se yu kasem save long ol rul blong Jehova, be ating i had yet blong stap kwaet mo gat longfala tingting long ol pikinini blong yu, speseli taem yu yu taed mo oli no wantem obei long yu. (Efes. 4:31) Long taem olsem, i impoten moa we yu prea long Jehova blong i halpem yu. Wan mama we nem blong hem Lidia, i se: “Samtaem, mi mas prea wetem fulhat blong mi, blong mi no faerap long boe blong mi taem hem i no obei. Taem mi stap toktok, samtaem mi mas stop mo prea long tingting blong mi blong askem help blong Jehova. Prea i mekem tingting blong mi i kam kwaet.”—Sam 37:5.

20. ?Wanem i had long sam mama, mo olsem wanem blong winim?

²⁰ I had blong sam mama oli soemaot lav long ol pikinini blong olgeta. (Taet. 2:3, 4)  Maet oli gruap long wan famle we papa mo mama i no soemaot lav long olgeta. Sipos i olsem long yu, yu no nid blong mekem semfala mastik. Wan mama we i obei long Jehova i save lanem blong soemaot lav long ol pikinini blong hem. Maet i had blong hem i jenisim tingting, filing, mo ol aksen blong hem. Be hem i naf blong mekem, mo sipos hem i jenis, bambae hem mo famle blong hem i glad moa.

21-22. Folem Aesea 65:13, 14, ?wanem blesing we yumi kasem taem yumi stap aninit long Jehova?

²¹ King Deved i save ol blesing we man i kasem taem hem i obei long Jehova. Hem i raetem se: “Ol loa we hem i stap tijim yumi long hem oli stret, mo olgeta we oli stap obei long ol loa ya, oli stap harem gud. Ol tok we hem i putum oli stret gud, mo oli stap givim save long yumi. Hae God . . . yu stap givim pei long mi, from we mi stap obei long olgeta.” (Sam 19:8, 11) Tede, yumi luksave olsem wanem olgeta we oli stap aninit long Jehova oli defren long olgeta we oli no wantem lesin long advaes blong hem. Olgeta we oli stap aninit long hem “oli hapi, we oli stap singsing from.”—Ridim Aesea 65:13, 14.

²² Taem ol elda, ol papa, mo ol mama oli stap aninit long Jehova, laef blong olgeta i kamgud moa, famle blong olgeta i hapi, mo ful kongregesen i joen gud. Samting we i impoten moa, oli mekem Jehova i glad. (Prov. 27:11) !I no gat wan blesing we i moa gud!