1. ?Wanem gudfala fasin fren we ol gudfala man oli save gat wetem Jehova?

INSAED long famle blong Jehova, i gat Jisas we i “fasbon blong olgeta samting we God i mekem,” mo plante milian enjel. (Kol. 1:15; Sam 103:20) Taem Jisas i stap long wol, hem i soemaot se ol gudfala man tu oli save singaot Jehova olsem Papa blong olgeta. Taem Jisas i stap toktok long ol disaepol blong hem, hem i tokbaot Jehova se hem “Papa blong mi we hem i Papa blong yufala tu.” (Jon 20:17) Taem yumi givim laef blong yumi long Jehova mo yumi baptaes, yumi kam pat blong wan bigfala famle blong ol brata mo sista we oli gat lav.—Mak 10:29, 30.

2. ?Bambae yumi tokbaot wanem long stadi ya?

² Samfala oli faenem i had blong tingbaot Jehova olsem wan Papa we i gat lav. Sam narafala oli no save olsem wanem blong soemaot lav long ol brata mo sista. Long stadi ya bambae yumi tokbaot olsem wanem Jisas i halpem yumi blong luk Jehova olsem wan papa we i gat lav, mo yumi save kam klosap long hem. Mo tu bambae yumi luk olsem wanem yumi save folem fasin blong Jehova blong mekem i gud long ol brata mo sista.

3. ?Olsem wanem prea ya we Jisas i tijim long ol aposol i pulum yumi kam klosap long Jehova?

³ Jehova i wan Papa we i gat lav. Jisas i wantem se yumi gat sem tingting olsem hem, hemia blong tingbaot Jehova olsem wan papa we i kaen, i gat lav, mo i isi blong kam klosap long hem, be i no olsem wan papa we i no kaen mo i stap givim oda nomo. Yumi luksave samting ya long prea we Jisas i tijim long ol aposol blong hem. Hem i statem prea ya wetem toktok ya se: “Papa blong mifala.” (Mat. 6:9) Jisas i save talem long yumi blong singaot Jehova se “God Ya We i Gat Olgeta Paoa,” “God  Ya We i Wokem” olgeta samting, o “King blong olwe,” olsem we oli stap long Baebol, be nogat. (Jen. 49:25; Aes. 40:28; 1 Tim. 1:17) Hem i talem long yumi blong singaot Jehova se, “Papa.”

4. ?Olsem wanem yumi save se Jehova i wantem we yumi kam klosap long hem?

⁴ ?Yu yu faenem i had blong tingbaot Jehova olsem wan Papa we i gat lav? Sam long yumi oli olsem. Sipos yumi gruap long wan famle we perens blong yumi i no kaen, maet bambae i had blong kasem save se Jehova i lavem yumi. Be yumi glad blong save se Jehova i kasemsave long filing blong yumi. Hem i wantem stap klosap long yumi. From samting ya Baebol i talem se: “Yufala i mas kam klosap long God, nao hem bambae i kam klosap long yufala.” (Jem. 4:8) Jehova i lavem yumi mo i talem se bambae hem i kam olsem beswan Papa blong yumi.

5. Folem Luk 10:22, ?olsem wanem Jisas i halpem yumi blong kam klosap moa long Jehova?

⁵ Jisas i save halpem yumi blong kam klosap moa long Jehova. Jisas i save gud Jehova mo i folem gud ol fasin blong hem, taswe hem i save talem se: “Man we i luk mi, hem i luk Papa tu.” (Jon 14:9) Jisas i olsem wan bigfala brata we i tijim yumi olsem wanem blong respektem mo obei long Papa blong yumi, olsem wanem blong no mekem hem i harem nogud, mo olsem wanem blong mekem hem i glad. Be long ful laef blong Jisas long wol ya, hem i soemaot se Jehova i kaen mo i lavem man. (Ridim Luk 10:22.) Naoia bambae yumi tokbaot sam eksampol.

6. Talem sam eksampol we i soemaot se Jehova i lesin long Jisas.

⁶ Jehova i lesin long ol pikinini blong hem. Traem tingbaot olsem wanem Jehova i lesin long fasbon Boe blong hem. I sua se Jehova i harem ol prea blong Boe blong hem taem i stap long wol. (Luk 5:16) Hem i lesin taem Jisas i prea from ol impoten desisen, olsem blong jusum ol 12 aposol blong hem. (Luk 6:12, 13) Mo tu, Jehova i lesin taem Jisas i prea from i wari bitim mak. Jes bifo we Judas i salem hem, Jisas i prea strong long Papa blong hem from hadtaem ya we bambae hem i fesem. Jehova i  no lesin nomo long ol prea blong Jisas, be hem i sanem wan enjel tu i kam blong mekem Boe blong hem i kam strong bakegen.—Luk 22:41-44.

7. ?Yumi harem olsem wanem taem yumi save se Jehova i stap lesin long ol prea blong yumi?

⁷ Tede Jehova i gohed blong lesin long prea blong ol man blong hem, mo i ansa long olgeta long taem we i stret mo long rod we hem i luk se i stret. (Sam 116:1, 2) Traem tingbaot wan sista long India we i luk olsem wanem Jehova i ansa long ol prea blong hem. Hem i gat sik ya we i stap wari bitim mak, mo hem i prea strong long Jehova long saed blong samting ya. Hem i talem se: “Program blong JW Brodkasting^® blong Mei 2019 we i tokbaot olsem wanem blong dil wetem fasin ya blong wari bitim mak, i kam long stret taem we mi nidim. Mo hemia i olsem ansa blong ol prea blong mi.”

8. ?Jehova i soemaot olsem wanem se hem i lavem Jisas?

⁸ Jehova i lavem yumi mo i kea long yumi olsem we hem i lavem Jisas mo i kea gud long hem, taem hem i stap mekem wok blong hem long wol ya. (Jon 5:20) Hem i givim ol samting we Jisas i nidim long saed blong spirit, filing, mo bodi. Mo Jehova i talemaot long Boe blong hem se hem i lavem hem mo i glad long hem. (Mat. 3:16, 17) Jisas i save se Papa blong hem long heven we i lavem hem bambae i stap oltaem wetem hem, taswe hem i neva harem se hem i stap hem wan.—Jon 8:16.

9. ?Wanem i pruvum se Jehova i lavem yumi?

⁹ Olsem Jisas, yumi evriwan i luksave se Jehova i lavem yumi. Traem tingbaot, Jehova i pulum yumi i kam long hem, mo hem i givim ol brata mo sista we oli save mekem yumi harem gud, mo enkarejem yumi taem yumi harem nogud. (Jon 6:44) Mo tu, Jehova i givim evri samting we yumi nidim blong mekem bilif blong yumi i strong. Antap long hemia, hem i givhan long yumi tu blong kasem ol samting we yumi nidim long laef. (Mat. 6:31, 32) Taem yumi tingbaot ol samting we Jehova i mekem blong soem lav long yumi, hemia i mekem yumi lavem hem moa.

10. ?Yumi save lanem wanem long fasin blong Jehova blong mekem i gud long ol brata mo sista?

¹⁰ Jehova i lavem ol brata mo sista blong yumi. Be samtaem maet i no isi blong yumi wantem soemaot lav long ol brata sista, from we kalja mo bakgraon blong yumi i defdefren. Mo from we yumi mestem samtaem, yumi save mekem narafala i harem nogud o i kros. Be yet, yumi save traehad blong mekem lav we yumi gat long ol brata sista i kam strong. ?Olsem wanem blong mekem? Hemia blong folem fasin blong Papa blong yumi blong soemaot lav long ol brata sista. (Efes. 5:1, 2; 1 Jon 4:19) Naoia bambae yumi luk samting we yumi save lanem from eksampol blong Jehova.

11. ?Olsem wanem Jisas i folem fasin blong Jehova blong gat “bigfala sore”?

¹¹ Jehova i gat “bigfala sore.” (Luk 1:78) Man we i gat sore, hem i harem nogud taem i luk we narafala i stap safa, mo i lukaot rod blong halpem hem mo mekem hem i harem gud. Fasin we Jisas i mekem long ol man i soemaot se hem i gat sore olsem Jehova. (Jon 5:19) Taem Jisas i luk wan bigfala hip blong ol man, “hem i sore tumas long olgeta, from we ol narafala oli stap spolem olgeta mo oli no lukaot long olgeta, oli olsem ol sipsip we i no gat man blong lukaot long olgeta.” (Mat. 9:36) Jisas i gat sore, be i no hemia nomo, hem i mekem samting tu blong givhan long olgeta. Hem i hilim sikman, mo i halpem olgeta we oli stap ‘hadwok tumas mo oli stap karem ol hevi samting.’—Mat. 11:28-30; 14:14.

12. ?Olsem wanem yumi save soemaot sore long ol brata sista? Talem wan eksampol.

 ¹² Blong soemaot sore long ol brata mo sista, fastaem yumi mas save gud ol trabol we oli stap fesem. Eksampol, maet wan sista i gat wan bigfala sik mo hem i neva tokbaot, be bambae hem i glad tumas sipos samfala oli givhan long hem. ?Olsem wanem? ?Hem i naf blong givim ol samting we famle blong hem i nidim? ?Yumi save go givhan long hem blong kuk o klinim haos blong hem? Maet wan brata i lusum wok blong hem. ?Yumi save givim smol mane long hem olsem wan presen, we yumi no talemaot se yumi nao i givim, jes blong halpem hem go kasem we hem i faenem wan narafala wok?

13-14. ?Olsem wanem yumi save folem fasin blong Jehova we i glad nomo blong givim samting?

¹³ Jehova i glad nomo blong givim samting. (Mat. 5:45) Yumi no mas wet se ol brata mo sista oli kam askem help long yumi bifo we yumi soem sore long olgeta. Olsem Jehova, yumi mas faswan blong tekem aksen. Jehova i mekem se evri dei san i kamaot, nating se yumi no askem. Mo yumi evriwan i harem gud long san ya, i no olgeta ya nomo we oli stap talem tangkiu from. !I klia se ol samting we Jehova i stap givim long yumi, i soemaot se hem i lavem yumi! Mo hemia i mekem se yumi lavem Jehova tumas, from we hem i kaen mo i glad nomo blong givim samting.

¹⁴ Plante brata mo sista oli folem fasin blong Jehova, mo oli glad nomo blong givim samting long ol narafala. Eksampol, long 2013, Super Typhoon Haiyan i mekem bigfala damej long Filipin. Plante brata mo sista oli lusum haos mo olting blong olgeta. Be ol brata mo sista raon long wol oli kwik blong givhan long olgeta. !Plante oli givim mane o oli givhan blong fiksimap o bildim bakegen samwe 750 haos long sam manis nomo! Long taem blong COVID-19 pandemik, ol Witnes blong Jehova oli wok had blong sapotem ol brata mo sista blong olgeta. Taem yumi kwik blong sapotem ol brata mo sista, yumi soemaot se yumi lavem olgeta.

15-16. Folem Luk 6:36, ?yumi save mekem wanem blong folem fasin blong Papa blong yumi?

¹⁵ Jehova i gat sore mo i fogivim man. (Ridim Luk 6:36.) Evri dei Papa blong yumi long heven i gat sore mo i stap fogivim yumi. (Sam 103:10-14) Ol man blong Jisas oli sinman, be  yet hem i gat sore long olgeta mo i stap fogivim olgeta. Antap moa hem i rere blong givim laef blong hem blong God i save fogivim yumi. (1 Jon 2:1, 2) Fasin blong Jehova mo Jisas blong gat sore mo fogivim yumi, i pulum yumi blong kam klosap long tufala.

¹⁶ Lav we yumi gat long ol brata mo sista i save kam strong, taem yumi “fofogivim” yumi. (Efes. 4:32) I tru, i no isi oltaem blong fogivim narafala, taswe yumi mas traehad. Wan sista i talem se Wajtaoa Stadi ya “Yu Mas Rere Blong Fogivim Narafala,” i givhan long hem blong mekem olsem. * Hem i talem se: “Atikol ya i mekem mi kasem save se fasin blong fogivim ol narafala i save halpem mi. Atikol ya i eksplenem se taem yu fogivim narafala, hemia i no min se yu tingbaot rong ya se i stret nomo o se i no save spolem yu. Be fogif i min se yu fogetem nogud samting we hem i mekem mo yu gat pis long tingting.” Taem yumi rere blong fogivim ol brata mo sista, yumi soemaot se yumi lavem olgeta mo yumi stap folem fasin blong Papa blong yumi Jehova.

17. Folem Matiu 5:16, ?olsem wanem yumi save soemaot se yumi ona long Papa blong yumi long heven?

¹⁷ Yumi glad tumas blong gat wan bigfala famle blong ol brata mo sista raon long fulwol we oli lavlavem olgeta. Yumi wantem tumas se plante moa man oli gat janis blong kam joen wetem yumi blong wosipim God blong yumi. From samting ya, yumi neva wantem mekem wan nogud samting we i save pulum ol man blong tingting nogud long Jehova mo ol man blong hem. Be yumi wantem soemaot ol gudfala fasin we i save pulum ol man blong oli lesin long gud nius.—Ridim Matiu 5:16.

18. ?Wanem i save halpem yumi blong gat strong tingting blong prij?

¹⁸ Maet i save hapen se sam man oli tok nogud long yumi o mekem i nogud long yumi from we yumi obei long Papa blong yumi long heven. ?Yumi save mekem wanem sipos yumi fraet blong tokbaot bilif blong yumi long ol narafala? Yumi save trastem se Jehova mo Boe blong hem bambae tufala i halpem yumi. Jisas i talem long ol disaepol se oli no mas wari se  bambae oli talem wanem o olsem wanem blong talem. ?From wanem? Jisas i eksplenem se: “Stret long taem ya, bambae yufala i kasem tok we bambae yufala i talem. From we bambae i no yufala nomo i toktok, be tabu spirit blong Papa blong yufala bambae i givim tok long yufala blong yufala i talemaot.”—Mat. 10:19, 20.

19. Tokbaot eksampol blong wan man we i gat strong tingting blong prij.

¹⁹ Traem tingbaot eksampol blong Robert. Sam yia bifo, taem hem i jes stat blong stadi Baebol we hem i no gat plante save yet, hem pas long kot from hem i no wantem joen long ami blong Saot Afrika. Hem i gat strong tingting blong eksplenem long kot se hem i no wantem joen long ami, from we hem i lavem ol kristin brata sista blong hem. !Hem i glad tumas blong kam pat blong famle blong yumi long saed blong spirit! Be wantaem nomo jaj i askem long hem se: “?Hu ya ol brata blong yu?” Robert i no ekspektem kwestin ya, be kwiktaem nomo hem i tingbaot vas blong dei blong dei ya. Hemia Matiu 12:50: “Man we i mekem wil blong Papa blong mi long heven, hem nao i brata mo sista mo mama blong mi.” Nating se Robert i wan Baebol stadi nomo long taem ya, be spirit blong Jehova i halpem hem blong ansa long kwestin ya mo sam narafala kwestin bakegen we hem i no ekspektem. !I sua se Jehova i glad tumas long Robert! Mo i sua se Jehova i praod long yumi tu, taem yumi dipen long hem blong i givim strong tingting blong yumi save givim witnes long wan taem we i had.

20. ?Yumi mas gat strong tingting blong mekem wanem? (Jon 17:11, 15)

²⁰ Yumi glad tumas blong stap long wan famle long saed blong spirit we oli lavlavem olgeta. Yumi gat wan beswan Papa mo plante brata mo sista we oli lavem yumi. Yumi no mas ting nating long samting ya. Setan mo ol man blong hem oli traem mekem yumi no sua sipos Jehova i lavem yumi, mo oli traem blong spolem fasin joen gud we yumi gat. Be Jisas i prea long bihaf blong yumi, i askem Jehova blong i lukaotgud mo mekem yumi joen gud oltaem. (Ridim Jon 17:11, 15.) Jehova i stap ansa long prea ya. Olsem Jisas, yumi neva mas gat tu tingting long saed blong lav mo sapot we Jehova i stap givim long yumi. Taswe i gud yumi gohed blong kam klosap moa long famle blong yumi long saed blong spirit.