Jehova i talem long profet Esikel se, bambae ol man blong hem oli gobak bakegen long Promes Lan mo bambae oli joen gud bakegen olsem wan neson. Profet tok ya i talem tu se, long ol las dei ol man blong Jehova bambae oli joen gud blong wosipim hem.

Jehova i talem long profet Esikel blong raet long tu stik. Hem i talem long profet blong i raetem long wan stik se: ‘Blong ol man Juda,’ mo blong raetem long nara stik se, ‘[“blong Josef, stik blong Efrem,” NW] mo ol man Isrel.’ Tufala stik ya i mas kam “olsem wan stik nomo” long han blong Esikel.—Esikel 37:15-17.

 ?Tok ya “Efrem” long vas ya i minim wanem? Laen blong Efrem i gat moa paoa bitim ol narafala laen long ol ten laen long kingdom blong not. Fas king we i rul long kingdom ya, hem i Jeroboam, we i kamaot long laen blong Efrem. (Dutronome 33:13, 17; 1 King 11:26) Laen ya i kamaot long Efrem, we hem i pikinini blong Josef. (Namba 1:32, 33) Jekob i givim wan spesel blesing long pikinini blong hem, Josef. Taswe, i stret nomo we “stik blong Efrem” i pija blong ol ten laen long kingdom blong not. Bifo we Esikel i talemaot profet tok ya, long yia 740 bifo Kraes, ol man Asiria oli winim ol ten laen blong Isrel mo oli tekem olgeta oli go kalabus. (2 King 17:6) Plante yia biaen, ol man Babilon oli winim ol man Asiria. Taswe, taem Esikel i raetem profet tok blong tufala stik ya, bighaf blong ol man Isrel oli stap olbaot long ol ples we Babilon i rul long hem.

Long yia 607 bifo Kraes, ol man Babilon oli winim tufala laen long kingdom blong Juda mo oli tekem olgeta oli go kalabus. Mo tu, maet oli tekem ol narafala man Isrel we oli stap yet long kingdom blong not. Ol king we oli rul long kingdom blong saot oli kamaot long laen blong Juda. Ol pris tu oli stap long Juda from we oli wok long haos tempol long Jerusalem. (2 Kronikel 11:13, 14; 34:30) Taswe, i stret nomo blong talem se stik ‘blong Juda’ i pija blong tufala laen long kingdom blong saot.

?Wetaem tufala stik ya i joen i kam wan nomo? Hemia long yia 537 bifo Kraes, taem ol man blong kingdom blong not mo kingdom blong saot oli gobak long Jerusalem blong wokem gud haos tempol bakegen. Naoia, neson blong Isrel i no moa seraot, oli joen gud bakegen blong wosipim Jehova. (Esikel 37:21, 22) Profet Aesea mo Jeremaea tu, i bin tokbaot taem ya we ol man Isrel bambae oli joen gud bakegen.—Aesea 11:12, 13; Jeremaea 31:1, 6, 31.

?Esikel i talemaot wanem profet tok long saed blong tru wosip? Hem i talem se Jehova bambae i mekem se ol man we oli wosipim hem oli kam ‘wan nomo.’ (Esikel 37:18, 19) ?Olsem wanem? ?Profet tok ya i kamtru long taem blong yumi? Yes. Profet tok ya i stat blong kamtru long yia 1919. Bifo long taem ya, Setan i traehad blong mekem se ol man blong God oli no moa joen gud. Be long yia 1919, sloslo Jehova i mekem ol man blong hem oli wok tugeta, mo oli joen gud bakegen.

Long taem ya, plante man blong God oli gat hop blong kam ol king mo pris wetem Jisas long heven. (Revelesen 20:6) Olgeta ya oli olsem stik blong Juda. Be olgeta we oli gat hop blong laef olwe long wol ya, oli smol nomo. Mo taem ol yia oli pas, namba blong olgeta i stap kam antap. (Sekaraea 8:23) Olgeta ya oli olsem stik blong Josef.

Tede, tufala grup ya oli wosipim Jehova tugeta. Mo oli gat wan King nomo hemia Jisas Kraes. Profet tok blong Esikel i tokbaot Jisas se hem i olsem ‘King Deved, man ya blong wok blong God.’ (Esikel 37:24, 25) Jisas i prea long Papa blong hem from ol man blong hem se: “Mi mi prea, blong olgeta evriwan oli save stap wan nomo. Papa. Laef blong yu i joen gud long laef blong mi, mo laef blong mi i joen gud long laef blong yu.” * (Jon 17:20, 21) Mo tu, Jisas i talem se smol grup blong ol tabu Kristin bambae “oli kam wan kampani nomo” wetem “ol narafala sipsip.” Olgeta evriwan bambae oli “gat wan man nomo blong lukaot long olgeta.” (Jon 10:16) Tede, ol man blong God oli joen gud olsem we Jisas i bin talem, nating se oli gat hop blong laef olwe long heven, no long wol ya.