Yu fogetem nogud samting we narafala i mekem long yu, mo yu blokem filing blong kros we i save kamaot. Taem yu fogivim narafala, hemia i no min se yu mas tingbaot rong blong hem olsem we i smol nomo, o yu mas mekem olsem se i neva hapen.

RUL BLONG BAEBOL: “Yufala i no mas hareap blong kros long yufala, mo yufala i mas glad blong fofogivim yufala nating sipos wan long yufala i gat poen agens long narawan.”—Kolosi 3:13.

“Taem yu lavem wan woman, yu no luk mastik blong hem, be yu luk olsem wanem hem i stap traehad blong kamgud moa.”—Eron.

Taem yu holemtaet kros, hemia i save spolem helt mo filing blong yu, mo i save mekem trabol insaed long mared.

“Wan taem hasban blong mi i talem sore from wan samting we i mekem mi mi harem nogud tumas. I had blong mi fogivim hem. Afta we sam taem i pas mi fogivim hem, be naoia mi rigret se mi no mekem hareap, from we trabol ya i mekem se mitufala i no fren gud.”—Julia.

JEKEM YU WAN

Sipos yu harem nogud long samting we hasban o waef blong yu i talem o mekem, tingbaot se:

• ‘?Mi mi hareap tumas blong kros?’

• ‘?Hem i mekem wan nogud samting we hem i mas talem sore from, o mi save fogetem nomo?’

YUTUFALA I TOKBAOT

• ?I tekem hamas taem blong mitufala i fofogivim mitufala?

• ?Mitufala i save mekem wanem blong mitufala i fofogivim mitufala kwiktaem?

TRAEM HEMIA

• Taem yu harem nogud long hasban o waef blong yu, yu no mas ting se hem i minim nomo blong spolem yu.

• Sipos yu tingbaot se “yumi evriwan i mekem mastik plante taem,” bambae yu no kwik blong blemem hasban o waef blong yu.—Jemes 3:2.

“I isi blong fogif taem mitufala tugeta i rong, be i had taem wan nomo i rong. Blong fogivim narawan, yu mas gat tingting daon.”—Kimbely.

RUL BLONG BAEBOL: “Yu mas go kwiktaem . . . blong yutufala i stretem trabol.”—Matiu 5:25.