OLGETA WE OLI MARED
1: Wokhad Blong Holem Promes
?I MINIM WANEM?
Olgeta we oli wok had blong holem promes blong mared, oli tingbaot mared olsem wan samting we i blong olwe, mo hemia i mekem se oli harem gud long mared blong olgeta. Hasban i trastem waef se bambae hem i no brekem mared taem tufala i fesem trabol, mo waef tu i trastem hasban.
Samtaem, tufala we i mared i stap tugeta nomo from we tufala i fraet se, sipos tufala i seraot, ol famle mo fren bambae oli no glad. Be i moa gud sipos lav mo respek i pusum tufala blong holem promes blong mared.
RUL BLONG BAEBOL: “Hasban i no mas lego waef blong hem.”—1 Korin 7:11.
“Sipos yu wok had blong holem promes blong mared, yu no save kros kwik long hasban o waef blong yu. Be yu kwik blong fogivim hem mo talem sore. Yu tingbaot problem olsem samting we yu mas winim be i no samting blong brekem mared.”—Maeka.
?FROM WANEM I IMPOTEN?
Taem i gat wan problem, ol man mo woman we oli no wok had blong holem promes blong mared, oli talem se: ‘Mitufala i no stret long mitufala.’ Nao tufala i lukaot wan rod blong brekem mared.
“Plante man mo woman we oli jes mared oli gat tingting finis, se sipos oli no hapi, bambae oli divos nomo. Be olgeta we oli gat tingting ya, oli no wok had blong holem promes blong olgeta.”—Jin.
?YU SAVE MEKEM WANEM?
JEKEM YU WAN
Taem yutufala i stap rao . . .
-
?Yu harem se i moa gud sipos yu bin maredem wan narafala?
-
?Yu stap drim long narafala man o woman?
-
?Yu stap talem se, “Bae mi lego yu” o “Bae mi faenem wan narafala we i glad long mi”?
Sipos yu ansa ‘yes,’ i gud yu wok had moa blong holem promes blong yu.
YUTUFALA I TOKBAOT
-
?Mitufala i wok had yet blong holem promes blong mared? Sipos no, ?from wanem?
-
?Mitufala i save mekem wanem, blong wok had moa blong holem promes blong mitufala?
TRAEM HEMIA
-
Raetem wan smol not blong talem ol gudfala toktok long man o woman blong yu
-
Putum foto blong hem long tebol blong yu long wok, blong soemaot se yu tinghevi long mared blong yu
-
Ring o sanem teks mesej long hem taem yu stap long wok o long wan narafala ples
RUL BLONG BAEBOL: “Samting we God i joenem, man i no mas seraotem.”—Matiu 19:6.
