OL PAPA MO MAMA
6: Stretem Pikinini
?I MINIM WANEM?
Tok ya “stretem” i save minim lidim o tijim. Samtaem, yu mas stretem pikinini from wan nogud samting we hem i mekem. Be sipos yu tijim hem fastaem long ol gudfala fasin, plante taem hem i naf blong jusum stret rod.
?FROM WANEM I IMPOTEN?
Long taem blong yumi, plante papa mo mama oli no stretem pikinini blong olgeta, from we oli fraet se bambae oli daonem hem tumas. Be ol papa mo mama we oli waes, oli putum ol rul we oli no strong tumas, mo oli tijim pikinini blong i folem.
“Evri pikinini i nidim sam rul blong folem. Olsem nao, bambae hem i gat ol gudfala fasin taem i kam bigwan. Sipos papa mo mama i no stretem pikinini, bambae hem i olsem wan bot we i no gat stia, we i save lusum rod mo maet i kafsaed tu.—Pamela.
?YU SAVE MEKEM WANEM?
No jenisim ol rul oltaem. Sipos pikinini i no obei long ol rul, yu panisim hem. Be taem hem i obei, yu talem ol gudfala toktok long hem.
“Oltaem mi talem gudfala toktok long ol pikinini taem oli obei, from we i no gat plante pikinini tede we oli mekem olsem. Sipos yu talem ol gudfala toktok long olgeta, bambae oli glad moa blong lesin taem yu stretem olgeta.”—Kristina.
RUL BLONG BAEBOL: “Wanem sid we man i planem, be frut blong hem nomo, man ya bambae i kakae.”—Galesia 6:7.
No mekem i strong tumas long pikinini. Taem yu stretem pikinini, yu mas tingbaot yia mo save blong hem mo rong we hem i mekem. Klosap oltaem, gudfala frut i kamaot taem panis we yu givim i stret folem rong we hem i mekem. I min se, sipos hem i yusum mobaelfon long fasin we i no stret, maet i gud yu tekemaot mobaelfon blong hem blong smoltaem. Mo tu, i nogud yu mekem wan smol rong i kam wan bigfala samting.
“Mi traem kasem save sipos pikinini i minim nomo blong no obei, o sipos hem i jes mestem. Wan nogud fasin we hem i mas jenisim, i defren olgeta long wan smol mastik we hem i save stretem.”—Wendel.
RUL BLONG BAEBOL: “Yufala i no mas mekem pikinini i kros, from we sipos yufala i stap mekem olsem, tingting blong hem bambae i foldaon.”—Kolosi 3:21, futnot.
Soemaot lav. Taem pikinini i save se papa mo mama i stretem hem from we tufala i lavem hem, hem i glad moa blong lesin.
“Taem boe blong mitufala i mekem wan mastik, mitufala i talem long hem se mitufala i glad tumas we hem i mekem plante gudfala desisen finis. Mo sipos hem i stretem mastik ya, bambae i no spolem gudnem blong hem, mo tu, mitufala i stap blong givhan long hem.”—Daniel.
RUL BLONG BAEBOL: “Man we i gat lav, hem i gat longfala tingting mo i kaen.”—1 Korin 13:4.
Maet Yu Laekem Hemia Tu
WAJTAOA
?Olsem Wanem Blong Stretem Pikinini Blong Yu?
Baebol i tokbaot 3 fasin we i save mekem se pikinini i save glad long fasin stretem.
WEKAP!
?Olsem Wanem Blong Tijim Yangfala Blong i Obei Long Ol Rul?
Taem yu stretem wan man, yu tijim hem. Ol rul blong Baebol oli save givhan long yu blong tijim yangfala blong yu blong i obei, i bitim we hem i rebel.
