OLGETA WE OLI MARED
2: Wok Tugeta
?I MINIM WANEM?
Taem hasban mo waef i wok tugeta, tufala i olsem tu paelot long wan plen we tufala i folem sem plan. Taem tufala i fesem hadtaem, tufala i tingbaot se tufala tugeta i mas winim, be i no tufala wanwan.
RUL BLONG BAEBOL: “Tufala i no moa tu, be wan bodi nomo.”—Matiu 19:6.
“Mared i no blong wan man nomo. Hasban mo waef i mas wok tugeta blong gat wan hapi mared.”—Kristofa.
?FROM WANEM I IMPOTEN?
Taem wan problem i kamaot, hasban mo waef we i no wok tugeta, bambae tufala i agensem tufala i bitim we tufala tugeta i traem winim. Ol smosmol problem bambae oli kam ol bigfala problem we i had tumas blong winim.
“Impoten samting long wan gudfala mared, se tufala i mas wok tugeta. Sipos mi mo hasban blong mi i no wok tugeta, bambae i olsem we mitufala i serem wan rum nomo be mitufala i no mared. Mitufala i stap tugeta be mitufala i no gat wan tingting long ol impoten desisen.”—Aleksandra.
?YU SAVE MEKEM WANEM?
JEKEM YU WAN
-
?Mi mi ting se evri mane we mi winim i “blong mi nomo”?
-
?Mi mas aot smoltaem long hasban o waef blong mi, blong mi harem gud fulwan?
-
?Mi mi stap longwe long famle blong hasban o waef blong mi, nating se hem i laekem olgeta?
YUTUFALA I TOKBAOT
-
?Mitufala i wok gud tugeta long wanem?
-
?Mitufala i save kam gud moa long wanem?
-
?Mitufala i save mekem wanem blong harem gud blong wok tugeta?
TRAEM HEMIA
-
Tingbaot sipos yutufala i stap plei tenis, we yu stap long wan saed blong net, mo hasban o waef blong yu i stap long narasaed. Long mared, ?yutufala i save mekem wanem blong stap long sem saed nomo?
-
I moagud yu tingting se, ‘?Olsem wanem mitufala i save win?’ i bitim, ‘?Olsem wanem mi mi save win?
“Yu no tingbaot weswan long yutufala i rong. I moa impoten we yutufala i gat pis mo joen gud.”—Etan.
RUL BLONG BAEBOL: “Yufala i no mas tingbaot yufala nomo, be yufala i mas tingbaot ol narafala man tu.”—Filipae 2:3, 4.
