Fasin blong tinghae long yumi wan, i save pulum yumi blong no laekem narafala. Man olsem i save leftemap hem wan bitim mak. Hem i ting se hem i hae moa long narawan, mo i jajem ol narafala we oli defren long hem se oli daon moa. Eniman i save foldaon long trap ya. Wan buk (Encyclopædia BritannicaI) i talem se: “Bighaf blong ol grup [blong ol defdefren laen] oli ting se fasin blong laef blong olgeta, kakae, klos, kastom, bilif blong olgeta, mo ol nara samting olsem, i gud moa long hemia blong ol nara grup.” ?Olsem wanem yumi save blokem nogud tingting ya?

“Yufala i mas mekem tingting blong yufala i stap daon mo yufala i mas luk ol narafala man se oli hae moa long yufala.”—FILIPAE 2:3.

?I minim wanem? Blong yumi no tinghae long yumi wan bitim mak, yumi mas lanem blong gat tingting daon. Taem yumi gat tingting daon, bambae yumi luk se ol narafala oli gud moa long yumi long sam samting. I no gat wan grup blong man we i gat evri gudfala fasin mo i gat gudhan blong mekem evri samting.

 Tingbaot eksampol blong Stefan. Hem i gruap long wan Komunis kantri, be hem i winim filing ya blong no laekem ol man blong ol kantri we i no Komunis. Hem i talem se: “Mi bilif se taem yu luk narafala se i hae moa long yu, hemia i blokem yu blong no laekem narafala. Mi mi no save evri samting. Taswe mi save lanem samting long eniman.”

Traem gat stret tingting long saed blong yu wan, mo luksave se yu save mekem mastik. Mo yu mas luksave se ol narafala oli save mekem sam samting we i gud moa bitim yu. Yu no mas ting se evri man blong wan grup oli gat sem slak fasin.

Bitim we yu tingting nogud long wan man blong wan grup, i gud yu askem yu wan se:

• ‘?Fasin we mi no laekem long saed blong man ya, hem i rili nogud, o hem i jes defren long hemia blong mi?’

• ‘?Man ya i save faenem fol long mi?’

• ‘?Man ya i nafgud bitim mi long wanem samting?’

Sipos ansa blong yu i no giaman, yu save winim fasin ya, mo tu yu save faenemaot sam gudfala samting we i save pulum yu blong tinghae long man ya.