BAEBOL I TALEM SE: “Oltaem [God] i stap . . . givim ren long yufala mo i mekem ol frut oli givim kakae long stret taem blong olgeta, mo hem i stap givim kakae long yufala mo i stap mekem yufala i glad.”—Ol Wok 14:17.

HEMIA I MIN SE: Evri samting we yu haremgud long hem long wol ya, oli ol presen we i kam long Krieta. Taem yu faenemaot se Hem i kea long yu, bambae yu glad moa long ol presen ya.

BAEBOL I TALEM SE: “Bambae yu kasemsave wanem i stret mo i gud mo i stret long olgeta man, yes, bambae yu kasemsave olgeta rod blong ol samting we i gud.”—Ol Proveb 2:9.

HEMIA I MIN SE: God i wokem yu, taswe hem i save samting we yu nidim blong yu hapi. Taem yu ridim Baebol, yu save lanem plante samting we oli save givhan long yu.

BAEBOL I TALEM SE: “Bambae yu faenem save blong God.”—Ol Proveb 2:5.

HEMIA I MIN SE: Taem yu save we God i stap, samting ya i save halpem yu blong faenem ansa blong ol impoten kwestin, olsem: ?From wanem yumi laef? ?From wanem plante man i safa? ?Wanem i hapen long man we i ded? Yu save faenem ol stret ansa long Baebol.

BAEBOL I TALEM SE: “‘Mi mi save gud ol tingting we mi stap tingbaot blong mekem long yufala, hemia tingting blong givim pis, be i no trabol, blong givim wan fiuja mo wan hop long yufala,’ hemia nao tok blong Jehova.”—Jeremaea 29:11.

HEMIA I MIN SE: God i promes se long fiuja, bambae hem i finisim ol rabis fasin, fasin safa, mo ded. Taem yu trastem ol promes blong God, hop blong yu bambae i givim strong tingting long yu blong fesem ol problem blong laef.