?Olsem wanem? ?God i wokem yunives ya wetem ol laef samting long hem o yunives ya i jes kamaot olsem nomo? Ansa we tufala fisiksis ya i talem mo ol faswan tok long Baebol oli no sem mak. I gat sam man we oli sapotem wan tingting mo i gat sam we oli sapotem narafala tingting. Be plante man oli no sua. Plante toktok long pablik mo long sam buk, oli sapotem wan tingting mo agensem narawan.

Maet ol tija blong yu oli tijim se yunives wetem ol laef samting oli kamaot olsem nomo, i nogat wan Krieta. ?Be ol tija ya oli pruvum se i nogat Krieta? Mo tu, maet yu harem ol lida blong jos oli talem se i gat wan Krieta, ?be oli pruvum toktok blong olgeta o oli talem se yu mas “bilif” from we oli talem olsem?

Maet yu tu yu stap tingbaot kwestin ya, mo yu ting se i nogat man i save talem stret sipos i gat wan Krieta o nogat. Ating yu stap tingting tu se: ?I rili impoten blong save ansa blong kwestin ya?

Wekap! ya bambae i tokbaot sam pruf we i pulum plante man blong bilif se i gat wan Krieta. Afta bambae i tokbaot from wanem i impoten blong kasem ansa blong kwestin ya se: ?Olsem wanem laef i stat long wol?