?Hu i Naf Blong Save Wanem Bambae i Kamtru Long Fiuja?

“Mi nomo mi God. . . . Bifo olgeta, long stat blong olgeta samting, mi mi talemaot fastaem ol samting we biaen oli hapen. Bifo finis, mi mi talemaot ol samting we biaen oli kamtru.”—Aesea 46:9, 10.

LAEF blong ol man tede i olbaot. Taswe ol man blong stadi long saed blong politik, mane, mo laef blong man, oli lukluk gud long laef blong ol man bifo mo fasin blong ol man tede, from we oli wantem save wanem bambae i hapen long fiuja. Sam narafala oli wantem tumas blong save se laef blong olgeta bambae i olsem wanem long fiuja, ale oli go luk ol kleva mo ol man we oli traem faenemaot fiuja long ol sta. Be biaen, plante taem oli harem nogud long wanem we i kamtru. ?Olsem wanem? ?I no gat rod nating blong yumi save wanem bambae i hapen long wol ya, famle blong yumi, mo long yumi wanwan? ?Hu nao i save talemaot fiuja tru?

Long vas we yumi ridim antap, God ya we i gat Olgeta Paoa, Jeova, i talem long Aesea se Hem i naf blong talemaot samting we bambae i kamtru long fiuja. Tru long profet Aesea, God i bin talemaot se ol man Isrel bambae oli kam fri long Babilon mo se bambae oli gobak blong bildim bakegen Jerusalem wetem haos blong God. ?Olsem wanem profet tok ya i kamtru stret olsem we God i talemaot? Samwe long 200 yia bifo we Babilon i foldaon, profet Aesea i talemaot nem blong man ya we bambae i winim Babilon, hemia Sirus. Mo tu, Aesea i talemaot plan we bambae Sirus i folem blong winim Babilon, se bambae hem i jenisim rod blong Yufretes Reva, we i blokemgud taon ya Babilon. Aesea i talemaot tu se Sirus bambae i faenem se ol doa blong bigfala stonwol blong taon ya oli open i stap, mo samting ya bambae i mekem i isi long hem blong winim taon ya. Evri profet tok we Aesea i talem, oli kamtru.—Aesea 44:24–45:7.

Taem yumi skelem God wetem ol man, ol man oli no gat paoa blong lukluk i go long fiuja. Waes King Solomon i raetem se: “I nogud yu stap bigmaot long ol samting we bambae yu kasem tumora, from we yu no save ol samting we bambae i kamtru tede.” (Ol Proveb 27:1) Toktok ya i tru yet long taem blong yumi. I no gat wan man we i naf blong talemaot se fiuja blong hem bambae i olsem wanem. ?Wanem samting i mekem se God i defren long ol man? God i kasem save gud long evri samting we hem i wokem, wetem fasin blong man mo samting we man i wantem mekem. Taem God i wantem, hem i save lukluk i go long fiuja blong wanwan man mo neson, mo talemaot stret wanem samting we bambae oli mekem. Mo tu, hem i gat bigfala paoa blong lidim ol samting blong oli kamtru olsem we hem i wantem. Taem God i yusum ol profet blong hem blong talemaot ol samting we bambae oli kamtru, hem i mekem samting we ‘man blong wok blong hem i talemaot,’ mo hem i mekem we ‘ol plan blong hem we man i talemaot, i kamtru.’ (Aesea 44:26) Jeova God nomo i naf blong mekem samting we tok ya i talem.

Profet Aesea i laef bitim 700 yia bifo we Mesaea Jisas i kam long wol. Nating se i olsem, Aesea i talemaot profet tok se Mesaea bambae i kamtru. Be stat long ol yia 1700, ol man we oli stadi long ol buk blong Baebol, oli talem se buk blong Aesea i no tru. Oli talem se ol profet tok blong Aesea oli no ol trufala profet tok, be wan man we i laef afta long Aesea i bin raetemdaon ol tok ya afta we oli hapen. ?Olsem wanem? ?Tok blong olgeta i stret? Long  1947, ol man blong digim graon oli faenem wan kopi blong buk blong Aesea wetem sam narafala olfala hanraet, long wan hol blong ston klosap long Ded Si. Ol haeman we oli stadi long ol tok blong Baebol oli talem se kopi ya, oli bin wokem bitim wan handred yia bifo we Mesaea, no Kraes, hemia man we kopi ya i stap tokbaot, i bon. !I tru tumas, Baebol i talemaot fiuja!

Sipos Aesea mo ol narafala we oli bin raetem Baebol oli stanap long prapa waes blong olgeta nomo, oli no save talemaot ol samting we bambae oli kamtru long fiuja. Ol tok we olgeta oli “talem, be tabu spirit i stap givim tok [ya] long olgeta, nao oli talemaot tok we i kamaot long God.” (2 Pita 1:21) Long haf we i kam biaen, bambae yumi tokbaot sam samting long laef blong Jisas we profet Aesea i bin talemaot. Mo afta, bambae yumi tokbaot sam samting we Jisas mo ol disaepol blong hem oli talemaot se bambae oli kamtru long taem blong yumi mo long fiuja.