Kwestin Blong Olgeta We Oli Ridim Magasin Ya

?Ol Witnes Blong Jeova Oli Bilif Se Olgeta Nomo Bambae Oli Kasem Laef?

Ol Witnes blong Jeova oli bilif se oli faenem trufala skul finis. Sipos no, bambae oli jenisim bilif blong olgeta. Sem mak olsem ol memba blong ol narafala skul, ol Witnes blong Jeova oli tingting strong se bambae God i sevem olgeta. Nating se i olsem, oli bilif tu se i no bisnes blong olgeta blong jajem se hu bambae i kasem laef. God hem i Jaj. Hem nomo i save talemaot samting ya.—Aesea 33:22, NW.

Tok blong God i soemaot se olgeta we bambae God i sevem olgeta, oli no wantem nomo blong kasem laef, be oli mas folemgud Sevia blong olgeta tu. Blong soemaot poen ya, tingbaot wan man we i stap pulum fis long dip solwota longwe long aelan, nao bot blong hem i brok mo i stap draon. Hem i wantem tumas blong kamso. ?Bambae hem i ded, no bambae hem i laef? Samting ya bambae i dipen long fasin blong hem blong lesin long man we i wantem givhan long hem. Sipos hem i flas, maet hem i no lesin long man ya we i wantem givhan long hem, no we i wantem sevem hem. Be sipos hem i save mekem tingting blong hem i stap daon mo letem man ya i givhan long hem, bambae hem i kasem sef ples.

Long sem fasin, olgeta we bambae oli kasem laef, oli laef from we oli lesingud long Man blong Sevem olgeta, Jeova God. Rod ya blong sevem man i wan presen we God i givim, be i no olgeta man evriwan we bambae oli save kasem presen ya. Pikinini blong God i talem se: “I no olgeta man evriwan we oli stap singaot mi se ‘Masta, Masta’ we bambae oli save go insaed long niufala wol ya we God i king long hem. Man we i stap mekem ol samting we Papa blong mi long heven i wantem, hem nomo bambae i save go insaed.”—Matiu 7:21.

Ol Witnes blong Jeova oli bilif se God i save sevem ol man we oli bilif long ransom sakrefaes blong Jisas mo we oli folemgud ol tijing blong hem. (Ol Wok 4:10-12) Tingbaot tri impoten samting we Tok blong God i soemaot se yumi mas mekem blong yumi save kasem laef.

(1) Jisas i talem long ol fren blong hem se: “From we yufala i stap lavlavem yufala, bambae olgeta man oli luksave se yufala i man blong mi.” (Jon 13:35) Eksampol blong Jisas we i givim laef blong hem from ol narafala, i soemaot se lav i rili impoten. Olgeta we oli lavem narafala, oli stap soemaot we lav nao i wan impoten fasin we i save sevem olgeta.

(2) Jisas i prea long Papa blong hem se: “Mi mi stap talemaot nem blong yu long olgeta blong mekem olgeta oli save yu.” (Jon 17:6, NW) Jisas i save finis olsem wanem nem ya blong God, Jeova, i impoten long tingting blong Papa blong hem. Jisas i prea long Papa blong hem, blong hem i mekem we olgeta man oli ona long “tabu” nem blong hem. (Matiu 6:9) Ona long tabu nem blong God i minim se, yumi savegud nem ya mo luksave se nem ya i tabu mo i impoten. Olsem Jisas, olgeta we oli wantem se God i sevem olgeta, oli mas yusum nem ya blong God. Oli mas tijim narafala tu long nem ya mo ol fasin blong God. (Matiu 28:19, 20) Olgeta nomo we oli singaot long nem blong God, God bambae i sevem olgeta.—Rom 10:13.

(3) Jisas i talem long Ponjes Paelat se: “Kingdom blong mi i no blong wol ya.” (Jon 18:36, NW) Tede smol man nomo oli soemaot klia se oli trastem Kingdom blong God, gavman ya we Jisas i King long hem. Bighaf blong ol narafala man oli trastem ol ogenaesesen blong man. Defren olgeta, ol man we bambae oli kasem laef oli sapotem fulwan Kingdom blong God, mo oli tijim ol narafala olsem wanem Kingdom ya bambae i mekem ol man we oli stap tru long God oli kam fri.—Matiu 4:17.

Afta we ol disaepol blong Jisas oli lanem sam long ol samting we oli mas mekem blong kasem laef, oli talem se: “?Be hu nao bambae i save kasem laef?” Jisas i ansa se: “Samting we i strong tumas blong man i mekem, be God i save mekem.” (Luk 18:18-30) Ol Witnes blong Jeova oli traehad blong folemgud ol samting we oli mas mekem blong kasem laef. Mo oli wok had blong halpem ol narafala, blong olgeta tu oli save kasem laef.