Plante Man Oli Bilif Long Hel

“!Mi mi no save slip gud long naet from mi stap drim nogud se mi stap bon long hel! Mi drim se oli sakem mi mi go long wan ples blong faea, nao mi wekap we mi singaot strong. Mi talem stret long yufala, mi traehad bigwan blong no mekem sin.”—Arline.

?YU YU bilif se hel i wan ples we ol man blong mekem sin oli stap bon long hem? Plante man oli bilif olsem. Long 2005, wan tija long Yunivesiti blong St. Andrews long Skotlan, i talem se wan long evri tri lida blong jos long Skotlan, oli bilif se ol man we oli stap longwe long God, bambae oli safa long “tingting mo filing blong olgeta blong olwe long hel.” Wan long evri faef lida oli bilif se olgeta we oli stap long hel, oli stap safa long bodi blong olgeta.

Long plante kantri, fulap man oli bilif long hel. Long 2007, wan ripot we i kamaot long Yunaeted Stet i talem se klosap 70 pesen blong ol man oli bilif long hel. Long ol kantri tu we bighaf blong ol man oli no tinghae long ol jos, be oli bilif long hel. Long 2004, wan ripot i talem se 42 pesen blong ol man long Kanada oli bilif long hel. Mo 32 pesen blong ol man long Inglan oli sua se i gat hel.

Samting We Ol Lida Blong Jos Oli Tijim

Plante lida blong jos oli no moa tijim se hel i wan prapa ples blong harem nogud long faea. Defren olgeta, oli sapotem wan tijing we i klosap sem mak long hemia we i kamaot long buk ya Catechism of Catholic Church, we oli printim long 1994. Buk ya i talem se: “Panis blong hel i mekem se man i seraot long God blong olwe.”

Nating se i olsem, plante man oli bilif yet se hel i wan ples we man i harem nogud long tingting mo bodi blong hem. Olgeta we oli leftemap tijing ya oli talem se tijing ya i kamaot long Baebol. Albert Mohler, presiden blong skul blong Saot Baptis, we i stadi long ol defdefren bilif blong ol jos, i talemaot klia bilif blong hem se: “Baebol i tokbaot helfaea.”

?From Wanem Bilif We Yu Yu Gat Long Saed Ya i Rili Impoten?

Sipos hel i rili wan ples blong harem nogud, bambae yu mas fraet long hem. Be, sipos tijing ya i no tru, ol lida blong jos we oli tijim bilif ya, oli mekem ol man oli konfius mo oli fraet blong nating nomo. Mo oli spolem God tu.

?Tok blong God, Baebol, i talem wanem long saed ya? Bambae yumi yusum Baebol Long Bislama mo sam narafala Baebol long ol haf we i kam biaen blong ansa long trifala kwestin ya: (1) ?Wanem i rili hapen long wan man taem hem i ded? (2) ?Jisas i tijim wanem long saed blong hel? (3) ?Taem yu lanem trutok long saed blong hel, samting ya i mekem wanem long yu?